Atos 1
1
Jesus Nurrene Kamrure Piranapni
1Teófilo tshinanupni twu yonawahlo, yonawahlo mitshikananu nyonreru, nyonatlu Jesus pirana, ptowruka Jesus kamhanru pirana hiyrunu runkakle pirana psoluka, Jesus hasruklewle yinuwaklekananuko;
2haté tenhohne ranikkoklunutka papko pirana potuko. Waneya Jesus tenhohne hma yaknuklunuwa ruykotna jejine, hnurrene, Hoyakalu Hiwejikaluru mixkonuyma waneya tenhohne ranikkatka Jesus.
3Rali hipnalexinixka Jesus, riwekatnaka waneya quarenta hohne pejnu tsonu rimwatkana hnurrene hiwekatshriko rixyawakatka, hiyrunu rekhipotutna hiwekatshri rixyawakatka. Wane pchinika Jesus hiynumsatna hnurrene Hoyakalu pohirewaxyawaka pirana.
4Jesus wannayma rapatjekanaxini ruykotna hnurrene Jerusalém poktshi hma muchpajyawakanupna seyni hkahwakanruna haté Hirtshi henejyana wale runkaklexyatkana. Wane htshinatkana Jesus:
— Hita hinkajyatkahi.
5Klu tshinanu halikaka João batiza-thi honhaya, seyni hi hix-hohnepnitshi hixa batiza-tko Hoyakalu Hiwejikaluruya.
Jesus Tenhohne Hanijikowaka Piranapni
6Waneya hapatjekanatatshine hepomhalu Jesus. Wane htshinruna:
— Tsru Hixikatshriwa, xawakniktshikla puhletanru Israel mitshikananu pixka rixyawakapa psol-tshijneko htowuxyawakatnaka?
7Seyni Jesus hihitna:
— Hixa hi hijhalu himaxyawaklu wale hohnekaka, hi hipapkoluko. Hirtshi nuretanru waleko hihchinikanuya.
8Seyni Hoyakalu Hiwejikaluru hix-hoho rapojinipa hyoptotanru pixkontshi hiyáhoni nuphujtatjenephi Jerusalém poktshiya hiyrunu Judeia tshijne psoluka, Samaria tshijneya, haté hmahaxyawaka tshiji nuphujtatjeneyaphi.
9Waneya wane rali tshinrexinixka, Jesus teno ranikkatka wanna hetanuya. Waneya satu hohimkohi katshpoklu Jesus haté hi rumukata hetletatkaluna.
10Seyni wanna teno hyihakananumtawana Jesus hatskotka pchinika. Waneya chinpotukawa hepi jejine klatalu mkatshri hitakatshine wannastsi potuko hakanhiyatka.
11Waneya wane htshinna:
— Jejine Galileia hajene, klu tshinanhe wane hwa hixa teno hyihjeta? Xyekni Jesus hixayma hwakanatatshri, tenhohne yatshritka waleko satkapanu hanukta rixa hatskoletatka hixa hetanuya wane potuko rixa hapokletanutnaka.
Jerusalém Poktshi Rawyawakna Jesus Nurrene Piranapni
12Waneya nuretkalune satokanwakatlu Jerusalém poktshi. Oliveiras mriji runyatkana satu quilômetro pchini.
13Waneya Jerusalém poktshi rapojinixkana, hihruko nwaka hyamtna, pantshi teno hwahrukotatshri. Wane rawjexyawakna Pedro, João, Tiago, André, Filipe, Tomé, Bartolomeu, Mateus, Tiago, Alfeu whene, Simão honra Israel tshijne tshinanu mixkowatatshrini, hiyrun-koxa Judas, Tiago whene.
14Nyi yine ptowruneka pa hchinikanurune hi rucho hanjihohneretna, wannaymalune Jesus molene jejine, Jesus hinro, hiyrun-koxa pimrone suxone.
Matias Nurexikowaka Piranapni
15Waneklu papko Pedro yopkaka Jesus hasruklene hanikajite (cento e vinte yine hapatjetatka) waneya wane htshina:
16— Jejine nomolene, hpoyahokakatkalu Hoyakalu tokanu yonatkaluru Hoyakalu Hiwejikaluru Davi-ni nama hinkakletakanatatkalu Judas tshinkaluru pirana walekni hanikna Jesus kachitjenepa.
17Waleni wepir-potuko. Wale hepixjekanatwu wkamrure tshinanu.
18Waneya htiyirote tshiji ranjixya hkamrure himtuknu tshinanu. Seyni waneko hyawniyanatka, himane rupchejyanatka, rixkapi hichpajyanatkalu.
19Jerusalém hajene ptowruneka jempiranyehitlu, wale tshinanu wale tshijne rutakhiwakatluna “Aceldama” tshinikowaka, wannanruya wla htshina “Jratshijneru”.
20Waneya pnute hya hinkakletna Pedro:
— Hoyakalu pirana yonatkaluru Salmos steno rawa: “Malepjiplu, hike wane hwanu.”
— Hiyrunu wane koxa htshina yonretka: “Satuko jeji wale kachrijru jihlokanu nuretkaluru rixyawakpatka.”
21— Wale tshinanu xawakni wnuretanru satu jeji hixa wepire rixyawakapa, Jesus Cristo hiwejinritnaka pirana wumuphujtatjeru rixyawakapa. Rujhalu wiyanjereru rixyawaka Jesus hix-yehi rawakanaxini,
22João batiza-xinri Jesus hohnekananuko haté tenhohne ranikkoklunutka papko.
23Hiyáhoni hepi jejine htomhana. Satu jeji hepi hiwaklu José Barsabás. Satu hhiwakni Justo. Satu jeji Matias tshinkaluru.
24Waneya wanna ptowruneka hanjihohnetatka wane htshinna:
— Hoyakalu, pixa tsonu himathethajitna yine. Pekhitanwu hanuru nyi hepi pnuretatka
25xye kamrurtshi hkamhiywakapa. Judas tshinkaluru hichotlu kamrurtshi hiyáhoni hyatka rawyawakpatka. Tsru Hixikatshriwa Hoyakalu, pekhitanwu katukta jihlokanru wale kachrijrupatka.
26Waneya satu hiknoklu hkamhana hnurexyawakapluna hiyáhoni hiknoklu hekhitlu Matias-patkani. Waneya repiretna onze Jesus nurrene.
Currently Selected:
Atos 1: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
