Mateo 4
4
A Hanitu i Tonia e Isu
(Markus 1:12-13; Lukas 4:1-13)
1 #
Hib 2:18; 4:15 Na parava tara a Hanu Kiripiripi i rudua e Isu ge lakea na tabeke i ngeki, a hanitu ge tonia vonga. 2#Nim 34:28E Isu i peremu a maki ni kani na parava i ravulu va, a rodo i ravulu va. Lakea i vitolo. 3A bakovi ni toni e huriki i bele vona, i takia, “Ge ioe a tuna Vure, o taki a kedo nga ri gi mapulo ri gi manga a bret.”
4 #
Vin 8:3
E Isu i koli, “A ngava ni here puru na Hinere, i ta maea, ‘A bakovi i uka ma ge mahuri na maki ni kani kunana. A bakovi bara i mahuri na tahuna i longototo a ngava lobo na Vure.’”
5Muri a hanitu i tulia e Isu, i vakapesi langea na mapana roho na Vure o Ierusalem, 6#Sng 91:11-12i takia, “Ge ioe a Tuna Vure, o to raga, a vuhuna a ngava ni here puru na Hinere i maea,
‘A Vure bara i rudu e huriki a agelo vona, ri valai ri matakari ioe.
Ri gi bole rike ioe na limane ria,
ma ge padi a vahamu a kedo.’”
7 #
Vin 6:16
Lakea e Isu i koli mule, i ta maea, “Ni here puru tabu na Hinere, i ta maea,
‘Naha ni tonia e Bakovi Dagi, a Vure vomu.’”
8Muri a hanitu i tuli tabua e Isu, ru lakea na mapana lolo dagi tara. I vakasiria vona a tanga lobo na malala, a bagetua ne ria. 9Lakea a hanitu i takia, “Ioe bara o turume puru, o vasileki nau, bara habi vomu a maki lobo nga.”
10 #
Vin 6:13
Lakea e Isu i takia, “Satan, o ha nau! A ngava ni here puru na Hinere i maea, ‘O kavurikea e Bakovi Dagi, a Vure vomu, o ramai kunana ia.’”
11Muri a hanitu i ha taroa. I valai ngane e huriki a agelo ri tuhoria.
E Isu i Vakatubu ni Vara
(Markus 1:14-15; Lukas 4:14-15; Ioanes 4:3,43-45)
12 #
Mat 14:3; Mrk 6:17; Luk 3:19-20 Na tahuna e Isu i longoa a velengane Ioanes ni ru dili na bavi, i hamule lakea o Galili. 13I malaga o Nasaret, i vano i made o Kapernaum, a tanga tabukoi na darilomu na malala ne huriki a kabu ne Sebulun e Naptali. 14Ngane i bele muholi a ngava ni taki polo na propet, e Isaia, i ta maea,
15 #
Ais 9:1-2
“E huriki ri made na malala ne huriki a Sebulun, e huriki a Naptali,
a dala i pori lakea na dari, na tabeke tara na naru e Iordan,
a robo e Galili, ra i made vona e huriki i uka ma ria a Iuda,
16e huriki ri made na uvo
ri masia a nipara dagi;
e huriki ri made na maniru na matenga,
a nipara i parai ria.”
17 #
Mat 3:2; 10:7 Ngane e Isu i vakatubu ni vara maea, “Mu pulo a vilone mua. A harikianga na hunu i tabukoi ge bele.”
E Isu i Gale e Huriki a Murimuri
(Markus 1:16-20; Lukas 5:2-11; Ioanes 1:35-42)
18Na parava tara, e Isu i lalaho na gagana Darilomu e Galili, i matai e maki tari rua, e Simon (a rana tara e Petrus), turana e tarina e Andreas. Ru ru a vuko, a vuhuna rua a tahodari. 19Lakea e Isu i gale rua, i ta maea, “Muru valai, muru muri nau. Ga tovo marua ni tuli valai nau e huriki a bakovi, i manga a hini ngane muru lakavu a manu.” 20Ru malaviriri kunana ru pea a vuko ne rua, ru muri maia.
21I laho lokovonga, i matai tabu e maki tarina rua, e Iakop e Ioanes. Ru made na aga turane tamane rua, e Sebedi, to hono a vuko. Lakea e Isu i gale rua. 22Ru malaviriri kunana ru pea e tamane rua na aga, ru ramaia e Isu.
E Isu i Vakamahuri e Huriki Ri Giloa
(Lukas 6:17-19)
23 #
Mat 9:35; Mrk 1:39; Apo 10:38 Muri e Isu i lakea na maka tanga na tabeke ne Galili, i dili na maka roho na vaponga, i vara e huriki na Velenga Kamumu na harikianga na hunu. I vakamahuri e huriki lobo ri tahoka a gilanga. 24#Mrk 6:55A velengana ni longo na tanga lobo na tabeke ne Siria, lakea e huriki ri tuli valai ne Isu e huriki ri giloa na gilanga vilihaliha, e huriki ri tahoka a nimadihi dagi, e huriki i dili ne ria a hanitu, e huriki ri matemate, e huriki a beu. Ri tuli valai vona, i kori ria lobo. 25#Mrk 3:7-8E huriki lobo o Galili, o Dekapolis, o Ierusalem, o Iudea, na tabeke tara ne Iordan, ri muri vona.
Currently Selected:
Mateo 4: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.