Marcos 7
7
Jesus Hiykoxyawakna Judeu-ne Piranapni
1Waneya fariseu-ne hiyrun-koxa kasruklewaklerune hinanchitkaluru pirana hasruklewatatshine Jerusalém hichpajikatshine hapatjeyehitlu Jesus.
2Waneya retna satkaka Jesus hasrukleru kaptshomyoluneko hnika, waleni merojikanekwa hnika.
3Klu tshinanu fariseu-ne hiyrunu pimrine judeu-ne homkahitlu rutsrukatenna hasruklewle, wan-tshinatshri: hma meromyohkanuklunu hma merokakanotkanuklunu hi hnikanna.
4Niktshi hanjijexikowaka hichpajikatshri merokakotu hi hnikanru. Hiyrunu hixo pimri yokanruru pirana romkahitna, hirapkaka herojikolu pirana, hachhajkaka herojikolu pirana, hiyrun-koxa yomuwa himatkaka herojikolu pirana romkahitna.
5Waneya repomhaluna fariseu-ne hiyrunu kasruklewaklerune hinanchitkaluru pirana hasruklewatatshine:
— Klu tshinanhe pasruklene hi homkahitlu tsrunni hixannu seyni kaptshomyoluneko hnikna?
6Waneya Jesus hihitna, wla htshinna: — Hixachatatshinhi! Hoyakalu tokanu hinkakletatshri Isaías-ni hinkakletpotuthi hixa. Wla htshina yonatkaluru: “Nyi yine himalwutno hinama tsonuyma seyni hihchinikanuyna howukayno.
7Hmahijeru himalwuretnona; klu tshinanu rasrujikolna yineru hinanchireru tsonu.”
8Pnuteko htshina:
— Hixa hiknokachatlu Hoyakalu yokanatanru tokantshi tsrunni tokanu homkahixyawakapa.
9Wane htshin-koxna Jesus:
— Hixa hijhalu Hoyakalu halujyawaka kahnete hitajyawaklu hixako halujyawaka hkamhiywaka.
10Klu tshinanu Moisés-ni towre wla tshina: “Pkahwakpiratanru puru, punro.” Hiyrunu wane htshina: “Katukta hektuwaka tshinanwakatlu ruru, runro walepni hipnanuna.”
11Seyni hixa wan-tshina: “Satu jeji wan-tshininri ruru ho runro: Pa hixanu nimwinri nepixyawakamkapyi wale Corbã-ni (wale haluka tshinreta rimwaleru henekachlu Hoyakalunupa),
12hi hima rujhalu ruru runro repixyawakapa.
13Hoyakalu mahijeru towutlethi klu tshinanu hixako haluk-hixlexyawaka hkamhajeta hitsrukatenni yokchale tshinanu. Hixo wale pixkalutu hkamhajeta.
14Waneya htomhatnakna hixolune yine. Wane htshinna Jesus:
— Hyijnakotanno ptowrunekhi. Himatjemanru xye:
15Hinama jihlojikatshri hi pitshotlu yineru Hoyakalu hetanuya seyni yineru pitshotjeru halikaka namtshi hichpakhimaxikatshri.
16Katukta kajnakopnapa hyijnakoxyawakapa, hyijnakotanu.
17Waneya hixolune yin-yehi ruchpajini Jesus, hjihloklu pantshi waneya rasruklene hepomhalu klu pirana raluka tshinreta xye yapkaklu tshinanu.
18Waneya wane htshinna Jesus:
— Hix-koxa mimatjemkanhi? Hi he himatjemlu ptowruko maleka hwatshri jihlojinri yineru hi rumukata pitshotletlu?
19Klu tshinanu hihchinikanu hi hjihloka seyni hisatu hya waneya himane ruchpajya.
Xye pirana runkakkatkana rimaxyawakna ptowru nikkaluru himukata nikletka.
20Waneya pnuteko htshina:
— Yineru hitokote hichpajikatshri walekni pitshotlu yineru.
21Klu tshinanu hihchinikanu hichpajikatshri hektutu chinikantshikaka, himopatlewlu, tshowhuwlu, hiylalewlu, hapoklewlu,
22pohirewlu tsonu ruchinikanreta, muhlentshi, yokwijrewlu, mapatehonutshi, sotanuhonutshi, hektuwaka htshinanwakaxyawaklu Hoyakalu, tserpiranawlu wale nanuko, machinikantshi.
23Xye hektuntshi ptowruka yineru hitokote hichpajikatshrini. Walekni himtukjetlu yineru.
Suxo Pa Tshijne Hajero Piranapni
24Waneya wane ruchpakamxya Jesus. Waneya Tiro [hiyrunu Sidom] tshinikowaka poktshistsi hyatka. Waneya satu pantshi rapokatka. Walemka haluklu hike mimaxyawakanumkaplu wane rawyawaka seyni hi rumukata yohimleta.
25Seyni sato suxo jemyehitlu. Kkamtshitero tchitsho. Waneya tuna tyoptsojityehitlu Jesus jixistsi.
26Suxni grega, siro-fenícia-néroni. Waneya tanjitlu maleka ruknojyawakaplu kamtshi tchitsho mane hajeru.
27Seyni Jesus hihitlo:
— Pohluhapkatanna whentshine jinanu rixyawakapna. Hi kihleru hkonikowakna mturune hnikanruna kawene nwaka ruknojikowakapa.
28Waneya tuhitlu wala. Wane ttshinru:
— Wanekni, Tsru Hixikatshriwa, seyni haté kawe whenene mesa hpuko hwatshine koxa niklu mturune nijitu mesa hijrujikatshri.
29Waneya ruhitlo Jesus:
— Xye tokantshi tshinanu pyanutka. Kamtshi hichpajyatkalo pchitsho.
30Waneya topji tapojinixka tetatkalo tchitsho tukoluhakanata tojeko, kamtshi hichpajyatkalo.
Majnakotu Manrutu Piranapni
31Waneya ruchpakamtatnaka Tiro poktshistsiya, Sidom hiyrunu Decápolis hyapamta. Tsru powha Galileia rapokatka.
32Waneya ranikanwakatluna satu majnakotu myanumatkatu. Waneya ranjitluna wale hoho rutakamyoxyawakapa.
33Waneya Jesus haniklu yine kahneteya. Waneya himyoji hyochmakajnakopnatlu. Waneya rutskahata. Waneya hkamrukanrutlu jeji hitskahayma.
34Waneya tenhohne hyihata. Rinniphata. Waneya wane htshinru:
— Efatá.
Wale haluka tshinreta: kajnakopyi.
35Waneyatka ruhlewajnakopnatatka. Waneklukawa potuko hinru himaletakanatatshri hamhatka waneya hyanumhihlenutatka.
36Waneya Jesus-mka towutna yine hike hmunkajyawakanupna seyni yáholu hixo katamka rujretna wanepnawaka pnutetka runkaklewatna.
37Waneya ptowruneka jematshine tsru himyeklu rixna. Waneya wane htshinna wanna:
— Ptowruko kihler-potu hkamha. Hjemkakna majnakone, myanumatkane hyanumkaka.
Currently Selected:
Marcos 7: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
