Zaa 17

Zezwii yɛ 'ɔ ‑gänɩwaa a 'wlumö Lagɔ bhibhe

1Zezwii 'nyɛɛ sa'a ɔ ‑nʋa 'dɩ 'wëë, 'n ɔ yiɛ ghäyɩ yɩlɩ, 'n ɔ yiɛ Lagɔ bhibhe, ɔ lɛ naa: «‑Atʋ, 'tɛnyɩɩ yɛ ghlɛ, 'ghlimanɩ ‑na yowli 'a nglɩɩ, nzɩɩ ‑na yowli 'kä ‑na'a nglɩɩ 'ghlimanɩ. 2‑Nmö kää 'nglɩ, 'n ɔ 'kämanɩɛ nɩkpaa 'wuë ‑gömö, nzɩɩ nɩkpaa 'wuë ‑n 'zʋaa ɔ ‑nʋä 'wʋʋ, ɔ 'kʋä 'pɩwʋ mää 'naa 'kää 'yli bhɩɛ 'nyɛ. 3‑Nmö glɩnɩɛ ‑tiamö a Lagɔ. Wa ‑kämö yɩbhlɩnɩɩ, Zezwii Kliisɩ, ‑n tiee mä'ä dʋdʋ 'wʋ, wa 'kɔ yɩbhlɩnɩɩ, mɩɩ glɩnɩɛ 'pɩwʋ mää 'naa 'kää 'yli bhɩɛɛ. 4Mä'ä dʋdʋ 'wʋ, n yɛ ‑na'a 'ghïlinɔɔ 'yli 'wälanɩ 'wë. Libhoo ‑n nyɩaa a‑a, n kʋ nʋ 'wë. 5Dɛɛ 'pɩwʋ a ‑lii 'wuë 'nɩ a‑a ‑bhlɛ 'wlʋ a'bhë, ɛ 'ghïlinɔɔ n kä a‑a ‑mä ‑na yɔwʋ, n ‑kä ‑mä 'bɩwʋ yii, nyɩa'mu yowʋ.

6Nɩkpaa ‑n ‑sɛɛ ‑lɛ mä'ä 'pɩwʋ a ‑nʋa gla'mö ‑n nyɩaaa yowʋʋ, n kʋä sʋlʋnɩ 'wë nɩɩ, ‑nmö glɩnɩɛ ‑tiamö a Lagɔ. ‑Nmö wa ‑lowli, ‑nmö nyɩa'muëë, 'n n yuëë ‑na'a wɛlɩɩ 'nyɛ 'n wa yiɛ 'klʋkpamö zʋ. 7Wa ‑yia'a ‑sɩkaa sɛ nɩɩ, 'na bhïlawɛlɩɩ ‑nyɛ 'na nʋnʋlii 'wuë 'sɔ, ‑mä ‑na 'mö ‑mä yɩ 'bhöönɩɛ ‑tiamö. 8‑Atʋ, wɛlɩɩ ‑n nyɩaa a‑a, 'mö n 'nyʋää 'n wa yiɛ 'wʋ nglu. 'N wa yiɛ ‑tiamö sɛ yɩbhlɩmanɩ nɩɩ ‑mä ‑na yɔwʋ, ‑mä n 'bhööä.

9‑Amö na a, nɩkpaa ‑wa glɩnɩɛ mä'ä 'pɩwʋ a 'yize a ‑nʋää, wa 'wlumö n ‑nɩmöä dɛ'ɛ bhibhe. ‑Maa ‑muë ‑n nyɩaaa, wa 'wlumö n ‑wʋmöä dɛ'ɛ bhibhe dɔ'wʋ. Ɛ'ɛ ‑bhö nyɩasɛ, ‑maa ‑na ‑nʋä wa glɩnɩɛ. 10‑Lii 'wuë ‑yɩ glɩnɩɛ na ‑li, ‑na ‑li yɩ glɩnɩɛ. ‑Lii 'wuë ‑yɩ glɩnɩɛ ‑na ‑li, na ‑li yɩ glɩnɩɛ. ‑Mä na nʋa 'mö, ‑mä 'na 'ghlinɔɔ 'wlʋnɩɛ 'yli. 11N'n‑a'a ‑mä dʋdʋ 'wʋ ‑wʋ, ‑maa wabhlɩ wa ‑wʋ ‑bhlɛ ‑mä. ‑Amö na a, ‑mä ‑na yɔwʋ ‑mä n ‑wʋä yi dɔ'wʋ. ‑Atʋ ‑ɔ ‑wʋ 'wlɩlɩ, ‑na'a 'mötɛɛnɔɔ ‑n nyɩa a‑a 'mö, ‑kuë 'wʋ, nzɩɩ sɛ n ‑nyɛmö 'sɔ ‑a glɩnɩɛ ‑bhʋlʋʋ, wa 'kä ‑sɩbhä ‑bhʋlʋ glɩnɩ. 12Wa ‑gänɩ a‑a a dɔ'wʋ, ‑na'a 'mötɛɛnɔɔ 'mö, ‑amöö ‑kuë a‑a 'wʋ. Wa 'wuë a gla'mö a ‑bhlʋ a'bhë 'nɩɛ tʋʋ, 'n ɛ 'nɩ ‑bhö ‑mɔ'la ‑bhʋlʋ ‑kpɔ ‑ɔ 'kä a‑a tʋʋ mɔɔ. Kïbhëa ‑a cɛlɩɛ ɔ dɛ ‑mä ‑na'a wɛlɩɩ a 'bɔgʋʋ 'möö, ma‑a 'wlʋnɩɛ da'a 'yli. 13‑Atʋ, ‑sɩkaa a dɔ'wʋ, ‑mä ‑na yɔwʋ ‑mä n ‑wʋa'aa 'bɩwʋ yi dɔ'wʋ. ‑Maa 'tɛnyɩ 'mö n ‑wʋä ‑bhlɛ mä'ä dʋdʋ 'wʋ, wa za n bhibheamöä nzɩɩ sɛ n ‑wʋä 'mäna 'möö, wa 'kä ‑sɩbhä 'mäna 'mö ‑wʋmö, 'wa 'mäna 'kä 'klʋ yie. 14‑Na'a wɛlɩɩ, n kʋänyɩ 'nyɛ 'wë. ‑Maa nɩkpaa ‑wa glɩnɩɛ mä'ä 'pɩwʋ a 'yize a ‑nʋä, sɛɛ n'n‑ä wa gla'mö a ‑nɔ glɩnɩɩ, wa'aa ‑sɩbhä wa gla'mö a ‑nʋä glɩnɩmö zaa, ‑gblɩ wa ‑gbïluëë. 15‑N 'kʋä mä'ä 'pɩwʋ ‑sɛ a za n ‑nɩmöä bhibhe, ‑maa ‑n 'kʋä Sataa 'a 'mötɛɛnɔɔ ngli ‑sɛ nza n bhibheamöä wa 'wlumö. 16Sɛ'ɛ n gbää nɩɩ, na'bhë, nɩkpaa ‑wa glɩnɩɛ mä'ä 'pɩwʋ a 'yize a ‑nʋä, sɛ n'n‑ä wa gla'mö a ‑nɔ glɩnɩ, ‑sɩbhä na ‑nʋa 'nɩɛ wa gla'mö a ‑nʋä glɩnɩmö. 17‑Na'a wɛlɩɩ, yɩ 'yize mɩɩ kää ‑tiamö gbëaa 'mö. ‑Lɛ a ‑tiawɛlɩ 'la, yɩ nɩ 'zuë ‑na 'yize a ‑nʋä 'wʋ. 18Sɛ ‑n tieaaa mä'ä dʋdʋ 'wʋ a ‑nʋa 'wʋʋ, ‑sɩbhä n tuë'ɛɛ na a. 19Na'bhë n yɛ nanyɩ 'mö 'wlʋ, nzɩɩ wa 'kä ‑tiamö 'wlɩlɩ plɛ.

20Wa 'yize a 'wlumö n ‑nɩmöä dɛ'ɛ bhibhe, ‑maa wa ‑kä nɩkpa 'na wɛlɩɩ 'nyɛ a ‑wa 'kɩɛ 'wʋ nglu, wa ‑kaa dlɩ 'tɛɛnɩɩ, wa 'wlumö n bhibheamöä. 21Wa 'wuë wa 'kä 'gämö ‑bhʋlʋ glɩnɩ, nza n bhibheamöä wa dɛ. Sɛ n ‑glamöä 'wʋ n‑n ‑wʋʋä ‑gömö, ‑a 'sɔɔ a‑a glɩnɩɛ ‑bhʋlʋʋ, gbä wa ‑kanyɩ ‑sɩbhä 'wʋ ‑glɛ, nzɩɩ wa 'kä ‑aa sɛ ‑bhʋlʋ glɩnɩ. ‑Lɛ a dɔ'wʋ, mä'ä 'pɩwʋ a nɩkpaa yi sɛ yɩbhlɩmanɩ nɩɩ, ‑nmöö tieaaa. 22‑Na'a 'ghïlinɔɔ ‑n 'wälanɩɛ ‑mä na 'mö 'ylii, 'mö n 'wälanɩ'ɛɛ ‑mä wa 'mö 'yli, nzɩɩ n ‑nyɛmö 'sɔ, sɛ ‑a glɩnɩɛ ‑bhʋlʋʋ, wa 'kä ‑sɩbhä ‑bhʋlʋ glɩnɩmö. 23Sɛ ‑n ‑wʋʋä ‑gömö, 'n n ‑wuë'ɛɛ na a ‑gömö a za, wa yi ‑tiamö ‑bhʋlʋ glɩnɩ. ‑Lɛ a dɔ'wʋ mä'ä 'pɩwʋ a nɩkpaa yi sɛ yɩbhlɩmanɩ nɩɩ, ‑nmö tieaaa mä'ä dʋdʋ 'wʋ. Wa yi'ɛ sɛ yɩbhlɩmanɩ nɩɩ, sɛ ‑n ‑waaa, ‑sɩbhä ‑n ‑wamö'ɛɛ na ‑nʋa.

24‑Atʋ, ‑muë ‑n nyɩa a‑a yowʋʋ, n yɩbhä nɩɩ, mä'a mä n ‑wʋä, wa 'kä ‑mä ‑wʋmö, n ‑nyʋä 'sɔ ‑a 'kä ‑mä glɩ nzɩɩ wa 'kä 'na 'ghïlinɔɔ 'ylɩmö. Ɛ'ɛ ‑bhö nyɩasɛ, ‑maa dɛɛ 'pɩwʋ a ‑lii 'wuë 'nɩ a‑a ‑bhlɛ 'wlʋ a'bhëë, ‑n ‑waa a 'kwädlɩ, nza ‑n nyɩaa 'nglɩ 'kädɩ. 25‑Atʋ ‑ɔ zlɔnɩ 'mö, mä'ä 'pɩwʋ a nɩkpaa, wa ‑nɩmöä ‑yi, ‑maa ‑amö na a, n ‑yimö. Na ‑nʋa ‑yi sɛ nɩɩ, ‑nmöö tieaaa. 26N ‑kamuë sʋlʋnɩ 'wë, n ‑yɩmuë'ɛ sʋlʋnɩ 'yize, nzɩɩ 'na ‑wawʋʋ ‑n kää 'möö, wʋ 'kʋä 'mö ‑wʋmö. Na'bhë n 'kʋä ‑gömö ‑wʋ.» Sa'a ‑sɩbhä Zezwii bhibhee Lagɔ ɔ ‑nʋa a 'wlumö.

Currently Selected:

Zaa 17: bet

Highlight

Copy