Markə 12
12
Dan mə gəgan wa sôwâ mə bro' məni wə ji sine viŋə
(Mat 21.33-46; Luk 20.9-19)
1Kəki rum, Zezu təŋ kə in dan kə dan mə gəgan nday ne: «Swə məsin pe gu viŋə sine umu. Mum dluɓ vun rum, mum dla zra kədan mum 'yem vra' gu wə han, ɓay mum dla dap kədan sôwâ məni ji sine viŋə rum gak gay' wə hana. Kəki rum, mum ar sine gu rum wə ɓa sum ji sine ɓay 'ya rəkwaya#Esa 5.1-2. 2Kəri məni wakaya rum mbə day, bə sine viŋə nə sin bə sin um wə hay' sum ji sine kədan mum ve vun kwa wakaya um wə ɓa ndaya. 3Ama sum ji sine viŋə kaw bə sin nə, pum ɓay 'way num ge kə ɓa uraya. 4Bə sine nə faŋ sin bə sin um məsini. Sum ji sine pum wa ne num ɓay i numu. 5Bə sine nə faŋ sin bə sin um məsin kəreme. Sum ji sine ci numu. Handay gi ndəna' kə sum sin um məsin kuni juk ta'a. Handay pum məsin, ɓay handay ci məsini. 6Gwa' vay vra' um ɗaw kərem məni mum bə wə hay' rumu. Ndo' vun rum, mum sin vay nə hay' ndaya. Mum ɗik wə vunduk rumu: Handay də mbâ vay mana. 7Ama sum ji sine in kuni mbok nji: "Swə məni də ti so nə wə mba. Mə ci num si, ɓay sine rum də faŋ mə namba!" 8Handay kaw num, ci ɓay tle mar rum wə du sine ɗâ ta rəka.»
9Zezu ci vun ndaya: «Bə sine də gi mi su? Mum də mbə ɓay də ci sum ji sine viŋə rum, ɓay də ar sine nə də ɓa sôwâ məsini. 10Hi cu in ri Ɗerwa Ifray məni nə mi su?
Gway' məni sum ɗam so ar ge ta rəka,
gway' rum faŋ gway' mə kə sin toŋo.
11Bârî gi kwa rum ndəna',
ɓay ɓay zə mba kədan namba we kwa rumu.»
12Sôwâ rôwâ mə du sôwâ Zuwif keɓ vari kədan handay kaw Zezu, zə handay we si: mum in dan mə gəgan rum wa ndaya. Ama zə handay ne wəlok raw sôwâ, handay ar num ɓay 'ya dle.
Ci vun wa po' grama
(Mat 22.15-22; Luk 20.20-26)
13Handay sin sôwâ məsin mə du kul sôwâ Zuwif mə ɗe kə Farisiyen kə sôwâ məsin mə du kul sôwâ Zuwif mə ɗe kə Herodiyen hay' Zezu kədan handay um kaw kə dan ge vunu. 14Handay mbə la' ne numu: «Bə ta' kwa, namba we si: Ha wə in tu dan, ɓay ha cu ne wəlok i sumra' mi. Ha cu gi sôwâ cem cem mi, ama ha wə ta' vari Ifray njeŋ ne kə sôwâ daŋ'ŋ. A in ne mba ri'i: Dan dlay mba ne vari ne mba kədan namba po' grama hay' jwə mə mbri mə nya Romə su? Namba də po' ko po' mi su?» 15Ama Zezu we dan ɗik mə vur vur nday, ɓay mum ci vun ndaya: «Zə mi hi wə keɓ kədan hi man kaw kə dan ge vun su? I mbə nan kə səlay na kar ri'i.» 16Handay mbə num kə ndi ɗaw, ɓay Zezu ci vun ndaya: «Nyî tu sa kə semɗe sa wây' han məni nə su?» Handay ɗam vun rumu: «Nyî tu jwə mə mbri mə nya Romə na.» 17Zezu faŋ la' ne ndaya: «La' ndəna' si, i ne kwa jwə mə mbri mə nya Romə ne num, ɓay i ne kwa Ifray ne num ta'a.» Ɓay dan ɗam rum jin' wa ne ndaya.
Ci vun wa dan pâ mbə mara
(Mat 22.23-33; Luk 20.27-40)
18Sôwâ məsin mə du kul sôwâ Zuwif mə ɗe kə Sadusiyen mbə hay' Zezu. (Handay sôwâ məni wə in i Ifray cu də ra' sôwâ mbə mar kpe mi.) Handay la' ne numu: 19«Bə ta' kwa, Moyizə wây' dan dlay məni nə ne mba: Swə la' kə njər rum mə mbri, ɓay mar ar ma dan daw si, swə nə tle rənda mok njər rum cin kədan mum vra' kə sə tan njər rum məni mara. 20Ɓa' si daw njiwkwa kəta' seɗa'a. Handay daw ya mə ɗawa. Mə mbri cin ma ɓay mar cu ar daw mi. 21Buwa wa hoɓ rum tle rənda mok njər rum cin, ama mum mar cu ar daw məta'a. Ndəna' kə buwa hinji' rum ta'a. 22Handay seɗa' daŋ' cin rənda rə ɓay mar cu ar daw mi. Kəki nday daŋ' ma rə mar ta'a. 23Fəta məni sôwâ də pâ mbə mar, ma rə də ke ma sa du nday su? Zə handay seɗa' daŋ' cin sa.»
24Zezu ɗam vun ndaya: «Hi wə vi' tu ri! Hi we zə rum si su? Zə hi cu we Ɗerwa Ifray ko gbəgboŋ Ifray mi. 25Zə kə ri məni sôwâ wə də pâ mbə mar, njiwkwa kə rawkwa cu də cin nji mi, ama handay də ke ce' ndə sum sin Ifray mə wafraya. 26Ama wa dan sum mar məni də pâ mbə mar, hi cu in wə du ɗerwa Moyizə, wə ri məni mum wây' dan wa ku məni ye' ŋây' nə mi su? Mum wây' wə hana: "Na Ifray Abraham, kə Ifray Isak, ɓay Ifray Yakub." 27Ifray nə cu Ifray sum mar mi, ama mum Ifray sôwâ mə kə i. Hi vi' vari si cete!»
Dan dlay mə mbri məni pâ nday daŋ'ŋ
(Mat 22.34-40; Luk 10.25-28)
28Swə ɗaw mə du sum pay zu dan dlay mun dan way ndaya. Mum we Zezu ɗam dan vun kul sôwâ Zuwif mə ɗe kə Sadusiyen ɓaya. Zə rum, mum jik mbə hay' Zezu ɓay ci vun rumu: «Dan dlay mə mbri məni pâ nday daŋ' nə kə mə ka su?» 29Zezu ɗam vun rumu: «Dan dlay mə mbri məni pâ nday daŋ' nə ni na: I mun ri' sôwâ Israyel! Bârî, Ifray mba, mum nə Bârî ɗaw sara. 30I bə Bârî Ifray mi kə vunduk ri daŋ' kə nyî ri daŋ', kə gwet mi daŋ', ɓay kə gbəgboŋ mi daŋ'ŋ. 31Bây hoɓ dan dlay mə mbri rum nə ni na: A bə jik wû ce' ndə məni ha wə bə tu ru. Dan dlay mə pâ mə hoɓ məni kuni cu za' mi.» 32Bə pay zu dan dlay nə faŋ la' ne kə Zezu: «Ɓay juk Bə ta' kwa! Dan məni ha in nə kəzini. Ifray nə ɗaw sar, ɓay ifray məsin cu mi, say mum ɗaw sara. 33Ɓay say swə bə Ifray kə vunduk rum daŋ', kə gwet um daŋ', ɓay kə gbəgboŋ um daŋ', ɓay bə jik um ce' ndə məni mum wə bə tu rumu. Kədan ta zə dan dlay mə hoɓ məni kuni pâ məni namba fol kwa po' fur mə ye' ku ye' kor Ifray kə ndi, ko ne kwane cem cem ne kə Ifray si.» 34Zezu we mum ɗam dan vun rum kə gwet, ɓay mum la' ne numu: «Ha cu seŋ kəri məni Ifray gak suk jwə wa ru nə mi.» Kəki rum, sôwâ daŋ' ne wəlok dan ci vun dan vun rumu.
Kris nə vay rawti sa su?
(Mat 22.41-46; Luk 20.41-44)
35Kəri məni Zezu wə ta' kwa ne kə sôwâ wə rawti so po' fur sôwâ Zuwif, mum ci vun ndaya: «Zə mi sum pay zu dan dlay gak in i Kris nə vay rawti David su? 36Zə Simbeɗ mə Kəleŋ pla' David kədan ini:
Bârî in ne kə Bârî mana:
A suk ɓa fun rin,
hâ na də njay sum sî wû zə sem ru.
37David kə tu rum ɗe num kə Bârî, ɓay gi ma kədan Kris nə faŋ vay rawti David su?»
Zezu har raw sôwâ wa kwa gi sum pay zu dan dlaya
(Mat 23.1-36; Luk 20.45-47)
Raw sôwâ məni ɓa wə han mun dan Zezu kə tuk kəɗama. 38Wə du kwata' um, Zezu har ndaya: «I ji tu ri hay' sum pay zu dan dlay məni wə tuk kəɗam kə gaŋ kə mbraw mə mbri ɓay wa' i sôwâ kaw jeɓ nday wə ri ɓawa sôwâ. 39Handay keɓ ri suk mə vun kofo wə rawti so Ifray sôwâ Zuwif ɓay keɓ ri suk mə ɓay wə ri gi cere. 40Handay ti kwa daŋ' məni wə ɓa rənda, ɓay handay in dan kə Ifray hâ hâ kədan sôwâ nday kar, handay də fe dan ɓok mə toŋ wa ndaya!»
Kwa məni rənda mə kə ca ne kə Ifraya
(Luk 21.1-4)
41Kəki rum, Zezu faŋ suk kor sunduku njay səlay han, ɓay mum kar raw sôwâ məni wə njay səlay də hana. Sum ndak juk wə njay səlay də han juku. 42Kəki nday, rənda mə kə ca mbə day, ɓay ta njay suŋku hoɓ wə hana. 43Zezu faŋ ɗe sum ta zə rum ɓay la' ne ndaya: «Na in mi ne kəzin', rənda mə kə ca rə njay kwa ta han pâ sôwâ məsin daŋ'ŋ. 44Zə sôwâ məsin daŋ' njay səlay məni wə ɓa nday dan sin, ama ta, du ca sə, ta njay kwa daŋ' məni wə ɓa sa. Ta ne kwa daŋ' məni ta kə ndi zə ur tu sə nə cete.»
Currently Selected:
Markə 12: KMN
Highlight
Share
Copy

Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.