Neto'te 15
15
Nsi wat kàn bo Abram
1Tshen nu li lo be tshùa, Tshùaben tshob Abram mum njem ndù: Kà bwôg me Abram! Me b'a yu tshètntsho, nda' o nsi b'a ze ndùb. 2Abram bùnte ndù: Tshùaben Nsi, ke z'o nsi fà m'à? Tshù me li me tshwèt nèn ke ghù mén nà; njùndà àm ke b'a Eliézer ze Damas ké?
3Abram bèn ntshob ndù: Tshù, o ke' fà kua' nzwit me, nkuan àm nsi bèn jù ndà àm. 4Ndùlala Tshùaben tshob yi ndù: A ke' b'a yen mén nà bèn jù ndà o, là kua' mén z'a tum zwe' o là nsi bèn jù ndà o. 5A #Rom. 4.18; Héb. 11.12tshob ndùlala, ndo' Abram ntum yi njù, ntshob yi ndù: Bù' miag mu mfe kamànyam nsiaṅ nsa, a be ze b'o ku'ni nesiaṅ nà. Tshùaben tshob Abram ndù a b'a mba nzwil i nsi be là. 6Abram #Rom. 4.3; Gal. 3.6; Yako. 2.23bam mba Tshùaben tshob là; Tshùaben lo' Abram mba mèn netsin nà num yen nu là.
7A tshob ndù: Me b'a Tshùaben z'a ghù o tum Ur mà Kaldéa, num nefà yen ngô li wù là. 8Abram tshob ndù: Tshùaben Nsi, me lèn à ndùke ndù me nsi ghù yen ngô l'à? 9A tshob yi ndù: Lo' mén mfô z'a ghù ngu'njù tat là, mbwe mba komnjù tse bo ghù ngu'njù tat là, bwoṅtambia' bo mén ngon saṅe. 10Abram lo' tshen nyàm nà, nkeb yub ndaṅndaṅ netèt bwe, njabte yub bag bag, là ke fagte nsaṅe. 11Nsaṅ mi a be ngom nyàm nà tsho' ngwù num fe tshobe, Abram ta' yube.
12Lagnyam #Yob 4.13,14be bi mo' neta miaglo ghom Abram, bwôg bo mo' njam ndùb se' ngwù num i. 13Tshùaben #Netu. 1.1-14; Mfa' Gha. 7.6tshob Abram ndù: Lèn ndù nzwil o nsi be ghùn ntùm ngô z'a ke' b'a yub là. Bo nsi lo' yub ghù kuan yi, ghùtni yub num ngu'njù nkù kuà. 14Me #Netu. 12.40-41; Mfa' Gha. 7.7nsi naṅ ntsha tu ngô tse bo nsi be kuan bwe là, bo tum ntùm tshen ngô là boa mfu' yàme. 15Tu wul o, o nsi nèn tèt tà tsho à ntùm fite. O nsi ywèn kua' ntùm mebwô kà kwù. 16A nsi be tôg zwiaṅ benntùn kuà nzwil o bèn mbèn njam nsen ni; nummbe mfànnu ba Amor ke' yoṅ ndun me lo nsi num bo. 17Ngelaṅ lagnyam bi là, mo' neta njam vù, mo' mbwôg nke nkag nzembwôge, tsemo' lambwôg tôg netèt mbàb nyàm tse bo keb nkam mbàa njabte nsi là. 18Num #Mfa' Gha. 7.5sen lé'njù là, Tshùaben wat kàn bo Abram ntshob ndù: Me nsi fà yen ngô li nzwil o, neto' fe num ta'ntse z'a Egipto là tà nèn nkum ta'ntse ndùb, ta'ntse Efrat, 19boa ngô ba Kénita, ngô ba Kénizia, ngô ba Kadmonia, 20ngô ba Hétia, ngô ba Férésia, ngô ba Refaït, 21ngô ba Amor, ngô ba Kanaan, ngô ba Guirgahia bo ngô ba Jébusia.
Currently Selected:
Neto'te 15: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
