Maariko 15

Yesu ˆaghasëmu ambërë e Bhiraato

(Mataayo 27:1–2, 11–14; Ruuka 23:1–5; Yohana 18:28–38)

1Hano bhookiire hangʼu, abhakoro bha bhachaama bhaghiikara ekiina haghirohamu na abhagharuka bha Abhayahuuti, na abheeghi bha meghiro ghe Ryobha na abhaato abhande bha riibharacha eriikoro re Bhayahuuti. Bhaghiishererani haghirohamu kinya bhuno bhakomwita Yesu. Niho bhakamubhöha Yesu, bhakamohira o Bhiraato.#15:1 Bhiraato. N‑omukangati o Keruumi uno akangatiri ase e Yuteya.

2Bhiraato akamobhoori Yesu kubha, “Iye niiye uno bhakobhugha, Omutëmi o Bhayahuuti?” Yesu akamugharokeri akabhugha, “N‑iye obhughiri.”

3Abhakoro bha bhachaama mbaare bharamusëma Yesu kubha ꞉naaköriri amabhe maaru. 4Bhiraato akamobhoori wiiki, akabhugha, “Tooghugharokeri ghyokyose? Mööhi kinya bhaghoghusëma iye kwo mabhe maaru.” 5Amare Yesu tagharokiiri ghyokyose. Niho Bhiraato akaroghoora.

Bhiraato ˆakamotenera ekiina Yesu

(Mataayo 27:15–26; Ruuka 23:13–25; Yohana 18:39—19:16)

6Eriibhagha re mo‑nyangi e Bhaasaka, Bhiraato naare na asughara e kobhiighorera omubhöhu umu, uno abhaato ꞉bhaare bharamusabha abhiighorere. 7Eriibhagha riyo mo‑riighërëcha mbaare‑ho abhaato bhano ꞉bhaare bhaköriri obhwigharurani no obhwiti. Umu o bhiiti bhayo naare arabherekeru Bharaabha. 8Niho erikinda ikoro re bhaato bhaaghaye o‑Bhiraato, bhakamusabha abhiighorere omubhöhu umu, kinya anariri ghuköra.

9Bhiraato akabhabhoori akabhugha, “Ibheere, mokwënda nemotighooroke Omutëmi o Abhayahuuti?” 10꞉Naabhughiri hangʼu gho kubha ꞉naamënyiri kubha abhakoro bha bhachaama ꞉mbaamurëëtiri Yesu ghokooche gho ghiri e riihari. 11Niho abhakoro bha bhachaama bhaghaseesi erikinda riyo re bhaato, kubha remusabhe Bhiraato konga abhiighorere Bharaabha. 12Bhiraato aghaghambana nabho wiiki, akabhabhoori, “Ibheere, nibhu mokwënda nemukörë omooto uno mokobhugha kubha, n‑Omutëmi o Bhayahuuti?” 13Abhaato bhoose bhaghagharokeri kwo riireghe wiiki, bharabhugha, “Mumambe!”

14Bhiraato akabhabhoori akabhugha, “N‑eriisari ke aköriri reghughëri tomumambe mo‑musarabha?” Niho bhakëëngëra chwee ghuköra eriireghe, bharabhugha, “Mumambe! Mumambe!”

15Bhiraato naare arëënda korichömëri erikinda riyo re bhaato, gho ghayo akabhiighorera Bharaabha. Akahatëka abhaashirikare bhaache bhamutëmë Yesu ne emicharicho. Akamara akamuhaana, bhamumambe mo‑musarabha.

Abhaashirikare ˆbhakamochebhora Yesu

(Mataayo 27:27–31; Yohana 19:2–3)

16Abhaashirikare bhakamwimoki Yesu, bhaaghaye nawe mo‑nyumba e ghitëmi e mukangati Bhiraato. Bhaghiikomana erikinda ikoro re bhaashirikare. 17Bhakamobheeki Yesu eriishaghi re sambaraawe re ghitëmi. Bhakaroka orohuuru ro maho, bhakamobheeki a‑mutu.

18Bhaghasëëma komukëëri gho komuchëëra bharabhugha, “Ntoghoghukëëri, Omutëmi o Bhayahuuti!” 19Mbaare bharamutëma a‑mutu na ahimbo e moori, na komotwera amatë, mbaare bharabhuna ebheru ambërë yaache bharamoghongi gho komuchëëra. 20Hano bhamariri komuchëëra, bhakamoruusi eriishaghi riire re sambaraawe, na komobheeki wiiki changibho cheeche. Bhakamohoroki anche, bhaghatanura nawe ghuye komumamba mo‑musarabha.

Yesu ˆakamambu mo‑musarabha

(Mataayo 27:32–44; Ruuka 23:26–43; Yohana 19:17–27)

21Hano ꞉bhaare mo‑nchëra, bhaghatëmëërana no omooto umu uno are araru a‑moghondo, eriina reeche Simiyooni, o mo‑moghya o Kireene. Omooto uyo naare ishe Arekisanta na Ruubho. Abhaashirikare bhakamuhaamereri aghëghë omusarabha o Yesu. 22Bhakamohira Yesu ahaghiro hano hakobherekeru Ghorighööta, egheteemoro keeche Ahaghiro ha Kehoore ke Mutu. 23Bhakamuha Yesu adivaayi ino ere isangeriini no omote,#15:23 Omote. Uyo ꞉noobherekiiru manemane, ꞉noomusakiiri omooto atooghu obhororo bhobhe. amare iwe akaanga koyinyo. 24Niho bhakamumamba mo‑musarabha, na kuhööha changibho cheeche#15:24 Kuhööha changibho cheeche. Mo‑chaasughara che Keruumi, abhaashirikare bhano bhamumambiri omuköri o masari, ꞉mbiimokiri changibho cheeche. Mööhi Sabhuri 22:18. gho ghutëma akuura kubha omooto woose imoki kurëngʼaana na bhuyo akuura ekobhugha. 25Eriibhagha bhamumambiri, neere mo‑chaasa ishato che tabhoori.

26Mbatooriri ighoro e musarabha amandëkö gha masëmö ghaache, ghano ꞉ghaare gharabhugha, “uno niwe omutëmi o bhayahuuti.” 27꞉Mbaamumambiri ghateghate e manyangara abhere, umu mo‑musarabha o kwiro, no owonde mo‑musarabha o kumosi. [ 28Niho ghakahikeerana Amandëkö Amatööbhiyu ghano ghakobhugha kubha, “Nabhareriinu haghirohamu na amanyangara.”#15:28 Mööhi Isaaya 53:12.]

29Abhaato bhano ꞉bhaare bharaheta hayo, mbaare bharasingisi emitu gheebho na komotoka bharabhugha, “Kana! Iye, ꞉noobhughiri kubha nokuhaanyura Erisëngërö re Ryobha na koryabhëka wiiki gho chaasiko ishato!#15:29 Mööhi Yohana 2:19. 30Ibheere, wiitoori iye mwene, wiike koru mo‑musarabha hayo!”

31Wiiki, abhakoro bha bhachaama haghirohamu na abheeghi bha meghiro, bhakamuchëëra abheene kwo bheene bharabhugha, “꞉Naatooriri abhande, amare taaghotora ghwitoori omwene! 32Ango, iwe abhugha kubha niwe Kirisito, Omutëmi o Abhiisiraeri. Ibheere, niike koru mo‑musarabha, kubha tomorighi na komokumi!” Koru abhaato bhaare, ꞉bhaamamburu mo‑misarabha haghirohamu nawe, bhoose bhaakabha bharamotoka.

Yesu ˆaghaku

(Mataayo 27:45–56; Ruuka 23:44–49; Yohana 19:28–30)

33Korwera chaasa ishaasabhe che mwishe mbagha mo‑chaasa kende, gheekabha ekengʼuuri mo‑se yoose. 34Niho kinya mo‑chaasa kende, Yesu akarera kwo riiraka ikoro arabhugha, “Erooyi! Erooyi! Raama sabhaghitaani?” Egheteemoro ke mangʼana ghayo nikyo kino, “Oo Eryobha reene! Oo Eryobha reene! Ngwake oghantigha?”#15:34 Mööhi Sabhuri 22:1.

35Abhaato nyarebhe ghate e bhano bhaare hayo, hano bhooghwire Yesu arasiikëra ghayo, bhakabhugha, “Mutëghëërëra bhamura, nakomobherekera omurööti Eriya.”#15:35 Eriya naghughambu hano gho ghiri Abhayahuuti bhaaru mbaare bharakumi kubha Eriya taakuure, amare Eryobha ꞉ndeemwimokiri koru mo‑se anyi muhöru na ghuye nawe Mwishaaro. Wiiki mbaare bhariitëngʼëra kubha Eriya naghugharuka wiiki mo‑se. Mööhi 2 Abhatëmi 2:11; Maraaki 4:5. 36Omooto umu akayaara bhwango, aghaköri obhorobha mo‑divaayi andoro, akabhoha mo‑moori indë. Aghagharuka akayighëgha ighoro, akamuha Yesu anyo. Omooto uyo akabhugha kubha, “Motighe torighi aribha Eriya nakuucha komwiki koru hayo mo‑musarabha!”

37Amare Yesu akarera kwo riiraka ikoro, aghaku. 38Niho omwando uno ore oteniini#15:38 Omwando uno ore oteniini noore orakenga abhachaama bhatasoha Ahatööbhiyu ha Ahatööbhiyu, hano obhokumi obhokoro bho Ryobha bhwikeere. Omwando o nyumba antööbhiyu e Ryobha noore kinya oroghito ro riibhuru eritööbhiyu mo‑ghitabhu ghe Kohoroka 26:31–33. Wiiki, mööhi Abheebhuraaniya 6:19, 10:19–22. Ahaghiro Ahatööbhiyu ha Hatööbhiyu oghachaaruka chambaara ibhere koru ighoro mbagha haase. 39Omokoro o bhaashirikare uno are imeeriire ambërë e Yesu, hano arooche kebhuno Yesu akuure, akabhugha, “Mahëënë, omooto uno naare Omoona o Ryobha!”

40Mbaare‑ho abhakari bhano ꞉bhaare bharamööhërëri gho kurë. Ghate yaabho naare‑mu Mariyamu o koru mo‑moghya o Maghitara, na Saroome na Mariyamu nyina Yakobho omonyi o Yoose. 41Abhakari bhayo mbaare bharamutambana na komuhökëri Yesu hano are mo‑mukööwa o Ghariraaya. Mbaare‑ho na abhakari abhande bhaaru bhano bhaghiire haghirohamu nawe Yerusareemu.

Yesu ˆakaryeku

(Mataayo 27:57–61; Ruuka 23:50–56; Yohana 19:38–42)

42Hano ehikiri omughörööbha, gho kubha orosiko ruyo ndoore orosiko ro ghwisëëmi gho ghiri e Riikane,#15:42 Eriikane ꞉ndiisëëmiri eriibhagha re masikera gha ryobha orosiko rwi Ichumaa mbagha mo‑masikera ghaache orosiko ro Chumamoosi. Amëërëkërëri gha Abhayahuuti ghataaghwishereri koryeka omooto orosiko ro Riikane. 43akaacha omooto umu uno are arabherekeru Yusubhu, omwikari o mo‑moghya o Arimataaya. Naare umu o riibharacha eriikoro re Abhayahuuti, na naare arasooku chwee. Iwe naare ariitëngʼëra kuucha kwo bhutëmi bho Ryobha. Uyo aghaye o‑Bhiraato kwo bhosubhesubhe, akamusabha amuhë erihundughu re Yesu.

44Hano Bhiraato oghwire kubha Yesu nakuure kwo bhwango hangʼu, akaroghoora! Akamobherekera omokoro o bhaashirikare kubha amobhoori aribha mahëënë Yesu nakuure. 45Hano omokoro o bhaashirikare ꞉ahëënëhiri kubha Yesu nakuure, Bhiraato akamwisherereri Yusubhu kwimoki erihundughu. 46Niho Yusubhu aghaghora asanda e ghitani. Aghaye hayo mo‑musarabha, aghiiki haase erihundughu re Yesu, akarinaareri asanda iyo. Akaryeka erihundughu riire mo‑mbeehera ino ꞉etukuru mwitare, akahiringiti eriibhohe ikoro na kohunya mo‑ghisëku ke mbeehera iyo. 47Mariyamu o Maghitara na Mariyamu nyina waache Yakobho omonyi o Yoose bhakarighi hano ꞉bhaare bhamuraariri.

Currently Selected:

Maariko 15: ntk

Highlight

Copy