Mata 24

Zok ge Dok ne gulla

Mrk 13.1-37; Luk 21.5-30; 17.22-37

1Guwa̰ ge Zeso ɗege ge zok ge Dok ne zì ya, sok waɗ-ɗa zum go, ne nda ge ame hateya ma gwan ta ya ge ne ta zì ndwa ngay ne zok ge Dok ne mbe sinna ge sḭḭ siŋli. 2Ɗaŋɗe, gwan ge num janna go: Ḛ kuwa zok na̰ ge ɓaŋlaŋ mbe ya kade? Fareba, mbi jan ḛ ne no: Ago njal ge àa sḭḭ zok mbe ge num ma, a̰me ɗu mbo gaa ge na kon pagal digi to, àa mbo gul num ya se ge ɓul mɔɗwag. 3Zeso mbo ya kaɗ na pe ge njal ge ɔwara oliv ma do̰o̰ no ne pagal digi kin̰a go. Ne nda ge ame hateya ma mbo ya ge ne ta hini jan, àa ele ne go: Jin̰a i gale, fare ge mo wan i ne mbe no, dee ma̰ del ɗoo wa mbo keeya de? A ma̰ kaŋ ma mbo ngay gwanna ge amo mage dunin̰a pe aaya ne de? 4Zeso gwan jan num go: Ḛ koy ta kwaɗa, ne kaa ge ndu a̰me n̰aame ḛ to. 5Ago nda gḛḛ mbo hee mbi dḭḭl, àa ka janna go: A mbi Krist, ndu ge Dok taa nee ne, àa mbo ee nda gḛḛ n̰aameya. 6Ḛ mbo kaɗ-ɗa za̰a̰ twam mballa ma ge ḛ tɔgwa, ḛ ka za̰a̰ kṵwa̰ ge twam mballa ma way, ge sok kaal yà ge ma, ḛ iigi ta to. A ngaɗ go, kaŋ mbe ma dee ya keeya, ɗaŋɗe, a be dunin̰a pe aaya gale ne to. 7Ago, suwal ma mbo ka mbal ta ta buwal zì, muluk ma mbo ɗege ho̰o̰l ta ta buwal zì waɗme. Ge sok a̰me ma go, camal baktar ma mbo ka deɗ-ɗa, suwa mbo ka ndaɗɗa me. 8Kaŋ mbe ma mbo kaɗ dinna ge yal ge twàl ne deɗ ndu gwale go.

Yal ge nda ge ame hateya ma mbo seɗ num ya ma

9Sok mbe go, nda duwana ma mbo kee ḛ yal, àa ka hun ḛ me. Rusu ge ɗogle ma peɗ mbo kuri ḛ gezi, ge mbi pe. 10Ano mbe ma mbo kaɗ kaŋ ee nda n̰a vin̰a hoɗ fareba gezi, àa ee fare ta pagal, àa kuri ta gezi. 11Nda ge ḛ buwal zige ma gḛḛ mbo kee ta nda ge zwagre Dok wa ma, àa mbo n̰aame nda gḛḛ me. 12N̰aal mbo kaɗ gḛḛ ge go nda gḛḛ mbo haɗ eyalam ge laa wanna ge maa way ma zì. 13Ɗaŋɗe, ndu ge mbo wan tene deŋel ya ɗiŋ mbo wa aaya yà, mbo seɗ monna. 14Àa mbo oy Fare ge Kwaɗa ge muluk ge Dok ne mbe ge dunin̰a zì mɔɗwag, ndwa go ne kaa kaŋ sayda ge rusu ge ɗogle ma ta peɗ. Guwa̰ go, dwam pe aaya wa mbo ya.

Yal ge ɓaŋlaŋ

15Ḛ ge isi maktub ge Dok ne ma, ḛ kuwa fare mbe pe gezi kwaɗa! Sok ge ḛ mbo kuwa ge sone kakatag ge vḛḛne kaŋ, ge ndu ge zwagre Dok wa Daniyel fâ ne fare, mbo ya kàɗɗa ge sok ge harcal, ge ne sḛ mbiya kaɗ ne go to go, 16sok mbe go, num ge mbo kaɗ-ɗa ge suwa ge Jude ne go ma, num chiya mbo njal ma zì yà. 17Ndu ge mbo kaɗ-ɗa ge zok pagal digi, ne kaa ge be ndee ya lee zok pul diŋ ndwa hee a̰me ge na tok go to#24.17 Yahuɗ ma kee maa zok ma pagal dagsasag. Àa mbo ɗwabe ta mage za̰a̰ sa̰a̰m gyala tok gasamal num digi.. 18Ndu ge mbo kaɗ-ɗa ge gaaso zì, ne kaa ge ne guwa̰ ya diŋ ndwa ɔwabe na ba̰a̰ ge kon pagal ge to me. 19A ma̰ yal ne ge nda zaab ge mbo kaɗ-ɗa ge emel mage mbo kaɗ-ɗa hon maa van ma pam ge dwam mbe go ma pe ne de! 20Ḛ ka kee kaɗeya, ndwa go ḛ dee ya chiyaya ge somo̰ pagal go to, koo ge dwam sabaɗ go to me. 21Ago, ge sok mbe go, iigiya ma mbo kaɗ gḛḛ. Mbo kaɗ iigiya ge ndu gale see ne pe dwam ɗu to, ge pe dolla ge dunin̰a ne ya day ɗiŋ màno. Ndu mbo gwan seɗ iigiya mbe no pe, zḛḛ daa to baɗ me. 22Daa na go, Dok chiya dwam mbe ma ya zì to, ndu a̰me ɗu mà seɗ vin̰a ge ɓuuya to. Ɗaŋɗe, mbo chal dwam mbe ma ya zì ge na nda ge talla ma pe. 23Ge dwam mbe ma go, kaɗɗa ndu a̰me jan ḛ ya go, ḛ za̰a̰: Krist, Ndu ge Dok taa ne no ge go go no koo ne no, ḛ ho fareba ge num fare janna mbe ma ta to. 24Ago, nda ge kee ta krist ma ɓanna ge nda ge kee ta nda ge zwagre Dok wa go ma mbo mbo ya. Àa mbo kee kaŋ ngayya ge ga̰a̰l ma, ge kaŋ haŋle ma keeya ge go ee nda ge Dok taa num ma n̰aameya. 25Mbi jan ḛ fare ma ya zḛḛ kakaɗag, ḛ duwa kwaɗa.

Gwanna ge Van ge Ndu ne ya

26Àa kaɗɗa ka jan ḛ go: Ḛ kuwa gale, Van ge Ndu ne ge babur pul yà go, ḛ mbo to. Koo àa jan ḛ go: A ge zok dwamma zì go, ḛ ho fareba ge num fare janna mbe ma ta to. 27Gwanna ge Van ge Ndu ne ya mbo kaɗ dinna ge mam see ge mbii ya ɗiŋ mbo deɗ ge kuu yà go. 28Sok ge kaŋ suu no go, boge ma tabe ya ge sok mbe go#24.28 Sok ge nda mbo ɗegeya seɗ yal ge gḛḛ mbe ma, ago Zeso dwam gwanna ga guwa..

29Guwa̰ ge dwam ge yal ge ɓaŋlaŋ mbe ma way go gaw, gyala mbo daa gwan zen to, saba mbo daa gwan hon kɔn̰al ge na ne to, gùwa̰ ma mbo deɗ ge pḭḭ ma zì ya se, kaŋ keeya ge Dok ne ge ɓaŋlaŋ ge no pḭḭ digi ma mbo ba̰a̰le se me. 30Ge sok mbe go, kaŋ ge ngay gwanna ge Van ge Ndu ne, mbo dyan zum kɔn̰al, ge digi zì. Rusu ge suwa pagal ma peɗ mbo ɗege fyal fiyaso ge kirgi ta, àa mbo kuwa Van ge Ndu ne mbe, mbo ya ge pḭḭ ge laaya gutub zì digi, ge pool ge ɓaŋlaŋ, ge pateya ge na ne zì me.#Dan 7.13. 31Sok ge burji mbo sun-na, Dok mbo hoɗ malayka ma na wa go, num mbo ge suwa keŋ ge ndà ma go, kwate na nda ge talla ma, ge pḭḭ wa lee ge ɗu go, mbo aa pḭḭ wa lee gegene yà.

Fare sḭḭ ge fere ne

32Ḛ za̰a̰ fare sḭḭ ge àa kee no ge ɔwara fere pagal. Sok ge ɔwara ɗege ɗufiya, ne dɔgwa ma haɗ pisil, ḛ kuwa kuwa go, ne gyala pul ne, ago mamasege gaa guwa. 33Ḛ sḛ ma waɗme, sok ge ḛ mbo kuwa kaŋ mbe ma ya peɗ keeya ge ḛ ndwa go, ḛ kuwa go, Ndu ge Dok teme ne ya gaa guwa ge gwan-na, dinna ge ndu yan-na mḛḛya zok wa go da̰a̰reya go. 34Fareba mbi jan ḛ ne no: Nda ge doŋ pe mbe go ma mbo suu peɗ to, ge go kaŋ mbe ma peɗ num dee ya keeya. 35Pḭḭ mage suwa mbo kaɗ to, ɗaŋɗe, mbi fare janna ma mbo kaɗ ɗiŋ ge din. 36Kaɗɗa ge fare ge dwam mage ler ne ɗe, ndu a̰me ɗu ge kuwa num to. Koo malayka ge Dok ne ma, koo Mbi sḛ ge Dok teme mbi ya puy, mbi kuwa ne to. Ɗaŋɗe, a Dok ge mbi Ba ɗu ɗeŋew kuwa nee ne. 37Gwanna ge Van ge Ndu ne ya, mbo kaɗ dinna ca ge kaŋ ge kê ge dwam ge Nowe ne ma yà go. 38Ago, ge dwam ge mam yḛḛreya ne ma ndwa zḛḛ, nda duwana ma ka zamma, àa ka njoɗɗa, àa ka kaɗ zok, àa ka san maa van ge soɗob ma gwale, àa ka hon ge gwale ma zok kàɗɗa ɗiŋ ge go dwam ge Nowe waɗ ge faa ga̰a̰l zì mbe dee ya. 39Nda duwana ma be ka pee ta ge fare a̰me pagal to, ɗiŋ ge go mam yḛḛreya dee ya, ne puu kaŋ ge on̰ ma gezi peɗ. Sok ge Van ge Ndu ne gwanna ya mbo kaɗ dinna ca ge ne dwam mbe go. 40Ge sok mbe go, nda soɗob zi mbo kaɗ-ɗa ge gaaso zì, àa mbo hee ɗu, àa n̰a gegene me. 41Nda zaab zi mbo kaɗ-ɗa nan swa ge njal zì dagre, àa mbo hee ɗu, àa n̰a gegene me. 42Ajo̰o̰ ḛ kuwa dwam gwanna ge ḛ Bagezok ne ya to ɗe, ɓyare go ḛ kaa jejew. 43Ḛ kuwa ano mbe kwaɗa, daa go ndu ge zok ge kuwaya go, ler go ga ge ɗaal mbe no zì chala mà mbo ya chel na ɗe, daa mà kaɗ ge na ndwa, n̰a na zok, àa zuɗ ne to me. 44A ge pe no, ḛ sḛ ma waɗme, ḛ kaa jejew. Ago Van ge Ndu ne, mbo mbo ya ge ler ge ḛ dwaɗ ge ne pagal to go.

Ndu ge tèmel ge kwaɗa mage sone

Luk 12.41-48

45Mà kaɗɗa go ndu ge tèmel ge n̰a wa to, gwan kaɗ ndwa ndaa go no, ne ndu ge zok n̰a mà ne ge na zok pagal, ndwa go ne ka vaa na ka̰a̰m ge tèmel ma kaŋ zam, ge dwam ma pagal tetem to de? 46Laa saal go ge ndu ge tèmel mbe pe, dwam gwanna ge ne ndu ge zok ne ya, kaɗɗa na seɗ ne ya tèmel ta keeya mbe go! 47Fareba mbi jan ḛ ne no, mbo ee ne, ne gaa ge kaŋ kwaɗa ge na ne ma wa go peɗ. 48Ɗaŋɗe, kaɗɗa go na ndu ge tèmel ge sone ne, a ge pool dwaɗ na dul wa zì go: Mbi ndu ge zok pagal gale wan go na sok mbe ya wan, 49mà ɗege ya iyal na ka̰a̰m ge tèmel mbe ma, ka an̰n̰a ge kaŋ zam mage buyya ge jin̰al ɓanna ge num mbe ge din gyala ge fereya ma no, 50ne ndu ge zok mbe mà mbo ja tan ne tugcug ge dwam mage ler ge ne sḛ dwaɗ ne pagal to go, 51mbo njaa ne mamaɗ, dol ne ge sok ge nda ge mbuɗi nda ndwa ma njoɗ yal no ne zì, sok ge fiyaso mage kin̰a sulla ma no ne go me.

Currently Selected:

Mata 24: kiaGRB

Highlight

Copy