লূক 1
1
উৎসর্ব
1-2কোচ্পেইয়্যে থিয়ফিল, আমা ভিদিরে যেদক্কানি ঘটনা ঘোট্যে সিয়েনি যিগুনে পৌইল্যাত্তুন্ ধুরি নিজো চোগেদি দেখ্যন্ আর গোজেনর গম্ হবর্ ফগদাং গোজ্যন্, তারা আমা ইধু বেক্কানি জানেয়োন্, আর তারা কধামজিম্ ভালোক্কুনে সিয়েনি পৌইদ্যেনে পর্পর্ লেখ্যন্। 3সেই বেক্ বিষয়ানি পৌইদ্যেনে পৌইল্যাত্তুন্ ধুরি গমেডালে হবরা-হবর্ লোইনে তত্তে সিয়েন এক্কান্ এক্কান্ গুরি লেগানা মুইয়ো গম্ বিলি মনে গুরিলুং। 4সেনত্তে তুই যিয়েন হবর্ পেইয়োচ্ সিয়েন সত্য না কি কোই পারিবে।
বাপ্তিস্মদিয়্যে যোহনর্ জর্মর্ পৌইদ্যেনে আগাম্ কধা
5হেরোদে যেক্কে যিহূদিয়া রেজ্যর্ রাজা এলঅ সে সময়োত্ ধর্মগুরু অবিয়ের দলত্ সখরিয় নাঙে যিহূদীগুনোর্ এক্কো ধর্মগুরু এলঅ। তা মোক্কো নাঙান্ এলদে ইলীশাবেত। তেয়ো এলদে ধর্মগুরু হারোণর এক্কো গুট্টি। 6তারা দ্বিজনে গোজেনর্ চোগেদি ধার্মিক এলাক্। প্রভুর্ বেক্ উগুমানি আর সুদোমানি তারা গমেডালে পালেদাক্। 7তারার্ কনঅ পুয়ো-ছা ন-অয় কিয়া ইলীশাবেতে ভাঝ্ এলঅ। সিয়েন বাদেয়ো তারার্ বয়জঅ অমকদ বেশ্ ওই যেইয়্যে।
8একবার্ নিজো দলর্ পালা সময়োত্ সখরিয় ধর্মগুরু ইজেবে গোজেনর সেবা যগোজ্যে। 9ধর্মগুরুগুনোর কাম চলেদে সুদোম মজিম্ চাম্বা চেইনে তারেই বেঈ নেযা ওইয়্যে, যেন তে প্রভুর উবোসনা-ঘরর্ পবিত্র জাগানত্ যেইনে পৌইরেক্ জ্বালেই পারে। 10পৌইরেক্ জ্বালেবার্ অক্তত্ বারেদি বোউত্ মানুচ্ তবনা গত্তন্। 11এমন্ সময়োত্ পৌইরেক্-পূজোবোর্ ডেনেদি প্রভুর্ এক্কো দূত অঢাদত্ এইনে সখরিয়রে দেগা দিলো। 12স্বর্গদূত্তোরে দেগিনে তা মনান্ চুলুবুলু ওই উদিলো আর তে দোরেল।
13স্বর্গদূত্তো তারে কলঅ, “সখরিয়, ন-দোরেচ্, কিয়া গোজেনে তঅ তবনাগান্ শুন্ন্যে। তঅ মোক্কো ইলীশাবেতর্ এক্কো পুয়ো অবঅ। তুই তা নাঙান্ রাগেবে যোহন। 14তে তঅ জিংকানিত্ অমকদ হুজি অইদ্যে ধোক্ক্যেন্ অবঅ আহ্ তার জর্মানাত্তে আরঅ ভালোক্জনে হুজি অবাক্, 15কিয়া প্রভুর্ চোগেদি তে দাঙর্ অবঅ। তে কনদিন্অ আংগুর-রস বা কনঅ বাবোত্যে মদ্ ন-হেবঅ আর মা পেদত্ থাগদে তে পবিত্র আত্মালোই ভর্ পুনোং অবঅ। 16ইস্রায়েলীয়গুনোত্তুন্ ভালোক্কুনোরে তে তারার্ প্রভু গোজেন ইধু ফিরেই আনিবো। 17ভাববাদী এলিয় ধোক্ক্যেন্ মনভাব্ আর খেমতালোই তে প্রভুর আগেদি এবঅ। তে বাবঅ মনান্ পুয়োবো ইন্দি ফিরেব আর অবাধ্য মানুচ্চুনোর্ মনভাব্ বুদুলিনে গোজেন ভক্ত মানুচ্চুনোর মনভাব ধোক্ক্যেন্ গুরিবো। এবাবোত্যেগুরি তে প্রভুত্তে এক দল মান্জ্যরে পুরোপুরি গুরিনে যুক্কোল্ গুরিবো।”
18সেক্কে সখরিয় স্বর্গদূত্তোরে কলঅ, “কেধোক্ক্যেনগুরি মুই সিয়েন বুঝিম্? মুই দঅ বুড়ো ওই যেইয়োং আর মঅ মোক্কোর্ বয়জ্অ বোউত্ বেশ্ ওই যেইয়্যে।”
19স্বর্গদূত্তো তারে কলঅ, “মঅ নাঙান্ গাব্রিয়েল; মুই গোজেন মুজুঙোত্ থিয়্যেই থাং। তঅ লগে কধা কবাত্তে আর তরে এ গম্ হবরান্ দিবাত্তে গোজেনে মরে পাধেয়্যে। 20চাহ্, মঅ কধাগান সময়মজিম্ পূরোণ অবঅ, মাত্তর্ তুই মঅ কধাগান বিশ্বেজ্ ন-গরচ্ বিলি ববা ওই থেবে। যেদক বিলোন্ সং ইয়েনি বেক্কানি ন-ঘদে সেদক্ বিলোন্ সং তুই কধা কোই ন-পারিবে।”
21ইন্দি মানুচ্চুনে সখরিয়ত্তে বাজ্জেই আগন্। উবোসনা-ঘরর্ পবিত্র জাগানত্তে তার্ দেরি অর্ দেগিনে তারা চিদে গরা ধুরিলাক্। 22পরেদি সখরিয় যেক্কে নিগিলি এলঅ সেক্কে মানুচ্চুনো লগে কধা কোই ন-পারিলো। ইয়েন্দোই মানুচ্চুনে বুঝি পারিলাক্ পবিত্র জাগাত্ তে কনঅ দর্শন পেইয়্যে। তে মানুচ্চুনো ইধু ইজিরেদি কধা কুয়ো ধুরিলো আর ববা ওই রলঅ।
23ধর্মগুরুবোর্ কামর্ পালা থুম্ অনার পরেদি সখরিয় ঘরত্ গেলঅ। 24ইয়েনর্ পরেদি তা মোক্কো ইলীশাবেতে পিদিলী অলঅ আর পাচ্ মাস সং ঘরান্ ফেলেইনে বাড়েদি ন-গেলঅ। তে কলঅ, 25“ইয়েন প্রভুর কাম্। মান্জ্য ইধু মঅ লাজানাগান্ দূর্ গুরিবাত্তে তে ইক্কিনে মইন্দি রিনি চেইয়্যে।”
প্রভু যীশুর জর্মর্ পৌইদ্যেনে আগাম্ কধা
26-27ইলীশাবেতে যেক্কে ছয় মাসর্ পিদিলী সেক্কে গোজেনে গালীল রেজ্যর্ নাসরত আদামর্ মরিয়ম নাঙে এক্কো গাবুজ্যে মিলে ইধু গাব্রিয়েল দূতরে পাধেল। রাজা দায়ূদো গুট্টির যোষেফ নাঙে এক্কো মান্জ্য লগে তার্ মেলার্ কধাবাত্তা ঠিগ্ ওইয়্যে। 28স্বর্গদূত্তো মরিয়ম ইধু এইনে তারে ভালেদি জানেইনে কলঅ, “প্রভু তঅ সমারে আঘে আর তরে বোউত্ বর্ দিয়্যে।”
29এ কধাগান শুনিনে মরিয়ম মনান্ খুব্ চুলুবলু ওই উদিলো। তে চিদে গরা ধুরিলো এবাবোত্যে ভালেদি জানানার্ মানেয়ান্ কি। 30স্বর্গদূত্তো তারে কলঅ, “মরিয়ম, ন-দোরেচ্, কিয়া গোজেনে তরে অমকদ দোয়্যে গোজ্যে। 31শুন্, তুই পিদিলী অবে আর তর্ এক্কো পুয়ো অবঅ। তুই তা নাঙান্ যীশু রাগেবে। 32তে দাঙর্ অবঅ। তারে দাঙর্ গোজেনর পুয়ো কুয়ো অবঅ। প্রভু গোজেনে তার পূরোণি মানুচ্ রাজা দায়ূদো সিংহাসনান্ তারে দিবো। 33তে যাকোব গুট্টি মানুচ্চুনো উগুরে জনম্ভরা রাজাগিরি গুরিবো। তার রাজাগিরি কনদিন্অ থুম্ ন-অবঅ।”
34সেক্কে মরিয়ম স্বর্গদূত্তোরে কলঅ, “ইয়েন কেধোক্ক্যেন্ গুরি অবঅ? মর্ দঅ মেলা ন-অয়।”
35স্বর্গদূত্তো কলঅ, “পবিত্র আত্মা তঅ উগুরে এবঅ আর দাঙর্ গোজেন ছাবা তঅ উগুরে পুড়িবো। ইয়েনত্তে যে পবিত্র পুয়োবো জোর্মেব তারে গোজেনর্ পুয়ো কুয়ো অবঅ। 36চাহ্, এ বুড়ো বয়জত্ তর্ কুদুম্মো ইলীশাবেতর্ পেদত্অ পুয়ো জর্ম ওইয়্যে। মান্জ্যে কদাক্ তার ঝি-পুয়ো ন-অবাক্, মাত্তর্ ইক্কিনে তার ছয় মাস চলের্। 37গোজেন ইধু অসম্ভব বিলি কনঅ কিজু নেই।”
38মরিয়মে কলঅ, “মুই প্রভুর্ চাগরানি, তঅ কধা মজিম্ মঅ উগুরে বেক্কানি ওক্।” ইয়েনর্ পরেদি স্বর্গদূত্তো মরিয়ম কায় কুরেত্তুন্ গেলগোই।
ইলীশাবেত ঘরত্ মরিয়ম
39সে পরেদি মরিয়মে যাদিমাদি গুরি যিহূদিয়া রেজ্যর্ এক্কান আদামত্ গেলঅ। আদামান্ মুড়ো-মুড়ি চাগালাত্ এলঅ। 40মরিয়মে সিধু সখরিয় ঘরত্ সুমিনে ইলীশাবেতরে ভালেদি জানেল। 41-42ইলীশাবেতে যেক্কে মরিয়ম কধা শুনিলো সেক্কে তা পেদত্ চিগোন্ চিজিবো নাজি উদিলো। তে পবিত্র আত্মালোই ভর্পুর্ ওইনে রঅ ছাড়িনে কলঅ, “বেক্ মিলেগুনোত্তুন্ তুই বর্পেইয়্যে আর তর্ যে পুয়োবো অবঅ সেই পুয়োবোয়ো বর্পেইয়্যে। 43মঅ প্রভুর্ মাবুয়ো মইধু এইচ্চ্যে, ইয়েন কিবাবোত্যেগুরি সম্ভব্ অলঅ? 44যেক্কে মুই তঅ কধাগান্ শুনিলুং সেক্কে মঅ পেদত্ চিগোন্ চিজিবো হুজিয়ে নাজি উদিলো। 45তুই বর্পেইয়্যে, কিয়া তুই বিশ্বেজ্ গোজ্যস্, প্রভু তরে যিয়েন কোইয়্যে সিয়েন্ পূরোণ অবঅ।”
46সেক্কে মরিয়মে কলঅ,
“মঅ পরাণানে প্রভুর্ বাঈনী গরের্;
47মর্ উদ্ধোরগুরিয়্যে গোজেনরে নিইনে
মঅ পরাণান্ হুজিয়ে ভুরি উঠ্যে,
48কিয়া তার্ এ সামান্য চাগরানীবো ইন্দি
তে মনযোগ্ দিয়্যে।
ইক্কেত্তুন্ ধুরি বেক্ মানুচ্চুনে মরে বর্পেইয়্যে কবাক্,
49কিয়া খেমতাবলা গোজেনে মত্তে
কত্তমান্ গম্ কাম্ গোজ্যে।
তে পবিত্র।
50যিগুনে তারে ভোক্তি গরন্
তারা উগুরে তে দোয়্যে গরে,
গুট্টির্ পর্ গুট্টি ধুরি গরে।
51তে আঢ্ বাড়েইনে দাঙর্ খেমতার্ কাম্ গোজ্যে;
যিগুনোর্ মনানি বার্বোলোই ভরা
তারারে তে চেরোকিত্তে দূর্ গুরি দিয়্যে।
52সিংহাসনত্তুন্ রাজাগুনোরে তে লামেই দিয়্যে,
মাত্তর্ সাধারন মানুচ্চুনোরে তুলি ধোজ্যে।
53যিগুনোর্ অভাব আঘে,
গম্ গম্ জিনিচ্চোই
তে তারার্ অভাব্পানি পূরোণ গোজ্যে,
মাত্তর্ তাগোয়্যেগুনোরে সুদো আঢে বিদেয় গোজ্যে।
54-55তে আমা পূরোণি মানুচ্চুনো ইধু
যে এগেম্ গোজ্যে,
সেবাত্যেগুরি তে তার্ চাগর্
ইস্রায়েলরে সাহায্য গোজ্যে।
অব্রাহাম আর তা গুট্টির্ মানুচ্চুনো উগুরে
জনম্ভরা দোয়্যে গুরিবার্ কধা তে মনত্ রাগেয়্যে।”
56পেরায় তিন মাস ইলিশাবেত ইধু থানার্ পরেদি মরিয়মে নিজো ঘরত্ ফিরি গেলঅ।
বাপ্তিস্মদিয়্যে যোহনর জর্ম
57অক্ত এলে পরেদি ইলীশাবেতর্ এক্কো পুয়ো অলঅ। 58তা উগুরে প্রভুর অমকদ দোয়্যের্ কধানি শুনিনে পাড়াল্যেগুনে আর কুদুম্মোগুনে তা সমারে ফুত্তি গরা ধুরিলাক্। 59যিহূদীগুনোর্ সুদোম মজিম্ আস্ট্য দিনোত্ তারা পুয়োবোরে সুন্নত গুরিবার কামত্ এগত্তর্ অলাক্। তারা পুয়োবো নাঙান্ তা বাবঅ নাঙান ধোক্ক্যেন্ সখরিয় রাগেবাত্তে চেলাক্, 60মাত্তর্ তা মাবো কলঅ, “না, ইবে নাঙান্ যোহন রাগা অবঅ।” 61তারা ইলিশাবেতরে কলাক্, “তঅ কুদুম্মোগুনো ভিদিরে দঅ কারর্ সেই নাঙান্ নেই।”
62তারা ইজিরেদি পুয়োবো বাব্পোত্তুন্ জানিবাত্তে চেলাক্ তে কি নাঙ্ দিবাত্তে চাই। 63সখরিয় লিগিবার্ জিনিস চেইনে লিগিলোদে, “তা নাঙান্ যোহন।”
সেক্কে তারা বেক্কুনে আমক্ অলাক্, 64আর সেক্কে সখরিয় মুয়োন্ আহ্ জিলান্ খুলিলো আর তে কধা কনা আহ্ গোজেনরে বাঈনী গরা ধুরিলো।। 65ইয়েন্ দেগিনে পাড়াল্যেগুনে বেক্কুনে দোরেলাক্, আর যিহূদিয়ার্ বেক্ মুড়োমুড়ি চাগালার্ মানুচ্চুনে ইয়েনি পৌইদ্যেনে কুয়োকি গরা ধুরিলাক্। 66যিগুনে এ কধানি শুনিলাক্ তারা পত্তিজনে মনে মনে সিয়েন ভাবদন্ আর কদন্, “দাঙর্ ওইনে এ পুয়োবো সালে কি অবঅ!” তারা এ কধাগান কলাক্, কিয়া প্রভুর খেমতা এ পুয়োবো উগুরে দেগা যেইয়্যে।
সখরিয় মুয়োদি গোজেনরে বাঈনী গরানা
67পরেদি পুয়োবোর্ বাপ্পো সখরিয় পবিত্র আত্মালোই ভর্পুনোং ওইনে ভাববাদী ইজেবে এ কধাগান কুয়ো ধুরিলো,
68“ইস্রায়েলর প্রভু গোজেনরে নাঙ্ গিনে ওক্,
কিয়া তে তার্ নিজো মানুচ্চুনো ইন্দি
মনযোগ্ দিয়্যে আর তারারে উদ্ধোর্ গোজ্যে।
69তে আমাত্তে
তা চাগর্ দায়ূদো গুট্টিত্তুন্
এক্কো খেমতাবলা উদ্ধোর্ গুরিয়্যে তুল্যে।
70এ কধাগান তার্ পবিত্র ভাববাদীগুনোর্ মুয়োদি
তে ভালোক্ দিন কোইয়্যে।
71তে শত্রুগুনো আঢত্তুন্
আর যিগুনে ঈচ্ গরন্ তারার বেক্কুনো আঢত্তুন্
আমারে রোক্ষ্যে গোজ্যে।
72তে আমা পূরোণি মানুচ্চুনোরে দোয়্যে গুরিবাত্তে
আর তার পবিত্র বেবস্থা, অত্তাৎ তা শমথতান্
পূরেবাত্তে আমারে রোক্ষ্যে গোজ্যে।
73-75সেই শমথতান্ তে আমা পূরোণি মানুচ্
অব্রাহাম ইধু গোজ্যে।
তে শত্রুগুনো আঢত্তুন্
আমারে উদ্ধোর্ গোজ্যে
যেন যেদক্দিন বাঁজি থাং
পবিত্র আর গমেডালে তা মুজুঙোত্ থিয়্যেইনে
ন-দোরেয়্যেগুরি তারে সেবা গুরি পারং।
76পুয়োবো মর্,
তরে দাঙর্ গোজেনর্ ভাববাদী কুয়ো অবঅ,
কিয়া তুই তা পথ্তান্ ঠিগ্ গুরিবাত্তে
তা আগে আগে আঢিবে।
77-78তুই তা মানুচ্চুনোরে জানেবে,
কিবাবোত্যেগুরি আমা গোজেনর্ দোয়্যের্ কারনে
পাপর্ ক্ষেমা পেইনে
পাপত্তুন্ উদ্ধোর পাহ্ যায়।
তা দোয়্যেলোই স্বর্গত্তুন্ এক্কো উদেদে বেলান্
আমা উগুরে লামি এবঅ,
79যাতে আন্ধারত্ আর মরণর্ ছাবাত্ যিগুনে বুয়োই আগন্
তারারে পহর্ দি পারে,
আর শান্তির পদেধি আমারে চালেই পারে।”
80পরেদি যোহনে দাঙর্ উয়ো ধুরিলো আর মনেদি দরমর ওই উদো ধুরিলো। ইস্রায়েলীয়গুনো মুজুঙোত্ খুলোমেলা গুরি থেবার্ আগে সং তে ধূল্যেচর-চাগালাত্ এলঅ।
Currently Selected:
লূক 1: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
