Matie 10

(Makö 3.16‑19; Lukö 6.14‑16)

1'Nɩ Zozii yi ɔɔ' 'kʋgënyʋa 'kʋgbä 'sɔ laa, 'nɩ ɔ yiwa 'päwä 'nyɛ nynä wa 'tlü ‑zizinyenyi ɩyä wa yamä 'bhläbhläguu 'fɩɩn ‑yä 'bhlʋlɛɛ 'fɩɩn. 2Zozii' lobho lobhonyʋa 'kʋgbä 'sɔ a ni waa' 'ŋnöö. ‑Bhlo plöö‑ Simɔɔ, wa ‑zienöɔ Pɩɛlö, ɔ ‑yä ɔ bheli Adlee. ‑Bhlo plöö‑ Zebedee ‑yowli Zakö, ɔ ‑yä ɔ bheli Zään. 3‑Bhlo plöö‑ Filipʋ, ‑bhlo plöö‑ Batlemii, ‑bhlo plöö‑ Tomaa, ‑bhlo plöö‑ Matie. Matie nä, ɔ ‑glö bhä lapoo‑ylänyɔ. 'Nɩ ‑bhlo plöö‑ Afee ‑yowli Zakö, ‑bhlo plöö‑ Tadee, 4‑bhlo plöö Simɔɔ 'nɩ wa bhizio bhä 'Bhlɩɩ 'Kʋ Bhläänyɔ#10.4 'Bhlɩɩ 'kʋ bhläänyɔ: Nyɩkpaa' ‑nänʋä sɩɩ ‑zɔɔ nynä ‑mä ɔ ‑glö bhä 'bhlɩɛɛ 'kʋ bhläänyʋaa' ‑jɛnyɩɛ 'mnö nyɩkpɔ. 'Nɩ ‑nänʋä ci 'sɩɩ nynä ‑mä ɔ ‑glö bhä Moyizöö' ‑Jlämaa' 'kʋ bhläänyɔ., 'nɩ ‑bhlo plöö‑ Zuda Sikalɩɔtö. Zuda Sikalɩɔtö nä, ɔmɔɔ‑ ‑pëë lä Zozii.

Zozii' lobho lobhonyʋa 'kʋgbä 'sɔ

(Makö 6.7‑12; Lukö 9.1‑6)

5‑Lää' nyɩkpanä 'kʋgbä 'sɔ, Zozii ŋʋwa dɩgälɩ 'nɩ ɔ yiwa lobho. Ɔ ‑sonʋwa, ɔ lä kä n lobhu'anyɩ lä ‑mä, nyɩkpaa' ‑lʋa ‑waa ‑wʋ lä 'Zufʋnyʋä plöö‑ nä, a 'nä mʋ lä waa' ‑gbäsɩɩ! A 'nä plä lä 'sɩɩ Samalii‑bhlɩɛɛ' 'dii 'mnö! 6‑Mä 'Yizlɛnyʋää' 'gbëa 'mnö 'bhabhlöö‑ yä lä too nä, a mʋɩ tään ‑kää! 7A mʋ ‑yä a ‑sänʋwa 'dö nynä ‑mä Laagɔɔ' 'Leyiduu 'tänyɩɛ yä yëku 'mɛ. 8A yamä gupanyʋä, a gälɩä 'kudukuë, a yamä 'zläbhlänyʋä ‑yä a 'tlü ‑zizinyenyi. Kä Laagɔ nyɩ'anyɩ lä 'flɛ, nä anyɩ ‑mä 'sɩɩ, a 'nyɛ 'flɛ! 9A 'nä 'bhlü ‑lä ‑sikaa 'kʋ! A 'nä 'bhlü ‑lä monii 'kʋ! ‑Flëëgie 'titi, aa' 'bhɛnɩɛ ‑lä wlu yëku! 10Aa' bhɛɛ lä badu! Aa' bhɛɛ ‑lä 'kwëti 'sɔ! Aa' bhɛɛ ‑lä 'süü! Aa' bhɛɛ ‑lä 'sɩɩ 'kʋtëgë ‑yukwe! ‑Mä lebhe‑nʋnyɔ nä, ɔɔ' lebhe‑ nyɩɔ 'nɩ ɔ lü. 11A kä 'du ‑ŋëë nä, ʋ yi 'du 'kädʋ 'plö ‑o, ‑bhlüdë ‑o, a tään ‑mɔɔ nyɩkpɔ‑ yi'anyɩ lä 'kʋplädä 'nyɛ nä. Ɩyä a kʋ ɔɔ' daa ‑aaa ‑yä anyɩa duu' ‑bha‑tänyɩ 'kä ŋëë. 12A kä nyɩkpɔɔ' gbëë' ‑plä nä, a bhään ‑lɔɔ' nyɩkpaa. 13‑Lɔɔ' 'gbëa 'mnö nyɩkpaa ‑wa kä 'kʋ ‑ŋwa nynä ‑mä 'pʋpʋɛ ŋënʋwa 'kʋ nä, anyɩa' 'pʋpʋɛɛ ŋënʋwa 'kʋ! 'Ɩzä wa 'nö 'kʋ ‑ŋwa nynä 'pʋpʋɛ ŋënʋwa 'kʋ nä, anyɩa 'pʋpʋɛ 'ylɩbhɔ ‑yä ɛ yi'anyɩ yëku! 14A kä dä ‑ŋëë nä, ‑lɔɔ yi 'du 'plö ‑o, ‑lɔɔ yi 'gbë 'plö ‑o, 'nɩ ‑lɔɔ' nyɩkpaa nö'anyɩ 'kʋplädä nyɛɛ‑, 'nɩ wa 'nö 'sɩɩ anyɩa' ciciwälɩɩ 'nyukwli poo nä, a ‑bha ‑lɔɔ' 'gbëa ‑yä ‑lɔɔ' 'duu 'mnö! ‑Mä a kä ‑mɔɔ ‑bha dä ‑kʋ nä, a gbɔtɔ anyɩa' ‑kokokpü ‑zɔɔ' ‑bhabhuu!#10.14 Kä wälɩklënä pana lä nynä ‑mä 'gbëa ‑yä ‑lɔɔ' 'duu nä, 'kʋgënyʋa yä ɩɩ' gbʋʋ' ‑bha. Wälɩ kwa yɩ ‑ŋëë nä, ‑ɛɛ yɩɔ waa' gbʋʋ. 15N sonö'anyɩ ‑nʋawlɛɛ 'mnö nynä ‑mä, Laagɔɔ' 'tite 'kädɛɛ' pläylʋʋ 'kʋ nä, 'titee Laagɔ 'kwa lä 'ŋʋ nä, Sodɔmʋ‑dunyʋä ‑yä Gomɔɔ‑dunyʋää' yëkuu' 'titee, ɛ yi yɔmä 'nɩ ɛ yi waa' ‑lɛɛ 'kʋ zi.

Zozii' 'kʋgënyʋä 'kwlɩ yiwa bhɩä

(Makö 13.9‑13; Lukö 21.12‑17)

16A ni, kä n lobhu'anyɩ lä. Ka ‑kʋ lä nynä 'bhabhlö, 'nɩ n lobhu'anyɩ lä vëvëmna nëëdë nä, a gblɩmä! A gblɩmä nynä ‑leebolu, ɩyä a wɔtɔmä plɛ nynä 'kpaakpu! 17A gblɩmä ‑mä ‑kä, nyɩkpa yi'anyɩ 'zuzunyʋä dëlü tʋ kuu. 'Nɩ wa yi'anyɩ Laagɔ‑bhitii 'mnö bhütë. 18Wa yi'anyɩ ‑gɔmnä delü tʋ kuu, 'nɩ wa yi'anyɩ 'sɩɩ 'loyuë dëlü tʋ kuu 'naa ‑za. Ɩ yi sɔɔ kʋ ‑yä a 'kwa dëlü 'naa ‑dläfʋɛ lüü, ɩyä nyɩkpaa' ‑lʋa ‑waa ‑wʋ lä 'Zufʋnyʋä plöö‑ nä, a 'kwa 'sɩɩ 'naa ‑dläfʋɛ dëlüü' lüü. 19‑Mä 'tänyɩɛ 'mnö wa 'kanyɩ lä 'zuzu yëku fä nä, a 'nä bhʋtʋ ‑lä sa 'kä lä ci nä, ɩyä sa 'kä lä a yëku 'kʋ bhlää nää' ‑za. ‑Ɔnöza bhää? sä a 'kä lä ci nä, n yi'anyɩ sɔɔ nëë' 'pä. 20Anyɩa nëë' ‑lɔɔ' ciciwälɩɩ' ‑lä ‑bha ‑mä a 'Bä Laagɔɔ' 'Wugɔɔ, ʋmʋʋ‑ 'ganyɩ lä nëë' cii. 21Bheli yi ɔ bheli pëë nynä wa 'bhlɔɔ. 'Bä yi ɔɔ' 'yu ‑sä nynä wa 'bhlɔɔ. 'Nɩ 'yuë yi wa 'bäsɩ ‑yä wa 'nɔsɩ 'bhlä. 22Nyɩkpaa 'fɩɩn yi'anyɩ zɔbhlɛmä 'naa ‑za. ‑Mä anyɩa' lɔɔ ‑ɔ gä plɛkʋ 'tɛmä ‑kaaa, 'nɩ bhɩäylʋʋ kä ‑ŋëë nä, ɔ yi ‑lɔɔ nëë' ‑bha. 23Wa ka'anyɩ 'dunʋ 'mnö nyenyisä klä nä, a ‑guu ‑yä a mʋ 'yigädadu 'kʋ! N sonö'anyɩ ‑nʋawlɛɛ nynä ‑mä, aa ‑lä 'Yizlɛ‑bhlɩnɛɛ' 'dii bhlülɩ bhɩä 'nɩ Nyɩkpɔɔ ‑Yowli yi yi.

24 'Kʋgënyɔ nä, ɔɔ' ‑wʋ 'ghlü 'nɩ ɔ 'kä ɔɔ' cɩanyɔ ‑zi. 'Nɩ ‑gänʋnyɔɔ' ‑wʋ 'ghlü 'nɩ ɔ 'kä ɔɔ' käänyɔ ‑zi. 25‑Mä 'kʋgënyɔ 'plöö cɩanyɔɔ' 'nɩ ‑gänʋnyɔ 'plöö käänyɔ. Wa ‑soo ‑kɛ ‑pɛɛ gbükänyɔɔ nynä ɔmɔɔ‑ plöö‑ Bɛzebuu, ‑zizinyenyii' 'cifio nä, ɔɔ' gbünyʋa a bhobho nynä sä wa 'kwa bhä laa?

Zozii' 'kʋgënyɔɔ' ‑guu yɩɔ

(Lukö 9.26; 12.2‑9)

26‑Mä a 'nä ‑guu ‑lä nyɩkpɔ. Wälɩɩ 'fɩɩn ‑ɩ ‑zizio bhlä nä, ɩ yi 'kʋ ghlä. 'Nɩ ‑lɩɩ ‑ɩ nʋɔ lä 'mükü ‑müküü' nä, ɩ yi yibhënöɔ. 27Wälɩɩ n sonö'anyɩ lä 'saboo nä, a cinɩɩ ‑zëlügä! Wälɩɩ' lɩɩ n 'ŋuŋuënö'anyɩ lä 'nyukwlii nä, a cinɩɩ 'clɩkpää! 28Nyɩkpaa' ‑lʋa yi lä 'yɛkɛɛ 'bhlä 'nɩ ‑waa ‑lä lä 'wugɔɔ 'bhlälɩ mii nä, a 'nä ‑guunʋwa ‑lä ‑mä a ‑guu Laagɔ. Laagɔɔ 'mʋʋ‑ ‑kä lä 'päwä ‑yä ʋ 'kä 'yɛkɛɛ ‑yä 'wuga 'sɔ 'Dëvloo ‑kosu ‑düdëa 'mnö nuëë. 29A ni 'yi ‑a, ‑mayuëë' ‑wʋ 'kpä ‑kä. ‑Mɔɔ ‑adäbhlä 'kʋ nä, wa lʋä 'sɔ lü ‑pikini. Yio ‑a? ‑Mä sɔɔ ɩ ‑kʋ 'nɩ ‑mayo kä ‑zɔɔ ‑bhlü nä, a 'Bä Laagɔ ‑yi sɔɔ. 30'Nɩ anyɩ nä, ka kään gbʋ 'nɩ a zi ‑mayuë bhutukpä 'kʋ. Nä, a 'nä ‑guu ‑lä ‑mä, anyɩa' 'wluu kʋnyɩɩ 'titi kä Laagɔ ‑zɛnɩ. 31Nä, a 'nä ‑guu lä ‑mä ka kään gbʋ 'nɩ a ‑zi ‑mayuë bhutukpä 'kʋ. 32Ɩmɩɩ‑ ‑kä lä 'ŋnö 'nɩ ‑ɔ gä nyɩkpa 'klʋ 'naa ‑dläfʋɛ lüü nä, n 'Bäɔ ‑ɔ ‑kʋ lä ‑mɔɔ ‑Laagɔɔ' nä, ɔmɔ dëlü, n yi 'sɩɩ ‑lɔɔ' nyɩkpɔɔ' ‑dläfʋɛ lü. 33'Ɩzä ‑ɔ gä'ä nyɩkpa 'yikʋ cɛnö nä, n 'Bäɔ ‑ɔ ‑kʋ lä ‑Laagɔɔ' nä, ɔmɔ dëlü, n yi 'sɩɩ ‑lɔɔ nyɩkpɔɔ cɛɛ.

‑Ɛɛ ‑wʋ 'kʋ wɔtɔlɩ ‑mä ‑jälögba

(Lukö 12.51‑53; 14.26‑27)

34A 'nä bhobho lä nynä ‑mä kä n ‑yi 'ylʋzɔɔ ‑yä n 'kä ‑mɔɔ 'kʋ wɔtɔlɩ 'ŋʋ! Nn' ‑wʋ ‑mɔɔ 'kʋ wɔtɔlɩ 'ŋʋ kää ‑yi ‑mä ‑jälögba n ‑lä. 35Kä n ‑yi lä ‑yä n 'kä 'yuŋwadi ‑yä ɔ 'bä 'sɔ pää' 'mʋdolɩ 'ŋʋ. Ɩyä n 'kä 'yuŋnʋgbänyɔ ‑yä ɔ 'nɔ 'sɔ pää' 'mʋdolɩ 'ŋʋ, ɩyä n 'kä 'wʋtɔŋwnɩä pää' 'mʋdolɩ 'ŋʋ. 36Nyɩkpɔɔ' gbünyɔ 'gä ylä ɔɔ' ‑zɔbhlɛgbänyɔ 'plö.#10.35‑36 Zɛɛ 'sɩɩ Misee 7.6. 37‑Ɔ gä ɔ 'bä ‑yä ɔ 'nɔ 'sɔ ‑waa, 'nɩ ‑ɔ gä ‑wawʋʋ ɔ ‑kä lä 'naa ‑za nä 'kʋ ‑zi nä, ‑lɔɔ' nyɩkpɔɔ' ‑wʋ 'naa 'kʋgëlɩ 'kʋ ‑ŋwa. 'Nɩ nyɩkpɔ kä ɔ ‑yowli ‑yä ɔɔ' ‑yɔŋnɔ ‑waa, 'nɩ ɔɔ' ‑wawʋʋ kä ‑wawʋʋ ɔ ‑kä lä 'naa ‑za nä 'kʋ ‑zi nä, ‑lɔɔ' nyɩkpɔɔ' ‑wʋ 'naa 'kʋgëlɩ 'kʋ ‑ŋwa. 38Nyɩkpɔ 'nö ɔ yëkuu' 'kusuu bhɛɛ‑ 'nɩ ɔ nö'ö 'kʋ gëë‑ nä, ‑lɔɔ' nyɩkpɔɔ' ‑wʋ 'naa 'kʋgëlɩ kʋ ‑ŋwa. 39‑Ɔ gä tään nynä ɔ 'kä ɔɔ' zëkpë 'kʋ bhlää nä, ɔ yia të. 'Ɩzä ‑ɔ gä cii‑ nynä ‑mä ɔ yi ɔɔ' zëkpë të 'naa ‑za nä, ɔ yia 'ni.

‑Ɔ gbonö'anyɩ lä 'kʋ nä, ‑amʋ ɔ gboo lä 'kʋ

(Makö 9.37,41; Lukö 9.48; 10.16; Zään 13.20)

40‑Ɔ ga'anyɩ 'nägäsä ‑klä nä, ‑amʋ ɔ ‑klä lä 'nägäsä. 'Nɩ ‑ɔ gä'ä 'sɩɩ 'nägäsä ‑klä nä, ‑amʋ ɔɔ' ‑wʋ ‑klä ‑mä, ‑ɔ ‑lobho'o lä nä, ɔmɔ ɔ ‑klä lä 'nägäsä. 41‑Ɔ gä Laagɔɔ' 'plɔfɛtɩ 'nägäsä ‑klä nä, ‑lɔɔ' nyɩkpɔɔ, Laagɔ yio bɔɔ 'pä. Sä Laagɔɔ' 'plɔfɛtɩɩ' bɔɔpälɩɩ ‑kʋ lä nä, sɔɔ' bɔɔpälɩ‑ ‑lɔɔ' nyɩkpɔɔ yii 'ni. Nyɩkpɔ kä Laagɔɔ' 'yigëgnyɔ 'nägäsä ‑klä nä, ‑lɔɔ' nyɩkpɔɔ yi 'yigënyɔɔ' bɔɔpälɩ 'ni. 42Nyɩkpɔ kä 'naa 'kʋgënyʋa nëëdëë' ‑lɛ 'tɩkɩɩlɛɛ 'titi 'nyu wɔtʋ ‑kɔbhä nyɛɛ‑ 'nɩ ɔ kä mnää‑ nä, ‑lɔɔ' nyɩkpɔɔ, n sonö'anyɩ ‑nʋawlɛɛ nynä Laagɔ yio bɔɔ 'pä.

Currently Selected:

Matie 10: god

Highlight

Copy