Markus 16

Yesuhz meu rae imz

(Matthe 28:1-8, Lukas 24:1-12, Yohn 20:1-10)

1Waaiz seu ngihz sinz ne, Mari Makdalen, Mari mah keuh Yakop, boh Salome keui, keuh yal lan omz hawm ngaz thukz toz yam Yesuhz. 2Naeh kaai seu ngihz seun teungz tuhz wong pulz seu ngihz, teuk ngup cao, meuz seu ngihz lae ne keuh lan a peun lu. 3Keuh teur daz daehz nahz, “Yaeh ngaz kling plaez aez ehz nahz reu aangz an bitz tuhz peun lu ne hoh?” 4Meuz keuh yawt reu aangz ne a wa peun kling plaez mok. Reu aangz an diz mawh baaiz. 5Keun nyah keu diz kaw kut yawt tuhz peun lu, keuh awlz ihz plung hawkz kap tang seu kaeng keun ra hanz, keu dez boh thaz takz kaaiz ne rae keuh teur aacz daehz khranz.

6Hnhz daz keun nyah keu diz nahz, “Yak khranz, pehz khahz Yesuhz, ihz weng Nasaraet, an ihz piamz kaai keun rang klawngz klaengz. Hnhz a wa meu rae imz. Hnhz nam naeh a niz leui, yawt ti mok toz yam Hnhz luz. 7Pehz lan lao Petros boh teu paez keu diz nahz raez. Hnhz a wa lan aacz pehz prih Kalile tui. Ceun ohz lao ne pehz te awlz boh Hnhz.”

8Keun nyah keu diz tang khranz, tang teur ceus lae truz thaz tuhz peun lu rae wang lan. Kawp keuh doz rae nam lao yaeh nahz naehz.

Yesuhz paw truz aacz ngaai Mari Makdalen

(Matthe 28:9-10, Yohn 20:11-18)

9Yesuhz meu rae imz teuk ngup cao, kaai seu ngihz hawkz, tuhz wong pulz seu ngihz ne, paw plaez aacz toz Daehz tawz Mari Makdalen, an phiz lae kaai hnhz teu pulz ne. 10Mari kaw lan lao plaez ihz an tomz cih bohz raen Yesuhz keui nahz, meuz keuh khiz ngaoz yaam boh ne. 11Meuz keuh ngarz ne keuh nam yum lawng Yesuhz meu rae imz boh, lawng Mari awlz toz Hnhz.

Yesuhz cao khahz lao reu oiz rak

(Matthe 28:16-20, Lukas 24:36-49, Yohn 20:19-23, Teu Maan Caoh 1:6-8)

12Waaiz an diz, Yesuhz cih toz Daehz pleung rae paw truz tawz teu paez Daehz keu aarz nahz, meuz kaar nuar lan cu pruh ne. 13Kaar kaw weng truz lao teu paez keu diz nahz kaw keuh nam yum.

14Waaiz an diz, Yesuhz paw truz plaez toz Daehz tawz teu paez seu kawlz disz, meuz keuh yeung suamz boh ne. Yesuhz nae keuh, sangz daz ihz an a wa awlz Hnhz keui lao plaez keuh nahz kaw kawp kingz keu nuasz keuh tanz rae keuh nam yum. 15Hnhz seumz lao keuh nahz, “Lan tuhz prih keu tehz sirz sirz, lao aez reu oiz rak kaai ihz nahz klawhz ihz. 16Ihz an yum rae leh teuk sruz ne bawnz reung dengz khyawt. Ihz an nam yum samz bawnz talz taam reung dengz kawi. 17Ihz an yum keui naeh a naez kaw, penz an laak laaiz a diz, leh mus Ohz ngaz wah thengz phiz keui, ngaz upz mony reu ma pleung pleung keui, 18keuh ngaz takz bawnz heunyz keui, suamz seum suamz an maang keu cawh caang yam ihz kaw nam teu keuh, leh tihz taangz lang kol ihz nam moh rak, cih aez keuh moh rak truz.”

Yesuhz raw lang kaang raaoz

(Lukas 24:50-53, Teu Maan Caoh 1:9-11)

19Waaiz Tahz Yesuhz seumz lao teu paez Daehz keui nahz ceun diz ne, khaam leh raw lang kaang raaoz, keu dez thaz plaakz takz kaaiz Phraz Pen Caoh. 20Teu paez keui kaw khahz rawz reu oiz rak klawhz ti, Yesuhz kaw kawr keuh cih an laak laaiz keui rae penz saak se an anz kaai mony reu ma Phraz Pen Caoh.

MARKUS A WA DUTZ.

9. Keun nyah keu diz lan cu Petros boh teu paez Hnhz keui rae, lawng an lao mok keuh klawhz khaw ne, lao aez an patz keui pan.

10. Waaiz an diz, Yesuhz cao teu paez Daehz keui aez keuh rawz taangz toz Daehz reu oiz rak Phraz Pen Caoh an seu ngamz boh traz khyawt ta klawhz co ne tawiz prih keu tehz cawk thaz reu lae taw dutz cawk thaz reu keutz.

Kyaamz Markus a wa dutz.

Currently Selected:

Markus 16: ril

Highlight

Copy