Génesis 7

Nishuta para paramusqanmanta

1Chaymantan Señor Diosqa Noeyta niran:

—Qanllan kay pachapi llapallan runakunamantaqa allin justo runa kanki. Chayraykuyá chay *arca ruwasqaykiman familiaykikunapiwan haykuy. 2Chay arcamanyá haykuchinki ch'uya animalkunamanta qanchis orqo animalkunata hinallataq qanchis china animalkunatawan. Saynallataqyá mana ch'uya animalkunamantapas orqo chinantinta huk paresllata arcaman haykuchinki. 3Hinallataqyá chay arcamanqa haykuchillankitaq alton phawaq animalkunamantapas qanchis orqo animalkunata hinallataq qanchis china animalkunatawan, saynapi kay allpa pachapi chay phawaq animalkunapas ama chinkanankupaq. 4Noqaqa qanchis p'unchawmantan nishu parata parachimusaq tawa chunka p'unchaw hinallataq tawa chunka tuta ima. Saynapin kay allpa pachapi llapallan unanchasqay tukuy kawsaqkunataqa chinkachisaq, nispa.

5Hinaqtinmi Noeyqa Diospa kamachisqanman hina llapallanta ruwaran.

6Noeyqa 600 watayoqmi kasharan nishuta para-paramuspa, kay pachaman unu qochaspa hunt'ariqtinqa. 7Hinaqtinmi Noeyqa manaraq para-paramushaqtin chay arcaman haykuran warmintin, qari wawakunantin hinallataq qachunninkunapiwan ima, chay nishu paramanta salvakunankupaq. 8Chay arcamanqa haykullarankutaqmi ch'uya animalkunapas, mana ch'uya animalkunapas, alton phawaq animalkunapas hinallataq kay allpa pachapi qasqonpallan puriq animalkunapas. 9Chay llapallan animalkunan Noeywan kushka haykuranku orqo chinantin, Diospa nisqanman hina.

10Qanchis p'unchawmantan nishuta para-parayta qallarimuran kay pachaman. 11Noeyqa 600 watanpin kasharan. Hinaspan ishkay kaq killapi, chunka qanchisniyoq p'unchawpi ukhu pachamanta unu t'oqyamuran; hinallataqmi alto cielomantapas unu phaqchirimuran. 12Chaymi nishuta para paramuran 40 p'unchaw hinallataq 40 tuta ima. 13Chay para manaraq qallarishaqtinmi, Noeyqa arcaman haykuran warmintin hinallataq kinsantin qari wawankunapiwan ima. Chay wawankunan karanku: Sem, Cam hinallataq Jafet. Hinaspapas chay arcamanqa haykullarankutaqmi Noeypa kinsantin qachunninkunapas. 14Saynallataqmi chay arcamanqa haykullarankutaq tukuy animalkunapas clasenman hina: salqa animalkuna, uywana animalkuna, qasqonpallan puriq animalkuna hinallataq alton phawaq animalkunapas. 15Noeypa arca ruwasqanmanqa llapallan kawsaq animalkunamantan, orqo chinantin paresnintinkama haykuranku. 16Chay arcamanqa orqo chinantinmi animalkunaqa haykuranku, Diospa kamachisqanman hina. Chaymantan Diosqa chay arcapa punkunta wishq'aran.

17Kay pachapiqa 40 p'unchawmi nishuta para paramuran. Hinaqtinmi unu kay allpa pachapi qochaspa hunt'aran. Chaymi chay arcaqa unu hawapi wayt'aran. 18Kay allpa pachapiqa ratollan unuqa hunt'ayta qallariran. Hinaqtinmi chay arcaqa unu hawapi wayt'aran. 19Unuqa kay pachaman nishuta hunt'aspanmi, hatunkaray orqokunatapas taparan. 20Hinaspan unuqa astawan hunt'aspa, hatunkaray orqokunata tapaspa, qanchis metro altotaraq pasaran. 21Chaymi kay pachapi llapallan kawsaqkunaqa wañuranku: alton phawaq animalkuna, salqa animalkuna, uywana animalkuna, qasqonpallan puriq animalkuna hinallataq llapallan runakunapas. 22Hinaqtinmi kay allpa pachapi llapallan samatyaspa kawsaq animalkunaqa wañuranku. 23Saynatan Diosqa chinkachiran kay pachapi llapallan runakunata, animalkunata, qasqonpalla puriq animalkunata hinallataq alton phawaq animalkunatapas. Ichaqa manan wañuranchu Noeyqa hinallataq paywan arcapi kaqkunapas. 24Unuqa kay pachapin qochalayaran 150 p'unchawkama.

Currently Selected:

Génesis 7: QEAÑT

Highlight

Copy