Vinara 34
34
E Moses i Mate
1E Moses i pea a bila ne Moab i sike na lolo e Nebo, na mapane Pisga na tabeke na nirikena haro na tanga e Ieriko. E Moses i pesi vona a hini nga, lakea e BAKOVI DAGI i vakasiri loboa vona a malala ge habia ne huriki a Israel. E BAKOVI DAGI i vakasiria vona a tabekena malala ne huriki a Gilead, i lakea i harena na tanga e Dan na tabeke mule sike. 2I vakasiria vona a malala ne huriki a Naptali, ne huriki a Epraim, ne huriki a Manase, a malala ne huriki a kabu ne Iuda, i vano i harena na Dari na Kurukuruna Malala na nirolona haro. 3I vakasiri e Moses vona a malala na tabeke mule puru ne Iuda, a bila i vakatubu o Ieriko, i vano i harena o Soar na tabeke mule puru. Ra tanga e Ieriko i tahoka a maka kai a det i kupo. 4#Vuh 12:7; 26:3; 28:13Muri e BAKOVI DAGI i takia e Moses i ta maea, “A ta muholi ne Abraham, ne Isak, ne Iakop ta ga habi ne huriki a hamone ria ra malala iea. A vakasiria vomu a malala, pali i uka ma go dili vona.”
5Lakea e Moses, a vora ne BAKOVI DAGI, i mate na malala ne huriki a Moab, i manga a ngava e BAKOVI DAGI i takia vona. 6E BAKOVI DAGI i tanua a podane Moses na maloku ne Moab, na tabeke mule lokovonga na tanga e Bet-Peor. I valai i harena mona, i uka tara viri ge lohoka vona a lovo ne Moses. 7E Moses i tahoka a pida i 120 i mate. I tababana ni gao, a matana i kamumu kunana. 8Na tahuna e Moses i mate pali, e huriki a Israel ri made na maloku ne Moab, ri taringia i harena na parava i ravulu tolu.
9Muri ne Moses i mate, a Vure i habi a lohokanga kamumu ne Iosua e tune Nun, a vuhuna e Moses i ru langa a limana vona. E huriki ri longototoa a nitane Iosua ri ramai a maka vinara e BAKOVI DAGI i vakuku e Moses vona.
10 #
Nim 33:11
I valai i harena mona i uka tara propet o Israel ge manga e Moses. E BAKOVI DAGI i ta turane Moses i manga a bakovi i ta turana e turana. 11E BAKOVI DAGI i rudu e Moses ge rata a maka nivakasiri dagi legelege ne vona ni ratapile e Parao, a hariki o Egipto, turana e huriki a bolekori vona, a robo vona lobo. E huriki a propet ranga, i uka ma ri kara ni ratana a maka nivakasiri i manga ne Moses i rata. 12I uka ma ri kara ni rata a maka maki dagi ri gi vakamangenge e huriki a bakovi a ngatavine, i manga a hini e Moses i rata na matane huriki a Israel.
Currently Selected:
Vinara 34: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.