Neto'te 42

Mba Yakob tum bon tse tse bandum Egipto là

1Yakob be yen mba nsa be mà Egipto là, ntshob bon tse tse bandum ndù: Numke bin nke nze wut tsin bin bin à? 2A #Mfa' Gha. 7.12tshob ndù: Tshù, me ju' ndù nsa num mà Egipto; bin swe' nèn bwe, njun nsa bwe, ndù be yôg yi, ke kwù. 3Fèt Yosèf tse gham swe' nèn Egipto nejun nsa. 4Yakob ke bam netum yub boa Benjamin, mfèt yub, mbwôg ndù kà ju tsho ngù i manze.

5Bon Israél nèn nejun nsa netèt tsemo' ben tse mba bo se' jun yub nsa là; nummbe nziku' lo nèn tà nkum Kanaan.

Yosèf ṅate fèt tse

6Yosèf na' mbèn nke nsa' ntùm ngô; a yi bèn nke nswèn nsa benntùn fa mum ngô. Fèt Yosèf se' ngwù nsi mbwe i kabkab. 7Yosèf yen fèt tse ndèn yube; là, nke ngù mb'a b'a ngùn nà mbwe bo; a tshob nu bo neta, ntshob ndù: Bin fe à yà? Bo bùnte ndù: Bag fe à Kanaan nse' jun jujù.

8Yosèf lèn fèt tse, là yub tu wut ke lèn i. 9Yosèf #Net. 37.5-10kwimte njem ts'a na' njen num bo là, ntshob bo ndù: Bin b'a ba ntom. Bin se' netsha' à dù' ts'a fà bu bin nà ntùm ngô. 10Bo bùnte yi ndù: Nga me tshùaben àm, ghafa' tsho se' jun à nsa. 11Njoṅ yag fa b'a bon mandum ntshù'; bag b'a ben nenùne, ghafa' tsho ke b'a ba ntom. 12A tshob bo ndù: A ke nu. Bin se' netsha' a dù' ts'a fà bu bin ntùm ngô là.

13Bo bùnte ndù: Bag, ghafa' tsho, bag b'a ntu ntshob bà gham, bon mandum ntshù' ntùm ngô Kanaan; kebatnjab b'a bo tà yag sènni, mo' ta' i ke' bèn mbe. 14Yosèf tshob bo ndù: Bin b'a ba ntom kua' mba me lo netshob bin nà. 15Tshù laṅte ze me fà bin ni: Me lo' lén Faraon z'a be ntùn nà nkàn mfe yi ndù bin ke nsi tum nsen ni ke be ndù kebatnjab zin se' nsen ni. 16Bin tum mo' mèn netèt bin, a nèn ndiag mfèt zin, bin ghô ndàtsha. M'a' laṅte zin njen mbe ntshob min b'a mi nenùn nà, ntag ndùlala mba me lo' lén Faraon z'a be ntùn nà nkàn mfe yi, ntshob bin ndù bin b'a ba ntom.

17A ghù bo ma' yub ndàtsha num lé'njù tat. 18A be kum mbatte lé'njù tat Yosèf tshob bo ndù: Me be mbwôg Nsi. A be ze bin kô neyôg wut tsin nà, bin ghù ju ze me nsi tshob bin nà. 19A be ze bin b'a ben nenùn nà, mo' mfèt zin ghô ndàtsha, bin lo' nsa nèn nkém tsin tunndà yi, 20mbe bèn njam ndo' kebatnjab zin nse' yi, nda'te me ndù bin tshob à nenùne, mba ndù bin yôg bu vù. Bo ghù ndùlala.

21Bo tshob bo bo ndù: Be b'a ghafànnu mbwe mfèt be, be lo yen nge' z'a be ntù i là, a bètte ndù be ko ndèn mi, là be ke kô neju' yi mba neju'u. Tshù là, yen nge' li tsho be à num bwe. 22Rubèn #Net. 37.21-22bùnte ntshob bo ndù: Me lo ke tshob bin ndù kà bin ghù kebwô num yen mén nà ké? Là bin lo ke kô neju'u. Tshù là, ndonni Nsi tshwèt mbètte be lem tse.

23Là bo ke lèn ndù Yosèf tshwèt nju'u, nummb'a lo ghù ngatote ntshob be netèt bo boa fèt tse. 24Yosèf lo mbaṅ bo, nsôte wul i num bo, ndàne. A bèn nse'e, ntshobte boa bo, ngù bo ghom Siméon be num miag mube, nkul i ma' ndàtsha.

Mba bon Yakob tse bandum bèn njam Kanaan nà

25Yosèf tshob ndù bo naṅ nsa ntùm mbàm mub k'a dune, bo bèn njab nkàb yub bwe, mfà jujù nze bo njoṅ z'a ku'ni là. Bo ghù ndùlala. 26Bo yab nsa num kekwèn tshob ndo nène.

27Mo' mèn netèt bo ké' ze bàm nefà nenà ze kekwène, dù' ze bo zi là, ntèt ze nkàb ntshu bàm. 28A soṅ fèt tse: Bo ba' yàm nkàb me, tshù i li ntshu bàm. Ntù yub tum, bo vèt, ntshob bo bo ndù: Ke ze Nsi ghù be ndù à?

29Bo bèn mbaṅ tà yub Yakob ntùm ngô Kanaan. Bo soṅ tà yub njoṅ nu fa ts'a tum num bo là, ntshob ndù: 30Mèn ndùb z'a be mum ngô là tshob nu bag neta, ndo' yag mba benntùn tse bo se' tom a ngô là. 31Là, bag lo ntshob yi ndù: Bag b'a ben nenùne, ke b'a ba ntom. 32Bag na' mb'a fètfèt ntshob bàa gham, tà yag be ntshù': Mo' ta' i ke' bèn mbe, kebatnjab b'a bo tà yag sènni mum ngô Kanaan. 33Là mèn ndùb z'a mum ngô là tshob bag ndù: Me nsi tshùa njam yen nu li lène; a be ze bin b'a ben nenùn nà: Bin faṅ mo' ta' mfèt zin me, ndo' ju z'a be bin tshètte nziku' yi ntùm tunndà tsin nà nène! 34Bin mbe nse'e, bin lo' mfèt zin, kebatnjab nse' yi; a nsi tshùa ndùlala me lèn ndù bin ke' b'a ba ntom, là ben nenùne. Yen ngelaṅ nà, me nsi fà mfèt zin bin, bin katte ntùm ngô.

35Ndùse bo ke nsô tshu bàm bo là, mba we lo tèt se bu' nkàb bàm. Bo yen bu' nkàb, bo mba tà yub, mbwôge.

36Tà yub Yakob tshob bo ndù: Bin biagte bon tshàm fa! Yosèf ke' be, Siméon ke' bèn mbe, mbe ndù bin nsi lo' Benjamin ndonni. Njoṅ tshen tshu là fa vù à be tu àm! 37Rubèn tshob tàab ndù: A be ze me ke' lo' Benjamin mbèn yi mfà wù là, mb'o ghù nezwi bon tshàm tse bandum bàa. 38Là Yakob tshob ndù: Bin à mén àm ke nsi nène, nummbe mfèl i lo à kwù, a tù' à tù' i. A be ze mo' ju tsho ngù i num manze dù' ze bin tshwèt nèn nà, mba me nsi kwù à zwe, me ze me be njwèn mèn nà.

Currently Selected:

Neto'te 42: BMa

Highlight

Copy