Mata 26

Wa vwalla ge Yahuɗ ma way Zeso pagal

Mrk 14.1-2; Luk 22.1-2

1Guwa̰ ge Zeso aa na fare hateya mbe ma go peɗ, jan na nda ge ame hateya ma go: 2Ḛ kuwa kuwa go vḛḛso ge Paska ne gaa dwam zi, ge go àa wa ɓyan Van ge Ndu ne gezi, ndwa go àa pee ne ge ɔwara kaŋre ta.

3Ge sok mbe go, ga̰a̰l ge nda ge kee tuwaleya ma way mage ga̰a̰l ge ɗeme Yahuɗ ma way ma seɗ ta kee kwateya ge ga̰a̰l ge nda ge kee tuwaleya ma way ge waɗe, ge àa tol ne Kayf diŋ. 4Àa za̰a̰ ta go maa wa̰a̰ Zeso ge maa zwam a̰me ɗu, maa wa hun ne gezi. 5Àa ka jan ta go: Kaɗɗa ne go puy ɗe, ne kaa ge dwam vḛḛso ge guguɗu go gaw to, ndwa go, ɓase ma mà haɗ ɗege ho̰o̰l ya ge maa pagal.

Nùm idiir ge gwale ka̰a̰ ne ge Zeso pagal

Mrk 14.3-9; Luk 7.36-50; Yoh 12.1-8

6Ajo̰o̰ Zeso kaa ge suwal Betani go, ge Simo̰ ge dee kṵṵ swàm diŋ, 7gwale a̰me ɗu mbo ya ge ne ta zì guwa. Kaa ge koblo ge àa ca ne ge njal Albatr huyya ge idiir ge yee gḛḛ ge na tok go. Kan idiir mbe ge ne pagal sok ge ne sḛ wa ya zam kaŋ zam go. 8Sok ge nda ge ame hateya ma kuwa ano mbe go, num laa hoɗ, àa ka janna go: A ma̰ kaŋ vḛḛneya ge go mbe ne de? 9Ne kwaɗa daa go, àa yaɗ idiir mbe gezi, àa vaa nda ge a̰se ma ne bware mbe to de?

10Ɗaŋɗe, Zeso za̰a̰ num fare mbe, jan num go: Ḛ daa kee gwale mbe yal ge dape de? Ḛ n̰a ne cɔgwaɗ, kee kaŋ ge gag ge mbi pe. 11Ago nda ge a̰se ma go ge ḛ buwal zì ɗaɗag, ɗaŋɗe, kaɗɗa ge mbi ɗe, mbi mbo kaɗ kaal tata ge ḛ buwal zì to. 12Sok suusi idiir mbe ge mbi duul ta go ɗe, nuusi zḛḛ duul swày ge ambi, ge mbulla pe. 13Fareba mbi jan ḛ ne no, sok ge no dunin̰a zì ma peɗ, ge àa mbo kaɗ-ɗa ka oy Fare ge Kwaɗa ge num go ma, àa mbo ka faa kaŋ ge gwale mbe kê ne waɗme, ndwa go ne gaa ge kaŋ dwaɗ pagal go ge nda ta peɗ.

Ko challa ge Yudas chiya Zeso ne

Mrk 14.10-11; Luk 22.3-6

14Sok mbe go, ɗu ge nda ge ame hateya ge wol pɔgwa zi ma buwal zige, ge àa tol ne Yudas Iskariyoɗ, ɗege mbo seɗ ga̰a̰l ge nda ge kee tuwaleya ma way ma, 15jan num go: Ḛ ɓyare hon mbi da ɗoo, mbi wa ɓyan Zeso ge ḛ tok go de? Àa mbo ya hon ne bware walam tapool ɗu. 16Ge sok mbe go, ɗege ɓyare vin̰a ge jwab ndwa ɓyan ne gezi.

Kaŋ zam nuusiya ge Paska ne

Mrk 14.12-31; Luk 22.7-34; Yoh 13.1-38; 1Ko 11.23-25

17Ge dwam ge zḛḛge ge vḛḛso ge dupḛ ge be jìn̰al hore na ndwa zì ne go, Zeso nda ge ame hateya ma ele ne go: Mo ɓyare go i mbo nuusi mo sok ge zam kaŋ zam ge Paska ne ge diya de? 18Gwan ge num janna go: Ḛ mbo ge ndu ge ano mbe no ta, ge suwal ga̰a̰l diŋ yà, ḛ jan ne go: Ba ge hateya jan go: Mbi dwam ge njoɗ yal mbyaɗ go, i ge mbi nda ge ame hateya ma mbo zam kaŋ zam kee vḛḛso ge Paska ne ge mo diŋ. 19Nda ge ame hateya ma kee ge mojo̰o̰ Zeso ho maa na wa go, àa nuusi kaŋ zam kee vḛḛso ge Paska ne.

20Sok ge sok yin̰a gasamal, Zeso mage na nda ge ame hateya ge wol pɔgwa zi ma kaɗ se zam kaŋ zam ge taabul wa go. 21Sok ge àa ka zam kaŋ zam go, jan num go: Fareba mbi jan ḛ ne no, ɗu ge ḛ buwal zige mbo ɓyan mbi gezi ge nda tok go. 22Ge sok mbe go, ne nda ge ame hateya ma ndwa mbo ya suu se leɗeɗ ge go, ndu ge diige ɗege ele ne go: A mbi de, Bagezok-goo? 23Gwan ge num janna go: Ndu ge paa na tok no ge mbi dagre ge kaŋ zam pagal, a ne sḛ mbo ɓyan mbi gezi ne. 24A ngaɗ go, mbi, Van ge Ndu ne, mbi mbo swày, dinna ge Njaŋeya ge Dok ne ma jin̰a go. Ɗaŋɗe, woo ge ndu mbe ge mbo ɓyan Van ge Ndu ne ya gezi pe. Nde-nde àa tol ndu mbe dana to baɗ. 25Yudas ge mà ɓyan ne ya gezi, hee fare, jan go: A mbi de, Ba ge hateya? Zeso gwan ge ne janna go: Mo sḛ jan ne ya go.

26Sok ge àa ka zam kaŋ zam go, Zeso hee dupḛ, guwa̰ ge kê mersi hon Dok go, siɗi ne se, hon na nda ge ame hateya ma ne, jan num go: Ḛ ame, ḛ zam, ano mbe no, a mbi sḛ duul ne. 27Guwa̰, hee kob ge on̰or jìn̰al ne kee mersi hon Dok, hon num ne, jan num go: Ḛ peɗ ḛ njoo ne. 28Ago, ano a mbi swàm ne, swàm ge wa tii vwalla nee ne, ge mbo kan-na se ge nda pe peɗ, ndwa pore num sone ma. 29Mbi jan ḛ no: A gaa mbo zḛḛ no, mbi mbo daa gwan njoɗ on̰or jìn̰al mbe to baɗ, mbi gaa dee mbo njoɗ on̰or jìn̰al ge jin̰al ge ḛ dagre ge muluk ge mbi Ba ne zì yà.

30Guwa̰ ge àa mbaa kaŋ ge sale Dok ge no Maktub ge kaŋ mballa ma way zì go, àa kan ta mbo ge njal ge ɔwara oliv ma do̰ ne pagal digi yà. 31Sok mbe go, Zeso jan num go: Ge ɗaal mbe no zì, ḛ peɗ, ḛ mà n̰a mbi, ago Njaŋeya ge Dok ne ma jan zì go: «Mbi mbo iyal ba ge koy tame ma go par, go no, tame ma mbo ɓasare se.»#Zak 13.7. 32Guwa̰ ge Dok mbo tan mbi ya digi, mbi mbo mbo ndaage ḛ ge suwa ge Galile ne yà. 33Piyer jan ne go: Kaɗɗa nda gegene ma n̰a mo ya peɗ puy ɗe, mbi n̰a mo to baɗ. 34Zeso jan ne go: Fareba mbi jan mo ne no, ge ɗaal mbe no zì, zḛḛ ge go baare too fiyaso, mo mà ee mo wa ndwa taa go mo kuwa mbi to. 35Piyer gwan ge ne janna go: Kaɗɗa mbiya go mbi mbo swày dagre ge mo puy, mbi mbo jan ge mbi wa zì go mbi kuwa mo to, to baɗ. Ne nda ge ame hateya gegene ma peɗ jan mbe go waɗme.

Kaɗeya ge Zeso ne ge gaaso Jeɗsemane zì

Mrk 14.32-42; Luk 22.39-46; Heb 5.7

36Guwa̰, Zeso mage na nda ge ame hateya ma mbo ya sok a̰me go ɗu, ge àa tol ne Jeɗsemane, jan num go: Ḛ kaa ge go go, mbi mbo gezi yà ndwa kee kaɗeya. 37Tol Piyer mage Zebede van ge zi ma, àa ge num mbo. Sok mboya go, ɗege za̰a̰ yal na sḛ zì, ka iigi tene. 38Sok mbe go, jan num go: Mbi duul suu ya se leɗeɗ, iigiya ge mbi seɗ ne ya mbi sḛ zì mbe no, ee mbi mbo swày. Ḛ kaa go go, ḛ kaɗ jejew ge mbi dagre me. 39Guwa̰, mbo zḛḛ ya nde, kubi na pul ge suwa se, kee kaɗeya go: Baa, kaɗɗa vin̰a go, n̰a ler ge yal mbe no, ne kale gezi ge mbi pagal. Peɗ puy ɗe, ne kaa mbi laa ɓyareya to, ɗaŋɗe, mo laa ɓyareya. 40Gwan-na ge nda ge ame hateya ma ta, seɗ num fii dwam. Tol Piyer, jan ne go: Mo gwan fii go dwam zoo de? Mo pool ge wan tene kàɗɗa ge mo ndwa ler ɗu ge mbi dagre to peɗ de? 41Ḛ kaa jejew, ḛ kee kaɗeya me, ne kaa ge ḛ dee pe heeya zì to. Ago ḛ ge dwaɗɗa ge kee kaŋ ge kwaɗa ma ɓa, ɗaŋɗe, ajo̰o̰ sḛ duul tuguɗi ɗe, ḛ ge pool ge mḛḛ Ba ge ho̰o̰l ndwa zì to. 42Guwa̰, gwan mbo gezi yà nde ge ndwa zi, ka kee kaɗeya jan go: Baa, kaɗɗa na ngaɗ go, mbi mbiya ɓuu ge yal mbe no zì to, n̰a laa ɓyareya ge amo ne huy ne. 43Gwan gwan-na iya, seɗ num, àa fii dwam ya galgatag ge go num ndwa ge kan zum go fyalag kaɗ to. 44N̰a num, gwan mbo gezi yà iya, kee kaɗeya ge ndwa taa, sok dwage fare ge na jin̰a num daa wal mbe ma. 45Guwa̰, gwan-na ge num ta, jan num go: Ḛ go gale dwam ta fiiya baba de? Ḛ ɗwabe ta ɗaŋ! Sok mbyaɗ-ɗa go, ge àa ɓyan Van ge Ndu ne ge nda ge sone ma tok go. 46Ḛ ɗege digi, nè mbo, ndu ge ɓyan mbi gezi yan ja no.

Wanna ge Zeso ne

Mrk 14.43-50; Luk 22.47-53; Yoh 18.3-11

47Zeso wa gale be aa to peɗ, Yudas, ɗu ge nda ge ame hateya ge wol pɔgwa zi ma buwal zige, zuɗ-ɗa ge nda nɔnɔg ge na pe go. Ɓase mbe ma mbô ya ge kasagar mage calaŋ ma ge maa tok go. Nda ge teme num ya ma, a ga̰a̰l ge nda ge kee tuwaleya ma way mage ga̰a̰l ge ɗeme Yahuɗ ma. 48Yudas ge ɓin̰a Zeso gezi, za̰a̰ tene zḛḛ ge ɓase mbe ma, ge fare a̰me ge na mà mbo ya keeya ge ne, jin̰a num go: Ndu ge mbi mà buu ne ya zì ge komreya ɗe, a nee ne, ḛ wa̰a̰ ne. 49Sok ge àa dee ya gaw, Yudas mbo ya ge ne ta zì guwa, jan ne go: Ba ge hateya, mo kê gyala gyana de! Buu ne zì me. 50Zeso jan ne go: Kondore, kaŋ ge mo mbo ya ge ne pe keeya ɗe, ke ne ɗaŋ. Ge sok mbe go, nda mbe ma mbo ya ge ne ta zì, àa paa maa tok, àa wan ne. 51Ndu a̰me ɗu ge kaa ge Zeso ma dagre, ndage na kasagar ge na vum zì ya gaw, kun ga̰a̰l ge nda ge kee tuwaleya ma way ge waɗe, ne ndu ge tèmel tɔgwa gezi. 52Sok mbe go Zeso jan ne go: Guwa̰ ge mo kasagar ge na vum zì, ago nda ge mbo hee kasagar ya hun swày ma peɗ, àa mbo seɗ swày ge kasagar me. 53Mo dwaɗ go mbi ge pool tol mbi Ba ɗoo, teme mbi malayka ma ya waɗe vwag wol pɔgwa zi ge sego to de? 54Kaɗɗa na mbe go, kee mà pe gyana, fare ge Njaŋeya ge Dok ne ma jin̰a num ma wa ma mà mbo huyya de? 55Sok mbe go, Zeso jan ɓase ma go: Ḛ zuu ya zum ge kasagar ma, ge calaŋ ma ḛ tok go, ndwa wan mbi dinna ge àa wan ndu ge fiiri vin̰a go ɗaŋ de! Dwam ma mɔɗwag mbi kaa ge ḛ buwal zì, mbi ka hateya ge zok ge Dok ne zì, ḛ be wan mbi to me ɗe. 56Ɗaŋɗe, fare mbe kee ndwa go fare ge nda ge zwagre Dok wa ma way ge no Njaŋeya ge Dok ne zì ma wa huy. Sok mbe go, ne nda ge ame hateya ma peɗ chiya, àa n̰a ne.

Zeso ge Yahuɗ ma ga̰a̰l ge kun sariya ma ndwa se

Mrk 14.53-65; Luk 22.54, 63-65; Yoh 18.12, 13, 19-24

57Nda ge wa̰a̰ Zeso ma gene ne ya ge Kayf, ga̰a̰l ge nda ge kee tuwaleya ma way ge waɗe diŋ, sok ge nda ge hate eeya ge Moyiz ne mage nda ga̰a̰l ge ɗeme Yahuɗ ma kwate no ne go. 58Piyer ka kàre ne pe ge guwa̰ se ya kaal nde ɗiŋ waɗ-ɗa ge ga̰a̰l ge nda ge kee tuwaleya ma way ge waɗe zok pul diŋ. Sok ge wuwa zok pul diŋ yà, kaɗ ge nda ge koy zok wa ma ta se, ndwa ndilla go fare mbe pe mà mbo aa gyana de.

59Ago ga̰a̰l ge nda ge kee tuwaleya ma way ma ɓanna ge Yahuɗ ma ga̰a̰l ge kun sariya ma peɗ ka ɓyare vin̰a ge ee fare ge hày a̰me ma ge Zeso pagal, ndwa hun ne gezi. 60Ajo̰o̰ nda ee fare ge hày ma gḛḛ ge ne pagal puy ɗe, àa be seɗ fare a̰me ge ne ta ɗu to. Guwa̰ go dwab, nda zi yan-na, àa ka janna go. 61Ndu mbe no jan go: Na ge pool gul zok ge Dok ne se, na gwan ge ne sinna digi ge dwam ge taa ma pul zì. 62Ga̰a̰l ge nda ge kee tuwaleya ma way ge waɗe ɗege digi, ele ne go: Mo fare a̰me ge gwanna ge fare ge àa ee num ya ge mo pagal go ga mbe ma byalam to de? Àa ee ma̰ fare ma ge mo pagal de? 63Ɗaŋɗe, Zeso kaɗ wa daal. Ga̰a̰l ge nda ge kee tuwaleya ma way ge waɗe, gwan jan ne go: Mbi ele mo fare ge dḭḭl ge Dok ge hon nda ndwa ne zì, jin̰a i gale: Mo Krist, Ndu ge Dok taa ne, ge Dok Van ne ɗaŋ de? 64Zeso gwan ge ne janna go: «Mo jan ne ya go. Ɗeŋew mbi jan ḛ go, a gaa mbo zḛḛ no, ḛ mbo kuwa, Van ge Ndu ne, kàɗɗa ge tok matoson ge Ba ge pool waɗe-waɗe ne pagal, mbo mbo ya ge pḭḭ ge laaya gutub ma zì, ge pḭḭ zì ya.»#Dan 7.13; Mkm 110.1.

65Sok mbe go, ga̰a̰l ge nda ge kee tuwaleya ma way ge waɗe taabe na ba̰a̰ ma gezi ge na ta, jan go: A jan fare ge sone kakatag ya ge Dok pagal no ɗe! Nè gwan ɓyare ma sayda ma iya de? Ḛ sḛ ma za̰a̰ fare ge sone kakatag ge ne jin̰a mbe ya go. 66Ḛ dwaɗ gyana ge ne fare mbe de? Àa gwan ge ne janna go: Mbiya go ne mbo swày. 67Sok mbe go, àa too watwa ge ne ta, àa ka yaa ne tɔgwa pul zì, àa ka sil ne ge maa tok guɗumul ma, àa jan ne go: 68Krist, Ndu ge Dok taa ne ngay i gale, a huɗi kee mo kaŋ mbe ne de?

Wa eeya ge Piyer ne

Mrk 14.66-72; Luk 22.55-62; Yoh 18.15-18, 25

69Ge fare mbe ma ndwa zì, Piyer go kàɗɗa ge zok pul zum yà. Moor kale a̰me ɗu mbo ya ne ta, jan ne go: Mo waɗme, mbi ka kuwa mo dee ɓanna dagre ge Zeso, ndu son mbe ge suwa Galile ne. 70Ɗaŋɗe, ee na wa ge nda ndwa go peɗ, jan go: Mbi wan fare ge mo ɓyare janna mbe pe to. 71Guwa̰, ɗege mbo ndwa zok wa waɗɗa ge zok pul ge zum-ge ne yà, moor kale ge ɗogle kuwa ne, jan nda ge kaa no ge sok mbe go ma go: Ndu mbe no kaa dagre ge Zeso Krist ge suwal Nazareɗ ne. 72Ɗaŋɗe, gwan ee na wa iya, sok guni tene go go: Mbi kuwa ndu mbe ge ḛ faa ne fare no to. 73Guwa̰ go swag, nda ge kaa sok mbe go ma gwan ta ya Piyer ta zì guwa, àa jan ne go: A fare ge fareba ne, mo ɗu ge num mbe ge wol pɔgwa zi ma buwal zige ne, mo ka̰a̰l ge faa fare ee ne go i kuwa mo. 74Sok mbe go, Piyer ɗege kabe fare ma se batraŋ, guni tene go: Mbi kuwa ndu mbe no to. Ge sok mbe go gaw, baare tol fiyaso. 75Piyer pagal dwaɗ fare ge Zeso jin̰a na ne go: [Zḛḛ ge go baare mà mbo tol fiyaso, mo mà ee mo wa ndwa taa go mo kuwa mbi to] sok mbe go, waɗ ge zok pul diŋ ya zum, fyal fiyaso ge kirgi tene.

Currently Selected:

Mata 26: kiaGRB

Highlight

Copy