Genesis 12

Isor do Abrame hohowaekan

1 # Apos 7.2,3; Ibr 11.8 Probhu Isor do Abrame metadea, “Am do amakʼ disạm, ar amren peṛa pạrbhạko ar am apatakʼ oṛakʼ duạr bạgikate iń okaṭakʼ disạmiń udukʼam ona disạmte calakʼme. 2Iń do am khon mitʼ maraṅ jạtiń benaokoa. Amiń bhorama ariń maraṅmea amakʼ ńutum do goṭa beṛhae pasnaokʼtama ar am hotete hoṛ do bhorko ńama. 3#Gal 3.8 Okoe amko bhoram iń hõ onkoń bhorakoa ar okoe amko sarapam onko hõ ińiń sarapakoa. Ar am iạtege dhạrtiren sanam jạtrenko do bhorko ńama.”

4Probhu Isorakʼ katha lekage Abram doe oḍokena ar Lot hõ uni soṅgeteye calaoena. Haran nagraha bạgiyakʼ jokhecʼ Abramakʼ umer do eaegel mõṛẽ bochor tahẽkana. 5Uni do acʼren bạhu Sạri ar bhạcạt koṛa Lote soṅgekedea are oḍok hecʼena. Ar acʼakʼ sanamakʼko soṅgekate ar tinạkʼ guti kạ̃ṛmĩko Haranreye ńamletʼko onko soṅgekate uni do Kanan disạmteye seṭerena.

Kanan disạmre Abram

6Kanan disạm talate calakʼ jokhecʼ Abram do Sikem nagraha ṭhenakʼ More reakʼ sonot dare hạbicʼe sen idiyena. Unre Kananrenko do ona disạmreko girobasokʼ kan tahẽkana. 7#Apos 7.5; Gal 3.16 Tayomte Probhu Isor do Abram ṭhen ńel ocoyenteye metadea, “Iń do noa disạmge amren bõskoń emakoa.” Unre Abraham do uniye ńel ocoyen Probhu Isor lạgitʼ onḍe mitʼṭecʼ pinḍe benaokeda.

8Ar ona tayom onḍe khon Bethel nagraha reakʼ purub secʼre menakʼ buru ṭoṭha secʼe calao idiyena ar pạchimre Bethel ar purubre Ae nagraha reakʼ tala jaegareye ḍerayena. Uni do Probhu Isor lạgitʼ onḍe hõ mitʼṭecʼ pinḍe benaokeda ar Probhu Isore sewawadea. 9Tayomte onḍe khon uṭhạukate Negeb reakʼ dạkhin hahaṅkar secʼe calaoena.

Abram Misorteye calaoen

10Kanan disạmre mitʼṭecʼ akal hoyena. Ona do maraṅ akalge tahẽkante, ar Abram do thoṛa din lạgitʼ Misor disạmte senkateye girobasena. 11Uni do Misor disạmte hecʼkate acʼren bạhu Sạriye metadea, “Ańjomme, am do ạḍigem cehragea. 12Ar Misorrenko samaṅre tinrem paṛaokʼa unre onko do ińren bạhu kanam menteko hudismea. Khan onko do amko dohomea ar iń doko gojeńa. 13#Gen 20.2; 26.7 Onate onkom metakoa, am dom ińren misera kana. Ar am iạte onko do iń sãote bhageko beohara ar jiwetʼko dohoyińạ.”

14Abraham do tinre Misorteye seṭerena unre Misorrenko doko ńelkeda, Sạri do sạriyakʼge ạḍiye cehragea. 15Unre Pharaokʼa raj dorbarren hoṛko hõ uniko ńelkede khan Pharao ṭhen uniyakʼ kathako lạikeda. Onate Sạri do raj oṛakʼteye idi ocoyena. 16Sạri iạte Pharao do Abram sãote mońj beohare ehopʼkeda. Ar Abraham do bhiḍiko, ḍaṅgrako, gadhako, ũṭko, guti ar kạ̃ṛmĩkoe ńamketʼkoa. 17Menkhan Abramren bạhu Sạri iạte Probhu Isor do Pharao ar uniyakʼ oṛakʼren hoṛko cetanre aema lekan ruạ hasoke paṛao ocokeda. 18-19Unre Pharao do Abrame hohowadeteye metadea, “Am do iń sãote cedakʼ nonka dom beoharkeda? Cedakʼ amren bạhu do amren misera kanae mentem lạikedea. Ona iạtege coṅ ińma baplaye lạgitʼ iń ạgukede. Nui amren bạhu soṅgekate am do calaojoṅme.” 20Noa menkate Pharao do uniren hoṛkoe hukumatʼkoa ar onko do Abramakʼ jotowakʼko salakʼ uni ar uniren bạhuko bidạkatʼkinạ.

Currently Selected:

Genesis 12: SBT

Highlight

Copy