Zaŋ 1

Yesu sə, aŋga Ma ta Zlavay

1Dapa mezler te jene hay fakwanay, Ma sə, aŋga ɓa cay.

Ma ana sə, aŋga da cak ta Zlavay. Ma ana sə, aŋga Zlavay ana.

2Dəga dapa mezler te jene hay fakwanay sə, aŋga da cak ta Zlavay.

3Jene hay fakwanay ece dek jaka pə Ma ana.

Jene masa e dek jaka pə Ma ana bay sə, aabay.

4Mesfeney, aŋga dapa.

Mesfeney ana sə, aŋga slam mawaɗa masa e wuɗecen ndey ta ndana hay,

5slam mawaɗa ana sə, ke weɗ dapa ləvaŋ,

amaa ləvaŋ ana ka kəsaw aabay.

6Zlav ke zlərek ndana ɓa, mezel Zaŋ.

7Ke dekey ara nda mata yaw, ka ta tə yaw da yaŋ slam mawaɗa, afa ndana hay fakwanay aca ra kəs ma tata jaka vara vaw.

8Zaŋ ava yaŋ tata sə, aŋga slam mawaɗa bay. Amaa e dek sə, ka ta tə yaw da yaŋ slam mawaɗa.

9Ma sə, aŋga slam mawaɗa metehwe ana, masa ke dek pa vavara, ke weɗecen ndey ta ndana hay fakwanay.

10Ma sə, aŋga dapa vavara.

Zlav e lemek vavara sə, jaka pə Ma ana.

Amaa ndah dapa vavara ac ka sənaw aabay.

11E də sə, kad vara ndah tata,

amaa ndah ana, ac ka kəsaw aabay.

12Amaa kad ndah masa ac ka kəsaw, kad ndah masa ac ka kəs ma tata, ke vec cəv te metər ke wudeh ta Zlavay. 13Ndah ana ŋgesey, ece heyek dapa bembez bay, kwa ara mawulak yaŋ ta slaw vaw ta waya bay, kwa ara mawulak yaŋ ta ndana ta waya bay, amaa dapa mawulak yaŋ ta Zlavay.

14Yaw, Ma ana, ka njah ara ndana, ka tərata ka slaw ta vaw,

ka njah dapa taɓa taciya, manəha ava mambəla ana va ma metehwe ana,

andə ka wala mehehəm tata,

mehehəmey ana sə, ta Wat malay masa e dek da vara Papaŋ.

15Zaŋ ka tə yaw da yaŋ ana, gege:

«Mawala nda masa yey te gweɗ zleezle da yaŋ ana: “Nda masa e te dek ava dəɓa taaɗaw sə, ka ŋgəlawa ma, afa dəga ya mahaya bay heley sə, aŋga ɓa cay.”»

16Andakwa fakwanay, andə ka ŋgatakwa meven ta ma te zleley tata hay macəkuma bay va mambəla ana tata.

17Zlav ke vek ma tata majawa jaka pa ha ta Muyiz, amaa mambəla ana va metehwe ana sə, ece dek jaka pa Yesu Kəristi.

18Kwa ndana ka wala Zlav aabay. Amaa Zlav masa aŋga Wat malay, aŋga sə, ka njah da cak ta Papaŋ, aŋga ta ŋguzdandakwaɗ Zlavay.

Matə yaw ta Zaŋ Baatis

(Mat 3.1-12; Mar 1.2-8; Luk 3.15-17)

19Mazlakava hay te Zuwef hay de Zeruzelem ke zlərek ndaakwas hay va Levi hay kad vara vaw, aca ra nəkafa: «Kaa sə, ka wa?» Nesey matə yaw ta Zaŋ. 20Zaŋ ana, ka cə ma aabay, ke gweɗec metehwe ana, gege: «Yey sə, ye Kəristi bay.» 21Ac ka nəkafa, gege: «Naa kaa sə, ka wa la wa? Ka Eli, nda mehwedek ma geyey?» Ke vehecen, gege: «Away! Ye Eli bay.» Ac ka gwaɗa saya, gege: «Naa kaa sə, ka nda mehwedek ma masa anda ɓəliya sə, geyey?» Ke vehecen, gege: «Away! Ya bay.» 22Ac ka gwaɗa, gege: «Naa kaa sə, ka wa la wa? Ŋguzdanay, afa anda ra dey, vehecen ma ana kad ndah mazlərakandaw. Ka pə yaŋ takaa sə, ka wa?» 23Ke vehecen, gege: «Yey sə, ya nda matala ma dapa yaŋ ta səɓak ara Izay, nda mehwedek ma zleezle te gweɗey: “Maləmadana cəv mambəla ana, nduwak nduwak kad Bay Mazlakava.”» 24Anjəkar ndah masa ec te zlərekec kad vara Zaŋ sə, ac Farisa hay. 25Ac ka nəkafa, gege: «Daha anjəkar ka Kəristi bay, ka Eli bay, ka nda mehwedek ma bay sə, naa ke ŋgec beetem kad ndana hay sə, mafay te mey?» 26Zaŋ ke vehecen, gege: «Yey sə, ya ŋgakwar beetem ava yam, amaa ndana ɓa dapa taɓa takwar masa akwa səniya bay. 27Nda ana, e te dek ava dəɓa aɗaw, amaa kwa ya husa ka pal ɗuweŋ ta tahkar tata hay bay.» 28Ma ana fakwanay nesey sə, e ŋgə dapa wunam ta Betani jaka luwa wayam te Zurdeŋ, masa Zaŋ e ŋgec beetem kad ndana hay dapa.

Zaŋ Baatis a bəzad ma da yaŋ Yesu

29Tedew te pərek ana, Zaŋ a ta wala Yesu e dek kad vara vaw, e gweɗ, gege: «Mawala, Wut ta təmak ta Zlavay, ma ta kəsa mebər ta ndana hay dapa vavara. 30Aŋga sə, aŋga nda masa ye ke gweɗ zleezle da yaŋ ana: “Ndana ɓa e te dek ava dəɓa aɗaw, nda ana sə, ka ŋgəlawa ma, afa dəga ya mahaya bay heley sə, aŋga ɓa cay”. 31Yey ava yaŋ taaɗaw ana, ya səniya bay. Amaa ye dek ka ta ŋgə beetem kad ndana hay dapa yam, afa ye de ŋguzdecen nda ana kad Isreyel hay.» 32Zaŋ ka tə yaw, ke gweɗec saya, gege: «Ya ka wala Mesfen Mavəna ke bəreŋgek da baymaləvaŋ ara mahwɗagwam, ka njah a yaŋ ana. 33Yey sə, kwa ya ka sənaw aabay, amaa Zlav mezlərekiyey te meŋgec beetem kad ndana hay dapa yam nesey sə, ke gweɗiyey, gege: “Nda masa ka ta wala Mesfeney aɗaw e te bəreŋgekey, a ta njah a yaŋ ana, ŋgesey, nda masa e te ŋgec beetem kad ndana hay ava Mesfen Mavəna”. 34Yey sə, ya ka wala, mafay ana, ya tə yaw da yaŋ ana, aŋga sə, aŋga Wut ta Zlavay.»

Ndah masasəraka jene macaaca ana

35Tedew te pərek ana, Zaŋ Baatis va ndah masasəraka jene tata hay ecew, ac dərŋga saya. 36Masa Zaŋ a wala Yesu e dey sə, ke gweɗ, gege: «Mawala, Wut ta təmak ta Zlavay.» 37Ndah masasəraka jene ta Zaŋ sə, ac ka cəna ma ana nesey sə, ac ka cəp Yesu. 38Yesu e te pə ndey kad ava dəɓa sə, e welec ndah masasəraka jene ta Zaŋ sə, aca cəpiya, ke nəkefeceŋ, gege: «Akwa yah mey?» Ac ka vahan, gege: «Raabi, slam ta manjah takaa sə, fəla?» Raabi sə, ara megweɗey nda masasəraka nda. 39Ke gweɗ, gege: «Medekey, akwa wala vəda pəse.» Ara nesey, ec ke dey, ac ka wala slam masa a njah dapa. Pəsaŋga ana ŋgesey, ac ka njah mabay ke ŋgə ler faɗ ta fakwaɗ.

40Nda amta deveŋ ndah ecew macəna matə yaw ta Zaŋ Baatis masa ac ka cəp Yesu sə, mezel Endəre, malamaŋ ta Simaŋw Piyer. 41Nda macaaca ana masa Endəre a cə yaŋ ava aŋga sə, malamaŋ Simaŋw#1.41 Simaŋw Simaŋw nesey sə, Piyer. Ka gwaɗa, gege: «Andə ka ŋgat Mesi.» Ara megweɗey, Kəristi. 42Ka padan ma ta Simaŋw kad vara Yesu. Yesu ka pafa ndey Simaŋw sə, ka gwaɗa, gege: «Kaa, Simaŋw, wut ta Zaŋ, ac ta zalakaa Keyfas.» Ara megweɗey, Pəra#1.42 Pəra a wal megweɗey Piyer..

43Tedew te pərek ana, Yesu a wal medə pa vavara te Gelile. Macə yaŋ tata ava Fəlep, ka gwaɗa, gege: «Cəpiyey!» 44Anjəkar Fəlep ana, aŋga wut te berne ta Baytisayda, wunam ta Endəre va ta Piyer. 45Ava dəɓa ana, Fəlep aca cə yaŋ ava Neteniyel, ka gwaɗa, gege: «Andə ka ŋgat nda masa Muyiz te gweɗ da yaŋ ana dapa ɗelewer ta ma majawa va ta ndah mehwedek ma. Nda ana sə, Yesu nda Nezeret ana, wut te Zezef.» 46Neteniyel ka vahan, gege: «Jə mambəla ana sə, e təhek de Nezeret ɓa may geyey?» Fəlep ka vahan, gege: «Dekey, ka ta wala vəda.» 47Dapa masa Yesu a ta wala Neteniyel e dek kad vara vaw sə, ke gweɗ, gege: «Mawala, nda Isreyel metehwe ana nesey, nda masa a ŋgal ma aabay.» 48Neteniyel ka nəkafa, gege: «Ke səniyey fəmey?» Yesu ka vahan, gege: «Dapa masa Fəlep ka zalakakaa aabay heley sə, ya ka walakaa vəda cay, ka manjaha da dara maftay.» 49Neteniyel ka vahan saya, gege: «Raabi, kaa sə, ka Wut ta Zlavay, ka bay te Isreyel hay!» 50Yesu ka vahan, gege: «Ka kəs ma aɗaw nesey sə, afa ya ta gwaɗakaa, ya ka walakaa da dara maftay sə, geyey? Yaw, ka ta wala jene hay mafəna nesey ana ɓa saya.» 51Yesu ke gweɗ saya, gege: «Eve metehwe ana ya gwaɗakwar akwar ta wala slam da wudam mawuna. Maskəla hay ta Zlavay ece tep kad a wudam, ece bəreŋgek kad yaŋ Wut ta Nda.»

Currently Selected:

Zaŋ 1: CUVnt

Highlight

Copy