IIMU/UUNGW 13

Abramu nee Loti

1Abramu iri tláy iri /iikú xuú' ay yaamaá Negebu awa baraá yaamaá Kana'ani, inós nee hareerós nee umuúqo gár i kona. Nee Loti tina koné'. 2Abramu a daqaarmo. Hikwaá yaariir gi kón, tam peésa nee sahaábuwo. 3Abramu iri yaamaá Negebuú wa tláy, iri kumaamiít aaiiwo ay yaamaá Beteli nee gixsár Ai. 4Didá' kitángw ilahhooa ngway tleéhh. Nee Abramu umuú AAKOÓ MUNGÚ guri didá' wa ateetín.

5Nee Loti, kudá' naa loohiye' nee Abramu, inós sleeme daqooroó hikwa nee muruú ququmát gu kón sleeme, nee heemaduuwós sleeme as múk do'ós nee lawaaleerós sleémeero. 6Yaamu niri alné' qawtantá muruuine, tam inooín niwa dinkwár wa hootiya', asma hikwaaín ki yaariir. 7Naagáy gila niri xayé' tla/ángw de'eemuusér hikwaá Abramu nee de'eemuusér hikwaá Loti. Nee de'emadaádae múk xoorór Kana'ani nee múk xoorór Perisi tan yaamuudá' wa hoot.

8Abramu Loti guri báy, «Gila mindiwa xayé' tla/ángw aníng nee kuunge, laqaá tla/ángw de'eemuuser'eé' nee de'eemuuseeroge. Asma án nee kuúng a hhae. 9Yaamu sleémeero diroge ki geehhoóeéke? Gím ti paraatlaán. Kuúng bar baskú slá', aníng a /iikú xuú'. Ala kuúng bar /iikú slá', aníng an baskú xuú'.»

10Loti iwa qaytsiít, xatstá Yordani gana ár ay gixsár Soari, i ma'aá koón umuúqo diiro, adór asalmoó Mungú,#13:10 Asalmoó Mungú: Gídaabárós a asalmoodá' ta bay Edeni. nee adór yaamaá Misri. Qoomaarí a qoomár AAKOÓ MUNGÚ Sodoma nee Gomora ngiwa qwaareesiiká. 11Naagáy Loti xatstá Yordani gari sleémeero wa tsawaár, iri tláy, iri bihhaá da/aá xuú'. Tiri adoorír paraatliyé'. 12Abramu iri hoót baraá yaamaá Kana'anír wa alé, nee Loti iri hoót baraá gixsaduudaá xatstadá' wa alé, heémarós gari surkuús ay gixsár Sodoma. 13Ala múk Sodoma a múk tlákw oo tlakweemaá yaariir gaa tlehhahhiit dír geeraá AAKOÓ MUNGUHE.

Abramu iwa loohi baraá gixsár Hebroni

14Loti tiwa paraátl dír Abramuwo, AAKOÓ MUNGÚ Abramu guri báy, «Áx qaytsiít iimír diirí ti dirí' wa alé ay bihhe sleémeero, /iya nee basko, da/aáw nee /uwawo. 15Asma yaamuká' sleémeero ta ga/eer, án ngi kuúngií haniís nee xwaylarók ay kureér. 16Aníng xwaylarók a ureés ngari adór teerír yaamu tleéhh. Barnaxes hee teerír yaamu faarooro ga aleesláy, daqaní xwaylarók sleeme ga aleesláy faarooro. 17Sihhiít, hi'iimiít baraá yaamuká' wa alé, baraá bihheerós nee tlenaangose. Asma yaamuká' ngin kuúngí haniís.» 18Naagáy Abramu heémarós gay surkuús, iri hardáh dír ta/eewoó heé ta bay Mamre, baraá yaamaá Hebroni. Iri didá' wa hoót. Didaádae kitángw ilahhooa guri tleéhh as AAKOÓ MUNGÚ.

Currently Selected:

IIMU/UUNGW 13: IRQW

Highlight

Copy