Lukas 14

Mba Yésu yate mo' ngangokèt lé'njù Sabbat là

(Luk. 6.1-11; 13.10-17)

1A lo be num mo' lé'njù Sabbat, Yésu tsho ndà mo' nkam ba Férésia, nejù jujù bwe, tshen ben ni te miag num mi, nke ndôt'é. 2Tshù, mo' ngangokèt lo be mbwe i. 3Yésu bùnte ntshob ghalèn ntshù' Nsi mba ba Férésia ndù: Ntshù' bam ndù bo ke njate ngangokèt lé'njù Sabbat ké, ke nga à? Bo mi ntswe. 4Ndùlala Yésu tshùb ngangokèt njat'é, mbèn ndé't'é, 5ntshob #Mat. 12.11bo ndù: A b'a we netèt bin ze mén i ke na' i lo vù ntùm tàm lé'njù Sabbat mb'a ke nsi sô i à? 6Bo ke ku'ni nebùnte sàm nu yi.

Nefà wut nsi mba nkôni

(Mat. 23.5-12)

7Yésu be yen ndù ben tse bo tsiaṅ yub num nejù jujù là num nke ndiag be dù' mebwô, ntshob mo' tànkùt bo ndù: 8Ngelaṅ #Tànk. 25.6-7ze mèn tsiaṅ o ntùm dù' tsiaṅte nandà là, kà tswe num mbwe dù', mbwôg ndù mo' ndù mo' mèn z'a tshùa o là num netèt ben tse bo tsiaṅ yub là. 9Ndùlala ndù kà mèn z'a tsiaṅ o bin yi là, se' ntshob wù ndù: Faṅ yu dù' yi. Tuswe nsi ko o ngelaṅ z'o nsi nèn tswe num miagte dù' là. 10Là ngelaṅ ze bo tsiaṅ o là, o nèn ntswe num miagte dù', ndù mèn z'a tsiaṅ o là se' ntshob wù ndù: Nshun àm, nèn tà mfe mbwe. Yen nà nsi b'a ghamte wù num miag njoṅ benntùn fa tse bin à bo tswe num téblé là. 11Nummbe #Mat. 23.12; Luk. 18.14mèn z'a num ndo' wul i nèn yi tù là, bo nsi tèn i fà nsi; mèn z'a num ndo' wul i nèn yi nsi là, bo nsi bù' i fà tù.

12Yésu tshob mba mèn z'a tsiaṅ i là ndù: Ngelaṅ z'o tshwèt ntsiaṅ benntùn ndù bo jù jujù ndà o, ke nkebnjù, ke mbwôgtshù lo là, kà tsiaṅ shun tsho ke fèt tsho, ke tàan bo màan, ke ba ndùla' o tse bo be ghankàb là, mbwôg ndù kà bo bèn njagte ju z'o ghù là be ndaṅndaṅ. 13Là ngelaṅ z'o num ntsiaṅ benntùn nà, tsiaṅ à bwoṅbwoṅ, ba kam nku, ba nke'kèt boa ba mfùmiag. 14O nsi b'a mènfen, nummbe bo ke' ku'ni neyagte wù. Bo nsi yagte wù ngelaṅ ze ben netsin nsi bam num vù là.

Tànkùt num nandà

(Mat. 22.1-10)

15Mo' mèn netèt ben tse bo tsiaṅ yub là, be ju' men ntshob là, ntshob Yésu ndù: Mènfen b'a mèn z'a nsi be num téblé ntùm nufen Nsi là. 16Yésu tshob yi ndù: Mo' mèn lo nabte jujù yàme, ntsiaṅ benntùn yàme; 17ngelaṅ nejù jujù ku', a tum tshe' i ndù a nèn ntshob ben ts'a tsiaṅ yub là ndù, bin se'e, njoṅ tshu fa ku'u. 18Là tshen ben ni to' nelé'te ntshù' ntshù'. Mbwe i tshob yi ndù: Me lo jun mo' dù' nà, a bwô ndù me nèn njene, me le't'o, tsho ndé'te me. 19Mo' tshob ndù: Me lo jun nyàm bàa bàa nze tàn, me nenèn zwi'te yube; me le't'o, tsho ndé'te me. 20Mo' bèn ntshob ze ndù: Me yôg nelo na ndà, ndùlala me ke' ku'ni nenène. 21Yen ngafa' li bèn njam, nsoṅ tàab njoṅ mbùnte ntshob fa. Tàndà ya ntù, ntshob tshe' i ndù: Nèn ndende num manze mba num mfagte manze ngô, ndo' bwoṅbwoṅ, ba kam nku, ba mfùmiag, ba nke'kèt, nse' yi nsen ni. 22Tshe' i tshob yi ndù: M'a ghù ju z'o tshob là, nda' ndù dù' banban ke'e. 23Tà tshob yi ndù: Nèn num manze mba ntùm mfé'kàb, nànte benntùn bo se' ntsho ndà, tà ndà àm dune. 24Nummbe me tshob bin ndù: Netèt ben tse me na' ntsiaṅ yub là, mba ze ntshù' ke nsi zwi'te yàm jujù.

Mb'a bwô ndù mèn ghù kà ntam njam Yésu là

(Mat. 10.37-38; 16.24-26; Mark. 9.49-51)

25Mba bwoṅ benntùn yàm ke nzin num manze boa Yésu là, a kaṅ wul i njam, ntshob bo ndù: 26A #Mat. 10.37be ze mèn se' me ke gha tàab, màab, nzwi i, mba kua' se yôg là, mb'a ke' ku'ni nebe ngazi'te nu àm. 27Mèn #Mat. 10.38; 16.24; Mark. 8.34; Luk. 9.23z'a ke' ket ze fanta'tù mbèn nzin num yàm manze là, ke' ku'ni nebe ngazi'te nu àm.

28A be ze mèn netèt bin kwate nekut ba' là, mb'a ke bwôgmbwe ntswe nsi, ndôte ju z'a bagte, num neyen a be z'a ghù ju nemiagte yi là, 29mbwôg ndù k'a ma' tun ba' ke ku'ni nekut ba' kà miagte, mba ndù kà ba tshùanze to' netshabt'é, 30ntshob ndù: A mèn z'a to' nekut ba' ke ku'ni nemiagte là ké?

31Be ndaṅndaṅ a zit mfen z'a be a to' nele' ntsho bo mo' mfen ke be ndù a bwôgmbwe ntswe nsi, njen ndù a ku'ni nele' ben ntsha' ṅam mbàa boa tse ben ntsha' gham à? 32A nenyà ke be ndùlala, mb'a nsi tum nganze yi bo fenkaṅ, ngelaṅ ze ngakeban ke' tà ngùanesà là; 33ndùlala, mèn z'a netèt bin ndù a ke' ghua' tshu fa ts'a ghù là, ke' ku'ni nebe ngazi'te nu àm.

Ngwa

(Mat. 5.13)

34Ngwa b'a kua' ju mebwô neshu; là, a be ze ngwa ghua' ndùm mi là, mba bo nsi bèn ghù à ndùke k'a bèn ndùm à? 35A ke' bèn mbwô tse mba num tsha'a, mba num ju netshàb nà yi; a bwô nema' i njù. Mèn z'a ghù ntoṅ mi a neju' yi là, a ju'.

Currently Selected:

Lukas 14: BMa

Highlight

Copy