Mark 2

Zonna ge ndu ge looɗeya ne

Mat 9.1-8; Luk 5.17-26

1Dwam ma kwaɗa lag guwa̰, Zeso gwan-na ge suwal Kapernawom diŋ. Nda za̰a̰ go ne go zok diŋ. 2Àa mbo ya twageya gḛḛ waɗeya ge go sok daa gwan gaa go fyalag koo ge zok pul diŋ, koo ge ndaa wa pagal zum to baɗ. Sok ge kuwa go nda twage ja gḛḛ, ɗege hate num fare ge Dok ne. 3Nda a̰me ma ndà in ndu ge looɗeya a̰me ya ge Zeso ta. 4Ajo̰o̰ àa be seɗ vin̰a ge waɗ ge ndu mbe ge ne ta zì yà to, ge ɓase ma pe ɗe, àa ndee zok pagal digi, àa zuɗ zok pagal, ge sok ge ne mḛḛ no go nga. Ge ndwal mbe go, àa siri ndu ge looɗeya ge digi ya, fiiya ge na saŋal go ge tàal mbo ya ge ne ndwa se. 5Sok ge Zeso kuwa hoɗ fareba ge num way go, jan ndu ge looɗeya go: Mbi van, mbi pore mo, mo sone ma ya go. 6Nda ge hate eeya ge Moyiz ne a̰me ma kwaɗa lag, ge kaa ge sok mbe go ma dwaɗ ge maa dul wa ma zì go: 7Ndu mbe daa jan fare go mbe ge dape de? Jan fare ge sone kakatag ya go ge Dok pagal. A huɗi ne ge pool ge pore sone ma, be ge Dok sḛ ɗu to de? 8Ge sok mbe go waɗ, Zeso kuwa dwaɗɗa ge num way ma ge na on̰om zì, jan num go: Ge dape ḛ wa kaɗ ge dwaɗɗa ge go mbe ma ge ḛ dul wa ma zì de? 9Jan ndu ge looɗeya go: Mbi pore mo, mo sone ma ya go me no, ɗege digi hee mo saŋal mo mbo me no, a ge diige dṵṵl gḛḛ ne zoo de? 10Ge sego, mbi kee ḛ kuwaya go, Van ge Ndu ne ge pool ge pore sone ma ge suwa pagal. 11Guwa̰, jan ndu ge looɗeya mbe go: Ɗege digi, he mo saŋal, mo mbo ge mo yà. 12Ge sok mbe go gaw, ɗege digi hee na saŋal, waɗ-ɗa zum ge nda ndwa go peɗ. Nda ge kaa sok mbe go ma peɗ kee ajab, àa ka janna go: I be kuwa kaŋ ge go mbe no pe keeya dwam ɗu to. Dok mbiya saleya.

Tolla ge Zeso too Levi

Mat 9.1-17; Luk 5.27-39

13Zeso waɗ ge zok diŋ ya zum, gwan mbo ge mangaɗam ga̰a̰l ge Galile ne wa yà. Ɓase ma peɗ ka mbo ya ge ne ta, ka hate num me. 14Guwa̰ ge aa na hateya go, sok gwanna ge ne ne ya go, kuwa Levi ge Alfe van kàɗɗa ge na sok tèmel ge chal siyal ne go. Jan ne go: Mbo ya mbi pe go. Levi ɗege ge na sok mbe go, mbo ge ne pe yà me. 15Guwa̰ go, Zeso mbo ya zam kaŋ zam ge Levi diŋ. Nda ge chal siyal ma gḛḛ ɓanna ge nda ge kee sone ma, àa mbo ya zam kaŋ zam ge num ge na nda ge ame hateya ma ge sok mbe go. Àa kaa ɓase sok kàre ne pe go. 16Nda ge hate eeya ge Moyiz ne ge no ɓan pagal ge Farisi ma way zì ma, sok ge àa kuwa ne zam kaŋ dagre ge nda ge chal siyal ma ɓanna ge nda ge kee sone ma me ɗe, àa jan ne nda ge ame hateya ma go: Ge dape, ḛ Ba ge hate nda wa ka zam kaŋ zam ge nda ge chal siyal ma, ge nda ge kee sone ma me de? 17Sok ge num fare janna mbe ma dee ya Zeso tɔgwa zì, jan num go: A be nda ge duul pool ma ɓyare Ba ge zon nda ne to, ɗaŋɗe, num ge sḛ duul tuguɗi ma. Mbi be mbo ya ge nda ge temel ma pe to, ɗaŋɗe, ge num ge kee sone ma pe.

Fare eleya ma ge mam njuwal wanna pagal

18Nda ge ame hateya ge Yohana ba ge kee nda baptem ne mage Farisi ma ka wan mam njuwal. Ge dwam a̰me go ɗu, nda mbo ya ge Zeso ta, àa ele ne go: Ge dape, nda ge ame hateya ge Yohana ba ge kee nda baptem ne mage Farisi ma way ma wa ka wan mam njuwal, mo nda ma wa ka wan mam njuwal to de? 19Gwan ge num janna go: Gwale jin̰al obe kondore ma ge pool ge wan mam njuwal sok ge gwale jin̰al obe no go ɓanna dagre ge num de? Ajo̰o̰ gwale jin̰al obe go gale dagre ge num, be kee kwaɗa go num wan mam njuwal to. 20Dwam ma mbo mbo ya ge go gwale jin̰al obe kaɗ to. Ge dwam mbe ma go, àa mbo gaa wan mam njuwal. 21Iya ɔwale, mbi jan ḛ go: Ndu a̰me ge hee ba̰a̰ wa ge jin̰al, dyan ne ge ba̰a̰ ge kamal ta go de? Kaɗɗa go na kee ne ya mbe go ɗe, ba̰a̰ wa ge jin̰al mbe mbo taabe ge kamal ya ge na ta mɔɗwag, ne ndwal mbe mbo gwan a̰a̰le se waɗeya. 22Ndu a̰me ge kan on̰or jìn̰al ge jin̰al ge ɗutulu ge kamal ma zì to. Kaɗɗa na kan ne ya zì mbe go ɗe, ago on̰or jìn̰al ge jin̰al fol ɗutulu mbe gezi. On̰or jìn̰al mage ɗutulu mbe vḛḛne gezi jwàg. Ɗaŋɗe, ɓyare go àa ka̰a̰ on̰or jìn̰al ge jin̰al ge ɗutulu ge jin̰al zì.

Zeso Ba ge kee muluk ge dwam sabaɗ pagal ne

Mat 12.1-4; Luk 6.1-11

23Ge dwam sabaɗ a̰me go ɗu, Zeso mage na nda ma ka kale mboya ge gaaso ge geme ne wa go. Sok mboya go, ne nda ge ame hateya ma ka orbe geme pagal ma sulla. 24Sok ge Farisi ma kuwa num, àa ele ne go: Ge dape, mo nda ma wa ka kee kaŋ ge àa ho̰ vin̰a go àa ke num dwam sabaɗ go to ma de? 25Gwan ge num janna go: Ḛ be isi kaŋ ge Daviɗ kê ne, sok ge dee ya ge hoɗegeya zì to de? Sok ge camal wa̰a̰ ne, ne sḛ ɓanna dagre ge na nda ma, 26wuwa ge gur seɗ ta ge Dok ne zì no, zâ dupḛ ge àa nuusi num ge Dok pe ma no, ho̰ na nda ma no waɗme to de? Nè yuwaleya ma ho̰ vin̰a go, nda ge kee tuwaleya ma za dupḛ mbe ma ne ɗeŋew. Ano mbe kee ge zaman ge ga̰a̰l ge nda ge kee tuwaleya ma way ge waɗe Abiyatar ne go. 27Gwan jan num go: Àa ee sabaɗ ge ɗwabeya ge nda duwana ma way pe, àa be kee nda duwana ma ge sabaɗ pe to. 28Ḛ kuwa go mbi, Van ge Ndu ne, mbi ne ge pool ge faa fare koo ge dwam sabaɗ pagal.

Currently Selected:

Mark 2: kiaGRB

Highlight

Copy