Luk 4

Pe heeya ge Zeso ne

Mat 4.1-11; Mrk 1.12-13

1Guwa̰ ge Zeso biri ge On̰om ge Harcal go, ɗege ge mangaɗam ga̰a̰l Urdun wa ya, On̰om ge Dok ne mbe gene ne ɗiŋ ge babur pul yà. 2Ge sok mbe go, Ba ge ho̰o̰l hee ne pe ɗiŋ dwam warndà. Ge dwam mbe ma pul zì, be zam a̰me to, num wa aaya go, camal wan ne. 3Sok mbe go Ba ge ho̰o̰l jan ne go: Kaɗɗa go fareba mo Dok Van ne, ho njal mbe mo wa go ne seŋe kaŋ zam. 4Zeso gwan ge ne janna go: Njaŋeya ge Dok ne jan go: «A be kaŋ zam ɗeŋew mbo ee ndu duwana kaɗ ge ndwa ne to.»#Dwa 8.3. 5Ba ge ho̰o̰l gene ne ge sok ge haal waɗeya digi ya, baŋ go velgeteg ngay ne muluk ge dunin̰a ne ma peɗ. 6-7Ba ge ho̰o̰l mbe jan ne go: Kaɗɗa mo guu mo ko ya mbi ndwa se, mbi mà hon mo pool mage kaŋ kwaɗa ge muluk mbe ma way ma no peɗ. Àa mbo gaa amo ma ge ɓul mɔɗwag. Ago àa ho̰ num mbi, mbi ge pool hon ne ndu ge diige ge mbi laa ɓyare hon ne ne. 8Zeso gwan ne janna go: «Àa njaŋe go: “Mo mbo uware Bagezok, Dok ge amo, mo mbo kee ne sḛ ɗu kikiɗ tèmel.”»#Dwa 6.13. 9Guwa̰, Ba ge ho̰o̰l gene ne ge suwal ga̰a̰l Jerusalem yà iya, ee ne ge zok ge Dok ne sok a̰me ge haal waɗeya pagal digi, jan ne go: Kaɗɗa go fareba mo Dok Van ne, doo tene ge digi ya se, 10ago Njaŋeya ge Dok ne jan go: «Mbo hoɗ na malayka ma na wa ge mo pe go, num cage mo. 11Àa mbo wan mo ge maa tok digi caɗ, ge go mo ko chiya ge njal sok van a̰me ta to.»#Mkm 91.11-12. 12Zeso gwan ne janna go: Njaŋeya ge Dok ne jan zì go: «Mo mbo hee Bagezok, Dok ge amo pe to.»#Dwa 6.16. 13Guwa̰ ge Ba ge ho̰o̰l aa na zwam ge hee Zeso pe ma go peɗ, ɔwabe tene ge ne ta ndwa da̰a̰re vin̰a a̰me ge ɗogle.

Tèmel keeya ge Zeso ne ge Galile go

14Zeso gwan-na ge Galile go, ge pool ge On̰om ge Dok ne mbe ge ka ɗeme ne ta, ne dḭḭl mbo ya faa ge suwa mbe go mɔɗwag. 15Ka hate nda Fare ge Kwaɗa, ge zok kee kaɗeya ge Yahuɗ ma way ma zì, nda peɗ ka dore ne.

16Mbo ge Nazareɗ yà, ge sok ge na wuwa ne go. Ge mojo̰o̰ na ha̰a̰le keeya ge dwam sabaɗ ma go go, waɗ ge zok kee kaɗeya ge Yahuɗ ma way zì, ɗege digi ndwa isi nda maktub ge Dok ne. 17Àa hon ne maktub ge ndu ge zwagre Dok wa Ezay ne. Hage ne se, seɗ sok ge na ɓyare ne ge njaŋe no zì go:

18«On̰om ge Bagezok ne ge mbi pagal,

Ge dape a ne sḛ taa mbi ne

[Ndwa zon nda ge dul wa vḛḛne ma]

Ndwa faa Fare ge Kwaɗa ge nda ge a̰se ma ta;

Teme mbi ya ndwa oy fare ge zuuya ne,

Ge num ge àa wan num moor ma ta,

Ee ɓaal ma kuwa sok me.

Haɗ nda ge àa njon̰ num ge yal ma suli,

19Ndwa wuwage nda go del mbe no,

Bagezok Dok ngay kuwa a̰se ge na ne

Ge nda duwana ma ta.»#Eza 61.1-2.

20Guwa̰, Zeso dibi maktub digi, gwan ge ne hon ndu ge tèmel, kaɗ se ndwa hate kaŋ. Nda peɗ ge zok kee kaɗeya ge Yahuɗ ma way zì ma ndwa kaɗ-ɗa ge ne ta. 21Sok mbe go ɗege jan num go: Fare janna mbe ge Njaŋeya ge Dok ne jin̰a num, ge ḛ za̰a̰ num no ma, wa huy mà ne. 22Nda mbo ya haɗ digi go giliw, àa ka kee ajab ge fare ge ngay kwaɗa keeya ge Dok ne ge ka ndage ge ne wa zì ma pe. Àa ka ele ta go: Daa be Jozef van ne to de? 23Zeso jan num go: Mbi ge kuwaya go, ḛ mà mbo isi mbi fare sḭḭ ge jan go: Ba ge zon nda, ee pe zon sḛ tene. Kaŋ ge i za̰a̰ go mo kê num ge Kapernawom go ma peɗ, ke num mbe go ca mo suwal diŋ go waɗme. 24Guwa̰ jan num go iya: Fareba, mbi jan ḛ waŋ go, ndu ge zwagre Dok wa a̰me ge àa ame ne kwaɗa ge na suwal diŋ ɗu to. 25Mbi jan ḛ ne gezi kɔn̰al, a fare ge fareba ne, ge zaman ge ndu ge zwagre Dok wa Eli ne go, sok ge pḭḭ kuri be suwa mam, del taa ge saba menengal, camal baktar deɗ ge suwa pagal peɗ, kumu ma kaa gḛḛ ge suwa ge Izrayel ne pagal, 26go no puy ɗe, Dok be teme Eli ge gwale kumu a̰me ge maa suwa go ge ta ɗu to, ɗaŋɗe, ge gwale kumu ge Sarepta ne ta yà ɗeŋew, ge suwa ge Sido̰ ne go. 27Nda ge kṵṵ swàm ma kaa gḛḛ ge suwa ge Izrayel ne pagal ge zaman ge ndu ge zwagre Dok wa Elize ne go, ano puy ɗe, a̰me ɗu ge num buwal zige, be seɗ zonna ndwa haɗ kɔn̰al to, ɗaŋɗe, kaa Naama̰, ndu ge suwa ge Siri ne ɗeŋew see zonna ne.

28Sok ge nda ge kaa zok kee kaɗeya ge Yahuɗ ma way zì ma za̰a̰ Zeso fare janna mbe ma go, laa hoɗɗa waɗe num pool. 29Àa ɗege digi mɔɗwag, àa yan ne ge suwal ga̰a̰l diŋ ya zum, àa gene ne ge njal ge àa sḭḭ maa suwal no ne pagal digi, ndwa ɓyan ne ge digi ya se. 30Ɗaŋɗe, kaɗɗa ge ne sḛ ɗe, ɓû ge num buwal zì ya no, mbo na mboya no.

Pool ge Zeso fare janna ma way

31Guwa̰, mbo ge suwal ga̰a̰l Kapernawom ge no suwa ge Galile ne go yà, ka hate nda ge zok kee kaɗeya ge Yahuɗ ma way zì, ge dwam sabaɗ ma go. 32Àa ka kee ajab ge hateya ge ne ne mbe ma pe, ago ka hate ge pool ge Dok hon na ne. 33Ge zok kee kaɗeya ge Yahuɗ ma way mbe zì, ndu a̰me ɗu kaa ge on̰om ge sone na zì, ka oyya digi ge ka̰a̰l ndaal: 34Mo! Zeso ge suwal Nazareɗ ne, Mo ɓyare da ge i ta de? Mo mbo ya ndwa ban i gezi de? Mbi kuwa mo kuwa tyatyaɗ, Mo Ndu ge Harcal ge Dok teme ne ya ne. 35Zeso ngwabe ne, jan ne go: Zane mo wa, wuwa zum ge ndu mbe zì. On̰om ge sone mbe dol ne nda buwal zì ɗaɗar, waɗ-ɗa zum ge ne zì, ɗaŋɗe, kee ne a̰me to. 36Voo mbo ya wan nda ge kaa sok mbe go ma peɗ, àa ka ele ta ta buwal zì go: Ḛ gale ndi fare ma ɗoo me! Hoɗ on̰om ge sone ma na wa ge pool, àa ka waɗ zum ba! 37Sok mbe go, ne dḭḭl mbo ya dasare ge suwal ge no Kapernawom ziya ma go peɗ.

Zonna ge nda ge tuguɗi ma way

38Sok ge Zeso ɗege ge zok kee kaɗeya ge Yahuɗ ma way zì ya, mbo ge Simo̰ yà. Mbɔgwam dol ne tisi ge gwale ya se, àa mbo ya kaɗe Zeso ne ke a̰me ge ne pe. 39Hugi ya ne ta se, ngwabe mbɔgwam, mbɔgwam jay ge ne ta. Ge sok mbe go gaw, ɗege digi kee kaŋ zam ge num pe.

40Guwa̰ ge gyala dḭḭ se#4.40 Àa da̰a̰re gyala dḭḭ se go, dwam mbe go a dwam sabaɗ ne, dwam sabaɗ kale gezi yà kale. Ago Yahuɗ ma ee pe isi dwam ge ɗogle ge gyala dinna go. go, àa gene nda ge tuguɗi ma ya Zeso ta, num ge ka njoɗ yal ge tuguɗi ma pe hini-hini ma. Ee na tok ma ge num pagal ɗu ɗu peɗ, ka zon num me. 41On̰om ge sone ma ka waɗ lee gḛḛ, ge num ge tuguɗi ma buwal zige ma zì ya zum waɗme, àa ka oyya go: Mo Dok Van ne. Ɗaŋɗe, sok ngwabe num go, be ka n̰a num vin̰a jan fare to, ge dape, àa kuwa kuwa go ne Krist, ndu ge Dok taa nee ne.

Zeso oy fare ge zok kee kaɗeyage Yahuɗ ma way ma zì

42Zeso n̰a sok ya ɓaaya gezi, waɗ zum ge suwal diŋ, mbo ge sok babur a̰me, ge kṵwa̰ no go to yà. Ɓase ma ɗege ɓyare ne pe, àa deɗ-ɗa ge ne ta, àa ɓyare vin̰a go ne gaa maa ta, ne daa gwan n̰a maa to. 43Ɗaŋɗe, jan num go: Ɓyare go mbi oy Fare ge Kwaɗa ge muluk ge Dok ne pe, ge suwal ga̰a̰l gegene ma diŋ waɗme. A ge ano mbe no pe Dok teme mbi ya no. 44Ɗege hate Fare ge Kwaɗa mbe ge zok kee kaɗeya ge Yahuɗ ma way ge no suwa ge Galile go ge ma zì.

Currently Selected:

Luk 4: kiaGRB

Highlight

Copy