Teu Maan Caoh 5

Ananias boh yah hnhz Sapphira

1Keuiz daz maang ihz hawkz mus hnhz daz Ananias tang yah hnhz Sapphira, saz phrihz phrahz daehz ne, 2kaar teum prawm unz mok paekz teur ka rae, Ananias truz aez teu maan keui nahz teur ka pan. 3Petros kaw daz hnhz nahz, “Cih naehz lah, aez Satan upz peung kingz keu nuasz daehz a, unz mok langz phrihz phrahz teur ka rae, upz suamz Khuanz Seu Ngamz a? 4Meuz maat saz kaw nam anz khangz mih haz? Waaiz a wa saz kaw naeh boh paekz mih leun, nam anz haz? Kawp naehz lah, tuhz phawmz mih kyaam ceun ni a? Mih upz suamz taw ihz nam anz, a wa upz suamz pa tang Phraz Pen Caoh.” 5Meuz Ananias ngarz ceun diz ne, hnhz taz yam. Ihz an bawnz ngarz keui kaw teur aacz daehz doz baaiz. 6Ihz reum buz keui kut truz rae, leh banz wian toz yam Ananias, klamz lan saangz keo. 7Moh thaengz seu waiz na ri ne, yah hnhz maat mas lawng an a wa penz ne kut truz. 8Petros maanyz hnhz daz, “Paarz saz phrihz phrahz bawnz taw seu ni hiuz?” Keun nyah an diz kaw daz, “Anz boh, bawnz taw seu diz pan.” 9Petros kaw daz, “Cih naehz lah, teur aacz daehz teum prawm caam yawt Khuanz Caoh Phraz a? Yawt raez, cawng ihz an lan saangz keo tahz mih ne a wa truz naeh rim keur wah, keuh ngaz klamz lan saangz keo thaengz tang mih.” 10Meuz diz luat keun nyah an diz kaw taz yam rim cawng Petros. Meuz ihz reum buz keui phraeoz truz ne, keuh awlz toz yam keun nyah, keuh kaw leh lan hnhz saangz keo rim tahz hnhz. 11Ihz an naeh tuhz cumz caoh boh ihz an bawnz ngarz lawng an diz keui teur aacz daehz doz baaiz.

An laak laaiz boh rak seum sangz

12Teu maan keui kaw cih plaez ihz nahz an laak laaiz boh rak seum sangz keui. Kuanz mai yum yam keui teur aacz daehz teur cuhz teu laangz eupz khunz Solomon ne. 13Ihz keui nam yaak raen keuh, keuiz daz ihz keui teur aacz daehz nap suamz keuh. 14Keuiz daz temz keur meh, temz keun nyah keui yum Caoh Phraz, kut truz cumz keuh tikz tikz rae, baaiz heungz truz. 15Ihz keui teur aacz daehz leh truz ihz penz, saatz boh peun khrengz ti yaetz keuh rae mok waar reung dengz, aez poiz Petros eupz kaai ihz penz. 16Ihz pruh ihz weng an naeh rim weng Yerusalem keui kaw, leh truz ihz penz boh ihz phiz kut, keuh kaw moh rak hacz aamz.

Teu maan keui klaez thang

17Meuz ceun diz ceu beunz boh bohz raen hnhz, an naeh cumz Saduse keui, seuk ke thanz paw ca teu maan keui nahz, 18keuh mat teu maan keui sapz tuhz thang. 19Keuiz daz meuz teuk bimz ne teu maan kaang raaoz Phraz Cen Cen ne lawk keur wah thang, raak teu maan keui lae thaz nawk, daz tang keuh nahz, 20“Pehz lan ceng tuhz teu laangz wat, rawz aez ihz keui nahz traz phawmz teun mehz.” 21Teu maan keui kaw teuk ngarz mony teu maan kaang raaoz rae lan cu tuhz teu laangz wat teuk ngup cao cao, rawz aez ihz keui nahz. Ceu beunz boh bohz hnhz keui teur cuhz tang cumz ihz mawh pha sa Yio rae cao ihz raak truz teu maan an naeh tuhz thang. 22Meuz siukz keui lan phraeoz tawz thang ne, keuh nam awlz teu maan keui rae, mial truz lao keuh nahz, 23“Meuz ehz lan phraeoz tawz thang ne keur wah kaw dapz rak boh, ihz pao thang keui kaw ceng pao rak rak boh. Keuiz daz meuz ehz lawk yawt keur wah ne, nam awlz yaeh tuhz diz.” 24Ihz mawh siukz pao wat boh beunz caangz keui ngarz ne, sangz baaiz daz, “An ni naeh ceun nae ez?” 25Meuz phangz an diz, maang ihz hawkz truz lao keuh nahz, “Teuk ngarz raez, ihz an pehz leh sapz tuhz thang ne, a wa lan naeh tuhz teu laangz wat tui sawnz aez boh ihz nahz.” 26Ihz mawh siukz pao wat boh teu paez hnhz keui raak kut mial teu maan keui. Keuh nam yaak cih cri cra, kawp daz keuh doz ihz wiurz sapz daehz nahz kawnz reu aangz. 27Keuh cao teu maan keui ceng aacz ngaai cumz ihz mawh pha sa Yio boh, ceu beunz maanyz teu maan keui daz, 28“Yak leh mus ihz an diz rawz ne ehz a wa lao mawn mawn pehz nahz seu naeh laehz leui, nam anz haz? Keuiz daz, yawt luz, pehz a wa sawnz aez tuhz weng Yerusalem ne a wa sirz. Pehz sunz maap daz ehz piamz Ihz an diz long!” 29Keuiz daz Petros boh teu maan keui daz keuh nahz, “Ehz lo teuk ngarz mony Phraz Pen Caoh leuz lak mony ihz eu. 30Pehz piamz Tahz Yesuhz kaai lakz keun rang klawngz klaengz. Keuiz daz Phraz ihz keu daehz keu daepz ehz a wa cih aez Hnhz meu rae imz. 31Phraz Pen Caoh leh phrawz Hnhz mok plaakz takz kaaiz Daehz rae aez Hnhz naeh Tahz Peur Aacz boh Tahz Khyawt, aez kheuz Israel keui caanz, aez bawnz lawt reung dengz kawi. 32Ehz naeh saak se lawng keu ni, Khuanz Seu Ngamz an Phraz Pen Caoh aez kaai ihz teuk ngarz mony reu ma Hnhz kaw naeh saak se laai.” 33Meuz keuh ngarz ne sunz ca baaiz, keuh teur lao daehz ngaz piamz thengz. 34Keuiz daz Kamaliel ihz Pharise, an naeh ihz sawnz aez traz, an ihz nap suamz ne ceng lao aez teu maan keui lae thaz nawk seu co. 35Hnhz daz, “Kheuz Israel keui aez, mok seu tih an pehz ngaz cih kaai keuh ne. 36Anz pehz tang meuz aacz an ni ne, Theudas daz daehz naeh ihz myaat rae kraao ihz ponz peur ya ne tawiz puatz hnhz. Keuiz daz waaiz ihz piamz hnhz ne ihz an tawiz puatz hnhz keui a wa seuk praaiz rae nam penz truz naehz. 37Waaiz an diz meuz ihz seutz craangz ihz ne, Yudas ihz prih Kalile kaw khahz pa leh ihz heungz taan taan aez ihz tawiz puatz daehz. Hnhz kaw talz ihz piamz rae ihz tawiz puatz hnhz keui a wa seuk praaiz thaengz. 38Kawp ceun diz yak cih keuh, teungz mah keuh. An keuh kyaam ne, beuk naeh a kyaam ihz kaw, tiunz luh. 39Keuiz daz beuk naeh a kyaam Phraz Pen Caoh kaw pehz nam caang ya. Doz caang penz lan ihz khatz Phraz Pen Caoh.” 40Keuh leh tawiz mony Kamaliel rae raak leh mial teu maan keui, keuh rotz teu maan keui, lao kan mok keuh nahz, yak aez leh mus Yesuhz rawz leui, a wa kaw plawiz aez keuh lan. 41Teu maan keui kaw seuz phawmz lae lan thaz paang kum longz lan kawp daz Phraz Pen Caoh maatz keuh naeh ihz trohz khaam sre luh kawp mus Tahz Yesuhz. 42Klawhz seu ngihz teu maan keui sawnz aez ihz keui nahz lawng Tahz Yesuhz naeh Khris tawiz kaang boh tuhz wat.

Currently Selected:

Teu Maan Caoh 5: ril

Highlight

Copy