João 20
20
Jesus Hiwejyawakatnaka Piranapni
1Waneya hyinuwakle seman-hohne, mapchahakowalu, Maria Madalena yanwakatlu yomletshi. Tetlu rerutkatka sotlu yomletshi hichyale.
2Hiyáhoni tasukamta Simão Pedro hiyrunu satu rasrukleru Jesus hamotleru yehi tya. Waneya wla ttshinna:
— Yomletshikta hkochpajyanatkaluna Tsru Hixikatshriwani. Hi wimata hanukta rutakanatkaluna.
3Hiyáhoni Pedro hiyrunu satu rasrukleru yomletshi nwaka hyana.
4Wanna hepi hasukamta seyni satu kapnuhamtlu Pedro. Wale hapka hapoklu yomletshi.
5Waneya ripyoka, retlu mkatshri sama seyni hi hjihloklu yomletshi.
6Waneya Simão Pedro hapkatamtatshri hapoka. Hjihloklu kapna. Retlu mkatshri sama wane hwakanatatshri.
7Ret-koxlu kasamalu Jesus-ni jiwu hiwtokakanatatshri. Hi pimri sama yehi rawakanata seyni pa sreta rawakanata rixannu hiwtokleko.
8Wane pnute satu rasrukleru hapokhapkatatshri jihlok-koxlu kapna. Retlu waneya ralixatka.
9(Seyni wanepnawaka hi rimatjemawaluna Hoyakalu tokanu Jesus hiwejinritnaka tshinanu hipnatshine tskalaya.)
10Waneya rasruklene hipjina hyatkana.
Jesus Hakanhayehixyawaklo Maria Madalena Piranapni
11Seyni Maria yomletshistsi tyopkakakanata, ttshiyahakanata. Ttshiyahakanaxiniwa, tipyoka texyawakaplu kapna.
12Waneya tetlu hepi hiwejikalune Hoyakalu towrene tenhohne hajene klatpowalune tuplakanatatshine Jesus-ni mane hwakanaxyawaka. Satu hijiwu hwakanaxyawaka sreta hwa, satu hijixi hwakanaxyawaka sreta hwa.
13Waneya repomhalona:
— Suxo, kluhe pitshiyahjeta?
Waneya tuhita, wla ttshinna:
— Klu tshinanu hanukta ranikanruna Nutsrukatni, hi nimata hanukta rutakanatkaluna.
14Wane ttshininixka, tuprotaka. Tetlu Jesus, hyopkakakanata seyni hi timathetlu Jesus rixyawaka.
15Waneya Jesus hepomhalo, wla htshinro:
— Suxo, klu tshinanrahe ptshiyahata? Kathe pujha?
Seyni wala hitaklucha hislahatshri tikahwaklu hiyáhoni wla ttshinru:
— Hitsrukatshi, pixa hanijiniplu, punkakanno putajyawaklu waneya nwapanru.
16Waneya Jesus wan-tshinro:
— Maria.
Waneya tuprotaka, hipokananu wla ttshinru judeu-ne tokanuya:
— Rabôni! (wale haluka tshinreta kasruklewakleru.)
17Waneya Jesus wan-tshinro:
— Hi pkachitanno klu tshinanu Nuru yehi hi nyawa. Seyni nomolene yehi pyanu, punkakanna: “Teno nyanu Nuru yehi hiyrunu hixa Hiru yehi, Noyakalute yehi hiyrunu hixa Hoyakalute yehi nyanu.”
18Waneya Maria Madalena yanwakatna rasruklene tunkajyawakapna Tsru Hixikatshriwa texyawakatka. Hiyrunu tunkakatkana ptowru pirana runkajyatkalo.
Jesus Rasruklene Hakanhayehixyawaka Piranapni
19Waneya hyinuwakle seman-hohne kayno, Jesus hasruklene hapatjetatka ruchyatka hiphaptokaka judeu-ne hamlenu tshinanu. Waneya Jesus hapokatka wanna hanikajite hyopkakatka. Waneya wane htshinna:
— Kihle hchinikanuphi.
20Rali wan-tshinretatka, rekhitna himyo, hikwansat-koxa. Waneya hpoyikowpotutna rasruklene Tsru Hixikatshriwa rexyawakna.
21Waneya Jesus rimepe wan-tshinretna:
— Kihle hchinikanuphi. Nuru xye tshijne yokanaxyawakno pixka nixa yokanrethi hixa.
22Waneya wane htshininixka, rajpokanwakatna waneya wla htshinna:
— Hyoptotanru Hoyakalu Hiwejikaluru.
23Hixa hamtakahchinikanyehixinri pimrine hektunu waneya Hoyakalu koxa hamtakahchinikanyehitanru wanna hektunu. Seyni hixa hma mamtakahchinikanyehixiniklunru pimrine hektunu, wanna hektunu hi ramtakahchinikanyehitka rektunna.
Jesus Tomé Hakanhayehixyawaka Piranapni
24Tomé, walekatkani Dídimo tshinkaluru, satu Doze Jesus hasrukleru, hi wannayma rawakanata, Jesus hakanhayehixiniklunna rasruklene.
25Hiyáhoni pimrine hasruklene wla tshinru:
— Wetatkalu Tsru Hixikatshriwa.
Seyni Tomé wan-tshinna:
— Nma metkanuklunuplu prego yohloxyawaka marca-te himyo hiyrunu nomyoji nma yochmakkanuklunuplu prego yohloxyawaka hiyrun-koxa nomyo nma yochmakkanuklunuplu hikwansata yohloxikolu, hi nalixanru.
Jesus Hiyrunuko Hakanhayehixyawakna Rasruklene Piranapni
26Waneya pa semana hiknohinixka, wanepjitnakna Jesus hasruklene Tomé-yma. Waneya yáholu hiphaptokaka hichyaluru potuko, Jesus jihlokatka wanna hanikajite hyopkakatka, waneya wla htshinna:
— Kihle hchinikanuphi.
27Waneya Jesus wla tshinru Tomé:
— Pimyoji nomyo putakanu, petamyotanno. Pomyokanu, nokwansata pyochmakanru. Hi malixakletupyi seyni halixatshripyi.
28Waneya Tomé wan-tshinru Jesus:
— Nutsrukate! Noyakalute!
29Waneya Jesus wla tshinru:
— Pexyawakno tshinanu palixatka seyni himuwatatshinepni yine yáholu himka retannona seyni ralixannona.
Klu Riyonatka Xye Pirana
30Hixo pimri hetkalurkaka hkamha Jesus rasruklene hetanuya, twu papel-mta mutak-yonhatkotu.
31Seyni xyekaka yonatka hixa halixyawakaplu Jesus, Hoyakalu Whene Cristo (Messias) rixyawaka hiyrun-koxa halixinri waneyaphi hiwejinri wale hiwaka tshinanu.
Currently Selected:
João 20: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
