Matiye 25

Dan mə gəgan wa way mə guɓu

1«Kəri rum, vari məni Ifray wə də suk jwə wa sôwâ um nə ra' nji kə way mə guɓ məni ra' baŋgay nday ɓay wur kədan handay də ndewa kə nja#Luk 12.35. 2Vatl du nday lay, ɓay vatl du nday kə gwete. 3Mə lay kuni ra' baŋgay nday, ama handay cu ra' mur məsin wə ɓa nday mi. 4Ama mə kə gwet kuni ra' mur kə gula kə baŋgay ndaya. 5Nja nə cu mbə ga'ri mi, zə rum, way mə guɓ kuni daŋ' təŋ kə kaw sen, ɓay handay nde sene. 6Kə du dukri, handay mun wor məni ka' dana: "Nja nə ni na! I car ndewa kə rum ye!" 7Kəri rum, way mə guɓ kuni dla' sen ɓay təŋ kə gila' baŋgay ndaya. 8Mə lay kuni la' ne kə mə kə gwet kuna: "I ne mur mi ne mba kî ri', zə baŋgay mba wə mara." 9Mə kə gwet kuni ɗam vun ndaya: "Â â, zə mur rum cu gak nde zə mba kə ri daŋ' mi! Pram i də hay' sum gi coɓ kwa, ɓay i də coɓ mur wə hana." 10Mə lay kuni 'ya dle vari coɓ mur, ama kəri rum, nja nə mbə day, ɓay mə vatl məni gila' tu gay' wə han, cok ta so dər kə rum, ɓay bə so ta' vun vari. 11Kəki rum, way mə kəɗi kuni mbə day ɓay do dana: "Bârî, Bârî, a ar vun vari ne mba#Luk 13.25!" 12Ama nja nə ɗam vun ndaya: "Na in mi ne, kəzin', na cu we ri məni hi car mbə han nə mi."» 13Zezu faŋ ini: «La' ndəna' si, i ji, zə hi cu we bəka ko ri rum mi.»

Dan mə gəgan wa səlaya

(Luk 19.11-27)

14Kwa rum də ke ce' ndə swə məni wə də 'ya gaŋa. Mum ɗe sum sin um ɓay ar kwa so um ɓa ndaya. 15Mum ne nday ɗaw ɗaw daŋ' ce' ndə gbəgboŋ ndaya. Mum ne səlay#25.15 Səlay wə verse məni nə ta' bal cik sin məni swə gi bəka ɗawa. mbu vatl ne kə swə ɗaw, mum ne mbu hoɓ ne kə swə məsin, ɓay mum ne mbu ɗaw ne kə swə məsini. Kəki rum, mum 'ya dle vari gaŋa. 16Bə sin məni fe mbu vatl 'ya dle kəkor sar ta gi par kə səlay rum, ɓay mum fe mbu məsin vatl ta han wa rumu. 17Bə sin məni fe mbu hoɓ gi ndəna' ta', ɓay mum fe mbu məsin hoɓ ta han wa rumu. 18Ama bə sin məni fe mbu ɗaw 'ya ta dla zra wə nya, ɓay mum no' səlay bârî um ta hana. 19Gi kim kəki rum raw, bârî sum sin kuni gewa mbə, ɓay mum təŋ kə in səlay um kə ndaya. 20Bə sin məni fe mbu vatl nə mbə hay' rum, ɓay mum ne num mbu məsin vatl məni mum fe ta wa rum, mum ini: "Bârî, ha ne nan mbu vatla. A kar na ni fe səlay mbu vatl məsin ta han wa rumu!" 21Bârî um la' ne numu: "Ɓaya! Ha bə sin mə ɓay ɓay njeŋ, ha gi njeŋ kə kwa mə kî. Zə rum, na də ar kwa mə mbri də ɓa ru. A mbə tuk kəɗam kə rini." 22Kəki rum, bə sin məni fe səlay mbu hoɓ nə mbə hay' rum ɓay ini: "Bârî, ha ne nan mbu hoɓo. A kar na ni fe mbu məsin hoɓ ta han wa rumu!" 23Bârî um la' ne numu: "Ɓay, ha bə sin mə ɓay ɓay njeŋe. Ha gi njeŋ kə kwa mə kî. Zə rum, na də ar kwa mə mbri də ɓa ru. A mbə tuk kəɗam kə rini." 24Ndo' rum, bə sin məni fe səlay mbu ɗaw nə mbə hay' rum ɓay ini: "Bârî, na we si: Ha nə swə mə cik tu. Ha wə tum kwa wə ri məni ha cu jo' kwa han mi, ɓay ha wə ɓawa kwa wakaya wə ri məni ha cu ge zep rum han mi. 25Na ne wəlok ru, zə rum, na ta mo' səlay wû ta nya. A kar kwa wû nə ni na!" 26Bârî um ɗam vun rumu: «Ha bə sin mə bro' ɓay ndala! Ha we i na wə tum kwa wə ri məni na cu jo' kwa han mi, ɓay na wə ɓawa kwa wakaya wə ri məni na cu ge zep rum han mi si su? 27La' ndəna' si, kəzə a cin səlay man wə so məni sôwâ wə cin səlay han, ɓay kəri gewa man, na mbə za' kəzə səlay man kə mbi rum daŋ'ŋ. 28Zə rum, i ve mbu ɗaw mə ɓa rum nə ɓay i ne kə swə məni kə səlay mbu guɓ na. 29Zə swə məni kə kwa, bə rum də fe məsin də han, ɓay mum də ke kə kwa juk, ama swə məni cu kə kwa mi, sôwâ də ve mə kî wə ɓa rum nə si.#Mat 13.12; Mak 4.25; Luk 8.18 30Ama mə bə sin mə ndal məni nə, i ge num də rəka wə ri mə ura'a. Wə ri rum mum də ci' ɓay cwə se'e.»

Dan ɓok mə bəka ndo' nya

31«Kəri məni Vay sumra' də mbə ce' ndə jwə kə sum sin Ifray mə wafray daŋ', mum də suk wa kwasuk um mə kə mbra'a. 32Sôwâ nya məsin daŋ' də ɓawa kor rum, ɓay mum də ɓul du nday ce' ndə ji kwa wə ɓul du cime kə huɓê. 33Mum də njay cime wə ga' ɓa fun rum ɓay huɓê wə ga' ɓa gur rumu. 34Kəri rum, jwə də la' ne kə sôwâ məni wə də ke ga' ɓa fun rumu: "I mbə ye, hi sôwâ məni Ba man kuswa' ni, ɓay i cok ri məni Ba man gila' rum zə ri daka təŋ zu nya." 35Zə kəri məni na kə mê', hi ne kwati ne nana. Kəri məni na kə mê' mbi, hi ne mbi ne nana. Kəri məni na du ri ce' ndə rəkway, hi ve nan so mi. 36Kəri məni na kə tu uray, hi ge mbraw ne nana. Kəri məni na kə gaɓ, hi tle fur rini. Kəri məni na wə so daŋgay', hi ta kar nan wə hana. 37Kəri rum, sôwâ mə njeŋ kuni ci vun rumu: "Bârî, kə ma namba we nu kə mê', ɓay namba ne kwati ne nu su? Kə ma namba we nu kə mê' mbi, ɓay namba ne mbi ne nu su? 38Kə ma namba we nu ce' ndə rəkway du mba, ɓay namba ve nu so mba ko kə tu uray ɓay ge mbraw ne wû su? 39Kə ma namba we nu kə gaɓ ko wə so daŋgay', ɓay namba ta kar nu wə han su?" 40Jwə nə də ɗam vun ndaya: "Na in mi ne, kəzin', kəri daŋ' məni hi gi kwa ɗaw du kwa məni kuni wə hay' vay nyêw ɗaw du daw ba man məni kuni, ka hi gi kwa rum hay' rini!" 41Kəki rum, jwə nə də la' ne kə sôwâ məni wə də ke ɓa gur rumu: "I 'ya hay' rin si seŋ, hi sôwâ məni Ifray ge nê' ri! I də du ku mə dan mar i kpe məni Ifray gila' rum zə Satan kə sum sin umu. 42Zə kəri məni na kə mê', hi cu ne kwati ne nan mi. Kəri məni na kə mê' mbi, hi cu ne mbi ne nan mi. 43Kəri məni na du ri ce' ndə rəkway, hi cu ve nan so mi mi. Kəri məni na kə tu uray, hi cu ge mbraw ne nan mi. Kəri məni na kə gaɓ ɓay wə so daŋgay', hi cu tle fur rin mi." 44Kəri rum, handay də ci vun rumu: "Bârî, kə ma namba we nu kə mê', ko kə mê' mbi, ko ce' ndə rəkway du mba, ko kə tu uray, ko kə gaɓ, ko wə so daŋgay', ɓay namba cu kawɓa ru mi nə su?" 45Jwə nə də ɗam vun ndaya: "Na in mi ne, kəzin', kəri daŋ' məni hi vaɗ gi kwa ɗaw du kwa məni kuni wə hay' vay nyêw ɗaw du daw mə ni kuni, ka hi vaɗ gi kwa rum hay' rin ta'a." 46Ɓay handay də ta du ku mə dan mar i, ama sôwâ mə njeŋ wə də ke kə nyî mə də hâ#Dan 12.2.»

Currently Selected:

Matiye 25: KMN

Highlight

Copy