Makö 11

Zozii ‑plä Zolizalɛmʋduu' nynä 'loyo

(Matie 21.1‑11; Lukö 19.28‑40; Zään 12.12‑19)

1Wa mɛ bhɛ lä Zolizalɛmʋ‑duu yëku 'nɩ wa ‑ŋëë lä Olivie‑kükëa yëkuu' 'dii wa laa lä Bɛfazee ‑yä Betanii nä, Zozii ‑lobho ɔɔ' 'kʋgënyʋä 'sɔ, 2ɔ lä a mʋ 'duu ‑ʋ ‑kʋ lä ‑mɔɔ 'yikʋ nä 'mnö. A kä ‑mʋ nä, a yi dä ‑bhlo ŋëë 'nɩ a yi jakasöö' 'yu 'ni. Wa ‑gʋänöɔ lʋʋ 'yi, ‑mä nyɩkpɔ 'nöɔ ‑läzä kätää' ‑gblää. A blisio ‑yä a ‑lä'ä 'mɔɔ. 3Nyɩkpɔ ka'anyɩ ylää‑ nynä ‑mä, ‑ɔnözä 'nɩ a blisio bhää nä, a ci nynä ‑anyɩa Kwlienyɔ ylɔɔ bʋkʋ, ‑mä ɔ lä ɔ kä 'gää ‑zɔɔ ‑bhɩä nä, ɔ yio 'ylɩbha.

4Ɔ ‑sonʋwa lä sɔɔ nä, 'nɩ wa yi mʋ. Wa ‑ŋëë lä nä, wa lä wa wloo nä, jakasö‑yuo ‑kʋ ‑lɔɔ. Wa ‑gʋänöɔ ‑kpomu‑gbäkö ‑bhutuu' kplu 'yii. 'Nɩ wamä ‑mä wa yio blisie. 5Nyɩkpa ‑wa ‑kʋ bhlä ‑lɔɔ nä, waa' 'sɔnalʋä ylʋwa‑ nynä ‑mä a nʋ bhää? ‑Ɔ ‑kʋ bhä ‑lɔɔ 'nɩ a blisie bhä jakasö‑yuoo? 6'Nɩ sä Zozii ‑sonʋwa bhlä nä, wa yi sɔɔ ci 'nɩ nyɩkpaa yiwa 'yi ‑taa.

7Wa ‑lä lä jakasö‑yuo nä, kwa pɔɔ‑ waa' 'kwëtii 'kʋ 'nɩ Zozii yio kätää' ‑gblää. 8Nyɩkpa ‑bhutukpä ‑lʋlʋ waa' 'kwëtii ‑blɔɔ 'kʋ, ‑nänʋä döö‑ ‑gbolugbü 'klämnö 'nɩ wa yii ‑blɔɔ 'kʋ 'ŋʋ. 9Nyɩkpaa' ‑nänʋä ‑gään bhä 'yikʋ 'nɩ ‑nänʋä ‑kʋɔ bhä klë, 'nɩ wa woo bhä nynä ‑mä

Ozana!#11.9 Ozana: Laagɔɔ' 'ŋnu fäälɩɩ' wälɩklë lä. ‑Mɔɔ mɔ ‑ɔ yi lä Kwlienyɔ Laagɔɔ' 'ŋnöö 'mnö nä,

'Nyupälɩ ŋënö‑ö 'kʋ!

10‑A tötɔ Davidöö' 'Leyiduu' 'päwaa ‑a yi lä nä,

Laagɔ 'paa 'nyu!

Ozana! 'Klʋagba ŋëë ‑mɔɔ Laagɔduu' fɛɛn fɛɛn!

11Zozii ‑ŋëë lä Zolizalɛmʋduu' nä, 'nɩ ɔ yi Laagɔ‑bhutu 'kädʋʋ 'mnö plä. 'Ylʋ yä bhɛ lä kpänyɩ mʋ nä, kɔ ‑bɩä ‑mɔɔ' ‑lɩɩ 'fɩɩn, 'nɩ ɔ yi Betanii mʋ ɔ ‑yä ɔɔ' 'kʋgënyʋa 'kʋgbä 'sɔ 'sɔ.

Zozii ‑gbütë 'figesuu

(Matie 21.18‑19)

12Zeli ‑ze ylä 'nɩ wa bha bhɛ lä Betanii ‑yä wa 'kä Zolizalɛmʋduu' 'ylɩbhɔ nä, Zozii ‑gbügbe ‑klɔɔ. 13Wa ‑kʋ mʋdä 'nɩ ɔ 'nii‑ 'figesu ‑blëlë 'yi 'nɩ ʋ ‑kä bhä ‑nyakpɩ ‑bhutukpä 'wlu. Ɩ ‑kä 'ŋnö 'nɩ ɔ ‑mʋʋ 'yi wloo ‑kää ʋ kä bhä 'bhü 'yii ‑kʋ nä. ‑Mä ɔ ‑mʋʋ lä ‑zɔɔ nä, ʋʋ' bhɔɔ 'bhë 'yi ‑kʋ. 'Figesii' tlʋdää' ‑lä bhä tee ‑ŋëë. 14'Nɩ Zozii yi 'figesuu soo, ɔ lä nyɩkpɔɔ' lü ‑lä kɩ 'kɔɔn ‑naa 'bhë! ‑Mä ɔ cii‑ lä sɔɔ nä, ɔɔ' 'kʋgënyʋa nuu‑.

Zozii tlüü‑ 'kwäsɛpänyʋä Laagɔ‑bhutu 'kädʋʋ 'mnö

(Matie 21.12‑17; Lukö 19.45‑48; Zään 2.13‑16)

15Wa ‑yi lä Zolizalɛmʋduu' nä, 'nɩ Zozii yi Laagɔ‑bhutu 'kädʋʋ 'mnö plä. Nyɩkpa ‑kʋ bhä ‑mɔɔ 'nɩ wa pä bhä 'kwäsɛ. ‑Nänʋä ŋʋ bhä 'kpä, 'nɩ ‑nänʋä zɔɔ bhä. 'Nɩ ɔ yiwa 'tlü. Nyɩkpaa ‑wa ‑kʋ bhlä ‑mɔɔ 'nɩ ‑wa dögbä bhlä moniee' nä, 'nɩ ‑lʋa ‑wa ŋʋ bhlä 'kpaakpii 'kpä nä, waa' këkpüü ‑yä waa' 'tëbhlüü ɔ bhui‑. 16Ɔɔ' ‑wʋ nyɩkpɔ 'yi ‑taa 'nɩ ɔ ‑yä lʋʋ 'sɔ 'kä Laagɔ‑bhutuu' jluu 'kʋ 'tɔɔ‑. 17‑Mä ɔ cɩanʋwa‑ ‑lɔɔ 'nɩ ɔ ‑sonʋwa, ɔ lä ɩ ‑jɩjlɔ nynä ‑mä, Laagɔ lä 'naa ‑bhutuu ‑glö 'bhlɩɩ 'fɩɩn bhibhiedä#11.17 Ɩ bha Eza 56.7.. 'Nɩ anyɩ, a klʋ nynä 'ghüghünyʋää' ‑gwlɛɛdä!#11.17 Zɛɛ 'sɩɩ Zele 7.11.

18 'Cibhisänyʋaa' 'cifinyʋa ‑yä ‑Jlämöcɩanyʋa, wa nuu‑ lä sɔ cii‑ lä nä, wa tään bhɛ nynä wa 'kɔ 'bhlä. ‑Mä ‑sä nyɩkpa ‑bhutukpä ‑waa bhlä kpänyɩ ɔɔ' cɩalɩɩ nä, wa gu bhä. 19'Ylʋ ‑bhlü lä nä, 'nɩ ɔ ‑yä ɔɔ' 'kʋgënyʋa 'sɔ yi Zolizalɛmʋduu' ‑bha.

Pɔlötɛtɛɛ' bhibhielɩ

(Matie 21.20‑22)

20Zëplü 'pii wa ‑kʋ lä 'ylɩbhɔdä nä, wa lä wa wloo nä, 'figesuu Zozii ‑gbütë bhlä nä, ʋ yä bhɛ yɛɛ. Ʋ ‑yɛɛ sää ‑aaa, 'nɩ ʋ ‑ŋëë sikpli 'kʋ. 21Pɩɛlö niu‑ lä 'yi nä, kɔ ‑luë. 'Nɩ ɔ yi Zozii soo, ɔ lä Cɩanyɔ‑, ‑n wloo 'figesuu ‑n ‑gbütë bhlä zekü nä, ʋ yä yɛɛ 'fɩɩn! 22'Nɩ Zozii yiwa soo, ɔ lä a kää Laagɔɔ' pɔlötɛtɛ! 23‑Nʋawlɛɛ 'mnö, n sonö'anyɩ nynä nyɩkpɔ kä 'kükënä ‑soo nynä ‑weyia 'kükëë‑! ‑N ‑bha ‑lää ‑yä ‑n bhlüü jiee'! 'Nɩ wälɩɩ ɔ cii‑ lä nä, ɔ kä 'titiclö ɩɩ pɔlötɛtɛ ‑kä nynä ‑mä ɩ yi glää nä, sä ɔ ylä lä nä, sɔɔ yi nʋɔ. 24'Ɩzä n sonö'anyɩ lä nynä ‑mä a kä bhibhiedä ‑kʋ nä, ‑lʋʋ a 'ylää lä Laagɔ nä, a kään pɔlötɛtɛ nynä ‑mä a yʋ wɛzä 'ni, ‑mä Laagɔ yi'anyɩmʋ 'nyɛ. 25A kä 'sɩɩ cii‑ nynä a 'kä bhibhie, 'nɩ a kä bhä nyɩkpɔɔ' wälɩnyenyi pleyii ‑kä nä, a cienöɔ. A kä sɔɔ ‑nʋ nä, ‑lɔɔ a 'Bä, ‑ɔ ‑kʋ lä ‑mɔɔ ‑Laagɔɔ' nä, ɔ yi'anyɩ lä 'sɩɩ nyenyi cie. [26‑Mä a 'nö a ‑liesɩ cie nä, a 'Bäɔ ‑kʋ lä ‑mɔɔ ‑Laagɔɔ' nä, ɔ nö'anyɩ ‑lä ‑kä 'sɩɩ nyenyii cie.]

Zozii' 'päwaa' da bha lä nä

(Matie 21.23‑27; Lukö 20.1‑8)

27Wa ‑yi lä bʋkʋ Zolizalɛmʋduu' nä, Zozii ‑kʋ bhä ‑mɔɔ Laagɔ‑bhutu 'kädʋʋ 'mnö bidä 'nɩ 'Cibhisänyʋaa' 'cifinyʋa, ‑Jlämöcɩanyʋa ‑yä ‑Dɔɔpänyʋa, wa ‑yio yëku. 28'Nɩ wa yio 'ylä, wlä ‑mä, lɔɔ ‑sä 'titi ‑ɔ ‑lobho‑o bhää? ‑Ɔ nyɛɛ‑ɛ bhä 'päwä nynä ‑n nʋ ‑nɩnɩ ‑n nʋ lä nää? 29Wa cii‑ lä sɔɔ nä, Zozii lä n 'kanyɩ wälɩklë ‑bhlo 'coo 'kʋ 'ylä ‑yä a kä'ä soo. A kä'ä ‑soo nä, ‑ɔ ‑lobho'o lä nä, n yi'anyɩmɔ paa. 30Ɔ lä ‑ɔ ‑lobho bhɛ Zään 'nɩ ɔ ŋʋ bhɛ nyɩkpaa 'nyuu 'wluu? Nyɩkpaa‑ ‑lobhuo bhɛ ‑a, ‑mä Laagɔ‑ ‑lobhuo bhɛ ‑a? A sonö'ö ‑wʋ saa 'nää!

31Zozii cii‑ lä sɔɔ nä, wa ‑sonö ‑sonö, wlä ‑a gä cii‑ nynä ‑mä Laagɔ‑ ‑lobho Zään nä, ɔ yi ci nynä ‑mänɩ ‑ɔnözä aa' bhɛ ɔɔ' ciciwälɩɩ nyaasäsä laa‑? 32‑A gä 'sɩɩ cii‑ nynä ‑mä nyɩkpaa‑ ‑lobhuo nä, 'nnn! Wa ‑guu bhɛ ‑jlëa, sä nyɩkpaa 'fɩɩn ‑yi bhlä sɔɔ nynä ‑mä Zään ‑glö Laagɔɔ' 'plɔfɛtɩ 'titi nä. 33'Nɩ wa yi Zozii soo, wlä ‑ɔ ‑lobho lä Zään nä, ‑a 'nöɔ ‑wʋ ‑yi. Zozii lä ‑aaa! ‑Amʋ ‑mä 'sɩɩ, ‑ɔ ‑lobho'o lä 'nɩ n nʋ lä ‑nɩnɩ nä, n nö'anyɩ mɔ ‑lä paa.

Currently Selected:

Makö 11: god

Highlight

Copy