Lucas 20
20
Jesus Tsru Potu Hitakkalurni Piranapni
1Waneya pa hohne Jesus Hoyakalupji hasrukakanaxyana yine, kihle piranalu potuko hiwekkaklewatatshri pirana, tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine, hiyrun-koxa tsrukakalune judeu-ne hapokanwakatlu.
2Waneya repomhaluna:
— Punkakanwu hanhe ruchpajya ptowutjeru xyekaka pkamhiywaka? Kathe henekyi xye tsru hitakkaluru?
3Waneya Jesus wan-tshin-hihretna:
— Hit-koxa satu hepomhalu nixanhi hixa. Hinkakanno xako.
4Kathe xawaka towutlu João h-batiz-lewaxyawaka? Ho Hoyakalu ho jeji?
5Waneya hyinuwaka hiynumsakakletna wannakakluko. Waneya wla htshinkakna:
— Wla wtshininri Hoyakalu, waneya repomhanunwu: “Haklu tshinanhe hi halixlu João?”
6Seyni wla wtshininri jeji ruchpajya htowutjeru, nyi hixolune yine sotlujetanunwu. Klu tshinanu ralixluna João-ni Hoyakalu tokanu hinkakletatshrini rixyawaka.
7Wale tshinanu wanna wla tshina hi hima rimatna hanu ruchpajyatka wale towuwlu.
8Hiyáhoni Jesus wla tshinna:
— Hit-koxa hi hinkakanhi hanukta ruchpajya xyekaka ntowuxijeru.
Hsana Kamrurewaxikatshine Hektu Kamrurerune Piranapni
9Waneya Jesus yinuwaka hinkakletanna yine satu yapkaklu pirana:
— Satu jeji yinuwaka hitakletlu uva. Waneya hsana hislahatshine renekamta. Waneya pa tshijne howuka hya. Hix-hohne ramha.
10Waneya rapokpapkoluxinixka ramikolu, jitakleru yokanatlu satu htowreru hitaklucha hislahatshine nwaka honantshi rawapyawakapa. Seyni hitaklucha hislahatshine kachitlu htowreru hkotshipjetluna. Hike manikamtkatuko hsatkakna.
11Waneya jitakleru yokanatatnaklu satu htowreru. Seyni ruylakluna wale koxni. Wan-rixa kamhalpatetanruna. Hike manikamtkatuko hsatkakna.
12Hiyrunuko wane hyokanatlu satu mapa rixinri seyni hitaklucha hislahatshine wale koxni ruylakna. Waneya uva-cha malekate ruknokanruna.
13Waneya jitakleru wla tshina hihchinikanuya: “Kluhe nkamhanu? Nyokanahetkotanru noturu namotleru. Wale hetko hkahwakpiratanna.”
14— Seyni rexinixkaluna hitaklucha hislahatshine, riynumsakakna wannakakluko, wla htshinna: “Ha xyekni jitakleru whene. Hayeri wuylateru. Waneyakni hitaklu hixanpatka!”
15— Hiyáhoni kahnete ruknokluna jitakleru whenni hitaklu mwiywakanu. Waneya ruylatanruna. Hiyáhoni klunerhe hkamhinna jitakleru?
16Runanu ruylatanunna hitaklucha hislahatshinepni. Waneya pimrineko hitaklucha hislahatshine renekanu. Waneya xye pirana hjeminixkana, wla htshinatkana:
— Ha, Hoyakalu, hi wane pixkakanru!
17Seyni Jesus yopukhatna waneya wla htshinna:
— Klunerhe xawaka raluka tshinreta Hoyakalu tokanu yonatkaluru wla htshinini: “Sotlu kpanawaklerune malukkotu rikahwakluna hepixlewatatshri potukni, psolupjiko poyehitatshrini wale.”?
18Katupnikta xye sotlu hoho hijrukanuna rumlokanuna. Hiyrun-koxa katupnikta xye sotlu hapokhohotanu, hipahi tsonunapni.
Repomhaluna Jesus Ho Tiyiro Raluka Wenutletluna César Ho Hike Piranapni
19Tsru hixikatshinwa sacerdote-ne hiyrun-koxa kasruklewaklerune hinanchitkaluru pirana hasruklewatatshine himatlu Jesus kamnitna yapkaklu piranaya runkakletleru. Raluka kachretmakluna Jesus seyni hpikna yine.
20Hiyáhoni hyinuwaka hislahletluna. Hwenutluna satkaka yineru waneya hyokanatluna rumlukanta hepomhalexyawakapluna Jesus. Kihle hchinikanune rixahoxnawana Jesus rumlukanuxyawakna. Wan-hixatshri hkachitko wale tshijne tsrukakalutene renekko.
21Waneya repomhatkaluna, wla htshinna:
— Kasruklewakleru, wimatyi pixa halikaka pirana ptshinjeta, pasrukjetkoxna. Hiyrun-koxa hi yine hixachatatshineko yokwityi seyni pasrukle halikakalutu Hoyakalu halujyawaka pirana.
22Hiyáhoni wepomhanyi minanchitkotlahe psoji tiyiro wenejyawaklu César Roma hajeru tsru hixikatshriwa? Ho wenejerhe ho hike?
23Seyni Jesus himathetahchinikanutna waneya wla htshinna:
— Haklu tshinanhe haluk-himlukantaletno?
24Hanikanro proji tiyiro. Netanro. Katu yaholunhe kat-hiwaknihe toproji hwatshri?
Waneya ruhitluna:
— César-ni.
25Waneya Jesus wla tshina:
— Henekanru César kluneruktapni César-nu henekanru hiyrun-koxa kluneruktapni Hoyakalunu waleko henekanru.
26Hi rumukata kachretluna tokantshiya yine hetanu. Hiyáhoni potshkena klu tshinanu rimyekna Jesus hihixya tshinanna.
Repomhaluna Yineru Hiwejyawakpatnaka Piranapni
27Waneya satkaka saduceu Jesus-stsi hipnatshri mkahwak-hiwekletkane hapoka. Waneya wla htshinna:
28— Kasruklewakleru, Moisés-ni yonaxyawu xye hiykolu pirana: “Jeji hipninipa ruknokamtanro hhanunro mwuhenetoko, walen-moleko hnunrotanro waleni hnunro. Twuhenewatanu hipnatshrini whenene hkahwajikowakapna.”
29Wan-rixa hahijewakatanna sete-ni jejinni moletkakatshinni. Tsrujruni hnunrowatni rupnana mwuhenetniko.
30Waneya repurni hnunrotlo hipnahnurutatshro. Rupnana mwuhenetniko.
31Waneko pixka rixa hahijewakatan-koxa satni mapa rixinri. Sete-ni hnunrotlewatni walaluto suxo. Rupnanna mwuhenenniko.
32Waneya suxni koxa hipnanatka.
33Xawakni hiwejikalur-hohnepatnaka, hanurpatkanhe thanuru? Klu tshinanu ptowruneko hnunrotaplo.
34Waneya Jesus hihita:
— Jejine, suxone xye tshijne hajene, hhanunrowjetna, hnuruwjetna.
35Seyni tujra hohne mnikawnakatupa himukata hwaletatshinepa, hiweklu yoptotatshinepa, hi hnunrowatanu hiyrunu hi hhanuruwatanna.
36Hiyrun-koxa hi rumukata hipnaletanutnakna klu tshinanu hiwejikalune Hoyakalu towrene tenhohne hajene pixka rixanutkana. Hoyakalu whenenepatkani klu tshinanu riwekkakatnakna.
37Moisés-ni hekhipotutlu hipnatshine hiwejyawakpatnaka halikaka. Klu tshinanu kamxihiru ruchpakmeroxini Moisés-ni wla htshinyawaka Tsru Hixikatshriwa Hoyakalu pirana “Abraão-ni Hoyakalutno, Isaque-ni Hoyakalutno, Jacó-ni Hoyakalut-koxno.”
38Wale hekhitlu Hoyakalu hiwekatshine Hoyakalutni seyni hi miwekkanepa Hoyakalutni. Klu tshinanu ptowrunek-yine hiweka wale tshinanu.
39Waneya satkaka kasruklewaklerune hinanchitkaluru pirana hasruklewatatshine wan-tshina:
— Wane potuko ptshina, Kasruklewakleru!
40Waneya wane pnute ptowru yineru pa pirana pika hepomhaletlu.
Cristo Davi-ni Klopichni Rixyawaka Piranapni
41Waneya Jesus hepomhana yine:
— Hanhe rumukata wla tshinretna yine, Messias klopichnixkani Davi-ni?
42Davi-ni potuko wan-tshina yonawahlo papel-mta, Salmos stenoya: “Tsru Hixikatshriwa Hoyakalu wan-tshinno Tsru Hixikatshriwa: Ptuplatanu npotukle sreta,
43haté pkamnitjene pijixi hpuko nutakanu.”
44Davi-ni potuko Rutsrukate tshinru Hoyakalu hiyáhoni hanhe rumukata Davi-ni klopicha hixleta Messias?
Jesus Hikolujyawakna Hinanchitkaluru Pirana Hasruklewatatshine Piranapni
45Waneya ptowru yineru jemanu Jesus wla tshinatkana rasruklene:
46— Xakoka hi kasruklewaklerune hinanchitkaluru pirana hasruklewatatshine yokwijetanhi. Rukchikhihlenutluna mkatshri hopowalu riyanyawakna. Rukchikhihlenutluna ralijikowakna hixowaka hetanu. Hnuretluna tuplawaka tsru hixikatshriwa tuplaxyawakapa ptowrupjika hanjihohnewakapji, kihleru niklur-yeh-potuko htuplatna.
47Hipnahnurutatshroni hkonahejnunkatetna. Seyni wanepnawaka hohanjihohneru rixjetna kihleru hkahwajikolupna. Seyni wanepnawaka tsru hapnokatlu rixkona.
Currently Selected:
Lucas 20: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
