Netume 7

Nkeko' gham

1Tshùaben tshob Mosé ndù: Me lo' o ngù nsi yi mbwe Faraon; mfèl o Aron nsi be yu ngatshob ntshob Nsi. 2O nsi ke ghù mba ke lo ze me nsi tshob wù là; mfèl o Aron nsi ke tshob Faraon ndù a faṅ bon Israél tum ntùm ze ngô. 3Tu #Mfa' Gha. 7.36wul àm nsi kag sagntù ntù Faraon, ke kwi'te nkeki boa nsà ntùm ngô Egipto. 4Faraon ke nsi ju' ju ze bin tshob là. Me nsi yab bu àm mum ngô Egipto, ghù tshàm ntshu ntsho, yàm nzwit mèn, bon Israél tum Egipto. Me nsi tshùa njam netsho'te tse ndùbndùb kà ghù ndùlala. 5Ba Egipto nsi lèn ndù me b'a Tshùaben, ngelaṅ ze me nsi nyit bu àm num Egipto, ghù bon Israél tum netèt bo là. 6Mosé bo Aron ghù ju ze Tshùaben na' ntshob bo là, ngù be ndaṅndaṅ. 7Mosé lo ghù ngu'njù ṅam fome, Aron ghù ngu'njù ntshob tat ṅam fome, ndùse bo ke ntshob nu Faraon nà.

Faraon gha neju' ntshu Mosé bo Aron

8Tshùaben tshob Mosé bo Aron ndù: 9Faraon ntshob ndù bin ghù ta' nsà, o tshob Aron lo' kôg se ma' mbwe Faraon. Kôg là nsi tù' ta' nyu. 10Mosé bo Aron nèn mbaṅ mfen Faraon, ngù mba Tshùaben tshob bo là. Aron ma' kôg se mbwe Faraon mba mbwe ghafa' tse, kôg là tù' ta' nyu. 11Là Faraon tsiaṅ ghazenu boa ghaka, mba ghangàm tse bo be Egipto là; mba bo yub lo' nka ngù yub be ndaṅndaṅ. 12Bo ma' njoṅ nkôg mub fa nsi, njoṅ i fa tù' nyu. Nda' ndù se kôg Aron mi njoṅ mub nkôg fa. 13Mba tà ndùlala, ntù Faraon nke nsag be nesage, a ke bam ju ze Mosé bo Aron tshob ndaṅndaṅ mba Tshùaben na' ntshob là.

Mbwe nge': Ntse kaṅ ntù' lem

14Tshùaben tshob Mosé ndù: Faraon tshwèt mfèn ntù; a gha nefaṅ nzwit mèn àm nène. 15Nèn mbaṅ Faraon kua' mà nkebnjù, ndùs'a nsi tum nèn mbaṅ ntse là. Béb i mbaṅ ta'ntse. Tshùb kôg s'a lo nkaṅ ntù' nyu là bu o. 16Tshob Faraon ndù: Tshùaben, Nsi ba Héber lo tum àm ndù me tshob wù ndù o faṅ ze nzwit mèn tum nèn mfa' yi num kônkwa. Tà nse' nkum ndonni o ke' kô nebame. 17Ndùlala #Apok. 16.4Tshùaben tshob ndù: A nsi tshùa njam yen nu li o lèn ndù me b'a Tshùaben. Me nsi lo' kôg s'a bu àm nà lab ntse mi a ta'ntse là yi, ntse kaṅ ntù' lem. 18Ngontse ts'a ntùm ta'ntse là nsi kwùte, ta'ntse ke ndame; ba Egipto nsi kagtùn nenu ntse mi a tum ta'ntse là ke ku'ni. 19Tshùaben tshob Mosé ndù: Tshob Aron ndù a lo' kôg nshù bu i num ntse ba Egipto, num bon ntse, num bon netsha' ntse, num ntam ntse mub boa njoṅ ntô ntse mub fa. Njoṅ i fa nsi kaṅ tù' lem; lem nsi be ntùm njoṅ ngô Egipto fa, ntùm nkab ntù boa nkab ndoṅ. 20Mosé bo Aron ghù mba Tshùaben tshob bo là. Aron bù' kôg tù, ndab ntse mi a ta'ntse là yi num miag Faraon mba num miag ghafa' tse; ndùlala njoṅ ntse fa kaṅ ntù' lem. 21Ngontse ts'a be ntùm ta'ntse là kwùte, ta'ntse nke ndame, ba Egipto ke bèn nku'ni nenu ntse mi a tum ta'ntse là. Lem be ntùm njoṅ ngô Egipto fa. 22Là tse ghangàm ba Egipto bèn ngù yub be ndaṅndaṅ njam nka mube. Ntù Faraon sag, a ke ju' ju ze Mosé bo Aron tshob ndaṅndaṅ mba Tshùaben tshob bo là.

23Faraon lo, mbèn njam ndà i, ke lo' tshen tshu là mba ju là. 24Njoṅ ba Egipto fa tswe' ntse mbaṅ ta'ntse, num neghù ntse nenu; nummbe bo lo ke ku'ni nenu ntse mi a tum ntùm ta'ntse là. 25Tshùaben lo lab ta'ntse a tswe lé'njù sammbàa.

Nge' mbatte bàa; ba metu'

26Tshùaben tshob Mosé ndù: Tsho ndà Faraon ntshob yi ndù: Tshù mba Tshùaben tshob li: Faṅ yàm nzwit mèn ndù a ke mfa' me. 27A be z'o ke nke' nga nefaṅ i a nèn nà, mba me nsi lo' metu' kag nge' yi ntùm njoṅ ngô Egipto fa. 28Mba metu' nsi gha' mbu ntùm ta'ntse, bo ke nko' ntsho ntùm ndà o, ntùm to'ndà o z'o be nzi bwe là, num kunndà su, ntùm ndà ghafa' tsho, ntùm ngô o, ntùm mu ntômbwôg neton tag, ntùm dù' netébte tag bwe. 29Ba metu' nsi ko' num o, num yu ngô, num njoṅ ghafa' tsho fa.

Currently Selected:

Netume 7: BMa

Highlight

Copy