Génesis 11

Babel sutiyoq llaqtapi torreta hatarichisqankumanta

1Kay pachapi llapallan runakunaqa huk rimaynillayoqmi karanku. 2Hinaspan runakunaqa intipa lloqsimunan lawmanta lloqsimuspanku, Sinar nisqa lawman rispa, tariranku huk pampata. Hinaspan chay lugarpi qepakuranku tiyanankupaq. 3Hinaspan paykunaqa ninakuranku khaynata:

—Ruwasunchis ladrillokunata; hinaspa hornopi q'osasunchis, nispanku.

Saynapin chay ruwasqanku ladrillokunaqa rumipa rantinta serviran. Breañataqmi mezclapa rantinta serviran. 4Chaymantan chay runakunaqa ninakuranku khaynata:

—Hatarichisunchis huk llaqtata, saynallataq cielokama aypaq hatunkaray torretawan ima. Hinaqtinmi noqanchisqa allin reqsisqa kasunchis. Saynapin mana ni pipas ch'eqechiytaqa atiwasunchu kay enteron pachantinmanqa, nispanku.

5Ichaqa Dios Tayta urayamuspanmi, chay runakunapa ruwasqanku llaqtata hinallataq chay ruwasqanku torretawan qawariran. 6Hinaspan Dios Taytaqa niran:

—Kay runakunaqa huk llaqta hinallan kashanku. Huk rimayllayoqmi kankupas. Chayraykun chay llank'ay qallarisqankutaqa mana ni imapas hark'anqachu ruway tukunankupaqqa. 7Kunanyá urayuspanchis chay rimayninkuta pantachimusun, saynapi paykunapura ama entiendenakunankupaq, nispanku.

8Hinaqtinmi Señor Diosqa chaypi llank'aq runakunataqa enteron kay pachantinman ch'eqechipuran. Saynapin chay llaqta hatarichiytaqa saqeranku. 9Chay llaqtapin runakunapa rimayninta Diosqa pantachiran ama entiendenakunankupaq. Chayraykun chay llaqtaqa Babelwan sutichasqa karan. Saynapin Señor Diosqa chay lugarmanta runakunataqa enteron kay pachantinman ch'eqechiran.

Sempa mirayninmanta

(1 Cr 1.24-27)

10Kay runakunan Sem runapa mirayninkuna karanku. Sempa wawanmi karan Arfaxad. Pachak watanpi Sem kashaqtinmi, chay wawanqa naceran. Chayqa karan nishu para pasasqanpa ishkay wata qepanmanmi. 11Sem runaqa wawan Arfaxadpa nacesqanpa qepantan 500 watataraq kawsaran. Chay watakunapin Sempaqa kallarantaq huk qari wawankunapas hinallataq warmi ususinkunapas.

12Arfaxadpa wawanmi karan Sala. Chay wawanqa naceran 35 watanpi Arfaxad kashaqtinmi. 13Arfaxadqa wawan Salapa nacesqanpa qepantan 403 watataraq kawsaran. Chay watakunapin Arfaxadpaqa karallarantaq qari wawankunapas hinallataq warmi ususinkunapas.

14Salapa wawanmi karan Heber. Chay wawanqa naceran 30 watanpi Sala kashaqtinmi. 15Salaqa wawan Heberpa nacesqanpa qepantan 403 watataraq kawsaran. Chay watakunapin Salapaqa kallarantaq qari wawankunapas hinallataq warmi ususinkunapas.

16Heberpa wawanmi karan Peleg. Chay wawanqa naceran 34 watanpi Heber kashaqtinmi. 17Heberqa wawan Pelegpa nacesqanpa qepantan 430 watataraq kawsaran. Chay watakunapin Heberpaqa kallarantaq qari wawankunapas hinallataq warmi ususinkunapas.

18Pelegpa wawanmi karan Reu. Chay wawanqa naceran 30 watanpi Peleg kashaqtinmi. 19Pelegqa wawan Reupa nacesqanpa qepantan 209 watataraq kawsaran. Chay watakunapin Pelegpaqa kallarantaq qari wawankunapas hinallataq warmi ususinkunapas.

20Reupa wawanmi karan Serug. Chay wawanqa naceran 32 watanpi Reu kashaqtinmi. 21Reuqa wawan Serugpa nacesqanpa qepantan 207 watataraq kawsaran. Chay watakunapin Reupaqa kallarantaq qari wawankunapas hinallataq warmi ususinkunapas.

22Serugpa wawanmi karan *Nacor. Chay wawanqa naceran 30 watanpi Serug kashaqtinmi. 23Serugqa wawan Nacorpa nacesqanpa qepantan 200 watataraq kawsaran. Chay watakunapin Serugpaqa kallarantaq qari wawankunapas hinallataq warmi ususinkunapas.

24Nacorpa wawanmi karan Taré. Chay wawanqa naceran 29 watanpi Taré kashaqtinmi. 25Nacorqa wawan Tareypa nacesqanpa qepantan 119 watataraq kawsaran. Chay watakunapin Nacorpaqa kallarantaq qari wawankunapas hinallataq warmi ususinkunapas.

26Tareypa wawankunan karanku: Abram, Nacor hinallataq Harán ima.

Tareypa mirayninmanta

27Taré runapa mirayninkunan kaykuna karanku. Tareypa wawankunan karanku: Abram, Nacor hinallataq Harán ima. Haranpa wawanmi karan Lot. 28Chay Haranmi papan Tareymantapas aswan más primertaraq wañupuran, Caldea nisqa lawpi nacesqan Ur llaqtapi.

29Abrammi casarakuran Saraiwan. Abrampa wawqen Nacorñataqmi casarakuran Harán runapa ususin Milcawan. Chay Harán runapaqa kallarantaqmi Isca sutiyoq ususinpas. 30Ichaqa Saraiqa qolluri warmin karan. Chaymi wawayoq kaytaqa mana atiranchu.

31Tareyqa Caldea lawpi Ur nisqa llaqtamantan lloqsiran. Hinaspan Tareyqa wawan Abramta, nieton Lotta hinallataq qachunnin Saraitawan pusarikuspa, Canaán lawman riran. Ichaqa Canaán lawman manaraq chayashaspanmi, Harán nisqa llaqtaman chayaranku. Hinaspan chaypi qepakuspa tiyaranku. 32Hinaspan Tareyqa 205 watayoq kashaspa, chay Harán llaqtapi wañukapuran.

Currently Selected:

Génesis 11: QEAÑT

Highlight

Copy