Zaŋ 15

Yesu sə, aŋga wudez te rezeŋ metehwe ana

1Yesu ke gweɗec ndah masasəraka jene tata, gege: «Yey sə, ye wudez te rezeŋ metehwe ana, Papa sə, aŋga nda mapana ndey fe wudez ana hay. 2Ha te wudez masa aŋga macama ava yey, e heyə wudiya ana hay aabay sə, Papa a ŋgəla avəda. Ha ana masa e heyey sə, a cacəha, afa e re heyek wudiya ana hay mambəla ana ka fəna macaaca ana saya. 3Akwar sə, akwar macacəha cay ava ma masa ya ta gwaɗakwar. 4Manjah akwar macama ava yey, ara masa ya manjaha macama ava akwar. Ara masa ha te wudez, daha aŋga manjəɓa fe wudez ana aabay sə, a zlafa meheyek wudiya ana aŋga amta aabay. Ara aŋga ana akwar may, daha akwar macama ava yey aabay. 5Yey sə, ye wudez te rezeŋ, akwar sə, akwar ha ana hay. Nda masa aŋga manjaha macama ava yey, yey may, ya manjaha macama ava aŋga sə, nda ana ŋgesey, e te ŋgə mezlər hay mambəla ana gaa, afa daha yey aabay sə, akwar ta zlafa meŋgə jene kwa kusetke aabay. 6Daha nda masa aŋga manjaha macama ava yey aabay, ac ta kazlda kad a vəda ara ha te wudez maŋgəla, e kuley, ava dəɓa ana, aca ɓəca, aca pana kwakwaw fətiya, aca ndala avəda. 7Daha akwar manjaha macama ava yey, ma aɗaw manjaha dapa akwar, manək jene hay fakwanay masa akwar ta waya, jeŋ ana hay akwar ta ŋgatiya. 8Mawala jə mahahəlan yaŋ ta Papa. Jeŋ ana sə, masa akwa ŋgə mezlər hay mambəla ana gaa va masa akwar ndah masasəraka jene taaɗaw. 9Ara masa Papa te weliyey, yey may, ya walakwar. Manjahay dapa mawal vaw taaɗaw. 10Daha akwa pafa yaŋ fa ma hay majawa taaɗaw, akwar ta njahay dapa mawal vaw taaɗaw ara aŋga ana, yey may, masa ya ta pə yaŋ fa ma majawa ta Papa, ya manjaha dapa mawal vaw tata.»

11Yesu ke gweɗec saya, gege: «Ya gwaɗakwar ara nesey sə, afa mewesley aɗaw de ŋgə dapa akwar. Ara nesey, afa meweslə takwar da nəhaɗay. 12Mawala, ma majawa taaɗaw sə, masa akwar ta wal vaw dapa taɓa takwar ara masa ya ta walakwar. 13Mawal vaw, mafəna mawal vaw ta nda masa a və mesfen tata ka ta məcay mafay ta guula tata hay sə, aabay. 14Daha akwa ŋgə jə masa ya ta gwaɗakwar sə, ŋgesey, akwar guula aɗaw hay. 15Ya zalakwar ndah te mezlərey aɗaw ɓasabay, afa nda maŋga mezlər ta ndana sə, a sən jə masa bay ta way tata a ŋgiya bay. Ya zalakwar guula aɗaw hay sə, afa ya ka ŋguzdakwaɗ jene hay fakwanay masa ye te cənek da vara Papa. 16Mepeɗiyey ka bay takwar sə, akwar bay. Sesəker ya ta palakwar ka ndah masasəraka jene taaɗaw. Ya ka palakwar, ya ka paɗakwar, afa akwar de dey ke te ŋgə mezlər hay mambəla ana, mezlərey ana ŋgesey, masa ac ta njah gaa. Ara nesey, jene hay fakwan masa akwar ta nəkiya vara Papa eve mezel taaɗaw sə, a ta vakwar. 17Ma majawa taaɗaw masa ya gwaɗakwar sə, masa akwa wal vaw dapa taɓa takwar.»

Ndah dapa vavara aca wala Yesu va ndah tata fe ndey bay

18Yesu ke gweɗec ndah masasəraka jene tata saya, gege: «Daha vavara a walakwar fe ndey bay, masəna, a wala fe ndey bay ŋgesey sə, yey kamma. 19Daha efes akwar ndah ta vavara sə, ndah ta vavara ana ac ta walakwar, afa akwar ndah teceŋ. Amaa akwar sə, ndah ta vavara bay, mapaɗakwar ha wal dapa vavara sə, yey, mafay ana, ndah ta vavara aca walakwar fe ndey bay. 20Masənafa ma masa ya ta gwaɗakwar: “Nda maŋga mezlər ta ndana sə, a fəna bay ta way tata aabay”. Daha ndana hay ac ke ŋgedeyey marga sə, ac ta ŋgadakwar marga may. Daha ac ka pafa yaŋ ma taaɗaw sə, ac ta pafa yaŋ ma takwar may. 21Ac ta ŋgakwar fakwanay ara nesey sə, mafay te mezeley aɗaw, afa aca sən nda mezlərekiyey bay. 22Daha ye ke dek kad pa vavara aabay, ye ke bəzedec ma ta Zlav aabay sə, efes ac eve mebər aabay. Amaa təlam nesey, ac ava ma te megweɗey te mepəl mebər tec ɓasabay. 23Nda masa e weleyey fe ndey bay sə, e ŋgə ŋgesey, a wala Papa fe ndey bay may. 24Daha efes ye ke ŋgə mezlər hay masa ndana ka ŋgaw aabay dapa taɓa tec bay sə, ec eve mebər aabay. Amaa təlam nesey, ac ka wala masa ya ta ŋgə mezlərey ana hay. Ava aŋga ana fakwanay, ece dey ava mawalandaw ava Papa fe ndey bay jaŋgata may, 25amaa afa a da ŋgata ara mavinda dapa ma majawa teceŋ, te gweɗ, gege: “Ece weleyey fe ndey bay sə, taambəla”.»

26«Daha nda ma ta jənakwar masa ya ta zlərakwar da vara Papa sə, ka dakata cay, Mesfen te metehwe ana masa e dek da vara Papa. Aŋga ava yaŋ tata ana a ta tə yaw da yaŋ yey. 27Ara aŋga ana, akwar may, akwar ta tə yaw da yaŋ yey, afa andakwa fa slam ana dəga dapa mezler ta manjah tandakwa fa slam ana ava akwar.»

Currently Selected:

Zaŋ 15: CUVnt

Highlight

Copy