Lúkas 2
2
Libyáa lí Yésus
1Á eceg líkanʼyɛ lí Ogústo, kasig a ɓɛ́ɛ́ káísa ecɛ́ŋ, ɔ pámɛ́ mbéndá nɛ nsɔŋgí á ɓot á nyɔŋɓɛ́ɛ á ŋkɔŋ-á-sí ásɛ. 2Nyúŋ nsɔŋgí ɔ́sū á ɓɔ̄ŋɓɛ́ɛ eceg Kulínius a ɓɛ́ɛ́ gɔ́mna licɛ́ŋ á ŋkɔŋ á Sília. 3Mut sig a ŋgí kɛ li nyɔŋɓɛ á nsɔŋgí, á tísɔn yɛ́ɛ̄ libyáa. 4La Yósɛp ki ɔ ɓógó á Názalɛt tísɔn nyí Galiléa, ɔ ɓét á Bétlehéem tísɔn nyí Dávid á ékombo yé Yúdēa, ányúū nɛ a ɓɛ́ɛ́ mɔ́ɔ̄n á ndáá-m̀biya nyí Dávid. 5A kɛnɛ́ɛ́ wóŋ á lí nyɔŋɓɛ á nsɔŋgí la eván yɛ́ɛ́ Mālía nyɔ́ á ɓɛ́ɛ́ líbum. 6Eceg bi ɓɛ́ɛ́ wóŋ, ɔlɔ́ ví ábyāl ví Mālía vú kɔlan, 7la nyɛ́ ɔ byál mɔɔ́n-á-páam, mɔɔ́n wɛ́ɛ̄ ɔsú. Ɔ vúlké nyɛ miɓato, ɔ nāntɛ́ nyɛ á ésōā bílēm, ányúū nɛ́ póla ɛh ɓɛ́ɛ ɓé ányúū yaɓá á ndáá ɓaloo-nzen. 8Múŋ á nlemlem á ékombo, ɓatát míɓembá bí ɓɛ́ɛ́ múŋ bí ŋgí loɛ eceg á míndīī la díɓe á li tát lí bílēm byáɓá. 9Váŋ nɛ́ áŋgɛl nyí Nyɔ́ŋ-Ɛsáŋɛ́ ya pámlé ɓɔ; mipúú mí lipém lí Nyɔ́ŋ Ɛsáŋɛ́ mú díí ɓɔ, la ɓɔ́ bú nát la woŋ. 10Ndí áŋgɛl yu lága ɓɔ nɛ́: «Miníh kɔnɔ́g ɓé woŋ, ányúū nɛ, ma sɔ́ ɓɛ́nɛ li lɛgɛ li pɔ́l m̀ɓɛɛŋ, nyí ɛ ŋga kɛ́ li kɔnhanɛ lí lilóm lísɛ mivag micɛ́ŋ. 11Ǹsuŋ a byáa nyí lɛn á tísɔn nyí Dávid, a lɛ Nyɔ́-a-Pɔ́hlɛ, Nyɔ́ŋ-Ɛsáŋɛ́. 12Ndembye ɛ ŋga kɛ́ ɓɛ́nɛ li yíhɛ náŋ yɔ nyí: miníg kɛ li kɔ́p lí ŋkɛ́gá-mɔ́ɔ̄n, m̀vúlkége, á náŋɛ á ésōā bílēm.» 13Á ékūyá-kúyá, livuŋ li áŋgɛl lú byáŋ elɔŋ la nyí ɔsú á lí lɔ́ŋghɛ́nɛ li Ɔlolómɛ̄ ŋgoso enyɛŋgɛ la li laga nɛ́:
14«Lipém lí ɓɛ́ la Ɔlolómɛ̄ á lóō lóō,
nsaŋ á sí la ɓot á ŋga díŋɛ.»
15Ɛnɛ́ ángɛl yá yíg ɓɔ li timan á lóō, ɓatát bílēm bú laglán ɓɔ́ la ɓɔ́ nɛ́: «Bi kɛ́nɛ́g nɛ́-tɛ́ɛla á Bétlehéem, bi ɛ́n yé ɛ́ ŋga loo wóŋ, yé Nyɔ́ŋ-Ɛsáŋɛ́ a yíhɛ́ ɓɛ́hɛ.» 16La ɓɔ́ bú dīgɓán duwɛ, bú kɔ́p Mālía, Yósɛp la ŋkɛ́gá-mɔ́ɔ̄n á náŋɛ á ésōā bílēm. 17Ɛnɛ́ ɓá ɛ́n mɔɔ́n, bú laga yéé ɛ́sɛ ɓá máŋlɛ́ ɓɔ likɔlɓan la nyɛ́. 18Ɓot bísɛ bí ɓɛ́ɛ́ váŋ bú nyág la yé ɓatát bílēm bí ŋgí máŋlɛ́ ɓɔ́. 19Malía a ŋgí náŋɛ míŋ mam mísɛ á m̀mím wɛ́ɛ́ la li somo lí lí sɔ́ŋtánɛ lí mɔ. 20Ámbúh náŋ ɓatát bílēm bú tímān bíg lɔ́ŋgɛ ŋgoso lipém, la li ɓégɛ lí Ɔlolómɛ̄, likɔlɓan la yé ɛ́sɛ ɓá ámble, ndí bú ɛ́n ki, tɛɛ́tɛ́ɛ ákaa bí lagléé ɓɔ́. 21Ɛnɛ́ ɔlɔ́ vá yáhɛ mwaam ví mɔɔ́n a ŋga nyɛ́ɛ li kwɛɛɓɛ vá kɔlan, bú lō nyɛ joó nɛ Yésus, joó áŋgɛl ɛ tíéé sɔ́kágánɛ́ nyaŋɛ́ ag nyɔŋ libum jɛ́ɛ́.
Bíg kɛla Yésus á ndáá-ēcɛ́ŋ-Ɔlolómɛ̄
22Ɛnɛ́ ɔlɔ́ ví lí loɛ lí esaa#2.22 Li oŋle la mbéndá Móse, mindígá á ŋga nyɛ́ɛ li loɛ lí muúmínáa mí álɔ̄ á mɓagɓanɛ́ ámbúh abyál wɛ́ɛ́ sɔ́kágánɛ́ ag kɛ li tíi lí Ɔlolómɛ̄ líkaale. vá kɔlan, li oŋle la mbéndá nyí Móse, Yósɛp la Malía bú kɛ́la mɔɔ́n á Yélūsalɛm á li étɛ lí nyɛ Nyɔ́ŋ-Ɛsáŋɛ́, 23ákaa yé yá ciiɓɛ́ á mbéndá nyí Nyɔ́ŋ-Ɛsáŋɛ́ nɛ: «Mɔɔ́n-á-páam ɔsú sig, bíg kɛ nyɛ́ li tíi lí Nyɔ́ŋ-Ɛsáŋɛ́.» 24Yósɛp la Malía ki, bí ŋgí nyɛɛ li tíi ákaa nsúlé, adú áɓáa tɔ nɛ́ ɓɔɔ́n bí áɓeŋ bíɓáa, li oŋle la mbéndá nyí Nyɔ́ŋ-Ɛsáŋɛ́.
25Múŋ á yéŋ eceg, mut wa a ɓɛ́ɛ́ á Yélūsalɛm, nyɔ́ bí ŋgí yáŋa nɛ́ Síméon; a ɓɛ́ɛ́ á tɛ́ɛ sim á miíh mí Ɔlolómɛ̄, ndí ɔ ɓɛ́la ki ŋguu ŋyéɓé. A ŋgí laaŋke M̀mɔ́mɛ Íslāɛl, M̀búl Mpúán ɔ ɓɛ́ la nyɛ́. 26M̀búl Mpúán á yíhɛ́ɛ́ nyɛ́ nɛ́, a ŋgá kɛ ɓé li wú nyɛ́ ŋgí li ɛ́n lí Nyɔ́-a-Pɔ́hlɛ la Nyɔ́ŋ-Ɛsáŋɛ́. 27La M̀búl ɔ kɛ́la nyɛ á ndáá-ēcɛ́ŋ-Ɔlolómɛ̄. Á nlemlem á eceg, ɓasáŋɛ́ bí Yésus bú sɔ́la nyɛ́, á li yáhɛ lí yé yá ciiɓɛ́ á mbéndá ányúū yɛ́ɛ̄. 28La Síméon ɔ lɛ́glé mɔ́ɔ̄n á mɔ mɛ́ɛ́, ɔ tí Ɔlolómɛ̄ mítamlan la li pɔ́t nɛ́:
29«Ɛtáŋɛ, likɔlɓan la eɓaŋgá yɔ́ɔ
m̀ɓɔŋle wɔɔ ag la li kɛ vɔ́ŋɔ́ɔ la nsaŋ;
30ányúū nɛ miíh máma má ɛ́n lísuŋga jɔ́ɔ,
31jé wa ɓōŋhán ányúū milóm mísɛ,
32mipúú mí ŋga páaye ɓá bí sē ɓé ɓɔ́ɔ̄n bí Élōg-Yúda,
la lipém lí Íslāɛl lilóm jɔ́ɔ.»
33Ɛsáŋɛ́ la nyaŋɛ́ a mɔɔ́n bú nyág la yé ɛ́sɛ ɓot bí ŋgí laga likɔlɓan la mɔɔ́n wāɓá. 34Síméon ɔ lómbó ɓɔ aá la nyaŋɛ́ Mālía nɛ́: «Nyɔ́ mɔɔ́n á sɔ́ ja á li ɓɛ́h la li tɛ́ɛ́yɛ lí ŋgandag ɓot á Íslāɛl la li ɓɛ́ lí ndembye nyí ɓot bí ŋga pún. 35La náŋ, miɔ́ŋɔ mí mímīm mí ɓot míg kɛ li pám á ápūū; ndí wā-mɛ̄n Mālía, m̀byɛndɛ a esɔghe ag kɛ wa li túú li m̀mím.»
36-37M̀máŋ á míndīgá wá ki á ɓɛ́ɛ́ múŋ nɛ́ Ána, a ɓɛ́ɛ́la muúmwaam mí mímbú lá mínáa, m̀pɔ́tle-a-Ɔlolómɛ̄, ŋgɔn nyí Fánuɛl á m̀biya á Ázɛ̄ɛl; ámbúh mimbú nzambúwá mí áūg, nlóm ɔ wú, ɔ yéglé ŋkúh. A ŋgí ɓógo ɓé á ndáá-ēcɛ́ŋ-Ɔlolómɛ̄, ag ɓɔŋle Ɔlolómɛ̄ díɓe la nzámuh átē á etɔɔ-nzal la mikánɛ. 38Ɛnɛ́ a sóŋhán váŋ á nlemlem á eceg, nyɛ́g ɔ ɓōtlé li ɓégɛ lí Ɔlolómɛ̄, la li máŋlɛ li ɓot bísɛ mam mí ŋga légɓe Yésus, ɓá ɓot bí ŋgí laaŋke nɛ́ Yelúsalɛm ɛ tɛ́lɛ́ kundɛ.
39Eceg Yósɛp la Malía ɓá manɛ́ li yáhɛ lí yéé ɛ́sɛ yá ciiɓɛ́ á mbéndá nyí Nyɔ́ŋ-Ɛsáŋɛ́, bú tímān á Galiléa á tísɔn yáɓá á Názalɛt. 40Á yéé ɛ́ ŋga légɓe mɔɔ́n, a ŋgí toŋgo la li ólo, ŋyálāg la peg, ediŋ yé Ɔlolómɛ̄ ɛ́ ɓɛ́ɛ́ la nyɛ́.
Yésus á ndáá-ēcɛ́ŋ-Ɔlolómɛ̄
41Ɓabyál Yésus bí ŋgí kɛ á Yélūsalɛm m̀bú sig, li loɛ lí ŋgand Páska nyí Elōg-Yúda. 42Ɛnɛ́ Yésus a pám jóom lí mímbú la míɓáa, Malía la Yósɛp bú ɓét elɔŋ la nyɛ́ á li loɛ li ŋgand Páska, li oŋle la miɓɔŋɔg máɓá. 43Ɛnɛ́ ŋgand ya mān, á ŋgɛ́ŋ misoa, mɔɔ́n wāɓá Yésus ɔ yéglé á Yélūsalɛm, ɛ́h ɓɛ́ ɓé ɓɔ́ li yí. 44Bí ŋgí ɔ́ŋɔ́ɔ nɛ́ a lɛ la ɓot bí elɔŋ yáɓá duwɛ; bú wɛ́ɛ̄ ɔlɔ́ víwūt sɔ́kágánɛ́ bíg ɓotle nyɛ́ li somo á póla ndog yaɓá la bileman. 45Kasig bíh ɛ́nɛ́ɛ ɓé nyɛ, bú tímān nyɛ li somo nɛ́-tɛ́ɛla á Yélūsalɛm. 46Ámbúh alɔ́ áŋháa, bú kɔ́p nyɛ́ á ndáá-ēcɛ́ŋ-Ɔlolómɛ̄ a tɔ́ɔ̄ á m̀mím á eti yé ɓayéglɛ mbéndá Ɔlolómɛ̄, ag ámble ɓɔ́, ag bihi ki ɓɔ́. 47Ɓot bísɛ bí ŋgí ámble nyɛ́ ag pɔ́t, bú nyág la nlohanɛ́ wɛɛ́ a eyí ndí la mbele yɛ́ɛ́ ki. 48Ɛnɛ́ Mālía la Yósɛp bí ɛ́nɛ́ɛ́ nyɛ́, bú nyág. Váŋ nɛ́ nyaŋɛ́ Mālía a ɓāt nyɛ́ nɛ́: «Wɛɛ́ʼɛ̄ á mɔ́ɔ̄n wama ndí láá wa ɓɔ̄ŋ ɓɛ́hɛ náŋ é? Légɓé sig ákaa ma la ɛsɔ́ŋɛ́ ɓaá taká ŋgandag á li somo lí wa.» 49La Yésus ɔ pélē ɓɔ nɛ́: «ányúū yéé miní ŋga sómo ma é? Ɓaá miní ŋgá yí ɓé nɛ́ ma nyɛ́ɛ li ɓɛ́ á ndáá Etāa é?» 50Ndí ɓɔ́ ɓáh sɔ́ŋtánɛ ɓé yéé a sómo ɓɔ li laga. 51La nyɛ́ ɔ sūh elɔŋ la ɓɔ́ li timan á Názalɛt. Yésus ɔ ɓɛ́la esuhɛ-nyuú á ŋgwáāg yaɓá. Nyaŋɛ́ á ŋgí naŋɛ míŋ mam mísɛ á m̀mím wɛ́ɛ́. 52Yésus a ŋgí náŋ la peg, la ntɛ́l, á sí ediŋ Ɔlolómɛ̄ la yé ɓot-bí-bínam.
Currently Selected:
Lúkas 2: NTB
Highlight
Share
Copy

Want to have your highlights saved across all your devices? Sign up or sign in
© 2023, CABTAL