Mata 13

Ma hay maɗəva da yaŋ Wunam ta bay

(Mar 4.1; Luk 8.4)

1Ta pəsaŋga ana ŋgesey, Yesu ka daɓa da way ana kad a vəda, ke dey, ka njah da ma te təker mazlakava te Gelile. 2Ndana hay gaa ec ke kwesek vaw kad cak tata. Mafay ana, ke tep kad pa kaslkaslah da yaŋ yam ana, ka njah pa. Ndana hay gaa mazlaca da ma ta yam ana.

Nda makwakwaca hulefey

(Mar 4.2-9; Luk 8.5-8)

3Yesu ke gweɗec ava ma maɗəva, gege: «Nda te mehəv ɓa ke dey, ka ta kwakwac hulef de ley. 4Dapa masa a kwakwaciya sə, hulef hay ŋgeɗey ece kwi kad pa ma te cəvey, ɗiyak hay da baymaləvaŋ ece dey, aca pala avəda fakwanay. 5Hulef hay ŋgeɗey, ece kwi kad fa ɗəsa pa slam masa wuyak da yaŋ ana gaa aabay. Hulefey ana, ec ke pəcec zef, afa wuyak da yaŋ ana gaa aabay. 6Amaa, daha pas a tay sə, e ɓətec avəda, ece kuleceŋ, afa slaslalay ana dapa veɗ gaa aabay. 7Hulef hay ŋgeɗey, ece kwi kad pa taɓa ta mətak hay. Mətak ana hay, ece gəley, ece ŋgeŋgəɗecec avəda. 8Mekele hay, ece kwi kad pa slam mambəla ana, ece hey wudiya ana hay gaa. Hulef amta sə, e hey temere, leŋgeɗ kwakwar makwa, leŋgeɗ saya kwakwar mahkar. 9A lada nda masa aŋga ava zləmay ɓa sə, da cəna.»

Megweɗ ava ma hay maɗəva sə, mafay te mey?

(Mar 4.10-12; Luk 8.9-10)

10Ndah masasəraka jene ac ka ŋgucafa vaw, ac ka nəkafa, gege: «Ke gweɗec ava ma hay maɗəva sə, mafay te mey?» 11Yesu ke vehecen, gege: Ye gweɗec ava ma hay maɗəva sə, afa takwar sə, akwar ava macəyaŋ ta masəna jene hay maraɓa da yaŋ Wunam ta bay da baymaləvaŋ hay. Amaa ta ndah ana nesey sə, ac ava macəyaŋ ta masəniya aabay, 12afa kad nda masa jene tata ɓa sə, aca vana, a da ŋgat jene hay gaa mafəna ana. Amaa ta nda masa jene tata aabay sə, kwa mekusetke ana tata ŋgesey, aca kəsan avəda. 13Mawala mafay te mey ye gweɗec ava ma hay maɗəva, afa ece njerey, amaa ece wele ndey bay. Aca cak zləmay, amaa aca cəna bay, kwa macəna ma da yaŋ ana sə, aca cəna aabay. 14Ara nesey, jeŋ ana ka ŋgata ara masa Izay, nda mehwedek ma te gweɗey:

Akwar ta cak zləmay mambəla ana, amaa akwar ta cəna aabay,

akwar te pə ndey mambəla ana, amaa akwar ta wala aabay,

15afa rav ta ndah ana nesey, a cəna jene bay.

Ac ka dəzla zləmay tec hay avəda,

ac ka ɓəzla ndey tec hay avəda,

afa aca ra wala jene eve ndey tec bay,

aca ra cəna ava zləmay tec bay,

aca ra cəna eve leŋgesl tec bay,

afa ac ta ŋgwada rav teceŋ

ye de mbəlec avəda bay.

16Amaa takwar sə, mapəsma ɓa kad ndey takwar hay, afa ece wele ndey va zləmay takwar hay may, afa aca cəna. 17Ya gwaɗakwar, ndah mehwedek ma hay gaa va ndah maŋga mezlər ara aŋga ana gaa ac ka wal mawala jeŋ ana eve ndey teceŋ, amaa ac ka wala aabay. Ac ka wal macəna jə masa akwar dapa macəna, amaa ac ka cəna aabay.

Mapan ma da yaŋ nda makwakwaca hulefey

(Mar 4.13-20; Luk 8.11-15)

18«Macəna mapan ma maɗəva da yaŋ nda makwakwaca hulefey. 19Daha ndana a cəna ma da yaŋ Wunam ta bay da baymaləvaŋ, amaa a cəna ma da yaŋ ana bay sə, afa nda suwe te dekey, ta kəsan ma masləka dapa rav tata. Nda ana ŋgesey, aŋga ara hulef masa aŋga te kezl a ma te cəvey. 20Hulef masa e kezl kad pa slam ɗəsa sə, ŋgesey nda macəna ma ta Zlavay, aca kəsiya zef zef eve mewesley. 21Amaa aŋga ava slaslalay aabay, afa a kəsiya sə, ta manjah kusetke war. Pas masa marga va mayah ma hay te dekey mafay ta ma ta Zlavay sə, a təɗata. 22Hulef masa e kezl kad pa mətak hay sə, ŋgesey aŋga ara nda macəna ma ta Zlavay, amaa mawulak yaŋ ta vavara va mafəc nda te zleley hay aca ŋgaŋgəɗac ma ana, ara nesey, nda ana e hey aabay. 23Hulef masa e kezl kad pa slam mambəla ana sə, aŋga ara nda macəka zləmay fa ma ta Zlavay, a cəna. Ara nesey, e hey wude hey. E hey wudiya ana hay temere, ŋgeɗey kwakwar makwa, ŋgeɗ saya kwakwar mahkar.»

Zlərev

24Ke gweɗec ma maɗəva mekele, gege: «Wunam ta bay da baymaləvaŋ hay sə, aŋga ara ndana ta slak hulef mambəla ana e ley tata. 25Dapa masa ndana hay aca njawaŋ sə, maslagəra tata ke dey, ka slakaɗ zlərev pa taɓa ta bəley ana, ka data. 26Masa hulefey ana, ka pəcata, e heyey sə, zlərev ke ŋguzdek vaw may.» 27Ara nesey, ndah maŋga mezlər ta nda te ley ana, ec ke dekey, ac ka gwaɗa bay ta way tec, gege: «Bay taciya, amba ke sləkek e ley takaa sə, hulef mambəla ana, biba? Na zlərev hay na ece dek dama?» 28Bay ta way teceŋ sə, ke vehecen, gege: «Maŋga mezlərey ana nesey sə, maslagəra.» Ndah maŋga mezlərey, ac ka gwaɗa, gege: «Ara nesey sə, ka wal anda dey, anda te ŋgəɗec avəda geyey?» 29Ke vehecen, gege: «Away, afa daha akwa ŋgəɗiya sə, akwar ta ŋgəɗa avəda ava bəley ana. 30Megərdeceŋ ece re gəl fa slam ana kasl fa kiya te meŋgə jene kad a wunam. Ye te gweɗec ndah meŋgek jene de ley, aca ra tawa zlərev ana avəda ɗagay, aca ra ɓəcaɗ fa slam ana ke te ndeley, ta bəley sə, ece re ɓəceken kad pa wuda aɗaw.»

Wut te venjeh

(Mar 4.30-32; Luk 13.18-19)

31E gweɗec ava ma maɗəva mekele saya, gege: «Wunam ta bay da baymaləvaŋ hay sə, aŋga ara wut te venjeh, masa ndana ta kəsiya, a sləkiya e ley tata. 32Wudiya ana aŋga kusetke deveŋ hulef hay dərziya, amaa daha ka pəcata sə, e gəl a fəna lak hay dərziya de ley, e tər ka gamslak mazlakava ana, ɗiyak hay da baymaləvaŋ ece dekey, aca lam way fa ha ana hay.»

Ma maɗəva ava is

(Luk 13.20-21)

33Yesu ke gweɗec ava ma maɗəva mekele saya, gege: «Wunam ta bay da baymaləvaŋ hay sə, aŋga ara is masa ŋgwaz ta həliya kusetke, ka gaɓa ava kəfa gaa, ka guvaɗa kəfa ana avəda fakwanay.»

Yesu e gweɗ ava ma hay maɗəva sə, mafay te mey?

(Mar 4.33-34)

34Ma ana fakwan nesey, Yesu e gweɗec kad miya sə, ava ma hay maɗəva. Ke gweɗec masa ava ma hay maɗəva aabay sə, aabay, 35afa ara masa nda mehwedek ma te gweɗey sə, da ŋgata, ke gweɗ, gege: «Ya ta wuna ma ke te gweɗ ma hay maɗəva, ya ta slaf jene hay maraɓa mezleezle ana dəga dapa mezler ta vavara.»

Mapan ma da yaŋ zlərev

36Ara nesey, Yesu ke gərdec miya faŋga, ka data kad a wunam. Ndah masasəraka jene tata ac ka ŋgucafa vaw, ac ka gwaɗa, gege: «Panandan ma da yaŋ ma maɗəva eve zlərev de ley sey.» 37Yesu, ke vehecen, gege: «Nda masləka hulef mambəla ana sə, Wut ta nda. 38Ley sə, e ŋguzdek vavara. Hulef mambəla ana sə, e ŋguzdek wudeh ta Wunam ta bay. Zlərev sə, e ŋguzdek wudeh ta nda suwe. 39Maslagəra masləka zlərev sə, bay ta haalay. Kiya te meŋgek jene kad a wunam sə, pas te mendəv ta vavara. Ndah meŋgek jene kad a wunam sə, maskəla hay. 40Ara masa aca ɓac zlərev ke te ndel pa kwakwaw sə, e te ŋgə ara aŋga ana pas te mendəv ta vavara may. 41Wut ta nda e te zlərek maskəla tata hay ke te həlec kad a vəda dapa Wunam ta bay tata, ndah mafəca ndana hay fakwanay ke te ŋgə mebərey va ndah maŋga jene hay mambəla ana hay aabay fakwanay. 42Ec te kezleɗec pe dəlev ta kwakwaw mahaldadas ana. Faŋga sə, makuɗa hay va mapaɗ zleŋ hay. 43Ara nesey, ndah maŋga mezlər ara aŋga ana ac te weɗ ara pas dapa Wunam ta bay ta Papaŋ teceŋ. A lada nda masa aŋga ava zləmay ɓa sə, da cəna.»

Zleley maraɓa va gavda

44«Wunam ta bay da baymaləvaŋ hay sə, aŋga ara zleley maraɓa de ley masa ndana ka ŋgata avəda, a raɓda saya. Dapa meweslə tata, a daɓa, a husamda jene hay tata fakwanay, a da husam ley ana. 45Wunam ta bay da baymaləvaŋ hay sə, aŋga ara nda maŋga fəlew masa mayaha gavda hay mambəla ana. 46Daha ka ŋgat gavda mambəla ana masa e husem bay ɓa sə, e dey, a husamda jene hay tata fakwanay, a da husamiya.»

Səfa

47«Wunam ta bay da baymaləvaŋ hay sə, aŋga ara səfa masa ac ta kazlaɗ pa yam mafayakfayak ana ta matəhaz tərsam te kəlef hay fakwanay. 48Masa ka nəhata weh cay sə, ece səpenek kad a rav ta zazay, aca njah maanjahay, aca pala tərsam te kəlef ana hay mambəla ana, ece kuyeɗec pa waŋ, amaa tərsam te kəlef hay masa mambəla ana aabay sə, ece kwideceŋ. 49E te ŋgə ara nesey ana dapa pas te mendəv ta vavara may. Maskəla hay ec te dekey ke te wekec ndah maŋga jə mambəla ana aabay va ndah maŋga mezlər ara aŋga ana. 50Ec te kezleɗec pe dəlev ta kwakwaw. Faŋga sə, makuɗa hay va mapaɗ zleŋ hay.»

Mamaɗ yaŋ ta ma hay

51Yesu ke nəkefec, gege: «Akwar ka cəna ma ana hay fakwan geyey?» Ac ka vahan, gege: «Aŋga, andə ka cəna fakwanay.» 52Ke gweɗec saya, gege: «Ara nesey, kwa waawa masa aŋga nda mesesərekecen ma majawa kad ndana hay masa ke sesərekek jene da yaŋ Wunam ta bay da baymaləvaŋ hay sə, aŋga ara bay ta way mehəlekec jene hay tata waya va mava dapa zleley tata maraɓa kad a vəda.»

Ndah de Nezeret aca ŋgaŋgar Yesu

(Mar 6.1-6; Luk 4.16-24)

53Masa Yesu a ndəvda megweɗ ava ma hay maɗəva nesey sə, ndal! A daɓa faŋga, 54ke dey e Nezeret, pa wunam masa e gəlek dapa. Dərŋga sə, ke sesərekec ndana hay dapa Way ta macə mbahw te Zuwef hay. Ndah dapa way ana faŋga fakwanay ec ke rəzleceŋ, ec ke gweɗ, gege: «Leŋgesl te mesen jene hay va gədaŋ te meŋgə cah hay nesey sə, e ŋgetekec dama? 55Aŋga sə, aŋga wut ta nda macacəɗa hap biba? Naa Mamaŋ sə, mezel Maaray? Zak, Zezef, Simaŋw va Zud sə, naa ac malamaŋ hay? 56Naa dəmaŋ hay fakwanay ac da vara andakwa fana? Leŋgesl te mesen jene hay va gədaŋ te meŋgə cah hay ana nesey sə, e ŋgetekec dama?» 57Mafay ta mawulak yaŋ ana hay nesey, aca ŋgaŋgar Yesu. Amaa Yesu gege: «Nda mehwedek ma sə, ndana hay aca hahəmiya vəla vəla fakwanay, amaa dapa wunam tata va da vara tərsam tata sə, a ŋgat mehehəm aabay.» 58Dərŋga sə, Yesu ka ŋgə cah hay gaa aabay, afa ac ka kəs ma tata aabay.

Currently Selected:

Mata 13: CUVnt

Highlight

Copy