Atos 12
12
Herodes Kamnixyawaklu Tiago Hiyrunu Pedro Piranapni
1Waneklu papko phuru Herodes yinuwaka kachretna satkaka yineru Cristo halixatshine hapatjetatshine hkamnixyawakna.
2Waneya Herodes hiylakjixlu hiylalewapiya, espada tshinkaluru, Tiago, João mole.
3Waneya Herodes rexiniklunna wale poyikowkakatkana judeu-ne, Pedro koxa hkachijixatka. Xye wan-hixatka himretkaluru hohne pão myapjetkotu kamhikolu hohne.
4Waneya rali kachretatkalu Pedro, Herodes preso rutaklu. Soldado-ne quatro ptohkaka quatro-kaka satkaka ptohkaka hislahakanatlu Pedro. Herodes honra haluka Pedro hkochpakhetanuxyawakna judeu-ne Páscoa hohne wkatanuko.
5Waneya Pedro preso hwa ruslahkatka seyni Cristo halixatshine hapatjetatshine psol-mixkonuko Hoyakalu ranjihohneyehitluna Pedro.
6Waneya Herodes haluka kochpaklexinixkalu Pedro rekhixyawakapna, wale yetshno Pedro himkakanata hepi soldado-ne hanikajiteya. Pedro hostutka hepi sretkanoko soldado-neya. Soldado-ne hinotatkalu preso hiphaptote.
7Waneya chinpotukawa rakanhayehitlu Pedro satu hiwejikaluru Hoyakalu towreru tenhohne hichpajikatshri katalu hatatlu preso hruko. Waneya Pedro-thana rutpeta hiwejikaluru Hoyakalu towreru tenhohne hichpajikatshri. Hkomyeklu. Waneya wane htshina:
— Wuya chinpotu pyotunotanu.
Waneya yomuwatsa hijrukatka himyo hwatsakanatatshri.
8Waneya hiwejikaluru Hoyakalu towreru tenhohne hichpajikatshri wan-tshinru:
— Postuskotatanu. Pyochmakanro p-sandalha-te.
Waneya wan-rixatka Pedro. Waneya hiwejikaluru Hoyakalu towreru tenhohne hichpajikatshri wan-tshinru:
— Pistono kpixnuru pyochmakanu. Pomkahitanno.
Pedro Preso Hichpajyawaka Piranapni
9Waneya preso yehi ruchpakamxya Pedro. Romkahimtlu Hoyakalu towreru. Seyni Pedro hi himatatka ho halikakla hiwejikaluru Hoyakalu towreru tenhohne hichpajikatshri kochpaklu ho rupnawlechala. Hoyakalu pixkonu hetkaluru rikahwaklu.
10Waneya riknohamtluna mitshikananu soldado-ne xkehi yehi hiyrun-koxa wale hapkatatatshri soldado-ne xkehi yehi riknohna. Waneya rapokna hiphapto yomuwa kamhikaluru poktshi jihlojikowaka yehi. Seyni hiphapto hitpukamta wale nanwaka wanna tshinanu. Waneya ruchpakamtna satu hapo hyapamtna waneya chinpotukawa hiwejikaluru Hoyakalu towreru tenhohne hichpajikatshri hichomtlu Pedro waneya.
11Waneya Pedro hichinikanuwpotutatka. Waneya wane htshina:
— Xawakni nimatlu halikakni. Halikakni Tsru Hixikatshriwa Hoyakalu yokanatlu htowreru hiwejikaluru tenhohne hichpajikatshri hkochpajyawakapno Herodes-myoya hiyrun-koxa ptowruka judeu-nerune haluk-hixlexyawakmakno.
12Rimatjeminixka Pedro wan-rixyawakatka hyatka, Maria, João Marcos hinropji nwaka hyatka. Hixo yine wane hapatjekanaxya. Ranjihohnekanatna.
13Waneya Pedro hitpetlu hiphapto pantshi yoptowaka sreta. Maria towrero Rode hiwakatletatshro hetaplu katnihe.
14Waneya timatjemtokanuxinixkalu Pedro, tumuwpotuthonuka haté hi tkotpuklu hiphapto seyni t-satokhonukatka tasukamxyawaka. Tunkaklewata Pedro hiphapto maleka sreta hwa.
15Waneya wane htshinrona:
— Pix-hetko hipukalewata!
Seyni wala hinkakletlu halikaka pirana rixyawaka. Waneya wanna wan-tshina:
— Wale hetko Pedro-ni samenrutka.
16Seyni Pedro pnuteko hixa hitpereta. Hiyáhoni hiphapto hkotpukna retluna Pedro-katkani. Rimyekna.
17Waneya Pedro hekhitna himyoyma potshke rixyawakna waneya runkakna hanu rixa kochpakletlu preso yehiya Tsru Hixikatshriwa Hoyakalu. Waneya wane htshina:
— Xye pirana Tiago hinkakanu hiyrun-koxa wimolene Cristo halixatshine.
Waneya wane ruchpajyatka pnuko hyatka.
18Waneya wale prikatkani tsru kaheknanuwlu rixna soldado-ne klukta rixanatka Pedro-ni.
19Ptowru sretaka rujhiylu Herodes seyni hi rukchikatkalu. Hiyáhoni repomsatna soldado-ne Pedro hinotatshine waneya ruylajixatkana soldado-ne. Waneya Herodes Judeia tshijne hichpajyatka Cesareia poktshi rapokatka. Wane rawatka pchini hohnejiji.
Herodes Hipninri Piranapni
20Phuru Herodes hahkajetna hepi poktshi hajene, Tiro poktshi hiyrunu Sidom poktshi hajene. Seyni wanna hepi poktshikak-hajene ptowruneka yanwakatlu Herodes. Mitshikananhapka rukchiklu Blasto hepixlewle, walekni Herodes towreru. Wane pnute Herodes nwaka hyanna hiyáhoni ranjitluna hmahnanuwaxyawakanupa klu tshinanu hyoptotluna nikkaluru htshijneyna Herodes tshijne hichpajikatshri.
21Waneya h-marca-xikolu hohne Herodes makatlu phuru mkalu kihleru. Phuruko htuplawakle htuplata Herodes waneya runkaklewyehitna.
22Waneya hsaplewatna yine:
— Tukwala hoyakalu plama potuko hi yineru plamatkani.
23Hiyáhoni waneklu papko potuko hiwejikaluru Hoyakalu towreru tenhohne hajeru himtukatkalu Herodes-ni klu tshinanu hi hpoyahnutakjixlewatni Hoyakalu potu. Waneya homawlu nikanru waneya rupnanatka.
24Seyni Hoyakalu tokanu tseruwnatka hiyrunu rixolewnatka rupalatatka.
25Waneya hnikaxinixkaluna hkamrurna Barnabé hiyrunu Saulo Jerusalém poktshi hsatokna, ranikluna João Marcos tshinkaluru.
Currently Selected:
Atos 12: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
