Lukas 15

Soz an bilz

(Matthe 18:12-14)

1Naeh seu seu ngihz ihz seutz khawn boh ihz raai keui truz teuk ngarz traz Yesuhz. 2Pharise boh ihz mawz kyaamz keui saehz daz, “Ihz an ni saanyz ihz raai keui rae suamz kawmz keuh.” 3Kawp ceun diz Yesuhz lao keuh nahz mony pung taek an ni,

4“Tuhz pehz ne maang ihz hawkz, beuk maang soz seu peur ya, hawkz samz bilz, hnhz ngaz cih seu naez? Ngaz mok thengz timz kawlz timz tuhz ruk ne khahz dawmz an bilz ka nam awlz nam anz haz? 5Meuz a wa awlz ne tang seuz phawmz kolz weng truz kaai cawkz pahz daehz, 6meuz a wa weng phraeoz kaang ne raak kuanz bohz boh ihz rim kaang daehz ne daz keuh nahz, ‘Seuz tawiz ohz raez, soz an bilz ne ohz a wa awlz daehz eunz.’ 7Naeh ceun khuz an diz, Ohz daz pehz nahz, meuz ihz raai caanz reung dengz kawi ne lang kaang raaoz baaiz seuz lak ihz keu sangz timz kawlz timz an nam lo caanz reung dengz kawi.”

Paekz ron an bilz

8“Keun nyah hawkz maang paekz ron seu khanz, samz bilz hawkz. Hnhz kleoz ngal ngawiz, pisz tang kaang rae khahz dawmz rak rak ka nam awlz nam anz haz? 9Meuz hnhz a wa awlz ne raak kuanz bohz boh ihz rim kaang daehz keui daz, ‘Seuz tawiz ohz raez, paekz an bilz ne ohz a wa awlz daehz eunz.’ 10Naeh ceun khuz an diz, ihz raai hawkz caanz reung dengz kawi ne teu maan kaang raaoz Phraz Pen Caoh keui seuz phawmz.”

Kuanz an bilz

11Yesuhz siupz lao thaengz, “Maang ihz hawkz maang kuanz keur meh keu aarz. 12An kyehz an diz daz paz daehz nahz, ‘Paz, aez ohz nahz a moi an ohz trohz bawnz keui.’ Paz keuh kaw teur yaang aez kaar nahz. 13Nam paw moh ceu nawhz, kuanz kyehz an diz leh ron khamz daehz lae lan prih yaan, cih sraz sraz, teuk hacz thengz ron khamz daehz a diz. 14Waaiz hnhz teuk hacz thengz ron khamz daehz hacz aamz, tawz prih an diz kaw coh nguat baaiz ne hnhz kaw nam maang naehz leui. 15Hnhz lan cih kuanz leng ihz tuhz prih an diz. Ihz an diz kaw cao hnhz lan damz lek tuhz na daehz. 16Hnhz nguat baaiz rae coh tang plaehz reu baaiz kaaiz lek keui. Yaeh nam damz hnhz. 17Meuz ceun diz hnhz wonz daehz eunz, ‘Kuanz leng thaz kaang paz ehz tui seum suamz kumz paw leuz. Ohz cingz coh nguat paw raenz yam! 18Ohz ngaz weng cu mial paz ehz daz, ‘Paz, ohz a wa pleung mih boh kaang raaoz. 19Nam theukz raak ohz kuanz leui, mok ohz ceun ihz suamz caangz hawkz.’” 20“Hnhz kaw caac ceng weng cu kaang paz daehz.

Meuz hnhz yeung naeh yaan kaang paz daehz ne paz keuh teuk soz awlz hnhz rae teur yawng hnhz. Paz keuh wang lan ngan leh hnhz, kuny hnhz. 21Kuanz an diz daz, ‘Paz, ohz a wa pleung mih boh kaang raaoz, nam theukz raak ohz kuanz leui.’ 22Keuiz daz paz keuh lao kuanz leng keui nahz, ‘Leh truz kreung laep lak ihz raamz rip, supz aez mangz koiz a tihz, kap aez cawng khlapz a cawng. 23Leh truz tangz kuanz meuk keu buiz, ngaz cih pawiz suamz khyaw. 24Kuanz ohz ne a wa yam rae seu ni hnhz meu rae imz. Hnhz a wa bilz seu ni a wa awlz mial hnhz.’ Daz ceun diz rae keuh cih pawiz suamz khyaw.

25Meuz phangz an diz, kuanz mawh samz cih boh kaanz a maar. Meuz hnhz weng truz ne ngarz reus mawng reus haaiz. 26Hnhz raak maanyz kuanz leng hawkz daz, ‘Cih naehz awh?’ 27Kuanz leng an diz daz, ‘Seum bohz tahz ehz a wa weng truz mial, paz tahz paz leng ehz awlz hnhz lawt phez weng truz rae tangz meuk keu buiz suamz khyaw.’ 28Kuanz mawh ne sunz ca rae nam kut tuhz kaang, paz keuh bawnz truz khyawz leh daehz eunz kut. 29Kuanz mawh ne daz, ‘Yawt, ohz cih kaanz mih naeh ceun kuanz leng ne a wa heungz wit, ohz nam ti teuk klaez mony reu ma mih lao. Mih nam aez ohz nahz paehz kyehz hawkz rae suamz khyaw tawiz kuanz bohz ohz. 30Kuanz an ni samz keulz yah mak damz, cih teuk hacz phrihz phrahz mih ne tangz tang meuk rae suamz khyaw!’ 31Paz keuh kaw daz, ‘Yawt, kuanz, mih moh kawmz se se ohz, phrihz phrahz an ohz maang ne naeh an mih keuiz. 32Ehz rak seum suamz khyaw kawp daz seum bohz mih ne a wa yam seu ni hnhz meu rae imz, hnhz a wa bilz seu ni a wa awlz mial hnhz.’”

Currently Selected:

Lukas 15: ril

Highlight

Copy