YAM JAH 13

Sinngao Son Abram

1Khaix an Abram lih hu khaing meung Ejiptux, khawm moeng nawh mai can pa koe nawh khankix tau mai Lotax, ka plak seh, meung Khanan heue. 2Abram kied magmi koe tobrie mai mau khri tom nie heue. 3Nawh hu krax tom hoek Betelax, dee sum tix nyiex gox man yam jah, sinax veng Betelax mai veng Ai heue. 4Dee an mawh dee hoik sum nawh khu dee tan ka Siyiex tom yam jah dix. Abram kok ceu kaux Simiang Siyiex mai yaogyaw Nawh tan heue. 5Lotax hu tau mai Abram, nawh kawx yaox ti koe kawn yung tobrie mai nyiex gox man tom nie heue. 6Mawh kheu hoik sikhawp haktiex sonsang ot kiex tau, jao hoik haoh hun kraung khrai tobrie cie kiex khawm ra, kiex tom ang lai chix ot tau heue. 7Krax simah simiang lih koe sinax cao liang tobrie Abram mai Lotax. Pui ceu Khanan mai pui ceu Pherazix khankix ot daux meung an heue. 8Mawh kheu nan, Abram tom ah nin ka Lotax, “Paw kieh krax simah simiang koe sinax cao liang tobrie aux mai maix, kheu mawh ex puxaik heue.” 9“Haktiex hoik koe sivoe ngai maix ang mawh lie? tang gwieh ti hu ot khaing aux. Phan maix hu plak gwiex, aux tak hu plak dawm. Phan maix hu ot plak dawm, aux tak sang hu plak gwiex heue.” 10Lotax yaog ti jhak mai yaox ka dee lung haktiex Yawdan dee koe rawm tom nie. Yam an Simiang Siyiex ang nyang yuh veng Sawdom mai veng Gawmorax laux leeing, haktiex an khankix hoik awm sipeem Simiang Siyiex, jiet mhawm awm haktiex meung Ejiptux#Jah 2:10 baoh krax hu ka haktiex Zorax heue. 11Khaix an Lotax laug ti teei dee lung haktiex Yawdan son tix, Lotax lih hu plak lih singaix. Kiex tom gwieh paox khaing tan heue. 12Abram ot haktiex Khanan mai Lotax hu ot daux veng khankix pa koe daux lung Yawdan mai sum nyiex gox dex baoh veng Sawdom heue. 13Pui pa ot daux veng Sawdom khankix mawh pui pa caox caig mai pui pa ting phimap sivoe ngai Siyiex heue. 14Khaix gwieh Lotax khaing nawh, Simiang Siyiex ah nin ka Abram, “Jah ka dee ot maix mai maong ti jhak ka plak lih, plak klip, plak laong, mai plak seh heue. 15Haktiex pa yaox maix khawmuik Aux tak sang tawx ka maix mai doeh ru maix leeing ju heue.#Cau 7:5 16Aux tak kieh ru maix haoh hun awm phawng tiex, phan pui tix kaux kaux pon simin ka phawng tiex, ru maix kawx tak pon tix simin ka heue. 17Kaoh heue, lih hu ka daux haktiex an, ka plak lang mai ka plak vieh, mawh kheu Aux hoik tawx ka maix heue.” 18Khaix an Abram gah nyiex gox man tix khaing tan mai hu ot ka haktiex veng Hebron, dee koe khaox piak van khankix mai nawh deeh sum khu dee tan tix mu son Simiang Siyiex tan heue.

Currently Selected:

YAM JAH 13: WCL

Highlight

Copy