Matiye 6

Zezu ta' kwa wa dan ne kwa kə sum ca

1«Kəri məni hi wə gi sin mə njeŋ, i gi sin rum kor sôwâ kədan handay gak kar ni taw mi. Hi la' gi ndəna' si, hi cu də fe bal cik wə ɓa Ba mi mə wafray mi#Mat 23.5. 2Kəri məni ha wə ne kwa kə sum ca, a ka' dan rum ce' ndə sum vur vur wə gi mi. Handay wə ka' dan wa rum wə rawti so po' fur sôwâ zuwif ɓay wə vari ta'a. Handay wə gi ndəna' kədan fe mbra' ndi hay' sôwâ. Na in mi ne kəzini: Handay fe bal cik nday si. 3Ama mə ha, kəri məni ha tle ɓa gur wû kədan ne kwa kə sum ca, a ne kə vari məni ɓa fun ru nə gak we mi, 4kədan kwane rum nə ke 'yeŋe. Ɓay Ba wû məni wə we kwa məni ha gi 'yeŋ, mum də wû ne bal cik wû.»

Zezu ta' vari o Ifraya

(Luk 11.2-4)

5«Kəri məni hi wə o kə Ifray, i gi ce' ndə sum vur vur mi. Handay wa' i handay car fray kədan handay in dan kə Ifray wə rawti so Ifray sôwâ Zuwif, ɓay wə hay' vari kədan sôwâ daŋ' nday kara. Na in mi ne, kəzini: Handay fe bal cik nday si#Luk 18.10-14. 6Ama mə ha, kəri məni ha wə in dan kə Ifray, a ze də rawti so wû, a ta' vun vari, ɓay a in dan kə Ba wû wə ri pe', ɓay Ba wû məni wə we kwa məni ha wə gi 'yeŋ, mum də wû ne bal cik wû. 7Kəri məni hi wə in dan kə Ifray, i in dan raw raw ce' ndə sôwâ mə dan we Ifray wə gi nə mi. Handay wə ɗik i handay la' ge dan raw si, Ifray də nday munu. 8I jənok zu nday mi, zə Ba mi we kwa məni hi kə mê' rum cop ka hi cu in dan kə rum məto'o.»

9«I in dan kə Ifray kə vari mə ni na:

Ba mba mə wafray,

namba wə wa' i sôwâ daŋ' mbra' semɗe ru.

10Namba wə wa' i a mbə suk jwə wa mba.

Namba wə wa' i a gi kwa məni ha wə wa' wa nya,

ce' ndə məni ha wə gi wafraya.

11A ne mba kwati i mê' mba mə tama.

12A vrum kwa mə bro' mba ce' ndə məni

namba wə vrum kwa bro' məni sôwâ məsin

wə gi hay' mba.

13Ɓay a də kə mba wə ri məni kwa mə bro'

gak mba ɓu han nə mi,

ama a ɓar mba mbə ɓa Satan.

[Zə ha kə məni suk jwə, ha kə gbəgboŋ,

ɓay ha kə mbra' hâ də hâ. Amen.#6.13 Ri ɗerwa rum cu wə du ɗerwa məni wây' cem cem məsin kuni mi.»]

14«Hi la' wə vrum kwa mə bro' məni sôwâ məsin wə gi hay' ri nə si, Ba mi mə wafray də vrum kwa mə bro' mi ta'a. 15Ama hi la' cu wə vrum kwa mə bro' məni sôwâ məsin wə gi hay' ri nə mi si, Ba mi cu də vrum kwa mə bro' mi mə ta'a#Mak 11.25-26.»

Zezu ta' kwa wa dan saŋ kwa

16«Kəri məni hi wə saŋ kwa, i gay' sototo ce' ndə sum vur vur wə gi mi. Handay wə gay' sototo kədan sôwâ daŋ' we i handay wə saŋ kwa. Na in mi ne, kəzini: Handay fe bal cik nday si. 17Ama mə ha, kəri məni ha wə saŋ kwa, a mbi i ru, ɓay a wu' mur mə sî sî wa ru, 18kədan sôwâ gak we i ha wə saŋ kwa mi. Ba wû məni wə ri pe', mum we taw, ɓay Ba wû məni we kwa məni ha wə gi 'yeŋ, mum də wû ne bal cik wû.»

I ɓawa ndak mi də wafraya

(Luk 12.33-34)

19«I ɓawa ndak mi wa nya məni nə mi. Zə wə ri rum ciŋgura' wə tum kwa, ɓay hura wə kəy vun so kədan handay ra' kwa wə hana#Zakə 5.2-3. 20Zawa, i ɓawa ndak mi də wafraya. Wə ri rum kwa far kwa cu gak ti kwa wə han mi, ɓay hura cu gak kəy vun so kədan handay ra' kwa wə han mi. 21Zə ri məni ha ɓawa ndak wû wə han, vunduk ru wə ke han ta'a.»

Ri mə ɓu mə tu

(Luk 11.34-36)

22«I ru ce' ndə baŋgay mə tu ru. I ru la' ɓay si, tu ru daŋ' wə ke du ri mə ɓu. 23Ama i ru la' kə gaɓ si, tu ru daŋ' wə ke du ri mə ura'a. Zə rum, ri mə ɓu tu ru la' faŋ ri mə ura' si, ura' rum də ke ɓayrumu!»

Ifray ɓay səlaya

(Luk 16.13)

24«Swə ɗaw cu gak gi sin zə sum rôwâ hoɓ mi. Mum də sî ɗaw ɓay mum də bə swə məsini. Mum də ta zə swə ɗaw ɓay mum də jeɗ swə məsini. Hi cu gak gi sin zə Ifray kə səlay hoɓ jak wə ri mə ɗaw mi.»

I njay vunduk ri wa Ifraya

(Luk 12.22-31)

25«Zə rum, na in mi ne: I ɗik dan wa kwati kə kwace məni hi kə mê' rum zə bəka nyî ri nə mi, ko zə mbraw məni hi kə mê' rum zə tu ri nə mi. Bəka nyî ri kə mbra' pâ kwati si, ɓay tu ri kə mbra' pâ mbraw si. Cu ndəna' mə su? 26I kar rugwa məni wə dla' wafray ri'i. Handay cu jo' kwa, ko ɓawa kwa wakaya mi. Handay cu ɓawa kwa njay də zəna mi, ama Ba mi mə wafray wə nday uru. Hi cu kə mbra' ɓayrum pâ rugwa mə su? 27Sa du ri gak ge bəka nyî um də han ɗaw kə dan ɗik um nə su?»

28Zə mi hi wə ɗik dan zə mbraw ge tu ri su? I kar wəɗi kwa məni wə wəɗi du gop ri'i. Handay cu cik kə gi sin ko ci zim mi. 29Ama na in mi ne: Ko Salomoŋ kə ndak um daŋ' cu ge mbraw mə ɓay pâ wəɗi kwa məni kuni ɗaw mi#1Sja 10.4-7; 2Izd 9.3-6. 30Ifray wə ge mbraw ne kə za məni wə gop tam, ɓay siw sôwâ də ge ku rumu. La' ndəna' si, mum cu də ge mbraw mi ne nday pâ mə su? Hi sôwâ mə kə ô kî! 31Zə rum, i ɗik dan kə ini: Namba də ti mi su? Namba də ce mi su? Namba də ge mi wə tu mba su mi? 32Sôwâ məni cu we Mesi mi wə keɓ kwa mə ni kuni bəka daŋ'ŋ. Ama Ba mi mə wafray we kwa məni hi kə mê' rum nə si. 33I ɗik dan wa ri məni Ifray wə də suk jwə wa ri kə gi kwa mə njeŋ məni mum wə wa' nə cop, ɓay mum də mi ne kam kwa məni kuni daŋ'ŋ. 34I ɗik dan wa bəka mə siw mi. Bəka mə siw də mi ne dan ɗik um ɓo. Cik məni wə mbə kə bəka ɗaw ɗaw daŋ' nde i bəka rum si.

Currently Selected:

Matiye 6: KMN

Highlight

Copy