YAM JAH 12

Sijax Mukheu Son Abram

1Simiang Siyiex ah nin ka Abram, “Lih hu khaing haktiex ot maix khaing paox ru maix khaing daux nyiex ma keeing maix mai hu ka meung pa tak sang jhi Aux maix yaox heue.#Cau 7:2-3; He 11:8 2Aux tak yuh maix mawh ru pa ting lhaong. Aux tak nawb bwan ka piang maix mai kieh min ceu kaux maix ting lhaong mai maix tak mawh pa tawx bwan ka pui heue. 3Aux tak nawb bwan ka pui pa nawb bwan ka piang maix, Aux tak jhax lawg ka pui pa jhax lawg ka maix, ceu pui piang haktiex khawmuik tak pon bwanson kheu maix heue.”#Ka 3:8

4Mawh kheu nan, awm hoik tawm Simiang Siyiex lox ka nawh, Abram lih hu, Lotax kawx hu tau mai nawh, yam lih Abram khaing haktiex Haran, ju nawh hoik koe atixgliah phwan num heue. 5Khaix an Abram teei moeng tix Sarai mai Lotax kawn pux nawh, khrawm kraung khrai sinngao khawm pui pa pon nawh khaing meung Haran, kix lih hu ka haktiex Khanan, kix hoek ka haktiex Khanan heue. 6Abram laig ka haktiex an mai hoek ka Shekhem, dee koe khaox piak van mai haktiex an mawh ceu pui Khanan pa dawg ot ka heue. 7Khaix an Simiang Siyiex lih bleeh ka Abram ah nin, “Aux tak sang tawx haktiex in son doeh ru maix heue.”#Cau 7:5; Ka 3:16 Nawh yuh khu dee tan tix mu, ka son Simiang Siyiex, pa hoik lih bleeh ka nawh tan heue. 8Nawh gah ti khaing tan mai hu ka gawng pa koe plak lih singaix ka veng Betelax mai nawh sum nyiex gox man, plak klip singaix veng Betelax mai plak lih singaix veng Ai heue. Nawh sum khu dee tan son Simiang Siyiex tix mu mai nawh yaogyaw ceu kaux Simiang Siyiex tan heue. 9Mawh kheu nan Abram deeh hu khaing tan mai hoek ka plak caong ma seh heue.

Abram Hu Daux Meung Ejiptux

10Yam an sibhawm praix lih koe daux haktiex Khanan mai Abram lih hu plak meung Ejiptux, sonsang laux lee ti tivud ticu glang sinax koe sibhawm praix daux haktiex an heue. 11Yam dex laig kix ka meung Ejiptux, nawh ah nin ka moeng tix Sarai, “Aux hoik tawng mawh maix bun mhawm grang heue.” 12Yam yaox pui Ejiptux khankix ka maix, kix tak ah nin, “In mawh moeng nawh mai kix tak pah aux mai kieh maix im ju heue.” 13“Yuh bwanson krai mawh maix nan aux, #Jah 20:2, 26:7 sonsang mawh pa mhawm son aux, kheu bwanson maix aux tak sang yaox ti im ju heue.” 14Yam hoek Abram daux meung Ejiptux, pui Ejiptux khankix yaox kied mhawm grang sibun an heue. 15Cao kaing greem Pharaw#12:15 Pharaw: Dee bleeh mawh “simiang Ejiptux”, ang mawh ceu kaux kawn pui. yaox ka nawh mai yaogyaw nawh sivoe Pharaw mai kix viex nawh laig ka nyiex haw Pharaw heue. 16Mawh kheu jao sibun an Pharaw tom priex Abram mhawm mhawm, nawh pon ti koe kawn yung, mawie, la mhaing, la shiang mai siliex simex bun mai kala-uk tom nie heue. 17Viang mawh nan Simiang Siyiex kieh Pharaw pon jhawm saux ting khawm nyiex khawm ma, kheu teei nawh ti priex Sarai moeng Abram heue. 18Pharaw kok ka Abram ah nin, “Grawng pa yuh maix ka aux in mawh pa yuh ka mawx? yuh patix maix lai ang krai nawh mawh moeng tix ka aux lie? 19Kheu maix lai krai nawh, mawh nan tix? aux tom teei nawh mawh moeng tix jao grawng in heue. Yam in deeh teei moeng maix hu heue.” 20Pharaw tawx lox ka pui tix khankix mai viex Abram khawm moeng nawh mai can pa koe nawh khawmuik lih khaing tan heue.

Currently Selected:

YAM JAH 12: WCL

Highlight

Copy