Mak 6

Mbə́ ton Yeso á Nazared

(Mat 13.53-58; Luk 4.16-30)

1Yeso noʼ asin wu iŋu ungɨŋ abey ma, mbə́ məŋə-anó ma ŋu ni uŋwən. 2A sə aney aku ba Jû, u ni ataʼa ba ungɨŋ ina bomo ba Jû. Ba nanaʼ mə awu zəw unó wu iyere. Anigə ibiri kwi anóm ŋunə num anó mbəŋ ujum aŋwayn? Wə num ukudu iwe uŋu aŋwayn? Mbən zən umugə u mə aghəy uyere unó nanaʼ! 3Ká uŋwən mə á komo na nə amə ŋwə̂ Mari? Aká amə unya anóm Jems nə Josef#6.3 Umbə tiya uŋwən ungɨŋ uŋwaʼanayn moʼ kwi Joses. nə Judas foro Sayimon? Aka unya ayey ma mə chomo akəŋ aboʼo inja? Mbə́ biri nigə iton uŋwən.

4 # Jon 4.44 Yeso ghayn abú úŋwən kwi, “ba mbə wumini wa ukən Nwiye usin ujum anigə cha umə wumini ma uŋwən ungɨŋ abey ma, akaʼa unebey ma foro ungɨŋ na ma.” 5Cha yə di aghəy ma ayere anó moʼ awu chigə akə mugə yə niŋi ubugə ma igun ba isɨgə moʼ izwey úŋwən. 6Wə chigə uŋwən umugə amə cha ibeni fiŋ abú úŋwən.

Yeso tom mbə məŋə-anó ma ighum cho bigə

Yeso mə gha iyeŋ ungɨŋ ubey mbənə mbə mə iyad iyad ni ataʼa ba. 7Amaʼazənə yə aghəy nigə, yə tiya mbə məŋə-anó ma ighum cho bigə asin feyn itom úŋwən isəg ubigə ubigə. Wə naʼ ikay abú úŋwən kwi ú chiyə uzugə iboŋ ungɨŋ ba. 8Wə ghayn abú úŋwən kwi, “Ka mbən num ngwen aghəy moʼ Amaʼazənə mbən mə ŋuw ichigə akə mbaŋ. Ka mbən num ngwen aghəy jəgi kə abam, kə abam ukab. 9Wə nibi ghayn kwi mbən zi utabay anigə ka mbən num ngwən ndwi bigə.” 10Wə nibi ghayn kwi, “Mbən bə nyi ungɨŋ na moʼ, mbən chomo ungɨŋ na wu pey amaʼazənə mbən mi noʼ ungɨŋ asin wu.” 11#Ifa 13.51Abə́ mə kwi cha udi num ma ngwen asin moʼ, kə kwi cha u di zəw ma anó zənə mbən mə ghayn, mbən koro imbuy zənə imə umbən ughəw Amaʼazənə mbən mə duw asin wu. Zigə ayi mə anwini abú úŋwən kwi mbə ton ukən uchuŋ.

12Amaʼazənə yə tom úŋwən nigə, mbə du ŋu ni ghayn kwi ba ujum beŋe fiŋ uma i waʼ unó iboŋ. 13#Jem 5.14Mbə́ chi uzugə iboŋ nanaʼ. Mbə́ zoʼ ba sɨgə nanaʼ akə ungəd olif i zwey úŋwən.

Inji zənə Jon ŋunə yə mə naʼa une yə ku

(Mat 14.1-12; Luk 9.7-9)

14 # Mat 16.14; Mak 8.28; Luk 9.19 Ufon Herod zəw unó mbəŋ ujum damugə ukum Yeso si saŋa usin ujum. Ba moʼ mə ghayn kwi, “Jon ŋunə yə́ mə́ naʼa une si zəmə iwu amə aton zənə umə ni ikay ighəy uyere unó mbəŋ.”

15Umoʼ ni ghayn kwi, “uŋwən mə Elayija.” Uchini ghayn kwi, “Uŋwen mə wa ukən Nwiye moʼ akaʼa mbənə mbə́ sí chigə imbey.”

16Amaʼazənə Herod zəw anó zəŋ, yə ghayn kwi, “Jon ŋunə mə səg atəw ma si zəmə iwu.” 17#Luk 3.19, 20Herod mə kono nigə damugə yə cha usogwi u ŋu ibiya Jon kod iŋu zi ana ndəŋ da Herodiyas. Herodiyas mə uyey Filip nu amə unya anóm Herod. Anigə Herod nam uŋwən. 18Umugə yə́ nam nigə, Jon mə́ ghayn abú Herod kwi, “Cha noʼo di beni ma kwi ngwə nam uyey ngwə unya anóm.” 19Zəŋ ghəy kwi Herodiyas yimə Jon ungɨŋ fiŋ anigə ni kaba inji izwere uŋwən. Asɨmə amə cha aza ighəy nigə. 20Herod mə goro ma Jon damugə yə kyayn kwi Jon mə wa zayn zayn. Foro kwi, u yə aghəy unó ni ukəʼərə. Anigə, yə mə nəmə uŋwən kwi ka anó moʼ aghəy ma nə uŋwən. Ka nə yə mə zəw unó mbənə Jon mə ghayn fiŋ ma ni toboro uŋwən, yə wuʼ imə zəw.

21Apan du abú Herodiyas aney zənə Herod mə́ kaʼa aney ibə́ anigə itiya ba kyayn abú ukara, itiya utəw kyayn abú usogwi nibi tiya ba kyayn mbənə umə Galeli. 22Amaʼazənə mbə́ mə́ jəgə, ukwere Herodiyas nyi ni binə. Anigə ighəy fiŋ herod ni fiŋ ba mbənə yə tiya iboŋ. Anigə ufon ghayn abú akwere wu kwi, “biri aghəy zənə ngwə mə kaba a yi naʼ inigə.” 23Wə kaʼ akwere wu nigə məʼe ma ghayn kwi, “Ayi naʼ aghəy zənə ngwə mi ibiri iniŋ kaba inyi aba abey feyn.”

24Amaʼazənə yə ghayn nigə, akwere wu du ŋu biri abú ingwo ma kwi, “I biri ngiya?” Wə ywiri kwi, “Biri atəw Jon ŋunə umə naʼa une.”

25Akwere wu nod aba ighari wu iŋu ghayn abú ufon kwi, “Ayə kaba kwi ngwə naʼa atəw Jon ŋunə umə naʼa une iniŋ akinine igun abára akaŋ.”

26Ufon wu kənə azəd. Asɨmə umugə yə si kaʼ imeʼe ma foro umugə ba mbənə yə tiya mbə́ mə́ awu izəw, amə cha inji abú uŋwən iton. 27Aba ighari wu, ufon wu cha sogwi ma ŋunə umə nəmə uŋwən kwi u ŋuw səg atəw Jon zaʼa nə aŋwən. Sogwi wu ŋu ana indəŋ isəg atəw Jon. 28Wə zaʼa nə aŋwayn igun abára akaŋ pey yi naʼ abú akwere wu. Wə num ŋu naʼ abú ingwo ma. 29Amaʼazənə mbə məŋə-anó Jon zəw anó zəŋ, mbə́ ŋu num atin inyo ma ŋu itwayn ungɨŋ ikəb.

Yeso jiy ichuʼ anóm itɨŋ

(Mat 14.13-21; Luk 9.10-17; Jon 6.1-14)

30Ba-tom wene zaʼa usin mbənə Yeso tom úŋwən awu. Mbə́ wene zaʼa nigə ŋu fere iyad Yeso. Mbə ghayn unó ujum mbənə mbə aghəy nibi ghayn unó ujum mbənə mbə ataʼa ba. 31Wə ghayn abú úŋwən kwi, “Mbən zaʼa mba ŋuw asin moʼ aba umba umba izwere pipi.” Wə ghayn nigə damugə ba nanaʼ mə zaʼa nə iŋuw anigə amə cha apan abú úŋwən izwere kə apan abú úŋwən ijəg. 32Anigə mbə́ nyi abaŋ ugwi iŋu asin ni cha ba mə chomo awu aba uma uma. 33Ba nanaʼ zən Amaʼazənə mbə́ mə́ ŋuw anigə mbə kyayn kwi amə úŋwən. Anigə ba du ungɨŋ usin ujum nod pey asin zənə Yeso nə mbə məŋə-anó ma mə́ ŋuw awu ki úŋwən sə ŋu pey. 34#Mat 9.36Amaʼazənə Yeso du ungɨŋ abaŋ ugwi, yə zən ikwiy ba. Akənə sugi ungɨŋ fiŋ ma da ba wu damugə, mbə chomo ni injəg tənə cha anəmə injəg aboʼo iŋwen. Wə aghəy nigə ti ki taʼa úŋwən akə unó nanaʼ. 35Amaʼazənə injaʼ mə sə chigə, mbə məŋə-anó ma ŋu abú uŋwən pey yi ghayn abú uŋwən kwi amaʼ si chigə azəd anigə cha ba mə́ chomo akəŋ. 36Ghayn abú ba mbəŋ kwi uni ŋuw boʼo umi ŋu ungɨŋ ubey foro ungɨŋ usin mbənə umə iyad iyad i zon aghəy moʼ ijəg.

37Amaʼazənə mbə́ ghayn nigə, Yeso ywiri abú úŋwən kwi, “Mbən naʼa aghəy moʼ abú úŋwən u jəg.” Mbə biri abú uŋwən kwi, “Mba waʼa ŋu zon ingəŋ akə akɨ ichuʼ bigə zaʼa naʼ abú úŋwən?”

38Wə biri abú úŋwən kwi, “Ubimi ingəŋ səʼe umə inen? Mbən ŋu iney.” Mbə́ ŋu iney iŋu ghayn abú uŋwən kwi, “Mba zən ubimi ingəŋ itɨŋ nə isu nigə.”

39Yeso ghayn abú úŋwən kwi mbən aghəy ba chomo igun ufəʼ akə ikwiyi ikwiyi. 40Anigə, ba chomo akə ikwiyi ikwiyi. Mbə chomo ungɨŋ ikwiyi moʼ ukɨ ukɨ nibi chomo ungɨŋ ikwiyi chini ighumi itɨŋ ighumi itɨŋ. 41Amaʼazənə mbə́ chomo nigə, Yeso num ubimi ingəŋ wu itɨŋ nə su bigə wu ineŋ azobo zi aborobod wu ibɨʼiri inaʼ abú mbə məŋə-anó ma kwi ughaba abú ba wu ujum yə nibi ghaba isu wu abú úŋwən uma ujum. 42Úŋwen uma ujum jəg ikod. 43Mbə məŋə-anó wu were ikəg tənə tə́ buʼe akə ingəŋ foro akə isu wu, tə́ sugi ungɨŋ usəŋ ighum cho bigə. 44Amə́ anóm ichuʼ itɨŋ mbə́ jəgə ubimi ingəŋ wu.

Yeso yeŋ igun animini

(Mat 14.22-33; Jon 6.15-21)

45Amaʼazənə mbə́ si mara, Yeso ghayn abú mbə məŋə-anó ma kwi u nyi ungɨŋ abaŋ ugwi kwenə dey ŋu Betsayida anjin animini zi. A chá ikwiy ba wu unuʼ ki sə zaʼa 46Amaʼazənə yə sí naʼana abú úŋwən, yə koʼ iŋu igun ugum ichaʼara Nwiye 47injaʼ chig ni abaŋ ugwi wu mə ungɨŋ ugha animini. Yeso mə asaŋ ma zeʼe 48yə zən kwi mbə məŋə-anó ma umbə zəw ingəʼ numugə mbə́ mə́ ifiyə abaŋ ugwi wu iŋuw damugə afim mə́ zaʼa aba ifigi ma. Amaʼazənə isəg mə sə ŋu kiʼi, yə ŋu kuw uŋwən. Yə́ mə́ yeŋ ŋuw igun une. Yə́ mə́ yeŋ iŋu chigə iyad ma 49asɨmə Amaʼazənə mbə məŋə-anó zən uŋwən u mə iyeŋ igun une wu, mbə́ kono kwi amə uzəg afəb. Mbə zən nigə ikyayn akə ikay. 50Úŋwen uma ujum a gəd Amaʼazənə mbə zən uŋwən anigə yə ghayn abú úŋwən aba ighari wu kwi, “Mbən yimə fiŋ amə umugə. Mbən mə goro ngwen.” 51Wə ghayn nigə inyi abaŋ ugwi wu aboʼo úŋwən afim wu sobo. Wə aghəy mbə məŋə bó wu yere kwaʼa akə ingəʼ 52mbə yere damugə cha utəw ma di si zayn umugə Yeso jəy ikwiy ba akə ubimi ingəŋ itɨŋ. Cha mbə́ zayn damugə fiŋ ma tu.

Yeso zwey ba isɨgə á Genesared

(Mat 14.34-36)

53Amaʼazənə Yeso ni mbə məŋə-anó ma kwenə animini wu, mbə ŋu yi təm á Genesared. Anigə itiŋe abaŋ ugwi awu 54Amaʼazənə mbə duw ungɨŋ abaŋ ugwi wu, ba zən Yeso kyay aba ighari wu kwi amə uŋwən 55anigə ba nod ighab uba ubey ujum anigə i num ba sɨgə igun ubaʼa uma iŋu abú Yeso usin mbənə mbə́ zəw kwi u yə awu. 56Usin ujum mbənə Yeso ŋu awu, usin kukuŋe foro usin kyayn kə ungɨŋ usin mbənə umə iyad iyad, ba mə́ num ə ba isɨgə ŋuw isey asin iyuŋ i boʼ ubugə abú uŋwən kwi u sayn ba isɨgə wu bira kaba iyad ndwi ma. Ba ujum mbənə mbə́ bira ndwi ma mbə́ boro.

Currently Selected:

Mak 6: NGI

Highlight

Copy