Luk 9

Temel mboya ge nda ge temeya ge wol pɔgwa zi ma way

Mat 10; Mrk 6.7-13

1Zeso tol na nda ge ame hateya ge wol pɔgwa zi ma ya se, hon num pool mage vin̰a ge on̰om ge sone ma pagal peɗ, vin̰a ge zon nda ge tuguɗi ma me. 2Guwa̰, teme num mbo oy fare ge muluk ge Dok ne mage mbo zon nda ge tuguɗi ma me. 3Jan num go: «Ne kaa ge ḛ he a̰me ɗu ge ḛ tok go ge vin̰a pe to, koo calaŋ, koo galam ge mbo gɔswal, koo kaŋ zam, koo bware saal. Ndu a̰me ɗu ge ḛ buwal zige mbo ge ba̰a̰ zi to me. 4Zok ge diige ge mbo ame ḛ ya, ḛ kaa ge ne diŋ bàba ɗiŋ ḛ dwam waɗ zum go. 5Sok ge diige peɗ ge nda mbo ame ḛ ya to, ḛ n̰a num suwal mbe. Sok waɗ zum ge num suwal mbe diŋ go, ḛ poy ḛ ko kuci#9.5 Poy ko kuci, a ngayya go maa gwan be suwal mbe kuci maa ko ma ta. A wa vḛḛneya ne waɗme. ma ne diŋ, ne kaa kaŋ ngayya ge num ta.» 6Nda ge ame hateya ma ɗege, àa mbo, àa ka zwagre ta ge suwal ge jiyale ma diŋ peɗ oy Fare ge Kwaɗa, àa ka zon tuguɗi ma ge sok ma go peɗ me.

Iigiya ge Heroɗ ne ge Zeso fare pe

Mat 14.1-2; Mrk 6.14-16

7Sok mbe go, fare ge Zeso ne mbe ma peɗ deɗ-ɗa ge Heroɗ, gan ga̰a̰l ge suwa Galile ne tɔgwa zì, iigi digi giliw. Ago nda a̰me ma ka faaya go, ne Yohana ge ka kee nda baptem ta̰a̰ ya ne ge sok swày se ya. 8Ge cùb ma ka janna go, ne Eli ngay tene ne, ge ɗogle ma me ɗe, ne ɗu ge nda ge zwagre Dok wa ge dee suu ya ma, a̰me ge num buwal zige ta̰a̰ ya ne me. 9Ɗaŋɗe, Heroɗ ka ele tene go: Mbi dee vyan Yohana go me ɗaŋ-noo, ndu mbe ge mbi za̰a̰ ne kaŋ keeya sḛ, daa na ne huɗi ne zoo de? Ka ɓyare vin̰a ge na kuwa Zeso mbe mbḛḛ.

Huriya ge Zeso huri nda dudubu nuwan̰ ge kaŋ zam

Mat 14.13-21; Mrk 6.30-44; Yoh 6.1-14

10Sok ge nda ge temeya ma guwa̰ ya Zeso ta, àa wan ne kaŋ ge maa kê ma pe peɗ. Ɔwabe num, gene num gezi yà caɗ ge nda ge ɓase ma, mbo ndwa suwal ga̰a̰l ge àa tol ne Betsayda#9.10 A ge mangaɗam ga̰a̰l Galile lee ge chiya-ge yà, guwa ge Jurdḛ. yà go. 11Ɗaŋɗe, ɓase ma kuwa go num n̰a maa n̰a, àa kàre num pe ya. Zeso ame num, ka faa num fare ge muluk ge Dok ne pagal, zon nda ge tuguɗi ge ka ɓyare go ne zo̰o̰ maa ma waɗme.

12Gyala mbo din din, ne nda ge ame hateya ge wol pɔgwa zi ma gwan ta ya ne ta zì guwa, àa jan ne go: Jin̰a ɓase ma, num mbo ge suwal van mage zok ge no ziya guguwa ma diŋ, ndwa ɓyare sok dwamma mage kaŋ zam. Ago sok ge nè no ne go babur ne. 13Ɗaŋɗe, Zeso jan num go: Ḛ sḛ ma ho̰ num kaŋ zam ɗe. Num sḛ gwan ge ne janna go: I go ge dupḛ ma nuwan̰, sini ma zi bàŋ me ɗe. Mo ɓyare go i mbo yaɗ kaŋ zam ya ge ɓase mbe ge nɔnɔg ma pe de? 14Ago, nda soɗob ge sok mbe go ma, kaa guwa ge dudubu nuwan̰. Sok mbe go, Zeso jan na nda ge ame hateya ma go: Ḛ ee nda ve pul kàɗɗa warnuwan̰ warnuwan̰. 15Àa kee fare ge ne jin̰a maa mbe, àa ee num se kàɗɗa mɔɗwag. 16Zeso ɔwabe dupḛ mbe ge nuwan̰ mage sini mbe ge zi ma, ee na ndwa pḭḭ digi, kee mersi hon Dok, guwa̰ siɗi num se, hon nda ge ame hateya ma num, ndwa go num va ɓase mbe ma num. 17Ndu ge diige zam kaŋ zam huriya, àa ɔwabe kaŋ zam pe ge gaa ma gwal pul wol pɔgwa zi.

Fare ge fareba janna ge Piyer ne

Mat 16.13-28; Mrk 8.27–9.1

18Dwam a̰me go ɗu, Zeso ka kee kaɗeya gezi yà hini caɗ, ne nda ge ame hateya ma mbo ya ge ne ta, ele num go: Ɓase ma jan go zum gyana ge mbi pe de? 19Num sḛ ma gwan ge ne janna go: Nda a̰me ma jan go go, mo Yohana ba ge kee nda baptem ne, gegene ma go, mo Eli ne, ge ɗogle ma me ɗe, mo ɗu ge nda ge zwagre Dok wa ge dee suu ya ma, a̰me ge num buwal zige ta̰a̰ ya ne me. 20Gwan jan num go: O̰o̰, ḛ sḛ ma ɗe, ḛ dwaɗ go mbi huɗi sḛ ne ɗaŋ de? Piyer hee fare, gwan ge ne janna go: Mo Krist, ndu ge Dok taa nee ne. 21Zeso hoɗ num na wa ndaa kaka go, ne kaa ge num jin̰a ndu a̰me fare mbe to. 22Gwan jan num iya go: Mbiya go Mbi, Van ge Ndu ne za̰a̰ yal gḛḛ, Yahuɗ ma ga̰a̰l ge ɗeme num ma, ga̰a̰l ge nda ge kee tuwaleya ma way mage nda ge hate eeya ge Moyiz ne ma kuri ne gezi, ne see swày, ge dwam taa guwa̰ ne ta̰a̰ digi me.

Kaŋ ge mbiya ndu keeya ndwa kàre Zeso pe

23Guwa̰, Zeso jan nda peɗ ge kaa sok mbe go ma go: Kaɗɗa ndu ɓyare mbo ya ge mbi pe go, ne duwa tene to, ne he dṵṵl ge in na kaŋre dwam ma zì mɔɗwag, ne kare mbi pe me. 24Ago, ndu ge diige ge mbo kaɗ-ɗa ka kwacware tene ge ndwa ge na ne, mbo ban ne gezi. Ɗaŋɗe, ndu ge diige ge mbo hon tene ya gezi ge mbi pe, mbo seɗ ndwa ge fareba me. 25Kaɗɗa ndu a̰me seɗ kaŋ gan ge suwa pagal ma ya mɔɗwag ɗoo, ban ndwa ge na ne gezi no, ano mbe mba ne ge da de? 26Ago, ndu a̰me ge mbo ngwabe tene ya, be kee sayda ge ambi, Mbi, Van ge Ndu ne mbo kuri go, ne ge na nee ne to waɗme, ge dwam gwanna ge na ne ya go, ge pateya ge na ne mage na Ba ne zì, ɓanna ge malayka ge harcal ma way waɗme. 27Fareba, mbi jan ḛ ne no, nda ge no ge sego sok mbe go ma, a̰me ge num buwal zige ma mbo suu to, zḛḛ ge go num kuwa Dok kee muluk ge na ne.

Diir eyaya ge Zeso ne

Mat 17.1-9; Mrk 9.2-10; 2Pi 1.16-18

28Deɗ-ɗa go, guwa ge dwam wa gezi zi, ge ne fare janna mbe ma guwa̰, Zeso jan Piyer, Yohana mage Jak ma go num mbo ya, ndee mbo njal pagal digi ndwa kee kaɗeya. 29Sok kee kaɗeya go, ne ndwa mbo ya eyaya, ne ba̰a̰ seŋe saal taɗag ge go gaa seeya cicim. 30Kuwa gale, nda a̰me ma zi dyan ta ne ta sok mbe go, àa ka siɗigi fare ge ne: Nda mbe ma kaa Moyiz mage Eli. 31Àa kaa ge pateya ge mbo no ge Dok ta ya pe se, àa ka faa fare ge ne dwam gɔswal ge suwa pagal go ge ne, ne wa ge mbo huyya ge suwal ga̰a̰l Jerusalem yà. 32Piyer mage na ka̰a̰m ma dol dwam galgatag. Ɗaŋɗe, sok ge àa kore digi go, àa kuwa Zeso seeya kɔn̰al, nda ge zi mbe ma ɓanna ge ne me. 33Guwa̰ ge num mbe ge zi ma ɗege n̰a Zeso go, Piyer jan ne go: Ba ge hateya, a kwaɗa ge nè kaɗ go go, nè ɗùu gur ma taa, ɗu ge mo pe, ɗu ge Moyiz pe, ɗu ge Eli pe me. Ɗaŋɗe, be kuwa fare ge na jan mbe pe go tem to. 34A sok jan na fare mbe go gale, pḭḭ mbo ya kulbi num se gaw. Voo mbo ya wan nda ge ame hateya ma, sok ge àa ba̰a̰ pḭḭ zì go. 35Ka̰a̰l a̰me mbo ge pḭḭ zì ya, jan go: Ndu mbe no a mbi Van ne, mbi taa ne tal, ḛ ke tèmel ne fare janna ma pagal. 36Guwa̰ ge ka̰a̰l mbe fâ fare mbe ma go, Zeso gaa hini ɗu. Nda ge ame hateya mbe ge kuwa kaŋ ge kê ma, koy num maa dul wa ma zì, àa wan ndu a̰me ɗu num pe dwam mbe go to.

Zonna ge Zeso zo̰o̰ van ge no ge on̰om ge sone

Mat 17.14-21; Mrk 1.23-27; 9.14-29

37Dwam ge na kon pagal ge go, Zeso mage na nda ge ame hateya ge taa mbe ma, sok gwan ge njal pagal digi ya se go, nda ɓase nɔnɔg mbo ya seɗ ne. 38Kuwa gale, ge ɓase ma buwal zì ya, ndu a̰me ɗege oyya digi go: Bagezok, mbi kaɗe mo kaɗe, kuwa mbi van a̰se nde, a nee ne ɗu kikiɗ mbi tok go. 39On̰om ge sone a̰me deɗ ne vun go cab, ee ne ka aa na pe, ka pil ne zazan̰, ne wa ka zam hore gigib. On̰om mbe ɗege mbo n̰a ne, kee ne ya go liliɗ. 40Mbi kaɗe mo nda ge ame hateya ma no go num yin̰a ne zum, num pool be mbyaɗ ge yan ne to. 41Zeso gwan jan num go iya: Ḛ mbe ge màno, ge be hoɗ fareba mage kee sone ma! Mbi gaa kaɗ ge ḛ dagre mbo diya ga de? Mbi in ḛ dṵṵl ma mbo diya ga me de? Guwa̰ jan ndu mbe go: Gene mo van ya go go. 42Van gale be yan-na ne ta zì guwa to peɗ, on̰om ge sone mbe dol ne suwa se, ka pil ne zazan̰. Ɗaŋɗe, Zeso ngwabe on̰om mbe, zon van jiyale mbe, hon ne ne ba me. 43Nda peɗ ka kee ajab ge pool ge ɓaŋlaŋ ge Dok ne mbe pe.

Zeso wuwage na swày mage na tanna ge ndwa zi

Mat 17.22-23; Mrk 9.30-32

Nda gale ge sok kee ajab ge kaŋ keeya mbe ge Zeso ne ma pagal peɗ, seŋe tene na nda ge ame hateya ma ta jan num go: 44Kaɗɗa ge ḛ ɗe, ḛ ee ḛ tɔgwa kwaɗa za̰a̰ fare ge mbi ɓyare janna mbe ma no: Àa mbo ɓyan mbi, Van ge Ndu ne ge nda duwana ma tok go. 45Ɗaŋɗe, nda ge ame hateya mbe ma be ka wan fare janna mbe pe to. Dok way num fare mbe way ndwa go num wa̰a̰ ne pe to. Àa ka chiya voo ge ele ne fare ge fare mbe pagal me.

Ndu ge waɗe ga̰a̰l ge nda ge ame hateya ma buwal zì

Mat 18.1-7; Mrk 9.33-42

46Ago, nda ge ame hateya ma ka ele ta go, ne huɗi sḛ mbiya kaɗ ga̰a̰l ne maa buwal zì de. 47Ajo̰o̰ Zeso kuwa num dwaɗɗa mbe ma ya sok, wan van jiyale a̰me ɗu, ee ne na ziya guwa, 48jan num go: Ndu ge diige, ge mbo ame ndu ge hoɗegeya a̰me ya ɗu dinna ge van jiyale mbe no go ge na diŋ, ge mbi pe, ago ame mbi sḛ ge mbi pagal. Ndu ge ame mbi sḛ ya me ɗe, ame Ndu ge teme mbi ya me. Ago, ndu ge fare a̰me pe to ge ḛ buwal zì peɗ, a ndu mbe ga̰a̰l ne.

49Guwa̰ Yohana jan Zeso go: Ba ge hateya, i kuwa ndu a̰me ɗu ka yan on̰om ge sone ma ge mo dḭḭl. I ɓyare no go i tele ne, ge dape kàre mo pe ge mojo̰o̰ i go to. 50Zeso gwan ge ne janna go: Ḛ daa gwan tele ne to, ago ndu ge sal tèmel ge ḛ kee to, a ge ḛ pe go.

Zeso ge dwaɗɗa ge mbo Jerusalem

51Ɗeɗ-ɗa go, dwam ge àa hee Zeso mbo pḭḭ zì terse ja zì, vin tene go ne kaa yal daa puy na mbo Jerusalem. 52Teme nda ge vin̰a ma ge na ndwa zḛḛ yà. Num sḛ mbe ma kan ta ge vin̰a go mboya, àa mbo waɗ ge suwal ge jiyale a̰me ge no suwa ge Samari ne go diŋ, ndwa nuusi sok ge ne wa dwam go. 53Ɗaŋɗe, àa vin ame#9.53 Àa vḭḭ ame ne to ge dape, ka mbo Jerusalem, ngay go ne Yahuɗ ne. Ago, Yahuɗ mage nda ge suwa Samari go ge ma za̰a̰ ta to. ne to, ge dape, ka kale mbo suwal ga̰a̰l Jerusalem. 54Sok ge nda ge ame hateya ge zi ma, Jak mage Yohana za̰a̰ fare mbe go, àa jan Zeso go: Bagezok-goo, Mo vin vin go i ho̰ i wa go ol mbo ge pḭḭ ziya burmi num gezi de? 55Seŋe tene ge num ta, mḛḛre num ol kekeŋ, jan num go: [Ḛ kuwa on̰om ge ee ḛ jan ano mbe no kuwa ɗer ɓade? 56Ago, Van ge Ndu ne mbo ya ndwa ban ndwa ge nda duwana ma way gezi to, ɗaŋɗe, ndwa mon num.] Guwa̰, àa kan ta mbo suwal ge jiyale a̰me ge ɗogle yà.

Mat 8.19-22

57Àa vin̰a zì gale, ndu a̰me ɗu zuɗ-ɗa, jan Zeso go: Mbi mbo kàre mo pe sok ma peɗ ge mo mbo mbo ya go. 58Zeso jan ne go: Bole ma ge maa tàal ma, njoole ge pḭḭ zige ma ge maa zok ma, ɗaŋɗe, Mbi, Van ge Ndu ne be sok a̰me ge paa na pagal go. 59Gwan jan ndu a̰me ge ɗogle go: Nè ɓa̰a̰ mboya dagre. Ndu mbe gwan ge ne janna go: Ho̰ mbi vin̰a, mbi gale mbuu mbi ba ɓiya. 60Ɗaŋɗe, Zeso jan ne go: N̰a nda ge suu suu paŋ ma mbul maa swày ma, ɗaŋɗe, mbo, mo mbo jan nda duwana ma vare zoo go, Dok kee muluk go. 61Ndu a̰me ge ɗogle ɗu jan ne go: Mbi mbo dagre ge mo Bagezok, ɗaŋɗe, ho̰ mbi vin̰a ge mbo san mbi zok wa guy. 62Zeso gwan ge ne janna go: Ndu ge ɗege gaa kaŋ ge chari, ka seŋe tene ndil sok na guwa̰ go, mbaa a̰me ge tèmel ge muluk ge Dok ne pe to.

Currently Selected:

Luk 9: kiaGRB

Highlight

Copy