Mark 6

Zeso ge suwal ga̰a̰l Nazareɗ diŋ

Mat 13.54-58; Luk 4.16-30

1Zeso ɗege ge suwal Kapernawom go, gwan mbo ge Nazareɗ yà, suwal ga̰a̰l ge na do̰o̰ ge ne diŋ. Ne nda ge ame hateya ma ka kàre ne pe. 2Sok ge dwam sabaɗ mbiya go, Zeso ɗege hate fare ge zok kee kaɗeya ge Yahuɗ ma way zì. Ɓase ge ka za̰a̰ ne ma ka kee ajab, àa ka janna go: See na fare mbe ma ge dii ya de? See na andaŋ mbe ge dii ya de? See na pool ge kee kaŋ ajab mbe ma ge dii ya me de? 3Daa be ndu ge pel zok pagal ge Mari van, ge Jak, Joze, Jude mage Simo̰ ma na̰ van ne no to de? Ne na̰ van ge gwale ma daa ne ge nè buwal zì no peɗ ɓade? A ano mbe ma ee num ne go, num ho fareba ge ne ta to. 4Ɗaŋɗe, Zeso jan num go: Ndu ge zwagre Dok wa seɗ hormo seɗ ge sok gegene ma go peɗ. Seɗ hormo to ɗeŋew ge na suwal diŋ, ge na sele ma buwal zì, ge na zok diŋ me. 5Be daa gwan kee kaŋ ajab a̰me ge ɗogle ma ge sok mbe go to, ɗeŋew kee kaɗeya ge nda ge kee tuguɗi a̰me ma pagal, zo̰o̰ num no. 6Kee ajab ge hoɗ fareba to ge num way pe. Guwa̰, n̰a num, ɗege gaa mbo hate nda ge suwal van ge jiyale ge no ge suwal Nazareɗ ziya go ma diŋ peɗ me.

Temeya ge nda ge ame hateya ge wol pɔgwa zì ma way

Mat 10.5-14; Luk 9.1-6; 10.1-20

7Ge dwam a̰me go ɗu, Zeso tol na nda ge ame hateya ge wol pɔgwa zi ma ya, ee pe jan num go, num mbo ta pe go zi zi mbo oy fare. Hon num pool ge yan on̰om ge sone ma. 8Sok mbe go, hoɗ num na wa go: Ne kaa ge ḛ he a̰me ge ḛ tok go ge vin̰a pe to, koo kaŋ zam, koo galam ge mbo gɔswal, koo bware kàal, ḛ hee calaŋ ɗeŋew. 9Ḛ pa tyako ma ge ḛ ko zì. Ɗaŋɗe, ne kaa ge ḛ ɔwabe ba̰a̰ kanna ma zi to. 10Gwan jan num go: Suwal ge diige ge ḛ mbo mbo ya ge ne diŋ, zok ge mbo ame ḛ ya, ḛ kaa ne diŋ ɗiŋ ḛ dwam waɗ zum go. 11Kaɗɗa nda ge suwal mbe diŋ-ge ma ame ḛ ya to, àa za̰a̰ ḛ to me, ḛ wuwa zum ge sok mbe go. Ge sok waɗ zum ge ḛ ḛ go, ḛ poy ḛ ko kuci ma ndwa sayda ho̰o̰l ge num pagal. 12Guwa̰ go, nda ge ame hateya ma mbo oy fare ge Dok ne ge nda ta, àa ka jan num go: Ḛ seŋe ta se, ḛ eya ḛ kaŋ keeya ma. 13Àa yan on̰om ge sone ma gḛḛ ge nda zì. Àa ka naŋe nda ge kee tuguɗi ma nùm, nda gḛḛ ka seɗ zonna me.

Swày ge Yohana, ba ge kee nda baptem ne

Mat 14.1-12; Luk 3.19-20; 9.7-9

14Ge sok mbe go, gan ga̰a̰l Heroɗ mbo ya za̰a̰ fare ge Zeso ne, ge dape, ne dḭḭl tol-la ge sok ma go peɗ. Nda ka janna go: Yohana ba ge kee nda baptem ta̰a̰ ne ge nda ge swày ma buwal zì ya, a ge pe, see pool ge kee kaŋ ajab mbe ma no. 15Nda a̰me ma ka janna go ne Eli ne, ge cùb ma, ne ndu ge zwagre Dok wa ne, ge mojo̰o̰ nda ge zwagre Dok wa gegene ge wal ma go. 16Ɗaŋɗe, sok ge Heroɗ za̰a̰ fare mbe go, jan go: A Yohana mbe ge dee ka kee nda baptem ge mbi kṵṵ ne pagal ta̰a̰ ne ge swày se ya.

17Duwa fare mbe no ge dape, a ne sḛ wa̰a̰ Yohana, ba ge kee nda baptem ne, doo ne ge daŋay zì no feɗɗa se ge zul. A ge ne na̰ van Filib gwale Herodiyaɗ ge ne sḛ hê ne pe. 18Ago Yohana ka jan ne go: Àa be hon vin̰a go mo he mo na̰ van gwale to. 19Herodiyaɗ, gwale ge Heroɗ hê ne, wa̰a̰ Yohana ge na laa zì ge fare mbe pe, ka ɓyare vin̰a go na hṵṵ ne gezi. Ɗaŋɗe, be seɗ vin̰a to. 20Ago, gan ga̰a̰l Heroɗ ka hon Yohana ga̰a̰l, kaa ge kuwaya go ne ndu ge temel ne, ne kaɗ ndu ge harcal ne me. Ka eyan ne gezi ge yal ma go, sok ge kaɗ za̰a̰ ne fare ma go, kaɗ ge iigiya ma ge na zì. Go no puy ɗe, kaɗ ge ene ge gwan ka za̰a̰ ne.

21Dwam a̰me go ɗu, Herodiyaɗ seɗ vin̰a ge kwaɗa ndwa kee laa ɓyareya ge na ne, ge dape, kaa vḛḛso dwam tolla ge gan ga̰a̰l Heroɗ ne. Heroɗ kee kaŋ zam vḛḛso ge na dwam tolla pe. Tol ga̰a̰l ge kee tèmel ge na ma ya: Asagar ma ga̰a̰l ma ɓanna ge nda ga̰a̰l ge pwal ge suwa Galile go ma peɗ me. 22Ge sok kee vḛḛso mbe go, Herodiyaɗ van ge gwale waɗ-ɗa zì, ɗege ndal kaŋ, ne kaŋ ndalla mbe kee Heroɗ mage na nda ge na too num ya ma sḛ tii. Ge sok mbe go gaw, gan ga̰a̰l jan van gwale mbe go: Ele mbi kaŋ ge mo ɓyare, mbi mà mbo hon mo ne. 23Guni tene ge ɓase ma ndwa go, jan van gwale mbe go: Kaŋ ge mo mà ele mbi ne ya, mbi mà hon mo ne. Koo ne kaa ge go mbi caɗe mo mbi muluk lee ɗu puy, mbi mà caɗe mo ne. 24Sok ge za̰a̰ fare mbe go, van gwale mbe waɗ-ɗa na na̰ ta zum, jan ne go: Mbi ele da de? Gwan ge ne janna go: Mbo jan ne go: «Mbi ɓyare Yohana ba ge kee nda baptem pagal.»

25Haa tene gwan ge gan ga̰a̰l ta, jan ne go: Mbi ɓyare go, mo ho̰ mbi ya ge sego Yohana ba ge kee nda baptem pagal ge bugur go. 26Sok ge za̰a̰ fare mbe go, gan ga̰a̰l mbo ya wan kiimi ge dape, be kaɗ ge dwaɗɗa ge hun Yohana to. Ɗaŋɗe, ge ne gunin̰a ge guni tene ge na nda ge na too num ya ma ndwa go pe ɗe, daa be gwan eya fare to. 27Avun cab, teme asagar ɗu, hoɗ ne na wa go, ne gene na Yohana ba ge kee nda baptem pagal ya. 28Asagar mbe mbo, mbo vyan Yohana pagal ge daŋay zì ya, gene ne ya ge bugur go. Hon van gwale mbe ne, ne sḛ ame ne mbo hon na na̰ ne me. 29Sok ge nda ge ame hateya ge Yohana ne ma za̰a̰ fare mbe go, àa mbo ya hee ne duul, àa mbo mbul ne.

Walla ge Zeso wuwa ɓase ma

Mat 14.13-21; Luk 9.10-17; Yoh 6.1-14

30Zeso nda ge temeya ma gwan-na ge ne ta, àa wan ne kaŋ ge maa kê ma pe peɗ, ge kaŋ ge maa hate nda num ya ma peɗ me. 31Jan num go: Ajo̰o̰ nda mbo ya mbi ta mage gwanna gḛḛ go ɗe, nè seɗ vin̰a ge zam kaŋ to. Ɓyare go ḛ mbo gezi yà kaal nde, ḛ wa seɗ vin̰a ge ɗigli ta. 32Àa kan ta mbo ndee ge faa go ndwa mbo gezi yà kaal, ge sok ge ndu no ge ne go to yà. 33Nda gḛḛ kuwa num mboya, àa kuwa tyatyaɗ go ne num ne, àa chiya ge suwal ga̰a̰l ma diŋ ya peɗ, àa mbo deɗ ge Zeso mage na nda ge ame hateya ma ndwa zḛḛ yà. 34Sok ge ka̰a̰ na ko ge faa se ya digi, kan na ndwa kuwa nda tabeya didib, àa kaɗ dinna ge tame ge be ba ge koy maa ma go, kuwa num a̰se, ee pe hate num fare ma gḛḛ me. 35Ajo̰o̰ sok kale ya, gyala gaa guwa ge dinna, ne nda ge ame hateya ma gwan ta ya ne ta, àa jan ne go: Sok mbe babur ne, ndu ge ne go to, sok kee ya gasamal. 36N̰a num, num mbo ge suwal van ge jiyale ge ne ziya go ge ma yà, ge gaaso ma zì me, ndwa mbo ɓyare maa kaŋ zam ma yaɗɗa. 37Zeso gwan ge num janna go: Ḛ sḛ ma ge ḛ pagal, ḛ ho̰ num kaŋ zam ne. Ɗaŋɗe, àa gwan ge ne eleya go: Mo dwaɗ go i mà yaɗ dupḛ ja ndwa silay saal kikis zi puy no, mà mbyaɗ num zamma de? 38Sok mbe go, gwan ge num fare eleya go: Ḛ dupḛ ma go gyana ga de? Ḛ mbo ndilla gale. Àa mbo, àa gwan-na jan ne go: I go ge dupḛ ma nuwan̰, sini ma zi me. 39Guwa̰ go, hoɗ na nda ge ame hateya ma na wa go, num ee nda se kàɗɗa vaaya popolow ge sugu tɔgwal pagal. 40Àa sare ta se kàɗɗa nda ge kis ma, nda ge warnuwan̰ ma me. 41Zeso ɔwabe dupḛ ge nuwan̰ mbe ma ɓanna ge sini ge zi ma, hee na ndwa pḭḭ digi kee mersi ge kaŋ zam mbe pe. Siɗi dupḛ ma se, hon na nda ge ame hateya ma num ndwa go, num vaa ɓase ma. Guwa̰ go, hon num sini ge zi ma, àa vaa ta num ge maa buwal zì peɗ waɗme. 42Ndu ge diige zam kaŋ huriya. 43Àa ɔwabe dupḛ mage sini pe ge gaa ma huy gwal wol pɔgwa zi. 44Ge nda ge zâ kaŋ mbe ma buwal zì, nda soɗob kaa dudubu nuwan̰.

Mboya ge Zeso ne ge mam pagal

Mat 14.22-36; Yoh 6.15-22

45Guwa̰ go cab, Zeso jan na nda ge ame hateya ma go num ndee ge faa go, num ha ge na ndwa zḛḛ, mbo Betsayda, ge mam wa lee gene yà. Na sḛ wa gaa n̰a ɓase ma mboya. 46Guwa̰ ge n̰a ɓase ma go, ndee mbo ge njal pagal digi ndwa mbo kee kaɗeya. 47Sok ge ɗaal wuwa ya se, faa ga̰a̰l deɗ-ɗa ge mam tuwal zum yà, Zeso sḛ gaa yà ne mḛḛya hini ɗu ge wa kal digi. 48Kuwa go na nda ge ame hateya ma za̰a̰ go yal ge sok ɗiibi faa go, ge dape, sa̰a̰m ka ya ge num ndwa zì. Lee aaram pagal sok mbo ge num ta yà, ka mboya ge mam pagal, yan ge num ta yà guwa, ka ɓyare ge mojo̰o̰ na kale num kale go. 49Sok ge àa kuwa ne mboya ge mam pagal, àa ka dwaɗɗa go ne kḭḭ a̰me ne, àa ɗege oyya ge ka̰a̰l ndaal. 50Ago, num sḛ ma peɗ kuwa ne, voo wan num, àa haɗ digi batraŋ. Ge sok mbe go gaw, Zeso jan num go: A mbi ne, ḛ ee ḛ dul wa se, ḛ chiya voo to. 51Guwa̰ go, ndee ge num ta faa go, sa̰a̰m eyal se me. Àa ka kee ajab gḛḛ ge maa sḛ zì. 52Ago, àa be wan kaŋ ngayya ge dupḛ ma way pe to, ge dape, num dul wa ma twagre twagre. 53Sok ge àa dee ge mangaɗam ga̰a̰l wa lee gene yà ge suwa ge Jenezareɗ ne go, àa yabe faa ya wa kal zì. 54Sok ge àa ka̰a̰ maa ko ge faa se ya digi, nda kuwa gaw go ne Zeso ne. 55Sok ma peɗ ge nda ka za̰a̰ ya go ne go, àa chiya ge suwal ma ya peɗ, àa ka gene ne nda ge kee tuguɗi ma ya, ge maa kaŋ fiiya ma go. 56Sok ma peɗ ge Zeso ka mbo ge num go ma, suwal van ge jiyale ma, suwal ge ga̰a̰l ma koo ge gaaso ma zì, nda ka gene maa nda ge kee tuguɗi ma ya eeya ge sok ge nda kaɗ twageya ge num go ma go. Àa ka gwarge ta ge ne ta go, ne n̰a nda ge kee tuguɗi ma taɗ na ba̰a̰ wa go nde. Num peɗ ge ka taɗ ne ba̰a̰ wa ma ka seɗ zonna me.

Currently Selected:

Mark 6: kiaGRB

Highlight

Copy