Zään 9

Zozii ‑yamää nyɩkpɔɔ' lɔɔ wa ‑gänö lä 'yikpüü' nä

(Makö 8.22‑25; 10.46‑52)

1Zozii ‑kʋ 'plödä 'nɩ ɔ nii‑ 'nyɩkpɔ, ɔɔ' 'yikpülɔɔ. Nyɩkpɔɔ nä, dä ɔ 'bä ‑yä ɔ 'nɔ 'sɔ 'nöɔ bhlä gään nä, 'yikpüü' ɔ ‑kʋ. 2'Nɩ 'kʋgënyʋa yi Zozii 'ylä, wlä Cɩanyɔ‑, ‑ɔnözä 'nɩ nyɩkpɔnɔ wa ‑gänönöɔ bhä 'yikpüü'? Ɔmɔ 'titii' nyenyi‑ ‑gbä bhä ‑a? ‑Mä ɔ 'bä ‑yä ɔ 'nɔ 'sɔɔ nyenyii' ‑za bhä ‑a?#9.2 Zɛɛ 'sɩɩ 'Nämʋ 20.5. 3Zozii lä 'nn, ‑ɛɛ ‑wʋ ɔɔ' nyenyii' ‑za. 'Nɩ ‑ɛɛ ‑wʋ 'sɩɩ ɔ 'bä ‑yä ɔ 'nɔ 'sɔɔ nyenyii' ‑za ‑mä, Laagɔɔ' nʋnʋ‑lebhee 'ylʋzɔkʋnyʋä 'kɛ 'yi 'ni nä, 'ɩzä nyɩkpɔnɔ ‑kʋ lä 'yikpüü'. 4Dä zeli ‑gä lä ‑lätee nä, ‑ɔ ‑lobho'o lä nä, ɩ ‑ŋwa 'kʋ nynä ‑mä ‑a nʋ ɔɔ' lebhee. 'Cucukpä kä yɩ ‑plä nä, nyɩkpɔɔ' ‑läyɩɔ lebhee' nʋlɩ mii. 5Dä n ‑kʋ lä ‑lätee 'ylʋzɔɔ nä, ‑amʋʋ‑ plöö‑ lä 'ylʋzɔɔ zëlü.

6Ɔ cii‑ lä sɔɔ nä, kɔ ŋwnaa‑ dlɛɛ ‑dʋdʋkʋ, 'nɩ ɔ yi ɛɛ' ‑paplɩɩ nʋ. 'Nɩ ‑paplɩɩnɩ ɔ yii 'yikpüü' kʋnyɔɔ 'yii bʋä. 7'Nɩ ɔ yio soo, ɔ lä 'nyibhlëa wa laa lä Silowee nä,#9.7 Silowee' 'nyibhlëa nä, Zolizalɛmʋduu' a ‑kʋ lä. Zɛɛ 'sɩɩ 2 'Loyua 20.20; Eza 8.6. ‑n mʋa 'mnö ‑yä ‑n 'gä 'klʋ wɔɔ! Silowee‑ŋnöö kɩ sä lä ‑zɔɔ nynä ‑mä, lobho lobhonyɔ‑. 'Nɩ nyɩkpɔɔ yi ‑mɔɔ mʋ 'nɩ ɔ yi 'klʋ wɔɔ. Ɔ ‑kʋ ylä 'ylɩbhɔdä nä, ɔ ni bhɛ sä.

8Ɔɔ' 'kʋ kʋʋnyʋa ‑yä nyɩkpaa 'fɩɩn ‑wa ‑yi bhlä sɔɔ nynä ‑mä kɔ zlaa bhä nä, wa ci bhɛ, wlä ‑maa, nyɩkpɔnɔ 'mɔɔ‑ bhɔɔ ‑mɔɔ 'clɩkpää' sä ‑kʋ 'nɩ ‑ɔɔ zlaa bhɔɔ ‑a? 9‑Nänʋä ci bhä, wlä ɔmɔ lä! 'Nɩ ‑nänʋä ci bhä 'sɩɩ nynä ‑ɔ! ‑Ɛɛ ‑wʋ ɔmɔɔ‑ ‑mä ɔɔ' 'wlʋʋnyɔ! ‑Bhlɛ ɔmɔ 'titi ci bhä, ɔ lä ‑amʋ lä! 10'Nɩ wa yio 'ylä, wlä ‑mänɩ sä ‑n ‑nʋ bhä 'nɩ ‑naa 'yii welio‑ bhää? 11Ɔ lä nyɩkpɔɔ wa laa lä Zozii nä, ɔmɔɔ‑ bhlüü‑ ‑paplɩɩ 'kʋ 'nɩ ɔ ‑bʋä'ä 'mɩɩ lä 'yii. 'Nɩ ɔ yi'i lä soo nynä n mʋ Silowee' 'nyibhlëa 'mnö ‑yä n 'kä 'klʋ wɔɔ. N ‑mʋ lä ‑mɔɔ 'nɩ n ‑wɔɔ lä 'klʋ nä, kä 'naa 'yii welio‑. 12Nyɩkpɔɔ cii‑ lä sɔɔ nä, 'nɩ wa yio soo, wlä ‑ɔ ‑sonö‑ö lä sɔɔ nä, dɔ ‑kʋ bhää? Nyɩkpɔɔ lä nn' ‑wʋ ‑yi.

Falizɩɛnyʋa ylä nyɩkpɔɔ ‑ɔnö 'yii welio lä nä

13'Nɩ nyɩkpɔɔ, wa yio Falizɩɛnyʋa dëlüü fä. 14‑Maa, 'ylʋʋ 'kʋ Zozii ‑nʋ bhlä ‑paplɩɩ, 'nɩ ɔ welio‑ bhlä 'yii nä, Sabaa‑gwlɛylʋʋ 'kʋ bhlä. 15Falizɩɛnyʋa ‑mä 'sɩɩ, 'nɩ wa yi nyɩkpɔɔ 'ylä, wlä ‑mä, sɩɩ 'plömɔ ‑plömɔ bhä 'kʋ 'nɩ ‑n ni bhä ‑pɛɛ sää? 'Nɩ ɔ yiwa soo, ɔ lä kɔ ‑bʋä'ä ‑paplɩɩ 'yii, 'nɩ n yi lä 'klʋ wɔɔ. ‑Lɔɔ n 'bhää 'nɩ n ni ylä sä.

16Falizɩɛnyʋaa' ‑nänʋä ‑wloo lä wälɩɩ nä, wlä nyɩkpɔɔ‑ ‑nʋ lä wälɩnɩ nä, ɔɔ' 'ŋʋ ‑wʋ Sabaa‑gwlɛylʋʋ 'klʋkpää' nä, Laagɔ yëku‑ ɔɔ' ‑bha ‑wʋ! 'Nɩ ‑nänʋä ci bhä 'sɩɩ nynä ‑mä säsä gbenyenyinyɔ yi bhä sää' 'yiziziogbɩ nʋʋ? Ɩ ‑kä bhɛ 'ŋnö 'nɩ wa doo‑ 'mʋ wamä ‑bhlobhlo pää'. 17'Nɩ wa yi bʋkʋ nyɩkpɔɔ 'ylä, wlä 'nɩ ‑mɔɔ, nyɩkpɔɔ ‑ɔ welie‑e lä 'yi nä, sä ‑n ci bhä ɔɔ' ‑za? Nyɩkpɔɔ lä ɔ ‑glö 'plɔfɛtɩ.

18‑Maa, sä nyɩkpɔɔ 'kä bhä tɛɛ 'yikpüü' kʋ ‑yä ɔ 'kä yɩ ‑pɛɛ sä 'ni nä, ‑lɔɔ' wälɩɩ 'Zufʋnyʋaa' lɩɩ bhɔɔ nyaasäsä. Ɩ ‑kä 'ŋnö 'nɩ wa paa‑ ɔ 'bä ‑yä 'nɔ 'sɔ wälɩ, 19'nɩ wa yiwa 'ylä, wlä ‑mä, anyɩa' 'yunɔ 'mɔ a sä bhlä nynä ‑mä, dä a 'nöɔ bhlä gään nä, ɔɔ' 'ni ‑wʋ sä ‑a? 'Nɩ sɩ ‑kʋ bhä ‑pɛɛ 'nɩ ɔ ni bhä sää? 20Nyëbluo, ɔ 'bä ‑yä ɔ 'nɔ 'sɔ lä ‑a ‑yi sɔɔ nynä ‑mä ‑anyɩa 'yu. 'Nɩ dä ‑a 'nöɔ bhlä 'sɩɩ gään nä, ɔɔ' ‑läzä sä 'ni. 21‑Mä sɩ 'plömɔ ‑plömɔ lä 'kʋ 'nɩ ɔ ni ylä ‑pɛɛ sä nä, ‑a 'nɩɩ ‑wʋ ‑yi. 'Nɩ ‑lɔyɩ 'titi ‑ɔ ‑gbä 'nɩ ɔ ni ylä sä nä, ‑a 'nöɔ ‑wʋ 'sɩɩ ‑yi. A 'ylɔɔ ‑mä ɔ plöö‑ nyɩkpabhë nä, ɔ yi 'mʋ ‑sää. 22Kä wa ‑guu bhlä 'Zufʋnyʋaa' 'cifinyʋa nä, 'ɩzä wa ci bhlä sɔɔ. 'Zufʋnyʋaa' 'cifinyʋa nä, kwa 'ŋʋʋ‑ bhä 'kʋ nynä ‑mä, ‑ɔ gä cii‑ nynä Zozii 'mɔɔ‑ plöö‑ Klisöɔ nä, wa 'kɔ Laagɔ‑bhutuu 'mnö 'tlü. 23‑Nɩnɩ 'fɩɩn ‑zä ɔ 'bä ‑yä ɔ 'nɔ 'sɔ ci bhlä nynä ‑mä ɔ plöö‑ nyɩkpabhë ‑nä, wa 'ylɔɔ.

24'Nɩ Falizɩɛnyʋa yi bʋkʋ nyɩkpɔɔ laa, 'nɩ wa yio soo, wlä ‑n fään Laagɔ 'ŋnu ‑yä ‑n ci ‑nʋawlɛ! ‑Anyɩ nä, ‑a ‑yi sɔɔ nynä nyɩkpɔɔ ‑ɔ ‑yamänö‑ö lä nä, ɔ ‑glö gbenyenyinyɔ. 25'Nɩ nyɩkpɔɔ yiwa soo, ɔ lä ɔ plöö‑ gbenyenyinyɔ ‑o! Ɔɔ' ‑wʋ gbenyenyinyɔ plöö‑ ‑o! Nn' ‑wʋ ‑yi. 'Klëa ‑bhlo 'coo n ‑yi lä nä, amää‑ plöö‑ lä nynä ‑mä, n ‑kʋ bhä tɛɛ 'yikpüü', ‑mä ‑pɛpɛɛ nä, n ni yɩ sä. 26Wlä ‑mä, säsä ɔ ‑nʋ‑ʋ bhää? Säsä ɔ ‑nʋmɔ ‑nʋmɔ bhä 'nɩ ‑naa 'yii welio‑ bhää? 27Nyɩkpɔɔ lä 'nɩ n ya'anyɩ wɛzä soo, 'nɩ a nö'ö ‑wʋ 'nyukwli ‑poo. ‑Ɔnözä 'nɩ a ylä bhä nynä ‑mä n sonö'anyɩ bʋkʋʋ? Anyɩ ‑mä 'sɩɩ, a 'kä bhɛ ɔɔ' 'kʋgënyʋä 'plö ‑a? 28Ɔ cii‑ lä sɔɔ nä, 'nɩ wa yio 'bhɩsɛlɩ 'kʋ cie. Wlä ‑mɔɔ‑ plöö‑ lä ɔɔ' 'kʋgënyɔ, ‑mä ‑anyɩ nä, ‑a ‑glö Moyizöö' 'kʋgënyʋä! 29Moyizö nä, ‑a ‑yi sɔɔ nynä Laagɔ ‑sonöɔ, ‑mä ‑nɔnɔ nä, ‑aa ‑wʋ dä ɔ bha lä nä ‑yi. 30Nyɩkpɔɔ lä ɩmɩɩ‑ 'ninie lä plɛkʋ! Aa' ‑wʋ dä ɔ bha lä nä ‑yi, ‑mä ɩ ‑kʋ sɔɔ, 'nɩ ɔ welie‑ lä 'naa 'yii. 31‑A ‑yi 'sɩɩ sɔɔ nynä ‑mä gbenyenyinyʋa nä, sä wa 'ylää lä Laagɔ nä, Laagɔɔ' ŋoo ‑wʋ sɔɔ 'kʋ. ‑Mä ‑ɔ ŋʋ lä Laagɔ 'klʋkpää, 'nɩ ɔ nää lä ʋʋ' pɔlösaa nä, sä ɔ 'ylää Laagɔ nä, kʋ nʋ sɔɔ.#9.31 Zɛɛ 'sɩɩ Eza 1.15; Lɔlɔ 34.16; 66.18; ‑Jlibɔ 15.29. 32'Nɩ bʋkʋ, ‑aa ‑läzä 'sɩɩ 'nu nynä ‑mä nyɩkpɔɔ' lɔɔ wa ‑gänö lä 'yikpüü' nä, ɔ lü‑nyɩkpɔ ‑yi 'nɩ ɔ welio‑ 'yii. 33Nä nyɩkpɔɔ‑ welie'e lä 'yii nä, ɔ 'nö bhä Laagɔ yëku ‑bha nä, ɔɔ' ‑lä bhɔɔ mii 'nɩ ɔ 'kɩɩ nʋ. 34Ɔ cii‑ bhɛ lä sɔɔ nä, nyɩkpaa lä ‑mä, ‑mɔɔ wa ‑gänö lä nyenyii 'mnö 'nɩ, ‑naa ‑lefɩɩn plöö‑ lä nyenyi nä, ‑mɔɔ 'ga‑anyɩ cɩa ‑a? ‑Nɩnɩ ‑kä bhɛ 'ŋnö nä, kwa tlüo‑ Laagɔ‑bhutuu 'mnö.

Zozii ‑yä 'yikpüü' kʋnyɔɔ ‑ɔ ‑yamä bhlä nä 'sɔ sloo

35Zozii nuu‑ lä nynä wa tlüü‑ nyɩkpɔɔ Laagɔ‑bhutuu 'mnö nä, kɔ ‑mʋ 'nɩ ɔ ‑yɔsɔ yi sloo, 'nɩ ɔ yio 'ylä, ɔ lä ‑mɔɔ, ‑n ‑kä Nyɩkpɔɔ ‑Yowlii' pɔlötɛtɛ ‑a? 36Nyɩkpɔɔ lä Cɩanyɔ‑, ‑ɔ plöɔ‑ bhä 'nɩ n kään bhä ɔɔ' pɔlötɛtɛɛ? 37Zozii lä ɔmɔ ‑n ni lä ‑lää 'yi. ‑Lɔɔ ‑ɔ ‑yä ‑mɔɔ 'sɔ sää lä 'mʋ nä, ɔmɔ lä. 38Nyɩkpɔɔ lä Kwlienyɔ‑, n ‑kä ɔɔ' pɔlötɛtɛ, 'nɩ ɔ yi Zozii dëlüü ‑kokoowli glu 'pä.

39'Nɩ Zozii yio soo, ɔ lä kä n ‑yi lä 'ylʋnʋzɔɔ ‑yä mɔɔ' nyɩkpaa' nʋnʋgbɩɩ n 'kɩ 'wɛɛ. ‑Wa ‑kʋ lä 'yikpüü' nä, wa 'kä sä 'ni, ɩyä ‑wa ni lä sä nä, wa 'kä yikpüü' kʋ. 40Falizɩɛnyʋä ‑zio ‑kʋmʋ bhlä ‑lɔɔ nä, wa nuu‑ lä Zozii' ciciwälɩɩ nä, wlä nä ‑anyɩ, ‑a ‑kʋmʋ 'sɩɩ 'yikpüü ‑a? 41Zozii lä a kä bhlä 'yikpüü ‑kʋ nä, aa' ‑lä bhɔɔ nyenyi kään. ‑Mä sa ci ylä nynä ‑mä ka ni sä nä, 'ɩzä anyɩa' nyenyii 'kanyɩ lä 'kɔɔkɔ yëku kʋ.

Currently Selected:

Zään 9: god

Highlight

Copy