Mataayo 12

Yesu niwe Omutëmi o rosiko ro Riikane

(Maariko 2:23–28; Ruuka 6:1–5)

1Eriibhagha riire, Yesu na abhaanabheegha bhaache mbaare bharaheta mo‑meghondo ghe changano orosiko ro Riikane. Hano abhaanabheegha bhaache ꞉bhooghwire anchëra, bhaghasëëma ghotu ebhisaawa bhe changano na kobhebhunga na kurë chaahëkë cheeche. 2Amare Amabharisaayo hano bhagharooche ghayo, bhakamobhoorera Yesu bhakabhugha, “Mööhi, abhaanabheegha bhaacho mbaghuköra emeremo orosiko ro Riikane, na ghano ghataakwëndëru ghuköru orosiko ruyo!”#12:2 Mööhi Kohiita kwo Meghiro 5:12–15, 23:25; Kohoroka 20:8–11, 34:21.

3Yesu akabhagharokeri akabhugha, “Kana, motaasömiri mo‑Mandëkö Amatööbhiyu bhuno omutëmi Tawuti ꞉aköriri, eriibhagha are na anchëra iwe na abhaghëndi?#12:3 Mööhi 1 Samweri 21:1–6. 4꞉Naasöhiri mo‑nyumba e Ryobha, akamara iwe na abhaghëndi bhaache bhaakarë emighaate ghino ghetooruru ambërë e Ryobha. Mbe, ꞉mbaariire emighaate ghiyo, ino emeghiro ghetabhiishereriiri, abhaato bhano bhiishereriiru kurë emighaate ghenga ghiyo na abhachaama abheene chiri. 5Hamu motaasömiri mo‑meghiro ghe Musa kubha abhachaama bha Mwisëngërö mbaare bharasari emeghiro orosiko ro Riikane, koru hangʼu Eryobha retabhabhariri kubha, mbaköriri kobhe?#12:5 Mööhi Kubhara 28:9–10. 6Amare ˆnekabhabhoorera inyu kubha hano naanyi‑ho uno anyi omokoro ghokera Erisëngërö. 7Aribha mongamënyiri egheteemoro ke Mandëkö Amatööbhiyu ghano ghakobhugha, ‘Nekwënda möbhëërëki abhaato abhande changori, ghokera konduuseri amaruusi,’#12:7 Mööhi Hoseya 6:6. motangabhatëmiri amasörö abhaato bhano bhataanyi ne eriisari ryoryose, 8gho kubha eni Omoona o Mooto, eni neeni Omutëmi o rosiko ro Riikane.”

Yesu ˆakamuhöri omooto orosiko ro Riikane

(Maariko 3:1–6; Ruuka 6:6–11)

9Yesu aghatanura hayo, aghaye na ghusöha mo‑risinaghooghi reebho. 10Mo‑risinaghooghi riyo, naare‑mu omooto umu uno are akuure okubhökö. Mbaare‑mu na Amabharisaayo bhano ꞉bhaare bharëënda komusaki Yesu kubha bhamusëmë. Bhakamobhoori bhakabhugha, “Kana, emeghiro ngeghwishereri komuhöri omooto orosiko ro Riikane?”

11Yesu akabhagharokeri akabhugha, “N‑niwe ghate yaanyu uno angʼöndu yaache eghwire mwiribha orosiko ro Riikane ataaghotora koyighööta na koyeruusi mwiribha? 12Mööhi omooto naanyi no obhwëra chwee ghokera angʼöndu! Mbe, emeghiro ghe Ryobha ngeghwishereri ghuköra amachömu orosiko ro Riikane.”

13Akamara Yesu akamobhoorera omooto uyo are akuure okubhökö akabhugha, “Ghöröröki okubhökö koocho.” Aghaghughöröröki, hayo hayo ghokahöra na kubha kinya kuure okonde. 14Amare Amabharisaayo bhayo bhakahoroka anche na korwacha bhuno bhangamwitiri Yesu.

Omutamishi uno ahwiru ne Eryobha

15Hano Yesu amënyiri kubha Amabharisaayo mbakorwacha ighoro e komwita, akaru hayo. Mbe, abhaato bhaaru bhakamutambana, akabhahöri bhoose bhano ꞉bhaare abhabhabharu. 16Amare akahatëka kubha bhatabha bhararaghani amangʼana ghaache kwo bhaato. 17Yesu ꞉naasiikiire hangʼu kubha ghahikeerane ghano omurööti Isaaya abhughiri mo‑Mandëkö Amatööbhiyu kubha,

18“Mööhi, uno niwe omutamishi waane uno nemwahwire,

Omosiighani waane uno aghuchömëri omotema waane.

Neghotoora Akörö yaane ighoro yaache,

kubha araghani obhuhëënë bhoone kwo matöngö ghoose.

19Taakuhakaana na abhaato koru taaghuköra eriireghe nabho,

Wiiki taanyi‑ho omooto uno akooghu eriiraka reeche mo‑nchëra.

20Taakobhuna amoori ino imomontiine,

taakororimi orutambe runo roghoghunda eryoki,

antenero naghuköra obhuhëënë bho Ryobha bhokinde.

21Wiiki, abhaato bha matöngö mbaghwitëngʼëra eriina reeche.”#12:18–21 Mööhi Isaaya 42:1–4.

Yesu m‑mokoro ghokera omokoro o misambu

(Maariko 3:20–30; Ruuka 11:14–23)

22Niho abhaato abhamu bhakaacha o‑Yesu no omooto umu uno are aghööturu no omusambu. Omusambu uyo nomuköriri abhe erimuumu no omohuku. Yesu akamuhöri omooto uyo, aghasëëma ghosiikëra na korighi wiiki. 23Erikinda re bhaato bhano ꞉bhaare hayo bhakaroghoora na kobhoorani abheene kwo bheene bharabhugha, “Kana, uno taanyi Omoona o Tawuti?”

24Amare hano Amabharisaayo bhooghwire ghayo, bhakabhugha, “Omooto uno nakuhëëbha emisambu kwo bhotoro bho Bherisebhuuri, omokoro o misambu ghyose.”

25Yesu ꞉naamënyiri ghano ꞉bhaare bhariihëëbha, akabhabhoorera akabhugha, “Aribha abhaato bha bhutëmi bhumu bharataana, obhutëmi bhuyo mboghughö. Wiiki, aribha abhaato bha moghya umu hamu anyumba imu bharaanga koghwana, mbaghusancha. 26Wiiki aribha Erishambu rerahëëbha Erishambu koru mo‑mooto, ndeekubha rerirööna eryene. Gho ghayo, obhutëmi bhooche mboghotora kwimeerera bhu? 27Aribha mokobhugha eni nehaahëëbha emisambu kwo bhotoro bho Bherisebhuuri, ibheere abhaghëndi bhaanyu nabho, mbaghoghihëëbha kwo bhotoro bhwa we? Gho ghayo, ibho nibho bhakuucha kobhatenera ekiina inyu. 28Amare aribha nekuhëëbha emisambu kwo bhotoro bho Körö e Ryobha, m‑mahëënë kubha obhutëmi bho Ryobha mbumariri kobhahikera. 29Amare, obhuhëënë n‑kubha, omooto taaghotora ghusöha mo‑nyumba e mooto uno anyi na changuru, na komuhöka ebheghiro bheeche, aribha atashamiri komubhöha singa. Aramubhöha, niho aghotora komuhöka ebheghiro bheeche.

30“Omooto wowoose uno ataanyi haghirohamu na neeni nakonyanga eni. Wiiki, wowoose uno ataaghokoma abhaato haghirohamu na neeni na kobhahira kwo Waryobha, naghusanchi. 31Gho ghayo, ˆnekabhabhoorera kubha Eryobha ndeghotora kobhaabhëra abhaato amasari ghaabho ghoose na ghuchëëra koobho, amare retaaghotora kobhaabhëra abhaato bhano bhaghuchëëra Akörö Ahörëëru. 32Wiiki Eryobha ndeghotora kobhaabhëra abhaato bhano bhakonyanga eni Omoona o Mooto, amare retaaghotora kobhaabhëra abhaato bhano bhakwanga Akörö Ahörëëru kwo riibhagha rino ri ibheere hamu rino rekuucha.

Abhaato mbakumënyëkana kwo mangʼana ghaabho

(Ruuka 6:43–45)

33“Omote omuchömu nohaasönga amakorobhese amachömu, no omote omobhe nohaasönga amakorobhese amabhe. Noghotora kumënya omote kebhuno onyi kwo makorobhese ghano oghusönga. 34Inyu orwibhoro ro nchöka! Nibhu moghotora ghosiikëra amangʼana amachömu eriibhagha inyu moonyi bhabhe? Gho kubha omooto naghosiikëra ghano ghiichwire mo‑motema waache. 35Omooto omuhëënë naharuusi amachömu koru mo‑machömu ghano ghiichwire mo‑motema waache, amare omooto omobhe naharuusi amabhe koru mo‑mabhe ghano ghiichwire mo‑motema waache. 36Amare ˆnekabhabhoorera inyu kubha orosiko ro ghoteneru ekiina, abhaato mbakoruusi omubharo o mangʼana ghoose ghano ꞉bhaasiikiire ghatanchekiine. 37Mbe, gho kubha Eryobha ndeghokubhara kubha muhëënë kwo mangʼana ghaacho amachömu hamu ndeghoghotenera ekiina kubha na amasari kwo mangʼana ghaacho amabhe.”

Abhaato bhano bhakomwanga Yesu mbakuröönu

(Maariko 8:11–12; Ruuka 11:29–32)

38Mbe, Amabharisaayo abhamu na abheeghi bha meghiro bhakamobhoorera Yesu bhakabhugha, “Oo Omweghi, ntokwënda ukörë ekeroghooro kwërëki kubha noruure kwo Waryobha.”

39Yesu akabhagharokeri akabhugha, “Orwibhoro ro bhaato abhabhe bhano bhataanyi abhahëënë mbakwënda ekyërëkërëri! Ntëëköbhëërëki ekyërëkërëri ghyokyose, nanyinga kino Eryobha riköriri gho kohetera omurööti Yoona. 40Kinya bhuure Yoona ꞉ikeere chaasiko ishato mo‑nda e su ankoro obhotiko no omwishe, hangʼu hangʼu na neeni uno neenyi Omoona o Mooto neghwikara chaasiko ishato mo‑mbeehera obhotiko no omwishe.#12:40 Mööhi Yoona 1:17. 41Orosiko ro ghotena ekiina, abhaato bha moghya o Ninaawi mbakwimeerera haghirohamu na abhaato bha rwibhoro runo na kobhatenera ekiina. Neekubha hangʼu gho kubha, abhaato bha Ninaawi ꞉mbaatuukuuniire amasari ghaabho eriibhagha bhooghwire Yoona araraghani angʼana e Ryobha.#12:41 Mööhi Yoona 3:1–10. Mutëghëërërë, hano haanyi no omokoro ghokera Yoona! 42Orosiko ro ghoteneru ekiina, marikiya o ribhaara re bhachuuta nakwimeerera na kobhatenera ekiina abhaato bha rwibhoro runo. Neekubha hangʼu gho kubha iwe ꞉naaruure mo‑se e kurë kubha ache ghutëghëërëra amangʼiini gha mutëmi Seremaani.#12:42 Mööhi 1 Abhatëmi 10:1–13. Mutëghëërërë, hano haanyi no omokoro ghokera Seremaani!”

Ghugharuka kwo musambu

(Ruuka 11:24–26)

43Yesu akëëndërëra ghosiikëra arabhugha, “Hano omusambu ohaamoru omooto, nohinaaranaara mwibhara oratabhara ha koweerera, amare tookubhöna. 44Mbe, omusambu uyo nokobhugha, ‘Neghugharuka mo‑nyumba yaane ino ꞉neeruure.’ Hano okohika‑mu, ubhöna anyumba yiire enyi bhoowa, itarekiri na ghusëëmibhu bhoheene. 45Mbe, nooghuye wimoki emisambu emebhe eghende mohungate ghino emebhe ghokera ryo. Emisambu ghyose ghiyo ngekomusöhërëra omooto uyo, ghimanya mo‑mobhere waache. Gho ghayo, antenero e riimanya re mooto uyo ribha ibhe chwee ghokera e rimbërë. Hangʼu nibhu ekubha kwo bhaato bha rwibhoro runo orobhe.”

Abhahiiri bha Yesu bha hëënë

(Maariko 3:31–35; Ruuka 8:19–21)

46Hano Yesu are akeere arasiikëra ne erikinda re bhaato, kwo riibhagha riyo riyo nyina na bhaömööbhö ꞉mbiichiri na kwimeerera anche, bharëënda ghosiikëra nawe. 47Mbe, omooto umu akamobhoorera akabhugha, “Mööhi, nyako na bhaömöönyu mbiimeeriire anche, mbakwënda ghosiikëra na niiye.”

48Amare Yesu akamugharokeri akabhugha, “Yiima waane n‑niwe? Na bhaomwito m‑bhawe?” 49Akamara aghaghöröröki okubhökö kwërëkëra mo‑bhaanabheegha bhaache akabhugha, “Mööhi, bhano nibho yiima na bhaomwito! 50Gho kubha omooto wowoose uno aghuköra ghano ghaanyi amiigha gha Taata waane uno anyi Mwishaaro, uyo niwe omwito, na niwe yiima.”

Currently Selected:

Mataayo 12: ntk

Highlight

Copy