Luke 18
18
Meingongnu le Thukhenmangpa Thu taw Thusonteena
1Tua zawkciang Jesus in a nungzuite tungah thinkiam ngawl a, a thunget tawntung natu a hilna in thusonteenate son hi. 2“Khua khat ah thukhenmangpa khat om a, ama in Pathian le kiita ngawl, mihing maitang le a zakta ngawlhet khat ahi hi. 3Tuaciang in tua khua ma ah, nupi meingong khat om a, ama thukhenmangpa kungah pai tawntung in, “Ka ngalte kung panin hong hung ta'n,” ci in ama ii nga tu a kilawm bang ngen hi. 4Khuangei hialma thukhenmangpa in bangma hisak nuam ngawl ahihang, a khakbel ciangin hi bangin ngaisun hi, ‘Pathian le kiita ngawlin mihingte zongh zakta ngawl ka hi hang, 5hi meingongnu in hong nawngkaisak ahikom, ama ii nga tu a kilawm bang a nga thei natu in ka khensak tu hi. Tuabangin ka hi buale, ama hong pai tawntung tu a, a khakbel ciangin ka thuak zo buatu hi,’ ” ci hi.
6“Thumaan ngawl thukhenmangpa ii kammalte ngai vun. 7Tua ahile Pathian in ama ii mihingte, sun taw zan taw hu ngen in a au te ii phat tuam natu in thukhensak ngawl tu ziam? Amate a hu tu sia a haisaang tu ziam? 8A maan tak ka ci ciangin, amate sangah pangin, a manlang takin thu khensak tu hi. Ahitazong Mihing Tapa ii hong pai kik ciangin leitung ah upna a mu tu ziam?” Topa in ci thua hi.
Phariseepa le Shiadongpa Thusonteena
9Amate le amate pha kisa mama a, ngualdang theampo a zawngsak mihingte tungah Jesus in hi thusonteena zangh hi. 10“Khatvei lai in mihing nii Biakinn ah thungen tu in pai hi: Khat sia Pharisee pa hi a, khat sia shiadongpa ahi hi. 11Pharisee pa in ama nguak ding a, thungen hi. ‘Pathian awng na tungah ka lungdam hi, banghang ziam cile kei sia ngualdangte bangin ka duhop bua a, leilot ngawlin, numei le pa palngul khialna ka vawt bua hi. Zia sungah shiadongpa bang hi ngawl ka hikom na tungah ka lungdam hi. 12Nipi khat sungah ni nii an ka tang a, ka nga sung panin, see sawm sua see khat nang kong pia hi,’ ci in thungen hi. 13Ahihang shiadongpa ahile a khualana ah ding a, vantung zongh ento ngam ngawlin, a awm beang a, ‘Pathian awng, kei mimawpa hong hesuak ta'n!’ ci hi. 14A tatak ka ci ciang, Pharisee pa bang hi ngawlin shiadongpa sia mipha tangin cia hi. Mihing simin a kiliansakte kiniamsak tu a, a kiniamkhiakte a thupi in kikoi tu hi,” ci hi. #Mt 23:12; Lk 14:11
Jesus in Patangnote Thupha Pia
(Matthew 19:13-15; Mark 10:13-16)
15Mihing pawlkhat in a nausente tungah Jesus ii a khut nga a thupha a piak tu in paipui uh hi. Nungzuite in hi bang a ngamtatnate mu in teih uh hi, 16ahihang Jesus in patangnote sam a, “Patangnote kei kungah hong pai tu khaam heak vun, banghang ziam cile Pathian Ngam sia hi bangte aa ahi hi. 17Hi thu ciamtee vun! Hi patangno khat bang a, Pathian Ngam a saang thei ngawlte tua ngam sungah a tum thei buatu hi,” ci hi.
Sumhau Pa
(Matthew 19:16-30; Mark 10:17-31)
18Jew te lampui khat in, “Sya pha awng, tawntung nuntakna ka nga natu in bang ka vawt tu ziam,” ci in dongh hi.
19“Banghangin Sya pha hong ci ni ziam? Pathian khat simngawl kuama a pha om ngawl hi. 20Thupiakte na heak hi: ‘Nupa kipalngul heak vun, mihing that heak vun; nguta heak vun; leilot thu taw kuama mawsak heak vun; na nu le na pa zakta vun,” ci hi.#Pu 20:12-16; Thkna 5:16-20
21Pasalpa in zo kik a, “Ka no lai panin hi thupiakte ka zui siat sa hi,” ci hi.
22Jesus in hi thu a zaak ciangin ama tungah, “Na khat nasep tu kisamh lai ni hi. Na neisa teng zuakin a, na sum nga teng a zawngte pia in, tua hile vantung ah hauna na nei tu hi; tua zawkciangin hong pai ta'n a, ka nung hong zui ta'n,” ci hi. 23Ahizong pasalpa in hi thu a zaak ciang khuangai mama hi; banghang ziam cile ama hau mama hi.
24Jesus in a khuangai mama na a mu ciangin, “Sumhaute ii Pathian Ngam sungah a tum tu bangza in haksa ziam! 25Sumhau khat ii Pathian Ngamsung a tum tu sia, kalaoh khat ii phin bilvang sungah a tum tu sangin haksa zaw hi,” ci hi.
26Tua thu a zate in, “Tua ahile akua peuma in ngupna nga zo thong tu ziam? ci in dongh uh hi.
27Jesus in zo a, “Mihing atu a suak thei ngawlte Pathian atu in suak thei hi,” ci hi.
28Tua zawkciangin Peter in, “En in! Ka inn uh nusia in nang kong zui uh hi,” ci hi.
29Jesus in amate tungah, “Hi hi, A maan tatak ka ci ciangin, Pathian Ngam atu in, inn ahizong, zi ahizong, suapuite ahizong, nu le pate ahizong, tate ahizong, a nusiate in, 30hi hun sung mama ah, a tamzaw in nga tu a, hong pai lai tu hun sungah tawntung nuntakna nga tu hi,” ci hi.
Jesus in Ama Thi tu Thumvei A sonna
(Matthew 20:17-19; Mark 10:32-34)
31Jesus in a nungzui sawm le niite sam tuam a, amate tungah, “Ngai vun. Mihing Tapa huvau kamsaangte ii at theampo a taangtun natu mun Jerusalem ah ih pai tu hi. 32Ama Gentile te tungah hong ki aap tu a, amate in ciammuina in nei tu a, selno in cilphii tu uh hi. 33Amate in saat tu a thatlum tu hi, ahihang ni thum zawkciangin nuntakna sungah tho kik tu hi,” ci hi.
34Ahihang hi thute khat zong nungzuite in a tel bua uh hi; tua kammalte ii khiakna sia amate mun panin kiseal a, Jesus in bang thu son ziam, ci in amate in a tel bua uh hi.
Jesus in Mittaw Khutdaw ngen khat Damsak
(Matthew 20:29-34; Mark 10:46-52)
35Jesus sia Jericho khua nai hong thet ciangin, lampi hui a mittaw khat khutdaw ngenin to hi. 36Mihonte in kaantan in hong pai ama in a zaak ciangin, “Bang thu ziam?” ci in dongh hi.
37“Nazareth khua mi Jesus in hong kaantan hi,” amate in ci uh hi.
38Ama au a, “David tapa Jesus awng! Kei hong hesuak ta'n!” ci hi.
39Mai a pai mihonpite in teih a, thim in sawl hi. Ahihang ama in a nging seseam in au a, “David tapa awng! Hong hesuak ta'n!” ci hi.
40Tua ahikom Jesus tawlnga a, mittaw pa ama kungah hong paipui natu in thupia hi. Ama hong nai ciangin Jesus in, 41“Nang atu bang hong vawtsak leng na uuk ziam?” ci hi.
“Topa awng, khua ka mu kik nuam hi,” ci hi.
42Jesus in ama tungah, “Tua ahile khuamu ta'n! Na upna in hong damsak zo hi,” ci hi.
43Thakhat thu in ama in khua hong mu thei a, Pathian tungah lungdamko in Jesus zui hi. Mihonpite in a mu ciangin Pathian pok tek uh hi.
Currently Selected:
Luke 18: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
