Markus 13

Yesuhz lao ihz raai keui ngaz ya thengz wat

(Matthe 24:1-2, Lukas 21:5-6)

1Meuz Yesuhz lae truz thaz wat ne, teu pae Hnhz hawkz daz, “Yawt, Tahz Sra, reu aangz mawh reu aangz longz keui, boh kaang mawh kaang longz keui, rak seum sangz baaiz.”

2Yesuhz tawpz daz, “Mih awlz boh kaang mawh kaang longz keu ni nam anz haz? Kawnz reu aangz keu ni hawkz boh hawkz te nam bawnz teur takz, te bawnz luh ducz hacz aamz.”

An laak laaiz meuz kam pha ngaz lawng

(Matthe 24:3-14, Lukas 21:7-19)

3Meuz Yesuhz naeh taw daehz lang rang Olip ne, waaiz ngaai cu wat rae, Petros, Yakop, Yohn boh Andre lan rah rah maanyz Hnhz, aez Hnhz lao plaez daehz nahz meuz nam maang ihz ne. 4“An keu diz ngaz penz truz peuk naeh? Meuz ngaz penz ne maang an laak laaiz naehz?”

5Yesuhz kaw daz, “Pehz seu tih raez, yak aez yaeh upz kaoz bawnz pehz. 6Kawp daz ihz tang heungz keui cih ceun naeh Ohz ne ngaz truz upz daz, ‘Ohz naeh Tahz Khris.’ Keuh upz bawnz ihz heungz baaiz. 7Meuz pehz ngarz reu oiz tiukz siukz boh reu oiz phaangz ngaz tiukz siukz ne, yak ngaat. Te bawnz naeh boh ceun diz leun. Keuiz daz, maat phraeoz ti dutz. 8Ihz seu kheuz boh seu kheuz, ihz seu prih boh seu prih ngaz teur tiukz. Reu yung kruhz boh an coh nguat keui kaw ngaz naeh klawhz ti. An keu ni naeh seun teungz tukz khahz peur teuk.”

Yesuhz lao teu paez Daehz ihz keui ngaz pae suamz keuh

9“Pehz seu tih toz daehz. Kawp daz ihz ngaz mat leh pehz lan cu tawiz rumz keui, tiz pehz tawiz crawp keui. Pehz ngaz bawnz ceng aacz ngaai ihz mawh boh khunz, kawp pehz tawiz puatz Ohz, keuiz daz pehz ngaz bawnz krai plaez keuh nahz reu oiz rak. 10Co kraao maat hacz ne ngaz bawnz krai reu oiz rak kaai ihz klawhz kheuz. 11Meuz ihz mat pehz ne yak kawcz phawmz, yak wonz mok teuk aacz an pehz ngaz tawpz daz ceun nae ne. Meuz phangz an diz, pehz lo upz mony reu ma an pehz bawnz. Kawp daz, nam anz mony reu ma an pehz upz leui, naeh Khuanz Seu Ngamz lao boh. 12Meuz ceun diz ne, kuanz mai teur deuiz kaw teur saz kokz daehz, mah paz keui saz kokz kuanz daehz, kuanz ihz keui kaw kawi mah paz, saz kokz mah paz daehz cih aez yam. 13Ihz ngaz ceuh pehz kawp Ohz. Ihz an klakz khreumz taw phraeoz ti dutz ne bawnz reung dengz khyawt.”

Phez tukz khahz an mawh longz

(Matthe 24:15-21, Lukas 21:20-24)

14“Ceun ihz taangz phraz Daniel lao mok, pehz te awlz phrihz peuk ceuh ritz ritz#Daniel 9:27, 11:31, 12:11 ne ceng boh ti hnhz nam rak seum naeh ne an ni sunz daz naehz, ihz rawz kyaamz lik an ni keui aez keuh loz phawmz. Meuz awlz ceun diz ne, ihz an naeh tuhz prih Yio keui aez keuh tiunz raw lang rang. 15Yak aez ihz an naeh lang kusz kaang keui kut leh phrihz phrahz tuhz kaang. 16Yak aez ihz an naeh tawiz sraakz maar keui weng leh kreung daehz lang kaang. 17Meuz seu ngihz an diz kreuk baaiz ta keun nyah keun meur boh keun nyah maang kuanz buhz keui nahz. 18Pehz suz tawngz raez, seu ngihz an diz yak aez maen kaai kiarz katz. 19Kawp daz, seu ngihz tukz khahz peur teuk ceun diz ne, thaz meuz Phraz Pen Caoh phaan cih taw phraeoz seu ni kaw nam ti naeh seu pawk, waaiz an ni kaw te nam naeh thaengz leui. 20Beuk Phraz Cen Cen cih aez kraao an diz nam patz kaw nam maang yaeh lawt. Kawp ihz an ras mok keui nahz rae cih aez kraao an diz patz.”

21“Meuz kraao an diz ne, beuk ihz daz pehz nahz, ‘Tahz Khris naeh a niz, naeh a tui,’ kaw pehz yak yum. 22Kawp daz, ihz an plawmz cih pung Tahz Khris boh, ihz an plawmz cih pung ihz taangz phraz keui paw truz ne cih plaez an laak laaiz boh an rak seum sangz keui, khanz daz caang, kyaam upz leh tang ihz an Phraz Caoh ras mok keui. 23Pehz seu tih toz daehz raez. Co maat phraeoz ne, Ohz a wa lao mok teuk aacz lawng keu ni hacz aamz.”

Kuanz Ihz ngaz mial truz

(Matthe 24:29-31, Lukas 21:25-28)

24“Waaiz kraao seu ngihz tukz khahz peur teuk ne, seu ngihz ngaz bimz, kiarz kaw nam aez an thaangz. 25Seuk muny lang plengz keui ngaz kur, taanz khoz plengz keui kaw ngaz keusz.#Isaiah 13:10, 34:4 26Meuz ceun diz pehz ngaz bawnz awlz Kuanz Ihz tang bunz boh taanz khoz an mawh ne tumz truz peu eumz. 27Meuz ceun diz Hnhz cao teu maan kaang raaoz Daehz, raak teur cuhz ihz an Phraz Pen Caoh ras mok kaanz prih keu tehz hacz aamz taw phraeoz lang plengz hacz aamz.”

Mony pung taek teungz laangz wah

(Matthe 24:32-35, Lukas 21:29-33)

28“Pehz yawt leh nahz teungz laangz wah raez. Pehz mas boh, beuk kaakz laangz wah plung, maang lahz run kaw a wa thatz kiarz kawcz. 29Naeh ceun khuz an diz, beuk pehz awlz lawng keu diz kaw, pehz lo mas kraao Kuanz Ihz mial truz ne a wa thatz baaiz rim keur wah. 30Ohz daz mawn pehz nahz, co ihz keu ni maat dutz ne lawng keu ni ngaz penz truz hacz aamz. 31Plengz boh keu tehz luh kaw, mony reu ma Ohz nam luh.”

Nam maang ihz mas seu ngihz an diz boh kraao an diz

(Matthe 24:36-44)

32“Neuz lak Paz Phraz, yaeh nam mas seu ngihz an diz boh kraao an diz, teu maan kaang raaoz kaw nam mas, Kuanz kaw nam mas. 33Pehz nam mas seu ngihz an diz ngaz phraeoz truz peuk naeh rae, seu tih toz, dangz toz pao raez. 34Naeh ceun ihz hawkz, meuz hnhz lae nawk prih ne khaanz mok kuanz leng keui nahz kaanz klawhz ihz. Lao tang ihz pao keur wah aez ngawm yawt. 35Tahz kaang ngaz weng truz teuk borz haz? Khinz sawmz haz? Meuz yaerz keu dawrz haz? Teuk ngup haz? Kawp daz nam mas rae teur aacz daehz pao. 36Beuk nam pao ceun diz, tahz kaang ne weng truz teuk khranz rae doz maen meuz phangz pehz yaetz reuk ngeut. 37Teur aacz daehz pao raez, ceun Ohz lao pehz ne, Ohz lao ihz nahz hacz aamz.”

Currently Selected:

Markus 13: ril

Highlight

Copy