Mezlər ta Maslaŋ hay 11

Piyer a bəzad mezlər tata de Zeruzelem

1Maslaŋ hay va malamaŋ hay dapa Yesu masa dapa vavara te Zudey, ac ka cəna, ndah dapa vavara hay masa aca sən Zlav bay, ac ka kəs ma ta Zlavay. 2Mahusa te Piyer e Zeruzelem sə, Zuwef hay makəsparav ac ka payafa mabay, ac ka gwaɗa, gege: 3«Hay! Ke ke sehw a way ta ndah masa ŋgwal tec hay maŋgəla bay va ka ka ndə ɗaf eve eceŋ!» 4Piyer ke ŋguzdecen jə masa e ŋgey dəga dapa mezlerey ana dama dama, gege:

5«Ya dapa macə mbahw kad Zlavay dapa berne ta Zawpey, Zlav ke ŋguzediyey cah ɓa. Ya ka wala jene ara gwedurey mazlakava ana ɓa e bəreŋgek da baymaləvaŋ kad vereyey. Ma ana hay faɗ majawa, mabaŋgaɗa kad a wudam. 6Ya ka pə ndey kad pa mambəla ana. Ya ta wala sə, gənaw hay masa sek ana hay faɗ ɓa, jə te ley hay mekele mekele ɓa, jene hay masa ece də ta hwaɗ ta hwaɗ ɓa va ɗiyak hay mekele mekele dapa.» 7Ya ta cəna uway ɓa e gweɗiyey, gege: «Piyer, zleftek, zleheceŋ, ndaw!» 8Amaa, ya ka vahan kad pa, ya gwaɗa, away, Bay Mazlakava, jə maləza masa kwakwas taciya ke viyey cəv ta mandiya aabay sə, ya ka ndaw aabay heley. 9Ya ta cəna uway ana ke gweɗek ke ecew ana saya, gege: «Jə masa Zlav ka pana sə, ka ta ndandazliya ara jə maləza bay.» 10Jeŋ ana ke ŋgə ara nesey dəɓa mahkar, ava dəɓa ana, ka vahata kad baymaləvaŋ. 11Dapa ŋgesey ana, ndah mahkar ɓa, ec ke dekey, ac ka ŋgatafandaw da way ana masa andaw dapa. Ndana ɓa dapa berne ta Sizarey te zlərekec kad vereyey, ye de dey kad vereceŋ. 12Mesfen Mavəna ke gweɗiyey, gege: «Madaɗ eve eceŋ, ke te lel bay.» Andə ke dey eve eceŋ kad pe berne ta Sizarey ana. Makəsparav hay makwa ɓa ac ka padawa ma, andə ka husa, andə ke sehw kad way te Kwernel ana fakwanay. 13Nda ana ka gwaɗandan ma da yaŋ jə masa aŋga ta wala te ŋgə da way tata fakwanay. Ka gwaɗandaw, gege: «Ya ka wala maskəla mazlaca da way taaɗaw. Maskəla ana ke gweɗiyey, gege: “Zlar ndana hay kad Zawpey ke te zelek Simaŋw masa aca zaliya Piyer. 14A da gwaɗakaɗ ma hay masa ke te mbəl ava aŋga, kaa va ndah da hwaɗ ta way takaa fakwanay.”»

15«Ava dəɓa ana, yey, Piyer, ya ka zlar megweɗec kad Kwernel va ndah da hwaɗ ta way tata. Dapa masa ye gweɗey, Mesfen Mavəna ke bəreŋgek kad yaŋ eceŋ ara masa aŋga te bəreŋgek kad a yaŋ andakwa dapa mezlerey ana.» 16Dapa ŋgesey ana, ya ka sənafa ma masa Bay Mazlakava ta gwaɗiya zleezle, gege: «Zaŋ Baatis ke ŋgec beetem kad ndana hay sə, ava yam, amaa akwar sə, akwar ta ŋgat beetem ava Mesfen Mavəna.» 17Eve metehwe ana, Zlav ke vec Mesfen tata ara masa aŋga ta vandakwa dapa masa anda ta kəsakwa ma ta Bay Mazlakava Yesu Kəristi. Ara nesey sə, ya wa la wa, masa ya da ran ma ta Zlavay ana ava yaŋ tata te meŋgə jə masa aŋga ta waya?

18Masa aca cəna ma ana hay ara nesey sə, ec ke njehec teete, ac ka hahəm Zlavay, gege: «Anjəkar kwa kad ndah masa Zuwef hay bay sə, Zlav ke ŋguzdec cəv ta maŋgwad rav teceŋ, aca ra cəp Zlav ava rav tec amta, afa aca ra ŋgat manjah katar ka midakw may.»

Macam yaŋ ta ndah te Yesu dapa berne ta Antakiya

19Ava dəɓa ta maməc te Etiyen sə, ac ka zlar meŋgedec marga kad makəsparav hay mabay. Makəsparav hay ana, ac ka vəna yaŋ amta amta. Ŋgeɗ hay deveŋ eceŋ, ec ke dec pa vavara te Fenesi, pa vavara te Kipərus va berne ta Antakiya. Amaa aca bəzad ma ta Zlavay sə, kad Zuwef hay babəla. 20Amaa makəsparav hay dərziya dapa vavara te Kipərus va dapa vavara te Siren ec ke dey a Antakiya, ec ke bəzedec Labara mambəla ana da yaŋ Bay Mazlakava Yesu kad ndah magwaɗa ma te Gərek hay may. 21Gədaŋ ta Bay Mazlakava aŋga eve eceŋ. Mafay ana, ndana hay gaa ac ka kəs ma tata, ac ka ŋgwada rav teceŋ.

22Macam yaŋ ta ndah te Yesu dapa berne te Zeruzelem, ac ka cəna ma da yaŋ jə masa ke ŋgə dapa berne ta Antakiya ana. Mafay ana, ac ka zlar Barnabas kad pe berne ta Antakiya. 23Dapa masa aca wala mambəla ana ta Zlavay e ŋgə mezlər meendey meendey, ec ke weslə macəkuma bay, ac ka van rav tec maza ta makəs ma ta Zlavay kad Bay Mazlakava. 24Barnabas ana sə, aŋga nda mambəla ana, manəha eve Mesfen Mavəna va makəsparav. Ndana hay gaa ac ka kəs ma ta Bay Mazlakava Yesu.

25Ava dəɓa ana, Barnabas ke dey ke te yehek Sawl dapa berne ta Tarsis. 26Dapa masa ka wala avəda cay sə, ka kəsaw kad pe berne ta Antakiya. Barnabas va Sawl ana cuweeney ac ka njah mavay amta da vara Macam yaŋ ta ndah ta Zlavay dapa berne ta Antakiya ana. Ec ke sesərekec ndana hay gaa dərŋga. Aca zlar mazal makəsparav hay «Kəretiyeŋ hay» sə, dapa berne ta Antakiya ana.

Macəkal jene hay ta majəna nda

27Dapa ŋgesey ana, ndah mehwedek ma dərziya de Zeruzelem ec ke dey a Antakiya. 28Nda amta deveŋ eceŋ, mezel Agabus. Ke zleftek, ka ta bəzad ma masa Mesfen Mavəna ta ŋguzdanay, ke gweɗ, gege: «May mazlakava ana e te ŋgey dapa vavara fakwanay.» Eve metehwe ana, may ana ara nesey ke ŋgə dapa masa Kəlawd aŋga bay. 29Ara nesey, ndah masasəraka jene faŋga ac ka cama mawulak yaŋ teceŋ fa slam ana, gege: «A lada kwa waawa, da və jene ara masa gədaŋ tata ta ŋgatiya ka ta jən malamaŋ tandakwa hay dapa Yesu Kəristi dapa vavara te Zudey.» 30Ndah masasəraka jene sə, ac ka cəkalaw. Jeŋ ana hay macəkala sə, ac ka zləraw jaka pa ha ta Barnabas va Sawl, aca ra te vecen kad mesnendə ta Macam yaŋ hay ta ndah ta Zlavay dapa vavara te Zudey.

Currently Selected:

Mezlər ta Maslaŋ hay 11: CUVnt

Highlight

Copy