Genesis 13

Abram ar Lotkin begarokʼkan

1Unre Abram do acʼren bạhu ar acʼakʼ jotowakʼ soṅgekate Misor disom khon oḍokkate Negeb reakʼ dạkhin hahaṅkar jaega secʼe calaoena ar Lot hõ uni sãoteye calaoena. 2-4Abram do ạḍi kisạ̃ṛe tahẽkana. Uniren do ạḍi utạr ạsul janwarko ar sona rupạ tahẽkantaea. Tayomte uni do Negeb khone uṭhạuente Bethel hạbicʼe senena. Ar nonkate uni do Bethel ar Ae tala reakʼ ona ṭhạ̃ireye seṭerena one okareye ḍeralen ar pạhilre pinḍe benaoletʼ. Ar uni do onḍe Probhu Isore sewawadea.

5Lot, okoe do Abram sãoteye tahẽkan, uniren hõ aema ḍaṅgra, bhiḍi, merom ar tạmbuko tahẽkantaea. 6Menkhan mitʼ ṭhen kin tahẽdaṛeakʼ nonkan jaega do baṅ tahẽkana. Unkin bana hoṛrenge ạsul janwarko ar tạmbuko nunạkʼ ḍher tahẽkante mitʼ ṭhen tahen do muskilge tahẽkantạkina. 7Onate Abram ar Lotren gutiko talare jaoge jhogṛa hoyokʼkan tahẽkana. Ona chaḍa onako oktere Kananrenko ar Pheresiko hõ ona disạmreko girobasokʼ kan tahẽkana.

8Unre Abram do Lote metadea, “Ńelme, sor peṛa kanalaṅ. Onate alaṅ talare ar alaṅren gutiko talare jhogṛakʼ do baṅ ṭhika. 9Goṭa disạmge am samaṅre menakʼa. Onate dela, laṅ begarlenge. Am do leṅga secʼem bachaoan khan iń do jojom secʼ iń calakʼa ar jojom secʼem bachaoan khan iń do leṅga secʼ iń calakʼa.”

10 # Gen 2.10 Unre Lot do Jordan reakʼ bilạn ṭạnḍire ḍher dakʼko ar jaega hõ mońjgeye ńelkeda, metakʼme Probhu Isorakʼ#13.10: Probhu Isorakʼ bagwan: Eden bagwan. bagwan leka, ar onka baṅre hõ Soyer calakʼ hor reakʼ Misor leka. Probhu Isor do un hạbicʼ hõ Sodom ar Gomora do bae ḍahao marao akatʼ tahẽkana. 11Unre Lot do Jordan reakʼ sanam jaega acʼ lạgitʼe bachaoana ar purub secʼe sen idiyena. Nonkate unkin dokin apan ạpinena. 12Abram do Kanan disạmre ar Lot do ona bilạn ṭạnḍi reakʼ nagrahako talareye girobasena. Uni do Sodom nagraha ṭhene ḍerayena. 13Sodomren hoṛko do ạḍi bạṛicʼko tahẽkana onko do Probhu Isor upạrte ạḍiko ghạṭ akatʼ tahẽkana.

Abram do Hebronteye calaoen

14Lote begaren khan Probhu Isor do Abrame metadea, “Am oka jaegarem teṅgo akan onḍe khon utạr, dạkhin ar purub pạchim beṅgetʼ ạcurme. 15#Apos 7.5 Ar okako jaegam ńel ona do am ar amren bõsko jaejug hạbicʼ iń emakoa. 16Iń do amren bõsko gitil lekań saṅgekoa. Dhạrti reakʼ gitil jodi jãhãeko lekha daṛeakʼ khan enḍekhan am bõsren hoṛ hõko lekha caba daṛeakoa. 17Am do goṭa disạm mitʼ dhao dãṛã ạcurme, ente iń do noa disạmge amiń emama.”

18Unre Abram do acʼakʼ tạmbukoe uṭhạukeda ar Hebron ṭoṭha reakʼ Mamre ńutuman mitʼṭen hoṛakʼ sonot dareko ṭhene ḍerayena. Ar onḍehõ uni do Probhu Isor lạgitʼ pinḍe benaokeda.

Currently Selected:

Genesis 13: SBT

Highlight

Copy