Lukas 23

Yésu mbwe Pilato mba Hèrodé

(Mat. 27.1-2; Mark. 15.1-5; Yoha. 18.28-38)

1Njoṅ bwoṅ benntùn fa lo nsi, ndo' Yésu nèn yi mbwe Pilato, 2bo to' netete nu tu i, ntshob ndù: Tshù mèn ze bag yen i, a nke mbagte tu benntùn ntùm ngô yag li; a num nke nto' ndù kà bo fà ntshub Kàsà, mbèn nke ntshob ndù tu wul i b'a Kristô, mbe mfen. 3Pilato bètt'é ndù: O b'a mfen ba Yuda ké? Yésu bùnte yi ntshob ndù: O tshob. 4Pilato tshob ghale'te Nsi tse ndùbndùb mba bwoṅ benntùn ndù: Me ke' fon sàm nu ze yen mèn ni fàn nà. 5Là bo bèn ntshob kua' neta ndù: A num nke ntshu' tu benntùn, nke ntswite ntùm njoṅ ngô Yudéa fa, mbe ndù a to' à fe Galiléa, nse' nkum nsen ni.

6Pilato be ju' ndùlala, mbètte nelèn a be ze yen mèn ni b'a mèn Galiléa là. 7Pilato be ju' ndù a b'a mèn ntùm bag nte' Hèrodé, ntum i Hèrodé ze mba ze tu wut na' mbe Yérusalém num tshen lé'njù li là. 8Hèrodé be yen Yésu, ntsiaṅte neshu, nummbe a lo ke nkô neyen i fe tà ndùke lo, nummbe a lo ju' nu tse bo ke ntshob num Yésu là, nke nkwate ndù Yésu a' ghù mo' nsa mbwe i. 9A bètte Yésu nu yàme, là Yésu ke bùnte sàm nu yi mba ntshù'. 10Là ghale'te Nsi tse ndùbndùb mba ghalèn ṅwa'ni Nsi lo be bwe, nke ntete nu num Yésu yàme. 11Hèrodé boa soyé wag Yésu, ntshabt'é, ma' kum ṅwa'ṅwa' num i, mbèn ntum i Pilato. 12Hèrodé mba Pilato tù' shun num sen lé'njù là, nummbe a lo be mbwe bo nke mbàne.

13Pilato tsiaṅ ghale'te Nsi tse ndùbndùb, ghatsho'te ntsha mba ba ntùm ngô, 14ntshob bo ndù: Bin lo se' mfà yen mèn ni me ndù a num mbagte tu benntùn. Tshù, me nebètt'é nu be mbwe bin, ke fon sàm nu ze yen mèn ni fàn num njoṅ nu fa tse bin tete tu i là. 15Mba Hèrodé ke' bèn ne njene, nummbe a bèn ntum i be. Tshù, a ke' ghù sàm ju z'a ku'ni ndù bo zwi i là. 16Ndùlala, m'a' ghù bo lab i, nkag i, a nèn. [ 17A lo ke mbwô ndù a kag ta' ngandàtsha num njoṅ lé'njù jùa fa.] 18Bo to' nekua' njoṅ yub fa ndù: Zwi yen mèn ni, nkag Baraba bag. 19Yen Baraba là, bo na' ma' i ndàtsha à num tshu'tu z'a tôg ntùm ngô mba num mb'a zwi mèn nà. 20Pilato bèn ntshob bo mo' yoṅ i, nke nkô nekag Yésu. 21Là bo bèn nkua' ntshob ndù: Kwimte, kwimt'é. 22Pilato tshob bo num mbatte yoṅ tat ndù: A ke lèn nukebwô z'a ghù à? Me ke' fon sàm nu z'a ghù k'a ku'ni neghù ndù bo zwi i là. Ndùlala, m'a' ghù bo lab i, nkag i a nèn. 23Là bo bèn nkua' mà neta, mbètte ndù bo kwimte Yésu. Bo bèn nke nkua' nèn mbwe, kà mub ntshob jù. 24Pilato bam bo ndù a nsi ghù ju ze bo bètte là. 25A kag mèn z'a na' ma' i ndàtsha num tshu'tu mba num mb'a zwi mèn nà, mba bo bètte là. A fà Yésu bo mba bo ke nkô là.

Yésu num fanta'tù

(Mat. 27.32-44; Mark. 15.21-32; Yoha. 19.17-27)

26Mba bo ke ndo' i nèn yi là, bo tshùb mo' Simon ze Kirinia z'a ke mfe tshwèt là, mfà fanta'tù yi ndù a ket njam Yésu. 27Mo' mà bwoṅ benntùn yàm be njam Yésu, mba bwoṅ bènnzwi yàm tse bo ke ndab ntù tshob mbèn nke ndàn num i là. 28Yésu kaṅ wul i njam ntshob bènnzwi ndù: Ngonngon Yérusalém, kà bin kua' num àm, bin kua' a be num tu wut tsine, mba num bon tsine. 29Nummbe tsemo' lé'njù bwe nse'e, tse bo nsi tshob ndù: Ghafen b'a ba kebwe, mbam mi a ke' bwe mén, mba mbùn mi a ke' nyô mén nà. 30Bo #Os. 10.8; Apok. 6.16nsi to' neke ntshob mbat ndùbndùb ndù: Vù num bag; mbèn ntshob nkônga nke'nke' ndù: Kabte yage. 31Nummbe a be ze bo ghù ndù num tù fi là, mb'a nsi se' b'a ndùke num se njum à? 32Bo lo' mba tsemo' ghaghù nukebwô bàa, nèn nzwi yub boa Yésu.

33Ngelaṅ bo kum dù' ze bo ke ntsiaṅ ndù nkatu là, bo kwimt'é num fanta'tù bwe, boa ghaghù nukebwô bàa, mo' num bag bu i ze zwim, mo' num ze kwéb. 34Yésu #Yobk. 22.19nke ntshob ndù: Tà, lagte bo, nummbe bo ke' lèn ju ze bo tshwèt ngù là. Bo ghabte nzwe tse ntam tô yi. 35Njoṅ #Yobk. 22.8benntùn fa tswe bwe, nke ndôte. Là, kamkam nke ntshabt'é, ntshob ndù: A lo yôg tsemo' ben, a bwô a yôg tu wul i, a be z'a b'a Kristô, mèn ze Nsi tsho' i là. 36Mba #Yobk. 69.22ba soyé tshabt'é, nkù'te nse' mbaṅ i, mfà tshùagkèt ndu' yi, 37ntshob ndù: A be z'o b'a mfen ba Yuda là, o yôg tu wul o yu tu. 38Bo lo kite mo' kam ṅwa'ni, ntaṅ tu fanta'tù ndù: Yen mèn ni b'a mfen ba Yuda.

39Mo' mèn netèt ben kebwô bàa tse bo kwimte yub num fanta'tù là, tshabte Yésu ntshob ndù: O ke' b'a Kristô ké? Yôg tu wul o yu tu, mbèn njôg mba bag yag. 40Là mo' tshobt'é, mbùnte ntshob ndù: O ke' be bwôg Nsi ké? Wù z'o b'a nganu mba yi là! 41Mba ze be tu là, a b'a nunetsine. Nummbe tshen nu li tsho be à num ju ze be ghù là, là yen mèn ni ke' ghù sàm nu z'a bag là. 42A bèn ntshob ndù: Yésu, kwimt'àm ngelaṅ z'o nsi tsho ntùm nufen so là. 43Yésu tshob yi ndù: Kua' nenùne, me tshob wù ndù: Sènni bag wù nsi be Paradis.

44A na' mb'a nguan njagnyam, njam sèn ntùm njoṅ dù' fa, tà nèn nkum nyam tat mfetnjù. 45Lagnyam #Netu. 26.31-33tam njame, nzwe z'a be Ndà Nsi là bèt netèt bwe. 46Yésu #Yobk. 31.6kua' kua' nze neta ndù: Tà, me yab Ywèt tshàm ntùm mbu mu. A tshob ndùlala nkwù. 47Mfen ba soyé be yen ju z'a tshùa là, ngamte Nsi, ntshob ndù: Kua' nenùne, yen mèn ni na' mb'a mèn netsine. 48Njoṅ bwoṅ benntùn fa tse bo na' nse' neyen nu z'a tshùa là, be bèn njam nke ndab ntù tshobe. 49Njoṅ #Luk. 8.2-3benntùn fa tse bo lèn Yésu mba bènnzwi tse bo tam njam i fe tà Galiléa là, tsin tà ngùanesà, nke ndôte tshen nu là.

Mba bo tshoṅ Yésu là

(Mat. 27.57-61; Mark. 15.42-47; Yoha. 19.38-42)

50Mo' mèn lén se Yosèf, mèn netèt ghafà ntage, se', a na' mb'a mèn netsine, mbe mèn nenùne. 51Ndù a lo ke bam tse nu ze bo na' nkutte, ke nu ze bo na' ngù num Yésu là lo. A na' mb'a ze Arimatia ngô ba Yuda; mba tu wul i lo ke mbéb nufen Nsi. 52A nèn ntèt Pilato, ndon i fe Yésu. 53A swe' fe i num fanta'tù, ndam i nzwe, mbèn njab i ntùm fi se bo na' nabte ntùm loṅ ke yoṅ njab fe mèn bwe là. 54A na' mb'a lé'njù nenabte, kà lé'njù Sabbat to'o. 55Bènnzwi tse boa Yésu fe Galiléa là tam njam Yosèf, bo yen fi, mbèn njen mba bo yab fe Yésu bwe là. 56Bo #Netu. 20.10; Neb. 5.14bèn njam, nabte ba labinda nzenze. A be lé'njù Sabbat, bo fite, mb'a be ntùm ntshù' là.

Currently Selected:

Lukas 23: BMa

Highlight

Copy