YAM JAH 14

Abram Taoh Ka Lotax

1Ka daux baux singaix an, simiang meung Shina pa mawh Araphelax, simiang meung Elalax pa mawh Arot, simiang meung Elam pa mawh Khedawralawmax mai simiang meung Gaw-in pa mawh Tidalax, 2Kix yuh naing ka simiang meung Sawdom pa mawh Berax, simiang meung Gawmorax pa mawh Berashax, simiang meung Adamaw pa mawh Shinap, simiang meung Zabaing pa mawh Shemabax mai simiang meung Belax meung Belax an mawh haktiex Zawrax heue. 3Kix khawmuik khrawm paox tix daux lung haktiex Sidim, (Sidim mawh nhawng kih.) 4Kix yuh siliex simiang Khedawralawmax kao ra num mai yam hoek kao loe num kix tieh feen ka nawh heue. 5Yam hoek kao pon num simiang Khedawralawmax mai simiang pa ot plak nawh khankix hoek ti puing veng Ashatarok kanan pa mawh ceu pui Riepen, ceu pui Zuzen, pa ot daux veng Hamax mai ceu pui Emen pa ot daux veng Kiriyatin, 6Ceu pui Hawrix pa ot piang gawng Sina tom hoek dee singai haktiex Elaparan pa mawh daux tiag tu heue. 7Khaix an kix deeh veeh tix hu plak khaix mai hoek ka veng Enmishapat (pa kok mawh Kadeshax) mai puing ka can haktiex pa koe daux meung Amaliet khawm veng Hazazutanma dee ot pui ceu Amawrix khankix heue. 8Simiang Sawdom, simiang Gawmawrax, simiang Adamax, simiang Zabaing mai simiang meung Belax pa kok mawh Zawrax, khankix lih hu puing naing tau ka daux lung ting Sidim, 9Simiang meung Elam Khedawralawmax, simiang meung Gaw-in Tidalax, simiang Araphelax haktiex Shina mai simiang Arok haktiex Elatax khankix, simiang pon kaux tix plak mai simiang phwan kaux tix plak puing ka paox tix heue. 10Daux ngawd Sidim, koe peeh gai rawm ka tom nie, simiang Sawdom mai simiang Gawmawrax to mai cod daux tiex tan tiblah, can pui pa kawn deuk khankix to piang gawng khawmuik heue. 11Khaix an kix teei can kraung pa mhawm mai pa ih khawmuik khaing veng Sawdom mai Gawmawrax lih hu khaing tan heue. 12Kix teei Lotax pa mawh kawn pux Abram pa ot veng Sawdom khawm kraung khrai nawh mai lih hu heue. 13Pui tix kaux pa glawd khaing naing hoek ka Abram ceu pui Hebrie mai krai nawh mhong grawng an, yam an Abram ot tiag khaox piak van Mamre pa sum ceu pui Amawrix, Eshakawlax mai Anerax mawh pa yuh paox pie mai Abram heue. 14Yam hoik mhong Abram ka giex kix kawn pux tix hu, nawh teei pui naing pa hoik gau tix loe yieh kao daix kaux mai pui pa hoik keh daux nyiex nawh mai kieh kix lih hawt puing ka kix tom hoek veng Dan heue. 15Nawh gwieh cub kru naing tix ra cub daux plak ponsawm, hawt puing kix tom hoek veng Hawbax, pa koe plak laong veng Damase heue. 16Mawh kheu nan nawh deeh viex kraung khrai pa mhawm khankix mai kawn pux nawh Lotax, khawm kraung nawh mai cub bun mai pui nawh khawmuik ing heue. 17Khaix hoik kaoh Abram khaing pex tix ka simiang Khedawralawmax mai cub simiang pa ot tau mai nawh khankix, simiang veng Sawdom lih rieb Abram ka daux ngawd Shawe pa mawh ngawd simiang tan heue.

Abram Mai Simiang Malakhizediek

18Simiang Saliem Malakhizediek, pa mawh cao giex kaing li pa ting cie Siyiex, viex blah mai rawm plix siiet hoek ka nawh. 19Nawh nawb bwan piang Abram ah nin, “Siyiex Cao pa ting lhaong, pa phan haktiex mai raoma, nawb bwan ka Abram liak, 20kieh Siyiex pa koe bwanson koe dee lhaong, pa hoik ap pui koeng maix khankix, daux tawm taix maix” Abram deeh tawx kraung khrai in pa pon nawh ka simiang an, kao son tix son heue.”#He 7:1-10 21Simiang Sawdom ah nin ka Abram, “deeh tawx pui inkix ka aux, teei ti cie kraung khrai in son cao maix heue.” 22Viang mawh nan, Abram deeh ah nin ka simiang Sawdom, “Aux hoik yaog taix tix ka Simiang Siyiex, pa ting lhaong, Cao pa phan haktiex mai raoma, 23Aux tak ang doh teei keei tix nyaing mai maox kiep tix gieb tix gawng kawx. Aux tak ang teei kraung cie maix tix ceu kawx, aux ang doh kieh maix ah nin ka tix, Aux hoik kieh Abram magmi heue.” 24Viang mawh nan Aux tak teei priex preem pa hoik ih pui aux khankix mai pa khaw pui pa hawt khaix aux tix pon, pa mawh Aneyax, Eshakawlax mai Mamre khankix, kieh kix tang teei son pa caw kix ti pon heue.

Currently Selected:

YAM JAH 14: WCL

Highlight

Copy