Markus 2

Yesuhz aez ihz tihz yawng yam ne bilz

(Matthe 9:1-8, Lukas 5:17-26)

1Naeh thaengz seu seu ngihz, meuz Yesuhz weng tawz weng Kapernaum ne, ihz keui ngarz reu oiz Hnhz weng truz lang kaang. 2Ihz keui teur aacz daehz truz neuk tuhz kaang thanz paw nam maang ti nuar, tawiz teun leukz kaang kaw neuk. Yesuhz kaw rawz plaez keuh nahz reu oiz rak. 3Meuz phangz an diz, ihz keu ponz klamz truz ihz tihz cawng yam hawkz. 4Ihz heungz baaiz, keuh nam caang truz cu thatz. Kawp ceun diz keuh raw lang kusz kaang, ya teuk loz tuhz tawz Yesuhz, plawiz cur ihz penz an yaetz boh kaai saatz. 5Yesuhz awlz reung dengz yum keuh rae daz ihz tihz cawng yam ne nahz, “Kuanz Ohz, Ohz a wa plawiz aez reung dengz kawi mih.”

6Sra mawz kyaamz teur ka an keu dez boh a diz ne daz tuhz phawmz daehz, 7“Cih naehz Ihz an ni daz ceun ni a? Hnhz a wa upz leuz Phraz Pen Caoh. Naeh Phraz Pen Caoh pan plawiz aez bawnz reung dengz kawi.”

8Yesuhz kaw mas luat tuhz phawmz keuh naeh ceun diz, maanyz keuh nahz, “Cih naehz, tuhz phawmz pehz daz ceun diz a? 9Mony reu ma an nae lao yoh tawz ihz cawng yam ne? ‘A wa plawiz aez reung dengz kawi mih,’ daz ceun ni ne yoh haz? ‘Rawi raez, leh ti yaetz mih nuar lan,’ daz ceun ni ne yoh haz? 10Aez pehz mas a na Kuanz Ihz plawiz aez bawnz reung dengz kawi tuhz prih keu tehz ne, Ohz ngaz plaez pehz nahz.” Hnhz daz ihz cawng yam ne nahz, “Rawi raez. 11Leh ti yaetz mih, weng cu kaang daehz.”

12Ihz an diz kaw rawi luat, leh ti yaetz daehz weng lan aacz ngaai ihz tang heungz. Ihz keui kaw teur aacz daehz sangz baaiz, lupz phrawz Phraz Pen Caoh daz, “Euz, ehz nam ti awlz ceun ni seu pawk ez.”

Yesuhz raak leh Lewi

(Matthe 9:9-13, Lukas 5:27-32)

13Waaiz an diz Yesuhz lan waar nawngz Kalile thaengz seu laehz, ihz keui truz cu Hnhz, Hnhz kaw sawnz aez keuh nahz. 14Meuz Hnhz lan tawiz reung dengz ne, awlz Lewi kuanz Alphaeus, keu dez boh sumz seutz khawn rae daz hnhz nahz, “Lan tawiz Ohz”. Ihz an diz kaw ceng lan tawiz.

15Waaiz an diz, Tahz Yesuh boh teu paez Hnhz suamz seum suamz tawz kaang Lewi ne ihz seutz khawn keui, ihz raai keui suamz kawmz keuh. Ihz keu diz naeh ihz lan tawiz puatz Hnhz. 16Meuz sra mawz kyaamz teur ka an naeh Pharise keui awlz Hnhz suamz kawmz ihz seutz khawn boh ihz raai keui rae maanyz teu paez Hnhz daz, “Cih naehz ihz an ni suamz kawmz ihz seutz khawn boh ihz raai keui a?”

17Yesuhz kaw ngarz rae daz, “Ihz moh rak keui nam lo tahz seu neumz, ihz suhz rit keui pan lo a. Ohz truz ta raak leh ihz keu sangz keui nam anz, ta ihz maang reung dengz kawi keui.”

Kaerz seum suamz

(Matthe 9:14-17, Lukas 5:33-39)

18Meuz teu paez Yohn boh Pharise keui kaerz seum suamz ne, ihz teur ka truz maanyz Yesuhz, “Teu paez Yohn boh Pharise keui kai kaerz seum suamz, cih naehz teu paez Mih keui nam kaerz a?”

19Yesuhz kaw daz, “Meuz tahz seu naaoz yeung naeh kawmz boh bohz raen daehz tuhz pawiz kopz ku ne, anz keuh kaerz seum suamz? Nam kaerz keuiz. Beuk tahz seu naaoz naeh tawiz keuh ne, keuh nam caang kaerz seum suamz lawh. 20Keuiz daz, kraao an ihz leh tahz seu naaoz teuk praasz lan thaz bohz raen ne, keuh te kaerz seum suamz.”

21“Yaeh nam leh banz teun mehz teuk baangz kreung trimz. Beuk cih ceun diz banz teun mehz ne rut, tuhz baaiz yeung waas. 22Ceun khuz an diz, yaeh nam sapz omz seu pit teun mehz tuhz seu kiz hurz trimz. Beuk cih ceun diz, omz seu pit teun mehz ne ngaz teuk plakz seu kiz hurz trimz, omz seu pit kaw teuk ukz hacz, seu kiz hurz kaw luh. Omz seu pit teun mehz ne bawnz sapz tuhz seu kiz teun mehz leun.”

Seu ngihz sinz

(Matthe 12:1-8, Lukas 6:1-5)

23Kaai seu ngihz sinz ne, Yesuhz keuh datz lan maar kaaiz kyung, teu paez Hnhz keui seur keut suamz seum kawr kaaiz kyung. 24Pharise keui daz Hnhz nahz, “Keuh nam rak seum cih ceun ni kaai seu ngihz ehz kaerz.”

25Hnhz kaw daz keuh nahz, “Pehz nam ti bawnz rawz lawng an ni seu pawk haz? Meuz kaap ceu beunz Abiathar ne, Khunz Dawit boh bohz raen hnhz keui coh baaiz, nam caang cih seu naez. 26Hnhz kut tuhz kaang Phraz Pen Caoh, leh suamz seum suamz an ceu beunz keui pan suamz bawnz a, samz aez tang bohz raen daehz keui nahz.”

27Yesuhz kaw daz keuh nahz, “Seu ngihz sinz ne naeh ta cih aez ihz rak, ihz nam anz ta cih aez seu ngihz sinz rak. 28Kawp ceun diz, Kuanz Ihz naeh Tahz seu ngihz sinz.”

Currently Selected:

Markus 2: ril

Highlight

Copy