Netume 20

Newat kàn. Ntshù' Nsi gham

(Neb. 5.6-21)

1Nsi tshob njoṅ men ntshob li fa, ntshob ndù:

2A b'a me Tshùaben Nsi o, ze me na' nsô o ngô Egipto, ndà kuan nà.

3Kà ghù tsemo' nsi mbwe àm.

4Kà #Netu. 34.17; Lev. 19.4; 26.1; Neb. 4.15-18; 27.15nabte neto, ke sàm ju z'a fute ju z'a be mfe tù, mfe kamànyam no, ke z'a num nsitsha' mà nsi lo, ke z'a ntùm ntse bam tsha' lo. 5Kà #Netu. 34.6-7; Nes. 14.18; Neb. 7.9-10vù nsi mbwe tshen nsi là, ke fa' bo, nummbe me bèn mbe Tshùaben Nsi o, Nsi ndànghe'e. Me be naṅ ntsha tu ba tà boa bon num zwiaṅ tat ke zwiaṅ kuà lo, a be ze bo bàn àm nà. 6Là nke njab kàn ben ntsha'ntsha', a be ze bo kô àm, nke nze ntshù' màm nà.

7Kà #Lev. 19.12tsi lén Tshùaben Nsi o ntùm tatte, nummbe Tshùaben ke' be kag mèn z'a tsi lén se ntùm tatte là, kà ke naṅ ntsha tu ng'é.

8Ke #Netu. 16.23-30; 31.12-14nkwimte lé'njù Sabbat, nke nze. 9Fa' #Netu. 23.12; 31.15; 34.21; 35.2; Lev. 23.3num lé'njù ntôge, mfa' njoṅ so fa' fa. 10L'a mbe mbatte lé'njù sammbàa, a be Sabbat Tshùaben Nsi o, lé'njù fite. Kà fa' sàm ju sen lé'njù là, ke wù, ke nshum o, ke ngon o lo. Kà mba ngafa' ze mandum ke ze mènnzwi, ke nyàm tsho, ke nkùla' z'a be la' o lo là, kà fa' sàm ju sen lé'njù là. 11Nummbe #Net. 2.1-3; Netu. 31.17Tshùaben na' nabte kamànyam bo tsha'a, dibantse boa tshu ts'a ntùm bwe l'a num lé'njù ntôge; là mfite wul i num mbatte lé'njù sammbàa. A ndùlala, Tshùaben lo naṅ mbotni num lé'njù Sabbat, ndo' ngù lé'njù nze se yi.

12Ghù #Neb. 27.16; Mat. 15.4; 19.19; Mark. 7.10; 10.19; Luk. 18.20; Ef. 6.2-3nku'ni tàan bo màan, ndù ntswe'njù mu tènte ntùm tsha' ze Tshùaben Nsi o fà wù là.

13Kà #Net. 9.6; Lev. 24.17; Mat. 5.21; 19.18; Mark. 10.19; Luk. 18.20; Rom. 13.9; Yako. 2.11zwi mènntùn.

14Kà #Lev. 20.10; Mat. 5.27; 19.18; Mark. 10.19; Luk. 18.20; Rom. 13.9; Yako. 2.11ghù màndà.

15Kà #Lev. 19.11; Mat. 19.18; Mark. 10.19; Luk. 18.20; Rom. 13.9yi tshô.

16Kà #Netu. 23.1; Mat. 19.18; Mark. 10.19; Luk. 18.20ghù kwénta tatte num mfèl o.

17Kà #Rom. 7.7; 13.9ghù miag lànghe' num tunndà mfèl o, ke ghù miag ghe'te num nzwi i, ke num ngafa' i ze mandum, ke ze mènnzwi, ke nyàmna' i ke kekwèn i lo, ke ghù miag lànghe' mba num ke lo z'a b'a ze mfèl o là.

18Ngô #Héb. 12.18-19tsin ngùanesà kà nke njen mfambaṅ, lambwôge, kà nke nju' nze nta, kà nke njen mbat z'a ke ndam nzembwôg là. Ngô be yen ndùlala mbwôg neshu. 19Bo tshob Mosé ndù: Tshob nu bag yu tu, bag nsi ju' wù; là, kà Nsi tshob nu bag, nummbe bag tshwèt mbwôg nekwù. 20Mosé bùnte bo ndù: Kà bin bwôg. Nsi se' à num nelaṅte zine, bo neghù ndù bwôg i tshote zine, ntshètte zin neghù nukebwô. 21Ngô tsin ngùanesà, Mosé kù'te nèn mbaṅ ndot dù' ze Nsi be là.

Ntshù' num dù' neghamte Nsi

22Tshùaben tshob Mosé ndù: Tshù nu z'o nsi tshob bon Israél li ndù: Bin yen ndù me Tshùaben lo tsin mfe kamànyam kà ntshob nu bin. 23A ndùlala be bin ke lo' àm mba nsi ze bo lo' à silba nabt'é yi là, ke ze gol lo. Kà bin nabte lèn tshen nsi là.

24Bin nsi bom ta' tômbwôg tsha' me, ke ton tsin nyàm boa tsin tshule'te num nu fite bwe; bin nsi ton zin nyàm nke' ke ze ndùb lo bwe. Mba yà lo ze me nsi kwimte lén sàm bwe là, me nsi se' yab kàn ntù bin. 25A #Neb. 27.5-7; Yosh. 8.31be ze bin lo' à ndoṅ mbom tômbwôg me yi là, kà bin lo' à ndoṅ mi bo tshua'te là, nummbe mba ghama nsi sagte men ndoṅ nà. 26Kà bin ko' num tuko' kà nèn tômbwôg, mbwôg ndù kà bo yen wut zin njù nge.

Currently Selected:

Netume 20: BMa

Highlight

Copy