Maakö 11

Zezwii yɛ ‑mä Zeluzalɛɛmö plɛ

(Matie 21.1-11; Lwiikö 19.28-40; Zaa 12.12-19)

1Zezwii ‑nyɛ 'ɔ ‑gänɩwaa 'sɔ wa 'dio Zeluzalɛɛmö a ‑glɔ yɔwʋ, wa lɛ 'kää ‑gwlɩ 'tikïyiea wa laa Bɛtɩfazee 'n Betanii ghlɩɛ yii, Olivieswii a ‑gägaa yɔwʋ a daa, wa nɛmö ‑lɛ, 'n Zezwii yiɛ 'ɔ ‑gänɩwaa a gla'mö a nɩkpa 'sɔ tie. 2'N ɔ yuëë 'dɩ 'nyɛ, ɔ lɛ naa: «‑Glɔɔ ‑wʋ ‑wʋä mä'a a 'yukuu, a nɩ mö ‑mä. A ‑kä ‑mä plɛ cuu, a yi ‑sʋkʋfanɩ a ‑dɩgba ‑bhlʋ 'ylɩmö, a ‑glɛ. Nɩkpɛ 'naa ‑bhlɛ tɛkäsɛ ‑gömö ‑gbälɛ, a nɩ ‑daa 'kpɔ a ‑ka'ma ‑lɛ. 3'N nɩkpɛ ‑kaanyɩ nimï 'yɩbhä nɩɩ, 'saa bhä 'n a zʋ bhä sa'a? A nɩ 'nyɔ 'dɩ nɩɩ, ‑Alowli mɔɔ yɩbhaa. ‑Maa ɔ yeanya ‑sɩkaa ‑lɛ.» 4Wa möä, wa lɛ 'bhöö 'lɛ, ‑lɛ 'yio yɔwʋ, ‑budu ‑bhlʋ a ‑gbëlea yɔwʋ, ‑sʋkʋfanɩ a ‑dɩgba ‑glɛ ‑lɛ. N wa yeaa 'kpɔ ‑dɩ. 5'N ‑wa ‑wʋ a ‑lɛ a gla'mö a ‑mumuë yuëë nimï 'yɩbhä nɩɩ: «'Saa a nʋ bhä? 'Saa bhä 'n a dɩ ɔ ‑sʋkʋfanɩ a ‑dɩgba 'kpɔ?» 6Sɛɛ Zezwii gbä a‑a wa nɩ gbää, 'n wa yiɛ ‑sɩbhä gbä. N wa yuëë kɛ yɔwʋ ‑sɛ. 7'N wa yeaa ‑mä Zezwii kwä, ‑lɛ a ‑gömö, 'n wa yiɛ ‑lɛ 'wa ‑banɩɩ lʋlʋ 'n Zezwii yeaa ‑gömö ‑gbälɛ. 8'N nɩkpa a 'kɔkɔmlɛ yiɛ ‑lɛ 'yio 'wʋ 'wa ‑banɩɩ lʋlʋ. 'N ‑mumuë yiɛ ‑gapatɩɩ wa ‑dɩ a‑a ‑mä 'wa 'lagbïlea 'mö ‑lɛ 'yio zʋ. 9Muë ‑gänɩ Zezwii 'yuku ‑muë ‑gänɔ nimï, wa 'wuë 'n wa kpaa 'mö, 'n wa nʋä:

«Ozana! ‑Ɔ yiɛ dɛ'ɛ ‑Alowli Lagɔ a 'nglɩ 'möö,

Lagɔ nɩ 'pɔ 'nyu aa!

10'Bhlɩlowlii ‑ɔ 'kää ‑aa dɩba 'kɔdɔ Daviidɩ a saa 'kämanɩɩ, ɔ yɛ yi.

Lagɔ nɩ 'pɔ 'nyu aa!

Ozana ‑mä Lagɔtapɛ 'wʋ aa!»

11'N Zezwii yiɛ ‑mä Zeluzalɛɛmö ghlɛ, 'n ɔ yiɛ ‑mä Lagɔbudu 'Kɔdʋʋ 'mö plɛ. 'Saa plɩɛ ‑mä 'wʋ 'wuë, 'n ɔ yiɛ 'ylɩmö, 'n ɔ yiɛ ‑mä 'wlʋ. Swe lɛ 'kä 'yluä mö, ɔ ‑nyɛ wa kʋgbä'sɔ ‑kpɔ 'sɔ, 'n wa yiɛ Betanii 'mö.

Zezwii yɛ su bhätlɩnɩ

(Matie 21.18-19)

12Zlɩ zɩɛ, Zezwii ‑nyɛ 'ɔ ‑gänɩwaa 'sɔ wa 'bhöönɩ ‑mä Betanii, 'n ngɔmʋ yoo 'lɩbhä. 13'N ɔ yiɛ ‑mä 'yuku fiigösu 'ylɩmö. Wʋ 'wlu a ‑patɩkwëa a 'käda. 'N ɔ yuä zɛmö plɛ, 'n ɔ yuä 'wlu yɩlɩ, wʋ ‑kä a 'bhï 'wlu ‑kä a za. ‑Maa ɔ 'nʋä 'bhë ‑bhlʋ a'bhë 'wlu ghlɩ. 'Wʋ tlʋtlʋtɛnyɩɩ 'nɩɛ ‑bhlɛ ghlɛ zaa, kpɩ a 'yize wʋ kää 'wlʋ. 14'N Zezwii yuä bhätlɩnɩ, ɔ lɛ naa: «‑Nmö su nɩ, ‑bɛ nɩ tɩa'a 'kwädlɩ ‑na 'yli a'bhë li.» Ɔ gbää sa'aa, 'ɔ ‑gänɩwaa 'nʋ.

Zezwii yɛ 'pɛlʋpäwaa ‑mä Lagɔbudu 'Kɔdʋʋ 'mö kpëti

(Matie 21.12-17; Lwiikö 19.45-48; Zaa 2.13-22)

15Zezwii ‑nyɛ 'ɔ ‑gänɩwaa 'sɔ 'n wa yiɛ ‑mä Zeluzalɛɛmö ghlɛ, 'n ɔ yiɛ ‑mä Lagɔbudu 'Kɔdʋʋ a 'ligbëa 'mö plɛ. Nɩkpa ‑wa 'pänɩɛ ‑mä 'pɛlʋ ‑nyɛ ‑wa pɩaa 'sɔ, 'n ɔ yuë ‑mä kpëti. ‑Wa zigbanɩɛ moni 'mö, 'n ɔ yiɛ wa 'tebhli dlɩsɛ ‑gbïli, ‑wa pää ‑kpakwiea 'pɛlʋ 'a ‑klikpïï kökä. 16'Plɩplɩwa ‑mumuë ‑wa ‑suä 'wlu, ‑wa ‑dɩnɩɛ Lagɔligbëa 'möö, wa 'wuë 'n ɔ yuëë 'nigba. 17'N ɔ yuëë 'cɩa. Ɔ lɛ naa: «Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ, Lagɔ lɛ naa: 'Na ‑buduu, ngäya 'wuë ‑kaa ‑mä bhibhenɩ a ‑luä.#11.17 Ezayii 56.7; Zelemii 7.11. ‑Maa abhʋa abhlɩ, 'mö a 'zʋaa 'wiwa a ‑budu 'wʋ.»

18 Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ, wa 'nʋä wɛlɩ 'laa, sɛ wa 'kää zʋ wa 'kä Zezwii 'lɩbhä ɔ 'kä 'ku, ‑sɩbhä wa tɛlɩɛ sɛ. ‑Maa nɩkpa 'kɔkɔmlɛ ‑wa ‑pʋnɔɔɔ 'yukwlii, 'ɔ 'cɩacɩasaa, ‑sɩbhä zuzu a ‑sʋä ‑gömö, zaa, Zwiiföwaa 'a 'kädɩ 'la, ‑ngänɩ wa ‑ngänɩɛ wa 'kɔ 'lɩbhä a dɔ'wʋ. 19‑Kidosɛ ghlɛɛ, Zezwii ‑nyɛ 'ɔ ‑gänɩwaa 'sɔ 'n wa yiɛ ‑mä Zeluzalɛɛmö 'bhöö, n wa yiɛ mö.

Dlɩ'wʋkänɔɔ a libhoo

(Matie 21.20-22)

20Zlɩ zɩɛ, wa ‑wʋ 'plɩ dɔ'wʋ, fiigösuu Zezwii bhätlɩnɩ a‑a, 'n 'ɔ ‑gänɩwaa yuë 'ylɩmö, wʋ ku‑u. 21'N Piɛlɩ a dlɩ yiɛ wʋ da bhlinɩ, ɔ lɛ naa: «‑Atʋ, yɩɛ, fiigösuu ‑n bhätlɩnɩ a‑a, wʋ yɛ 'ku.» 22'N Zezwii yuëë 'dɩ 'nyɛ nɩɩ: «A nɩ 'tɛɛnɩ Lagɔ dlɩ! 23‑Tiamö n nyanyɩɛ dɛ'ɛ 'dɩ, 'n nɩkpɛ ‑kä ‑gäga nɩ 'dɩ 'nyɛ nɩɩ: 'Bhöö ‑sɩkaa dɛ'ɛ n 'kä ‑mä gïnyɛ 'mö bhlinɩɛ mö, 'n gʋgɔgʋgʋ 'nɔ dlɩzɛmö ‑wʋ, ‑maa 'n ɔ ‑kɩɩ dlɩ 'wʋ ‑kä nɩɩ, sɛ ɔ gbää da'a ‑sɩbhä yi 'yli 'wlʋnɩɩ, ‑sɩbhä yi ‑tiamö 'yli 'wlʋnɩ. 24Nza n gbää nɩɩ, a ‑kä Lagɔ bhibhe a ‑kɔɔ ‑lu 'yɩbhänɩɩ, a nɩ kɩ dlɩ 'wʋ nɩɩ, ɔ yɛ 'wʋ nglu ɔ 'kanyu 'nyɛ. ‑Lɛ a dɔ'wʋ ɔ yeanyu ‑tiamö 'nyɛ.

25A ‑kä ghäyɩ 'nɩgbönɩ a ‑kä Lagɔ bhibhe dɔ'wʋ ‑wʋ, 'n a ‑kä nɩkpɛ a wɛlɩ 'mlɩɩ ‑kä, a nɩ 'tatinii 'yi. ‑Lɛ a dɔ'wʋ a dɩba Lagɔ ‑ɔ ‑wʋä ‑mä ghäyɩ 'wʋʋ, ɔ yi 'a 'nyinylolii a gbʋʋ 'yi 'tatinɩmö. [26‑Maa ‑lizokuu a'bhɩa nʋanyɩɛ 'wlu 'n a 'nɩ yɩ gbʋ 'yi 'tatinɩɩ, a dɩba Lagɔ ‑ɔ ‑wʋä ‑mä ghäyɩ 'wʋʋ, ɔ 'naa 'kä 'a 'nyinylolii a gbʋʋ 'yi 'tatinɩmö.]»

‑Ɔ tie bhä Zezwii?

(Matie 21.23-27; Lwiikö 20.1-8)

27Zezwii ‑nyɛ 'ɔ ‑gänɩwaa 'sɔ, 'n wa yi'ɛɛ ‑mä Zeluzalɛɛmö 'bɩwʋ yi. 'N ɔ yiɛ ‑mä Lagɔbudu 'Kɔdʋʋ 'mö plɛ. Ɔ ‑wʋ 'mö zi dɔ'wʋ, Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ, Zwiiföwaa a 'nɛɛnɩwa 'kädɩɩ kökä, 28'n wa yoo nimï 'yɩbhä, nɩɩ: «‑Lii 'wuë ‑n nʋä, ‑ɔ tieami bhä 'wʋ, ‑ɔnyɩ 'nglɩ 'mö ‑n nʋni bhä?» 29'N Zezwii yuëë 'dɩ 'nyɛ nɩɩ: «'Kïbhë ‑bhlʋ ‑kpöö 'mö n 'kanyɩɛ 'wʋ 'yɩbhänɩ, a ‑kaa ‑gömö ‑sɛ 'wëë, ‑ɔ tiaaa, 'n n 'kanyɔ sʋlʋnɩ. 30N nɛ naa, Zaa Batisɩ, ‑ɔ tio a bhä 'n ɔ wɔlʋ a bhä nɩkpa 'wlu 'nɩ? Lagɔ mɔ 'nɩɩ, ‑maa nɩkpɛ bhä ‑a? A nɩ nyɩaaa ‑ka 'dɩ.» 31Zezwii gbää sa'aa, 'n wa yiɛ ylɩ 'mö mö, wa 'kä yi wa 'kɩ ‑gömö ‑sɛ. Wa lɛ naa: «A‑a ‑kä nɩɩ Lagɔ mɔɔ tio a‑a nʋʋ, sɛ'ɛ ɔ 'kää nɩɩ, zaa, saa bhä 'n a 'nɔ a bhä dlɩ 'wʋ ‑kä 'nɩ? 32A‑a ‑kä'ɛ nɩɩ, nɩkpɛɛ tio a‑a nʋʋ, nɩkpabhë 'naa ‑kä ‑wa.» Ɛ'ɛ ‑bhö nyɩasɩ ‑maa, wa ‑yi sɛ nɩɩ, Zaa Batisɩ, Lagɔ a 'möbhïlanɩnyɔɔ ɔ glɩnɩ a‑a ‑tiamö. Zaa 'n wa yiɛ ‑gu. 33'N wa yiɛ Zezwii 'dɩ 'nyɛɛ mö nɩɩ: «Zaa Batisɩ, ‑aaa ‑ɔ kɔ tiee ‑yi.» Zezwii lɛ: «‑Aa! N kɩ 'nʋ. Zaa, 'naa 'kanyɩ'ɛ na a ‑ɔ tieaaa sʋlʋnɩ.»

Currently Selected:

Maakö 11: bet

Highlight

Copy